Yohanes 6

Yesusdi jen keca bokra karepupa, nesala denge weik, lima ribu (5.000) nengdi jepya tep, pepu upu

1Yesusdi Farisi neng tep upu pepudi, sun yuma dakuramipane, amenda taruda, amutu tapra, gapung co deiki bukra, Galilea mokon ortara beu. (Amokonpu dinin, ton yuk sida, Tiberias mokon perami.) 2Dana-dana tara kurami nesalada, Yesusdi pu jeramu nesala kweteramudi, nimi men kupmanto pel doramu ngeda diramya tep, Yesus beupa, nesala gung denge weik, ‘Yesus epkamep’ tenen, amutupu bei. 3Yesus ortara mutu Betsaida mutu beudi, tenpu mutu deiki welepudi, er cap, er nyapu cap bukmai. 4Amutu bei taruda, ada sun Yahudi yala nesaladi Kaplemna Kailya Kalemna kalemami tumi konum damai kupu.

5Yesus cap, er nyapu cap, amutu deiki bukmai taruda, amutu yanmai nesala denge weik er damai yakanmaipa, Yesusdi epu. Epudi, Pilipus tep pepu. “Pilipuso, dan mutu di jen keca weik kunuptepedi, ayakanmang nesala tep kareptepe do?” pepra asipetepu. 6Yesusdi, ‘Aneng sun jen karena tep, ukupkune,’ konum tenepu dinin, Pilipus tep asipetepu ngeda, ada, ‘Pilipus ware pepkuner do?’ tenen, kupetepu.

7Yesusdi upepupa, Pilipusdi tamupra pepu. “Gume, naie. Anesalada, denge weik wekmanga cadi, men di ware ban bari deiki di pel dopmatepepa, nun kunumna tep, co bo weik karepmasetenga peda, adeiki di jen keca weik kunuptepe dinin, jen weik kunuptepya peda, suktupa anesala yuma men jeptenge,” pepu.

8Upepupa, Yesus er nyapu kan-kan di, tenpu ngebo ton Simon Peterus er weit bo Anderiasdi upepu. 9“Tenpu mi, aca kunmare mida, jen keca roti meteknge pamu bari cap, mekina meteknge butene cap, kipra duyanmarada, epmap dinino, ange yuma bokra anesala denge weik tep kareptepya peda, nimi weik men jeptenge,” pepu.

10Upepupa, Yesusdi er nyapu yuma tep pepu. “Sundi abulupmang nesala yuma tep, ‘Dabukso,’ perbenkurume,” pepupa, sundi pepi pangeda, sun kunmaiyaida betei pamngai tep, anesala yumadi betei deiki bukmai. Nerapu cap, nyapu cap men nuki dinin, nimida denge weik 5.000 nimi kunmai. 11Konum buki pangeda, Yesusdi aroti kwaneng jen keca pamu dopra erepudi, er nai Allah tep, “Telepe,” pepudi, er nyapu tep karepupa, sundi abukmai nesala yuma tep bokra karepi. Karepmaipa, bungmaidi, anesala sun putanmautopu dopra jenmai. Ange utopu, Yesusdi amekina butene peda, bokra karepupa, sun yumadi dopra jepi.

12Sun yumadi akeca dopra jenmaipane, konum boupkopda, Yesusdi er nyapu tep, “Sun anengdi kwal tapmang keca yuma dopda-dopda pepra, tenpaipu bupra deipkurume. Yambul tenpu peda ton tamna gume,” pepu. 13Ange upeputopu, er nyapudi jen kwal tapmainge dopda-dopda peprapidi, dopra tenpai deipipa, sun bulupra kipra deipmai ngeda, alen utopu keca, er si bakul ilange 12 deiamya di kipra deipi. Ada, aroti kwaneng jen keca pamu bari, metekanun kupmau dinin, Yesus er pel dopka deiki di, kwal tapmai ngeda weik kupu.

