Kejadian 13

Abram cap, Lot cap tapdareidi, yuk-yuk bendoprei upu

1Mesir mutu nengdi Abram dopra, sun mutu neitamai di dokotepi atep, Mesir mutu tapra kange di ton cap, Negeb mutu bisi bei. Ada, Abram cap, er ner cap, Lot cap, sun bunga yuma cap dopra bei. 2Ataru neitamaida, Abram er peiramu keca yala-yala weik cap, kunumna weik keca emas cap, perak cap, weik konum dororamnga cadi, isomka weik kuramu.

3Uda, Abramda Negeb mutu dinin, ormutu benap, yuk mutu benap dakunmauanen, ka di bisi banmauanen, amendada kange di ton cap Betel mutu dana tara, Ai mutu dana tara, daneitamaida er tenda ati deipkaipu tamupra beu. 4Amutuda, orketeng tamun deiki Allah er gispal dona cap, karena cap tep, gel pala doprapudi, gel taplakra yakeipu mutu apu. Amutu beudi, Allah er si Yahweh peprapudi, Allah tep moropu.

5Uda, ataruda Abram amutu-amutu neitamai yuma embaramu taruda, er mi Lot cap embaramrei. Abram er peiramu bisam yala-yala weik akwamutopu, Lot peda er domba bisam cap, er sapi bisam cap, er tenda ati cap, weik taleamu. 6Kikimanpu embaramrei dinin, sun butene utopu, akeca-keca weik taleamreidi, sun peiramrei keca yala-yala weik kupka cadi, atuda go metek kupupa, ‘Uo, ware kupteneme do?’ teneramrei. Tuaida yambulpu kupka cadi, go metek kupupa, sun telep kupra kikiman men kuramretenge. 7Tonda, Abram er bisam peirami neng cap, Lot er bisam peirami neng cap, pio weika di upu pangdarami. Tonda, amutu neitamaipu dinin, sun Kanaan yala nesala cap, sun Peres yala nesala cap, amutupu kikiman wisipra kurami.

8Sun tu go metekpu kupka cadi, Abramdi Lot tep upepu. “Kao, ne cap, kan cap yu kuprepa, upu pangdanada yaproyo. Tonda, ne bisam pein neng cap, kan bisam pein neng cap, upu pangdana ngeda yaptenge. Uda, nunda tenpu yalapu kunum neng tepa. 9Atekmanemai dana-dana tara dipetepmayo. Mutu weik akapmara cadi, nun yuk-yuk benkaneme. Nun tapdaryo. Kanda ortebalal tara bememnyopda, neda dumsisi tara benkamane. Agum dingeda, kanda adumsisi tara bememnyopda, neda ortebalal tarapu benkamane. Kan kange ja,” pepu.

10Abramdi upepupa, Lotdi amutu yuma dana-dana tara dipetepupa, Yordan mekin cap, Yordan banai yuma capda, me weik kupka cadi, pio telepe kupupa, epu. Amutu yumada, Allah er si Yahwehdi menmena taru ketekeipu mutu Eden utonun, tonda Mesir mutu neitamai dinin, telep mutu si Soar mutu urasin utopu kupupa, epudi kange deipu. (Ataruda, Allahdi Sodom mutu cap, Gomora mutu cap, sun wenemna tep uku dokotepupa, gum kupra deipu taru, kapul men kupka tep pepne).

11Lotdi amutu yuma dipetepudi, ‘E, Yordan mekin cap, Yordan banai yuma capda, pio telep mutu kurure,’ tenepudi, kael kepka cadi, ‘Nedi angepu dopropkene,’ pepra wepudi, amutu bisi bana tep, keteng yakan tara bisi beu. Bana tep, Abram cap, Lot cap acapu tapdareidi, yuk-yuk berei. 12Abramda, Kanaan mutu neitamai kuramu taruda, Lotda ila banai neitamai, ila ati arum domyaipu bena kuramu. Er tenda ati deipkaida, Sodom mutu damai deipu.

13Ataru neitamaida, sun Sodom mutu nengda, sun kange dipru yuma, pio mali nengpu kurami atep, Allah er si Yahwehdi teneramunge cap, dumsisi kuramunge yuma cap, tali yaniptapnapu mali-mali weik kurami. 14Lot cap, Abram cap konum tapdareipa, Lot beu pangeda, Allah er si Yahwehdi Abram tep upepu. “Abramo, kan tekmaremai dipu, dana-dana tara yuma dipetepo. Deiki tara selatan cap, dutara utara cap, ortara keteng yakan tara cap, atara keteng bare taru cap yuma dipetepo.

15Aca di epmarem mutu yumada, kan cap, kandi deipmempa, dadeipdanen bankameng nesala yuma cap tep karepkamsene. Karepsenepa, amutu sun pio talenkamrume. 16Nedi meliamsenepa, kandi deipmempa, dadeipdanen bankameng nesala, kan yala nesala yumada, pio weik kupbankamenge. Tuai mutu kupre kalkal tu akuretopu, kandi deipmempa, dadeipkamenge nesala utopu, denge weik men nukmanto kupbankamenge. Nimidi kalkal tu nuktengetoda, kan nyapsilip ton nuktenge. Gum dingeda, gume, men nuktenge. Tek sisi men nukmanto kunkamenge.

17Kan dinmarem mutu yumada, karepkamken atep, aca di dutara cap, deiki tara cap, dana-dana tara cap dipra embankamrume,” Allahdi Abram tep pepu. 18Atep, Abramdi er tenda ati deipmauai di doprapudi, bisi banmauanen, Hebron mutu neitamai dinin, ila co tekamyai, mutu si Mamre mutu bena kuramu. Amutu damai pape, Allah er si Yahweh tep, er gispal dona cap, er karena cap tep, gel pala doprapudi, pala gel taplakra yakeipudi, Allah er si Yahweh tep si ereipu.

Currently Selected:

Kejadian 13: KNTOT

Highlight

Copy