Yohanes 8

Mali nengdi tali nyangami ner tep, Yesusdi pepu upu

1Sun aneng yuma, sun ati yuk-yuk tamupra bei dinin, Yesus er tenpuda, mutu si Zaitun#8:1 Zaitun perami ngeda, ada co du si tep perami. Amutu deikida, zaitun co mouramu co weik kouamya tep, amutu sida Zaitun mutu perami. mutu deiki welepu. 2Mapmaiya berekyopda, kange di ton cap Yerusalem mutu beu. Beudi, Allah er gispal dona cap, er si eremna cap, tonda Allah er tep karerami ati dinin, akati dam bura tara, Yahudi yala gum nesala bulupra wengamyai bena buku. Bukupa, sun awekmai nesaladi, ‘Er upu gekepkup’ tenen, bulupra bukmaipa, erdi aupu gonga kepra peteremau.

3Yesusdi peteremau taruda, Allahdi, ‘Ukunkamrume, angeda men kunkamrume,’ peipupa, Musadi sekeiamu mem upu peteremna deiyo neng cap, sun Farisi neng cap, tenpu ner dopra, Yesus damai duyai. Anerda, nimi konum domu dinin, yuk ngebo cap tali upula nyakdareipa, yuk neng kael kepidi, aner tomopra dopra duyai. Duyaidi, abulupmai nesala sun urasin tara, “Acapu teko,” pepipa, anerdi aweka dinmai nesala damai teku.

4Ukupupa, sun Yahudi yala deiyo nengdi Yesus tep upepi. “Peteremna ngebo, anerda, nimi konum domu dinin, yuk ngebo cap upula nyakdareipa, yuk neng kael kepmangua tep, aner tomopmape. 5Musadi sekamseu mem upu neitamaida, aner kupmautopu kunge nerapu yuma tep, upepu. ‘Gel dopra sun nong deiki doprumdi, potamkamrume,’ pepra sekamseu. Musadi, upepseu dinin, kan puda, ware tenepmaremdi, pepkuserem do?” pepra mawa di asipetepi. 6Uda, anengdi Yesus tep aupu pepra asipetepmaiya deiyoda, ‘Mali upu peptupa, er tep, “Kanda mali kupmareme,” pepra, er nong deiki mali upu pepra deiptepepa, nesala yuma kael kepkung’ tenen, asipetepi.

Utenepra asipetepi dinin, Yesusdi er nong geipdongopudi, kalkal pemu tu akwamnga neitamai di, er buru du di upu sekra deipu. 7Upu sengmaupa, sun anengdi tupa-tupa asimnapu kunmaipane, Yesus tekrapudi, aneng tep pepu. “Sun atekmarum neng kankan, mali keca tenpunge peda men kure ngebo akaptuopda, angebodi aner nong deiki gonga kepra, menmena gel doptudi poptue,” pepu. 8Upepu dingeda, kange di ton cap, er nong geipdongopudi, kalkal pemu tu kamnga neitamai di upu sengmau.

9Aupu pepupa, anesala yuma gekepmaidi, sun yuma, ‘Uo, ware kuptepe do?’ tenen, ali kupupa, tenpu-tenpu yuk-yuk bendopi. Ada, sun wisi neng menmena beipa, aneng yuma tenpu-tenpu yuk-yuk banmaiyanen, siryada Yesus cap, atekmau ner cap, sun butenepu tapipa, aca kunmarei. 10Yesus tekrapudi, aner tep asipetepu. “Ka nero, aneng yumada, dan mutu benmang do? Sun kan-kan di, tenpu ngebo peda, ‘Anerda mali kun ner cadi, nun yumadi popmeko,’ pepra upu men bokeipmaker do?” pepra asipetepu. 11Asipetepupa, anerdi, “Gume, naio, sundi aupu men pepmanenge,” pepu. Upepupa, Yesusdi pepu. “Atep ne peda utopu aupu men pepkukene. Ukutaruda, kan mali kumem keca yuma tapra, dumsisipu kunkamrume,” pepu.

Yesusdi, “Ne nai boda Allah tenpu kurure,” pepu upu

12Amenda taruda, Yesusdi amutu nesala tep upepu. “Neda, tuai mutu ban-ban yuma kunge nesala tep, dirin deiyo ngebo kunune. Ne pesene upu gekepredi, talepra dombare ngeboda, kunungnai pio men kunkamre. Ange gum dinin, gam kuna deiyo dirinda, er dipruai kunkamre.” Yesusdi pepu.