14Yesusdi nimi men kupmanto keca, ajen keca bokra karepmau ngeda epidi, adipapu gonga kepra aupu pepbanmai. Ada, “Gume, sun nabi nengdi menop taru di peamseitopu, ‘Allah er upu Lap Pena Ngebo, nabi ngebo yankamre,’ peamsei ngeboda, Yesus erda konuma,” pepra lap perbarami. 15Uperamya tep nengeda, sun kange neitamai teneraminge peda, Yesus konum teneamu. Ada sundi Yesus tep, ‘Nun ila nimi deiyo ngebo, Raja kunkamser’ tenen, ‘Yesus dopra deipmepepa, amutu yuma talenkamser’ tenen, ‘Yesus dopra erepra deipmepepa, erdi talenkamsere,’ tenerami. Sundi utenerami ngeda, Yesus konum kael keamnga cadi, anesala acapu tapra, er yuk bura tara mutu beu.

Yesusdi, ila mokon deiki yanipra beua tep, pepu upu

16Atumi dinin, keteng wengbenkou taruda, Yesus er nyapu mokon pirman kwererbei. 17Bei dingeda, ila gapung co wekmaidi, ‘Mokon ortara Kapernaum mutu benkup’ tenen, co lase dopra bungmaidi bei. Mokon deiki bei taruda, konum ipropu dinin, Yesus cap men bei. Yesusda, er yuk tuai tara tup kunmau. 18Yesus er nyapuda, mokon deiki banmai dinin, mokon neitamai banmaipane, ila mungna cap, kulman cap, mo cap kupupa, mokon ila di longteng-longteng penmau.

19Ukunmaupane, sundi co lase puto di bungmaidi, pamu bari kilometerto, tonda, ngantan bari kilometer#6:19 kilometer – Tenpu kilometer penungada, bisi bana yambul karenai tep penunge. Nun mutu neitamai ngeda, ukupmantonge pepkusene. Ada, Omban di Bulpasikneto, tonda Borban dine Omlyom banato, tonda Turuwe dine Calap banato, abisi banada satu kilometerto peptepe. utopu bei dinin, ila mungna mungmaua cadi, amokon neitamaipu tup kunmai. Mokon deiki banmaipane, Yesusdi mokon deiki yanipra beudi, sun kunmaiyai damai beupa, epi. Mokon deiki banmaua epi pangeda, ‘Isok do?’ tenen, kware weik kupupa lukdai. 20Kware weik kunmai dinin, Yesusdi sun tep upepu, “Gume, ne akununa cadi, sun kwar dangna yapso,” pepu. 21Upepupa, sun kange deipi. Yesusdi sun gapung co welepra bungbeupa, mokon deiki yambul ton bei dingeda, mokon pirman ortara Genesaret mutu bei.

22Kapernaum mutu mapmaipa, berekyopda, amokon ortara Betsaida mutu tupa kunmai nesaladi utenepi. ‘Gume, mokon pirmanaida, gapung co tenpungepu kupmaupa, Yesus er nyapu ange dopra, mokon deiki benmangu dinin, Yesus cap, sun cap kikiman men benmangu. Sun yuk benmangua,’ tenepi. 23Betsaida mutu kunmaipane, amenda taru mokon ortara, Yesus benmau mutupu, Tiberias mutu di banmaiyanen, mokon atara Betsaida mutu bei. Gapung co yana lukeipyopda, Yesusdi, “Telepe,” pepra, jen keca bokra karepupa, nesala denge weika di jen jepmai mutu, Betsaida mutupu bei. 24Beidi sun cap, amutu kunmai nesala cap, upu talepmaiya deiki di kael kepi. ‘Yesusda Tiberias mutu men benmau. Er Kapernaum mutu benmau darape,’ tenepidi, ‘Yesus dirbenkup’ tenen, Kapernaum mutu bei.

