Kejadian 21

Sarahdi er mi Isak deipu upu

1Uda, Allah er si Yahwehdi Sarah tep bicau tenemudi, “Ne puto deiki melipkenepa, sal mi deipkamreme,” pepra pediramutopu, Sarah tep telep kweipupa, mundu doupu. 2Mundu douamnganen, Allahdi, “Ataru, aware deiki sal mi deipkamre,” pepu tarupu, Sarahdi sal mi deipu. Abrahamda, pio wisi konum deipu taru dinin, sal mi deipmemeu.

3Sarahdi sal mi deipupa, Abrahamdi, “Ami er sida Isak,” pepra si sipepu. 4Si pepra karepmaupa, Isakda ban bari tumi konum kupupa, Abrahamdi er sal mi den bam bol deiki tarange sektapu. Ada, Allahdi, “Ukupkamrume,” peipmemeutopu kupu. 5Sarahdi sun sal mi Isak deipu taruda, Abrahamda keteng tamun denge weik, 100 tahun konum wisi deipke.

6Sarahdi upepu. “Allah melipneua deiki di, ne kange telep deipnere. Ange utopu, ware nesala do yuma, ne sal mi deipmanada, yuk nengdi lap pepmengepa, gekepmengopda, sun peda telep kange derinkamenge,” pepu. 7Upepudi, aupu ton pepu. “Tonda, ware ngebodi balila kuptupa ne akengebo Abraham tep, ‘Kan ner Sarahdi milo mi moum karenkamre,’ pepmatu do? Gume, ange tenepra men pepmatenge dinino, Abraham pio wisi deipu taru neitamaida, er sal mi konum deipmemene,” pepu.

Hagar cap, er mi Ismael cap tep, “Bereso,” pepreipa, berei upu

8Uda, Isak konum deipreipa, nepbaramnganen, er moum dakeipu taruda, Abrahamdi ila kalemna kalepra deipu. 9Kalemna kalepra lukra deipmaipa, jen jenmai taruda, Mesir mutu ner Hagar cap, Abraham capdi deiamrei mi Ismaeldi, Isak tep nyek-nyek penmaudi, autunmaupa, Sarahdi epu.

10Epudi, mali kange doupra Abraham tep upepu. “Aner Hagar cap, er mi Ismael cap tep ne song cadi, kandi, ‘Bereso,’ pepmempa, nun tapra yukai bendopkamrenge. Deiyoda, kan depmem pangeda, nedi deipsi mi Isakdi, kan taleamum keca yuma dopra talenkamre dinin, ami Ismaeldi meteka peda men taleptue. Amida ne song tepa,” pepu. 11Upepupa, Abraham gekepudi, ‘Uo, ada nedi deipsi mi tep mali pepmare’ tenen, mambul kange doupu.

12Mambul kange doupu dinin, Allahdi Abraham tep upepu. “Abrahamo, kan pel melimna ner Hagar cap, sundi deiprerum mi Ismael tep, mambul kange douna gume. Sarahdi pepmaker upuda gekepkurume. Ada, kan mi Isakdi deiprepa, dadeipdanen baramenganen kunkameng nesala tep nengeda, “Anesala sun apu bo Abraham,” penkamenge. Ismaeldi deipkamre nesala tep, ange men penkamenga tep pepkene. 13Dinino, nedi melimnepa, Ismaeldi deiprepa, dadeipdanen baramenganen nesala yala-yala weik ton kunkamenge. Ukupkamna deiyoda, Ismael peda kandi deipmuma tepa,” Allahdi Abraham tep pepu.

14Upepupa, mapmaiya berekupa, Abrahamdi jen keca cap, me cap gwepra ketenepmaudi, Hagar damai bena karepu. Karepupa kipudi, Hagar cap, er mi Ismael cap bisi banmarei. Bisi banmareiyanen, Bersyeba tara neitamai dinin, nimi gumai tali embanmarei. 15Embanapu kunmareipane, Abrahamdi sun me mau pumbon gwepra karepmau me jepropreipa, gum kupu. Me gum kupupa, Hagardi Ismael dopra, tali dapakamu keca, yambul co kaue deipu.

16Deipudi, yambulanun ortara bena bukudi, ‘Uo, ne mi depkamarada men epkune’ tenen, kange mun kange doupra engenmau. 17Erdi engenmautopu, er mi peda engenmaupa, Allah gekepudi, peipmaupa, er im deiki melimna ngebo, malaikat tenpu di, Hagar tep upupu. Ada im deiki di aupu pepu.