13Upepupa, sun Farisi nengdi, ‘Mok upupu pepsere’ tenen, yu kupupa, upepi. “Gume, kan pedipapu, kan pe tep ‘Ne akunune, ne kune kecada ake,’ pepra, kan pe sipu ereipdanmarum dinino, kandi peserem upuda, tek upu gume. Tali upupu pesereme,” pepi. 14Upepi pangeda, Yesusdi sun yuma tep pepu.

Gume, menop taru ne mutu sisa di yanamsi mutu cap, ne amenda taru benkamne mutu cap, ne kael keamsa tep, ne pedi ne pe tep pu, ne si ereipdatenya peda, ne pesenun upuda, tek sisipu kurure. Dinino, sun Farisi nengpuda, ne yanamsi mutu sisa cap, ne amenda taru benkamne mutu cap, sun pio walwale.

15Sunda tali nimi kange tenepmenga deiki dipu, nong bol deiki kecapu tenepra upu bongdirume. Nedi nimi yuma tep, wenepra upu kapul men bongdinune. 16Dinino, ne yukpu men kununa cadi, nedi nimi tep wenepnedi, upu bokeiptenya peda, tek sisi upupu pepsetene. Ne yuk men kunun dinin, ne dokotepneu ngebo, ne nai bo Allah cap kikiman kunume.

17Sun ton tenipetepso. Musa sekamupa, sundi pio talerum upu, mem upu neitamaida, aupu akapmare. Ada, “Nimi butene nengdi, amsetopu kupra, ‘Nundi akeca epra akuputopu pepseneme,’ peprengopda, aupuda tek tenenkamrume,” pepra sekeiamseu. 18“Atep ne pepsene. Tenpu ngebo tep nengeda, nedi ne pe tep aupu pepsene. Butene ngeboda, ne dokotepneu ngebo Allahdi ne tep upu peserure.” Yesusdi Farisi neng tep pepu.

19Upepupa, sun Farisi nengdi Yesus tep tamupra asipetepi. “Kan nai boda, dan mutu kurur do?” pepra asipetepi. Asipetepipa, Yesusdi tamupra, “Sunda ne cap, ne nai bo cap tep, pio men kael keamrume. Ne tep, ‘Angebo ake’ tenen, moupra kael kepnetum teptoda, adeiki di, ‘E, er nai bo sisa ake’ tenen, kael keptume. Dinino, ne cap, ne nai bo cap tep, moupra men kael keamrume,” Yesusdi pepu.

20Yesusdi sun Farisi neng tep aupu pepu taruda, ada Yahudi yala nengdi, Allah er si eremami ati dam dinin, Allah er gispal dona tep, telep keca deriramya damai di pepu. Katuaipu pepu dinin, Allahdi Yesus tep, ‘Popkami taru ake,’ teneamu taru kapul men kupka cadi, aneng yumadi Yesus tep, ‘Tomopra poptepe’ tenen, tenipetepi dinin, men tomopi.

21Ton taruda, Yesusdi sun Yahudi yala neng tep upepu. “Amenda taru amutu tapra, yuk mutu konum benyopda, sundi ne tep, ‘Dan benmar do?’ tenen, er petenkamnerum dinin, men epkamnerume. Sun mali kurum keca neitamai dipu depkamrume. Ne benkamne mutuda, sun ton men yatuma cadi, tek sisi men yankamrume.” Yesusdi pepu. 22Upepka deiki di, sun Yahudi yala deiyo nengdi, pepi. “Ange dano? Er pedi popdankamara tep, ‘Ne benkamne mutuda, sun men yatume,’ pepmaser do? Yuk deiyo tep, aupu pepmaser do?” pepra asipetepdaidi, kange bongtonapu kunmau.

23Anengdi, ‘Deiyo ake’ tenen, moupra men tenenmai dinin, Yesusdi aupu ton dukdongopra pepu. “Sunda, tuai mutu neitamai dipu deipseipa, kurume. Dinino, neda im deiki tara di yasi. Sunda tali tuai mutu nesala kurum dinin, neda tali tuai mutu ngebo men kunune. 24Arupda nedi sun tep, ‘Sun mali kurum keca neitamai dipu depkamrume,’ pepmasene. Ton cap aupu ton pepsene. Nedi sun tep, ‘Ne akunune,’ pepra, ne pe tep lap pesene upu gekepmumdi, teka men tenepnerumyopda, tek sisi sun mali kuruma keca neitamai dipu depkamrume.” Yesusdi Yahudi deiyo neng tep pepu.