Yesusdi, “Neda gam kuna deiyo kwaneng kunune,” pepu upu

25Sun Betsaida mutu nesaladi, mokon deiki banmaiyanen, mokon ortara Kapernaum mutu yanmaidi, Yesus enmaiyanen, Yesus akunmaupa, epi. Epidi, Yesus tep asipetepi. “Nun Peteremna Deiyo Ngebo, kanda ware taru di amutu yanmaum do?” pepra asipetepi. 26Asipetepipa, Yesusdi aneng tep upepu.

“Ne kaele. Sundi er petenmaneruma deiyoda, ada, ‘Yesusdi nimi men kupmanto keca pel dopmaua cadi, er upu gekepkupe’ tenen, men diryanmanerume. Sunda, ‘Roti kwaneng jen keca bokra weika di karepmaseupa, jepmapupa, boupmaseua tep, jen keca ton cap karepkamser’ tenen, diryanmanerume.

27Nedi pepsene. Tali lyupmanto jen keca tep, ‘Kange deipra dopropkup’ tenen, pel dona meme. Angepu tenena gum dinin, neda Nimi Mi Sisa Utopu ngebodi, jen keca utopunge karepsetene kecada, karepsenepa doproprumyopda, amenda pio gam kunkamrume. ‘Angepu doproptepe’ tenen, pel donkamrume. Nimi Mi Sisa Utopu Ngebo tep nengeda, nun nai Allahdi er tep kange konum deipke,” Yesusdi pepu.

28Yesusdi upepupa, sundi asipetepi. “Allahdi, ‘Ukunkamenge,’ teneamseu keca, ‘Angepu tenepra pel donkamepe,’ tenepmepyopda, wareto pel doptepepa, Allahdi kange deipsetu do?” pepra asipetepi. 29Asipetepipa Yesusdi, “Gume, Allahdi, ‘Ukunkamenge,’ teneamseu ngeda, yuk pel ton gume. Ada, erdi wepra deipseu ngebo tep, teka tenenkamrume. Sun kunkamrum ngeda, ange pua,” pepu.

30Yesusdi upepka tep, sundi upepi. “Uda, ware mambul pel, nimi men kupmanto keca, kunupsek pen pel dopsetumpa, eptepya deiki di, ‘Tek sisi Allahdi angebo wepra deipmasere’ tenen, kael kepketepedi, teka tenepketepe do? Wareto pel dopsetum do?” pepi. 31“Ange utopu ngeda, Allah upu neitamaida aupu seki.

‘Allahdi im deiki jen keca er sida mana kwaneng dokotepupa jepi.’ (Keluaran 16:4)

Aupu sekamitopu, nun apu yapudi,#6:31Yahudi yala neng, sun apu yapu tep, lap pena upu nomor 20 dirume. nimi cap, mo cap, men kwamu mutu neitamai embarami taruda, Allah im deiki di, jen keca er sida, mana kwaneng#6:31 mana kwaneng – Aupu mana kwaneng perami ngeda, ada Ibrani upu deiki di perami. kareramupa jerami. Atep kan dano? Ware keca karepsetum do?” pepi.

32Upepipa, Yesusdi anesala tep tamupra pepu. “Ne tek sisi pepsene. Musadi im deiki jen keca roti, er sida mana kwaneng, tek sisi ngeda men kareamseue. Ne nai bo Allahdi im deiki roti tek sisi ngeda#6:32 im deiki roti – Yesusdi, im deiki roti pepu ngeda, domona upu di pepu dinin, aupu nong neitamai ngeda, ada er pe tep pepdau. Ada, tuai mutu neitamaida, jen keca jepmepyopda, gam kunup utopu, er dipapu gam kuna deiyo keca kareserea deiki di, gam pio kunkamepa tep, aupu pepdau. kareserure. 33Apepmasenada, tali tep gume. Deiyoda, Allah er im deiki roti utopu ngeda, ada yuk keca gume. Ada im deiki di tuai mutu yana kuramredi, nesala ban-ban yuma tep, gam kuna deiyo keca karerurya deiyo ngebo er pua.#6:33 gam kuna deiyo keca karena ngebo – Aupuda, Yesusdi, er pe tepapu pepu. Erda roti kwaneng utopu kurur ngebo.” Yesusdi pepu. 34Upepupa, sundi Yesus tep, “Atep naie, ataru di diprap, oryankamre taru yumada, kan pepserem roti kwaneng karenkamserume,” pepi. 35Upepipa, Yesusdi tamupra adomon upu pepu.