“Ka nero, ware keca deiyo tep engenmarem do? Kan kware dangna meme. Kan mi ormapmaua di engenmarpa, Allah konum gekepmare. 18Kandi kan mi tep erepra tekeipmemdi, er buru talepra dubenkurume. Ada, Allahdi ami tep melimrepa, erdi deiprepa, dadeipdanen baramenganen, amenda taru kunkameng nesalada, yala-yala weik kupmengedi, puto nesala kunkamenge,” pepu.

19Upepupa, Allahdi Hagar tep, ‘Ame bungna epra kael kepkur’ tenen, asuru pakeipupa, me bungna epu. Epka cadi, sun me mau dopra, orbena me gwepu dingeda, er mi tep karepmau. 20Amenda taru yuma neitamai di, Ismael nepbaramu taru yumada, Allahdi weik melimamemeu. Nimi gumaipu kuramudi, ila kael jen talena ngebo kael kepudi, kuramu.

21Amenda yuk taruda, er nin cap, er cap, nimi metekpu kuramyai, mutu si Paran mutu, kuramrei taruda, er nindi yuk neng cap upu sisikupa, Mesir mutu ner karepipa, Ismaeldi dopu.

Abraham cap, ila deiyo ngebo Abimelek cap, “Nun mali kudana gum dipapu, teleppu kudankamepe,” pepra, pedina upu peprei upu

22Uda, ataru neitamaipu, ila nimi deiyo ngebo, er sida Abimelek cap, er jen talen neng sun deiyo ngebo, er sida Pikol capdi, Abraham tep upeprei. “Kan kurum ngeda kael keamnume. Ware kun keca do yuma, kan kumem keca neitamai yumada, Allahdi melimkerure,” peprei. 23Upepreidi, Abimelekdi upepu. “Ukuda kandi pedina upu pepra deipnerume. Allahdi dinmaserpa, ‘Ne Abrahamdi, kan cap, kandi deipmum nyapu cap, sundi dadeipkameng nesala yuma cap tep, telep kupra dumsisipu kunkamne. Mok upu pena cap, mali kuna cap yuma, pio men kunkamsene,’ pepra pedina upu peipnerume. Tonda nedi kan Abraham tep, telep-telep kupra meliamkesitopu, kandi ne tep, tonda kanda nimi bo utonun kunkamrem mutu neitamai kunkameng nesala cap tep, telep kupra melimkamrume. Kandi, ‘Tek sisi apepneremtopu kunkamne,’ pepra, pedina upu peipnerume.” Abimelekdi Abraham tep pepu.

24-25Upepupa, Abrahamdi tamupra pepu. “Tek sisi ange pepneremtopu kunkamsene,” pepra deipu. Upepu dingeda, aupu ton dukdongopra pepu. “Uo, Abimeleko, kan pel melimna nengdi, ne me bungnada puto di upula dopropnei. Ange dano?” pepra lap pepu. 26Lap pepu dinin, Abimelekdi tamupra pepu. “Uo, angeda ukupu pepmanerema tep, ataru dipu kael kepne. Kan me bungna upula dopropkei neng, sun sida kapul men gekepsa cadi, ne walwale,” Abimelekdi Abraham tep pepu.

27Aupu sisikmareipane, Abrahamdi er domba bisam cap, sapi bisam cap, tenpu-tenpu dopra duyaudi, Abimelek tep karepupa, sun pedina upu pepmareinge tep, ‘Nong tek sisi kupkamre, nun pepmanemtopu kunkamneme’ tenen, tenpu kange teneprei. 28Tonda, Abrahamdi duyau domba bisam gung neitamai di, ner domba yoneitam bari wepra, yambulanun yukai deipu.

29Ukupupa, Abimelekdi, “Kao, aner domba meteknge, yoneitam bari wepra yukai deipmaneremada, ware keca deiyo tep kupmanerem do?” pepra asipetepu. 30Asipetepupa, Abrahamdi, “Gume, ‘Abrahamdi ame gwepkamne, tenepudi, ame bungnai er buru dipu palipu’ tenen, ‘Teka tenepkunerem’ tenen, ayoneitam ner nyapu domba bisam karepmakene,” pepu.

31Uda, abutene nengdi, amutu neitamaipu pedina upu talepdareia cadi, amutu sida, Bersyeba mutu peramreipa, tupa penunge. 32Sun pedina upu konum pepdareidi, sengpepreiyopda, Abimelek cap, er jen talena neng sun deiyo ngebo Pikol cap, Filistin nesala kurami tara, sun pe mutu tamupra berei.

33Abraham dingeda, acapu Bersyeba mutu dam, co si tamaris co koupudi, ‘Ne nai bo Allah er si Yahweh, Pio Gam Kurur Allah pua’ tenen, er si Yahweh erepra mororamu. 34Abrahamda, acapu sun Filistin nesala kurami mutu neitamaipu, keteng tamun weik kuramu.

Currently Selected:

Kejadian 21: KNTOT

Highlight

Copy