25Upepupa, sundi tamupra Yesus tep, “Kanda ware ngebo kurem do?” pepra asipetepipa, Yesusdi upepu. “Gume. Ne upu gonga kepra peteremamsi taru di dipra, ataru neitamai yumada, ‘Ne akunune,’ peamsisitopu kunune. Yuk gume. 26Sun mali kurum nesala tep nengeda, upu weika di pepsenedi, wenepra upu bokeipkamsene. Ne dokotepneu ngeboda, er upu peretopu, ayuma tek sisi kurure. Tali upu men pertamrure. Erdi peamneu upu yumada, nedi sun tep aupupu pesenune.” Yesusdi pepu.

27Yesusdi upepupa, sun Yahudi yala deiyo nengdi, ‘E, er nai bo Allah tep, aupu pepmasere’ tenen, moupra men kael kepi. 28Atep Yesusdi sun tep upepu. “Sundi Nimi Mi Sisa Utopu Ngebo dopra, sengdin co deiki ereipmumyopda, ne tep moupra kael kepkamnerume.

Tonda, nedi sun tep, ‘Ne kange dipapu pel men donune. Tonda, ne nai bodi penere upupu dopra pesenune.’ Aupu pesenun ngeda, amenda kael kepkamnerume. 29Tonda aupu pepsene. Ne dokotepneu ngeboda, er cap, ne cap tupa kikiman kunume. Yuma taru yuma, nedi er kange derirur kecapu pel donuna cadi, ne naidi men tamnerura tep, ne yuk men kunune.” Yesusdi pepu. 30Aupu penmau taru dipapu, nimi weika di er upu gekenmaidi, adipapu er tep teka tenepi.

Yesusdi, “Ne nyapu sisada, ne upu moupra talepmengedi, dombanunge,” pepu upu

31Ton Yahudi yala nengdi Yesus tep teka tenepi. Aneng tep Yesusdi aupu pepu. “Nedi peteremsene upu gekepmumdi, moupra talepmumdi, pio dombamumyopda, ne nyapu sisa kurume. Ange men kuprumyopda, gume, pepsene. 32Apepmantopu kupmumyopda, ‘Tek sisi upu, deiyonge ake’ tenen, moupra kael kemkamrume. Kael kepmumyopda, atek sisi upu talepra dombamumnya deiki di, sun mali kumumnya neitamai di loptapsenyopda, dumsisipu kunkamrume.” Yesusdi pepu.

33Upepupa, sun Yahudi yala deiyo nesaladi, Yesus tep tamupra pepi. “Gume, nun apu bo Abrahamdi deipupa, dadeipdanen yakarami nengdi deipseiya tep, Abraham er nyapu kunupe. Yuk nengdi nun tep, co bo deiki kunupseidi,#8:33 kunupsei Pumun taruda, isomka nengdi, pio kankan kurami nesala tep, co bo deiki di kunuamipa, akankan nesaladi, sun isomka nesala tep, sun pel talipu pel dorami. Tonda, lap pena upuda, nomor 36 dirume. men talesenunga cadi, kanda ware keca deiyo tep, ‘Loptapsenyopda, teleppu kunkamrume,’ pepmaserem do?” pepi. 34Upepipa, Yesusdi aneng tep tamupra pepu.

Nedi tek sisi upupu pepsene. Ware nesala do yuma, tupa-tupa mali kunge nesala yumada, sun mali kun keca deiki di, sun pe tep talepya ateng koudongona utopu kununge. Tupa malipu kununga tep, men lotamdanunge. 35Ukupmanto upu ton pepkusene. Nimi sun pedi derinung nyapu tep, ‘Anyapuda, tek sisi nun nyapu sisa kununge’ tenen, pio kikimanpu kunkamenge.

Dinino, nimidi yuk neng tep, ‘Nun pel donkamseng’ tenen, co bo deiki dipu kunupmengedi, pel dimenge nesala tep nengeda, ‘Nun nyapu sisa kununge,’ men tenenunga cadi, anesala cap ke tarupu kikiman kununge.