Roti kwaneng gam kuna deiyo ngeda, ada ne pua. Yuk ngebo ton gume. Ware nesala do yuma, ne tep moronengedi, ne damai yankamnenung nesalada, ataru di dipra doryankamre taru yumada, jen pio men putankamre. Tonda, ne tep teka tenepnenge nesala yumada, doryankamre taru yumada, me pio men putankamre. 36Dinino, nedi sun tep arup taru pepmasena utopu, ne kune keca cap, ne nong cap, konum dinerum dinin, tupa-tupa teka men tenenerume.

37Ware nesala do yuma, ne nai bo Allahdi karenere nesala yumada, ne tep teka tenepnengedi, ne damai yakankamnenge. ‘Er dipu lyepkamser’ tenen, ne damai yakankamneng nesala yumada, ‘Sunda ne song,’ pepra men tamkamne. 38Apepmasen upu deiyoda, im deiki di tuai mutu yasidi, ‘Ne dokotepneu ngebo, Allah er tenenere pelpu donkamne,’ tenepsidi yasi. Neda, ‘Ne kange dipu tenenun kecapu tenepra kunkamne’ tenen, men yasi.

39Wepra deipneu ngebo, ‘Ukunkamre,’ teneamneuada pepkusene. Ada, ne nai bo Allahdi, ‘Anesala yumada, ne mi tep karenkamne,’ teneamudi, wepra kareamneu nesala yumada, tenpu peda men wangapkamnere. Tenpunge peda, men gum kupnetenge dinin, sirya taruda, ‘Anesala yumada, pio gam kunkameng’ tenen, sun yuma gam bukra ereipkamne.

40‘Ukupkamne,’ pepmasenada, tali tep men pepsene. Deiyoda, ne nai bo Allahdi utenerure. Ada, Allahdi, ware nesala do yuma, sundi, ‘Allah er Mi Sisadi lyepsetue’ tenen, ne mi tep teka tenepmengopda, ‘Tek sisi pio gam kunkamenge,’ tenerure. ‘Gam pio kunkameng’ tenen, ne Yesusdi sirya taru, anesala yumada, gam bukra deipnedi ereipkamne. Yesusdi awekmai nesala yuma tep pepu.

41Upepu pangeda, sun Yahudi yala nengdi, Yesus tep yu kupupa, mali kange douprap, yupropidi mali penmai. Yesusdi, “Neda, im deiki di yau kwaneng, gam kuna roti deiyo ngeda ne pua,” pepka tep, sun yu kupmai. 42Yu kupupa upenmai. “Angeboda, Yusupdi deipu mi men kurur do? Gume, erda angebo pua. Er nai sisa cap, er nin sisa capda, nun kaele. Atep nengeda, ware kuprap, ‘Neda im deiki di tuai mutu yasi,’ pepsetu do? Tali penmasere,” pepi.

43Upenmaipa, Yesusdi sun tep pepu. Yu kuprepa, mali upu pedanmarumada yapso. 44Ware neng do yuma, ne dopra deipneu ngebo, ne nai bo Allahdi aneng tep, ‘Yesus teka tenenkamenge’ tenen, sun dipru men tamupyopda, ne tep teka men tenepnetenge. Allahdi weamu nesala yuma, sirya taruda, nedi gam bukra deipnedi ereipkamne. 45Pumun taru, Allah er upu lap peramu ngebo, nabi Yesayadi sekamutopu, ne tep teka tenenge neng kununge. Nabi Yesayadi pepu upuda ake.