36Ange tep nengeda, Allah er Mi Sisa lyepseredi, sun mali kumumnya neitamai di loptapseryopda, tek sisi kange deipra teleppu kunkamrume. 37Ne kaele, sunda Abraham er nyapu kurume. Erda sun apu bo kurure. Dinino, sundi ne tep, ‘Angeboda nun song cadi, popkamepe’ tenen, konum ketenepra dinerume. Deiyoda, ne peteremsene upuda, ‘Nun songe. Aupuda teka men tenenkamepe’ tenen, sun dipru gat nesala kuruma tep pepsene. 38Nedi sun tep pesene upu yumada, ne nai damai kurepa, diramsi keca cap, gekeramsi upu cap dopra pesenune. Sunpuda, sun nai bodi peamu upu gekeramrumdi, kurume. Yesusdi aYahudi yala deiyo neng tep pepu.

39Upepupnen, sundi tamupra, “Gume, nun apu boda Abraham kuserure,” pepi. Upepipa, Yesusdi, “Gume, Abraham er nyapu tek sisi kutumopda, Abrahamdi telep kupra kuramutopu kutum dinin, ange men kurume. 40Abraham kuramutopu gum dinin, sundi ne tep, ‘Angebo tek sisi popkamepe’ tenen, konum keteneipmanerume. Allahdi peamneu upu yuma, sun tep peteremsenun dinin, sundi ‘Er popkupe,’ tenenerume. Abrahamdi akeca utopu keca pio men kuramu. 41Dinino, sunda sun nai bo sisa di kure kecapu, angepu tupa kurume.” Yesusdi pepu.

Upepupa, sundi, “E, nunda tali nyangdangedi, deritamenge nyapu utopu men kunupe. Tek sisi nun nai bo sisada, Allah erpu kuserure. Yuk ngeboda, nun nai men kuserure,” pepi. 42Upepipa Yesusdi, “Ne kange dipapu tuai mutu men yasi. Ange gum dinin, Allahdi dokotepneupa, tuai mutu yasa tep, Allahda sun nai bo sisa kutuopda, sundi ne tep teka tenepra sun kange dipru ne deikipu deipnetume,” pepu.

Yesusdi, Yahudi yala deiyo neng tep, “Sunda Kain Jen Ngebo, er nyapu kurume,” pepra wenepu upu

43Yesusdi aupu pepu dingeda, aupu ton cap dukdongopra pepu.

Nedi ne peteremsene upu yumada, amul deiki dipu gekertamrumdi, ‘Deiyo ake’ tenen, moupra men kael kemrum ngeda, deiyo tenepmarum do? Deiyo pepkusene, ada nedi pesene upu, moupra men gekepmanto nesalapu kuruma tep, ‘Deiyo ake’ tenen, pio men kael kemrume. 44Sun nai bo Kain Jen Ngebodi,#8:44 Kain Jen Ngebo penup ngeboda, Yahudi yala nesala, sun upu deiki di Setan perami. Yahudi yala nesalada, sun Ibrani upu deiki di, Setan perami upu deiyoda, Nimi Pon Ngebo, perami. Tonda, Setan upu deiyoda, “Minina Upu Pen Ngebo kurure,” perami. Tonda, ‘Luludina Upu Pena Deiyo Ngebo kurure’ tenen, aupu perami. Tonda, lap pena upu nomor 13 dinkurume. sun kange dipru taleserepa, erdi kange derirur kecapu mali kurume. Allahdi akeca-keca yuma ketekepra deipu taru di dipra, aneitam taru yumada, Kain Jen Ngebo er dipru neitamaida, tek sisi keca tenpu peda men kuramudi, tupa men kurura tep, Kain Jen Ngebo erda nimi potamna ngebopu kurure. Erdi mok upu pere taruda, er mutu sisa upupu perure. Kain Jen Ngeboda, mok upu gonga kepra pen deiyo ngebo kurura cadi, mok upupu pio perure.

45Dinino ne Yesusdi, sun tep tek sisi upu pesenuna cadi, sundi aupu tep teka men tenenerume. 46Sun kan-kan neitamai ware ngebo tek sisi upu peptudi, ‘Yesus mali kupu keca epsada ake-ake,’ pepra wenepnetu do? Pio gum cadi, nedi sun tep tek sisi upupu pesenun dinino, warya deiyo tep teka men tenenerum do? 47Deiyo pepkusene. Ada, Allahdi sun kange dipru men taleserepa, er nyapu men kuruma cadi, nedi pesene upu gekeprumdi, teka men tenerume. Dinino, ware nesala do yuma, Allahdi sun kange dipru talerepa, er nyapu kunge nesala yumadi, Allah pere upu gekengedi, ‘Deiyo ake,’ tenen, moupra tenengedi, talenunge. Yesusdi sun Yahudi yala deiyo neng tep pepu.

Yesusdi, ‘Aneng kael kepkamneng’ tenen, erdi er pe tep, lap pepu upu

48Yesusdi aupu yuma pepmaupa, sun Yahudi yala deiyo nengdi er tep, yu kupupa, aupu tamupra pepi. “Gume, nundi kan tep, ‘Angeboda, pio mali mutu ngebo. Samaria mutu ngebo kurepa, isok-isokdi er kange dipru yuma talenunge,’ pekenupada, tek pekenupe,” pepi. 49Upepipa, Yesusdi tamupra, “Isok-isokdi ne kange dipru men talenenunge. Ange pio gum dinin, ne kune keca deiki di ne nai bo tep, gispal donune. Dinino, sundi ne tep mali upu pepra, ne nong deiki derinerume.

50Nedi ne pe tep, ‘Nimi yumadi ne si eremkamneng’ tenen, men eremdidanune. Dinino, akeca-keca yuma tep upu bongdina deiyo ngebodi, ‘Nesala yumadi Yesus tep, gispal dopra er si eremkamenge,’ teneredi, pel dorure. 51Tonda aupu tek sisipu pepsene. Ware nesala do yuma, ne pesene upu teka tenepmengedi, pio talepra dombange nesala yumada, sun nong depmenga peda, pio gampu kunkamenge,” Yesusdi pepu.

52Upepupa, sun Yahudi yala deiyo nengdi Yesus tep, tamupra pepi. “Ukuda konuma. Apepmaserema deiki di, konum katuai kupserepa, kael kepmepe. Isok-isokdi tek sisi kan kange dipru talekengepa, kurume. Uda, nun kaele. Nun apu bo Abraham cap, Allah er upu lap perami neng, nabi neng pe cap dakuramyanen, amenda taru konum deami. Sun yuma deami dinino, kandi, ‘Ne upu teka tenepra dombange nesalada, pio gam kunkamenge’ pepsereme.

53Kan dano? ‘Abrahamda yambul mambul dinino, nepuda ila mambul ngebo,’ tenepdanmaremdi, pepserem do? Abraham pe, Allah er upu lap perami neng, nabi neng peda, aneng yuma deami dinino, kanda wareto ngebo tenepdaremdi, pepserem do? ‘Neda ila mambul ngebo,’ tenepdanmaremdi, pepserem be?” pepra, Yesus tep yu kupupa, wenepi. 54Upepipa, Yesusdi pepu.

Ne kange dipapu, ne pe tep erepra deipdatenya peda, angeda nong men kuptue. Talipu kuptu. Dinino, sundi, “Nun nai bo Allah erpu kurure,” perum ngebo, tek sisi Allahdi ne tep, “Erda mambul weike,” pepra eremdinerure. 55Sundi Allah tep tek sisi men kael kemrumdi, er cap dipru dukdongopra men kurum dinin, nepuda Allah tek sisi kael ngebo kunune. Nun kikiman kunume. Nedi, “Allah ne walwale, kapul men kael kepne,” peptenya peda, aupu tek sisi men kuptu.

Aupu pepnyopda, sunda mok upu pen nesala kurumtopu kutene. Dinino, aupu men penkamne. Allahda ne tek sisi kael kemnune. Er upu yuma talepra pio dumsisipu kunune. 56Sun apu bo Abrahamdi, ‘Angebo amenda taru yankamre’ teneamudi, kange deipra kuramnganen, yasi taruda epudi, ila di kange deipu, pepsene. Yesusdi pepu.

57Upepupnen, sun Yahudi yala deiyo nengdi pepi. “Uo, kanda keteng tamun denge weik 50 tahun kupra wisi kapul deipkeu dinin, kandi, ‘Abraham epsi,’ pepmaseremada, warya tep do? Tali upupu pepmasereme,” pepi. 58Upepipa, Yesusdi pepu. “Gume, pio tek sisi upu deiki di pepmasene. Abraham kapul men deiami taruda, ne konum kuramsi. Pio kurur ngeboda ne ca,” pepu. 59Yesusdi aupu pepka deiki di, sun Yahudi yala nengdi, ‘Angebo adipapu popkup’ tenen, gel dopra ketenepmai. Ketenepmai dinin, Yesusdi, Allah er karerami ati dam kunmauai di tapra, inipra beupa, sundi Yesus ton cap ataru men epi.

Currently Selected:

Yohanes 8: KNTOT

Highlight

Copy