‘Allahdi anesala yuma tep peteremrepa, kael kemkamenge.’ (Yesaya 54:13)

Aupu akapka tep, ware nesala do yuma, Allahdi er upu perepa, gekepmengedi teka tenepra, er tep kael kemenge nesala yumada, ‘Yesusdi lyepkamser’ tenen, ne tep teka tenenkamnenge. 46Allah im deiki di dokotepu ngebo, er dipapu Allah diramu. Yuk nesala yumadi, Allah pio men dirami. Allahdi wepra deipudi, sun damai dokotepu ngebo, erpu Allah dirure. 47Tek sisi pepsene. Ne pene upu cap, ne cap tep, teka tenepre ngeboda, gam kuna deiyo keca konum dororure. 48Neda tali ngebo gume. Neda roti kwaneng gam kuna deiyo ngeda, ne pua. Yesusdi pepu.

49Upepudi aupu ton pepu. “Sun apu yapuda, Allah im deiki di dokotepu jen keca, er sida mana kwaneng, bupra jerami dinino, amenda taruda derami. 50Dinino, ne pepmasenada, im deiki di yau roti kwaneng dopra jere ngeboda men depkamre. Pio gampu kunkamre. 51Im deiki di yau roti kwaneng, gam kuna deiyo ngeda, ada ne pua. Akwaneng pepmasenada, dopra jere ngeboda, nong depmarya peda, pio gam kunkamre. Domon upu deiki di, kwaneng pepmasenada, ne nong tepa. ‘Nesala ban-ban yuma lyepnepa, gam kunkamenge’ tenen, ne nong karepsene.” Yesusdi pepu.

52Upepu pangeda, sun Yahudi yala nengdi, yu kupupa pedanmai. Sundi upenmai. “Gume, angeboda, ware kuprap er nong karepsetupa, jeptepe do?” pepra upu deiki pedanmai. 53Pedanmaipa, Yesusdi sun tep pepu.

Tek sisi pepsene. Neda, Nimi Mi Sisa Utopu Ngebo, ne nong cap, ne yapi cap men jeprumyopda, bol koptapra gam kuna deiyo keca men doproptume. Pio gam men kunkamrume. 54Dinino, ware nesala do yuma, ne nong cap, ne yapi cap jenge nesala yumada, pio gam kuna deiyo keca konum dopropmengedi kununge. Anesala yumada, sirya taru gam bukra deipnedi, ereipkamsene.

55Angeda, ne nongda, kwaneng sisa utopu kurure. Ne yapida, me sisa utopu kurura tep pepsene. 56Ware nesala do yuma, ne nong cap, ne yapi cap jenge nesalada, ne cap dipru dukdongopra, ne cap kikiman kununge. Nedi sun dipru neitamai tupa kunkamne. 57Uda, Gam Kuna Deiyo Ngeboda Allah pio akurure. Ne nai Allah dokotepneudi talenerepa, gam tupa kunetopu, ange utopu ne kune keca cap, pesene upu cap, doronung nesalada, nedi talesenepa, ne deikipu pio gam kunkamenge. Yesusdi pepu.

58“Adomon upu pepmasena deiyoda, ada im deiki di yau kwaneng, ne tep pesenune. Nun apu yapuda, Allah im deiki di dokotemamu keca, er si mana kwaneng bupra jerami dinin, amenda derami. Dinino, ne pepsene roti dopra jenge nesalada, gam pio kunkamenge. Ada, ne tep teka tenepnengedi, domyakankamneng nesalada, pio gam kunkamenge.” Yesusdi aupu yuma pepu.

59Yesusdi aupu pepu taruda, Kapernaum mutu neitamai, Yahudi yala nesala, sun Allah upu peteremna ati pum#6:59 Allah upu peteremna ati – Yahudi yala neng, sun Allah upu peteremna atida, nun gereja yambul atonun kwamu dinin, yambul yuk. Bahasa Indonesia deiki di, ‘rumah ibadah’ penunge. Yahudi nengdi, hari Sabtu deiki akati wengamidi, Allah er si eremami. Yahudi yala nesala kurami mutu yuma neitamai yumada, Allah upu geken ati domi. Tonda, yuk-yuk tumi yumada, Allah upu gekena cap, peteremna cap, nimi pepdaramipa, sun upu bongdina tep nengeda, akatipu wekami. Dinino, ila mambul ati, Allah er karena tep, ila gel di domi atida, Yerusalem mutu neitamai, tenpu atipu domipa akwamu. Allah upu geken ati lap pena upuda, nomor 26 dirume. neitamai di pepu.

Nimi weik, Yesus upu gekerami dinin, ton nengdi Yesus tapra beiya tep, pepu upu

60Yesusdi, aupu yuma Kapernaum mutu pepupa, er upu gekepra dombarami nesala kan-kan neitamai di, ton nengda, “Uo, apepser upuda, ikin weik upu cadi, ware kuprap teka tenepra doproptepe do?” pepi. 61Aupu pedanmaidi mali kange doupra, pangdana utopu kunmaipa, Yesusdi tenepka tep, er dombanmai nesala tep pepu.

“Apepmasen upu tep nengeda, ‘Uo’ tenen, mali kange doupmanerum do? 62Nimi Mi Sisa Utopu Ngebo, men di kuramngai ka tamupra im deiki welerberepa, eprumyopda, ware tenepkamrum do?

63Allah er Lek Sambaladi, gam kuna deiyo keca karerure. Nimi nong cap, nimi puto kusere ngeda, mambul keca pio gume. Ada nong men kupkamre keca pua. Nedi pepmasen upu yumada, Allah er Lek Sambaladi perure. Aupu tep, teka tenepmumyopda, gam kuna deiyo keca dororume. Aupuda, gam kuna deiyo upu kurure. Tali upu gume. 64Gam kuna upu pesenun dinin, ne kaele, sun kan-kan neitamai di, ton nengda teka men tenenenunge.” Yesusdi pepu.

Yesusdi aupu pepu ngeda, tali tep men pepu. Pumun taru di, sun teka men tenerami neng cap, tonda, ‘Er poptapkung’ tenen, nimi upu kai perbankamu ngebo cap, Yesusdi konum kael keamnga tep, aupu pepu.

65Amenda dukdongopra aupu ton pepu. “Sun kan-kan di, ton nengda teka men tenenunga cadi, arup taruda, aupu pepmasenu. ‘Ware nesala do yuma, ne nai bo Allahdi, “Yesus teka tenenkameng” tenen, sun dipru men tamupyopda, ne tep teka men tenepnetenge,’ pepmasenu.” Yesusdi awekmai nesala yuma tep pepu.

66Yesusdi upepu pangeda, ataru di gonga kepra, er tep domyakarami nesala kankan bokra, gung weika di er tep tapidi, ‘Er upu men gekepkupe’ tenen, men domyakarami. 67Sun tapra beipa, Yesusdi er wepra deiamu neng, sun 12 neng tep asipetepu. “Sun dano. Sun ton, ‘Er tapra betepe,’ tenepmanerumdi, ne tapra benkamrum do?” pepra asipetepu. 68Yesusdi upepra asipetepupa, Simon Peterusdi tamupra pepu. “Gume, naie. Kan puda, nimi pio gam kuna deiyo upu talepra peseruma tep, wareto ngebo damai betepe do? 69Nun kael kepmupudi, kan tep konum teka tenekenupe. Allahdi dokotepseupa, Dumsisi Kuna Ngeboda, kan tenpua. Yuk ngebo gume,” pepu.

70Upepupa, Yesusdi pepu. “Ne dipapu, sun dua belas neng wepra deiamsisi dinino, sun kan-kan neitamaida, tenpu ngebo isok mi kurure,” pepu.

71Yesusdi aupu pepkada, Simon Iskariot, er mi Yudas tep tenepudi aupu pepu. Yudas Iskariotda, Yesus dombarami neng, 12 neng kankan kuramu dinin, amenda taruda, ‘Yesus poptenge’ tenen, nimi kai upu perbenkamua tep, Yesusdi aupu pepu.

Currently Selected:

Yohanes 6: KNTOT

Highlight

Copy