มท 4

ลอง โบว กานัม กาซูห เฌา เยซู โบง หมาบ

1วาย อัน ตี น็อห พึอม เฌาพรา วี จัร เฌา เยซู ฮาว แคง แปร กาฮ็อห, แตห โบว กานัม ปึอน ดี กาซูห อัน โบง หมาบ. 2เฌา เยซู ยี กอย ดี ตี อาดา พวน ฆึร ซีแง ดี พวน ฆึร หมึร, ตู โฮม มาเซ. ปัน ตี อัน กาปราณ กาเซา ปี ดี โฮม. 3อี ดี กาซูห เฌา เยซู โบง หมาบ ตึอน, อัน ยี ตัห โดง กอย เฌา เยซู, วี ต็อห, “เซ อึณ หมาน มูห แม ฆอน เฌาพรา, แตห แม กาลาง แตห มาว เฆ นี แบน ปี ดี โฮม แม.”

4เฌา เยซู วี เวียะ โฆรห ตี. อัน ต็อห, “แคง บับ เฌาพรา อึณ ต็อห, ‘เซ ดูอี มึห มี ปี ดี โฮม อู โมยว อาว ฆลึม. อึณ ซี โลว บอ โฆรห เฌาพรา ดอน โดว อี เลห แคง โมต อัน, แตห อึณ เฮียง บอ น็อห พึอม ดูอี.’”

5วาย อัน ตี โบว กานัม วี แตห เฌา เยซู ฮาว ฌัม แคง มืง เยรูซาแลม, อี มูห มืง บอด. อัน แตห เฌา เยซู กอย นา แดง กาตูะ โฮว เฌาพรา. 6อัน วี ต็อห, “เซ แฮะ หมาน มูห แม ฆอน เฌาพรา, แตห แม บูงบลูห บยัว โดง กอย แม ตี. โคว, แคง บับ เฌาพรา อึณ แฮะ แดม อูน ต็อห, ‘เฌาพรา ดี จัร เฆ อามู อามาด อัน, แตห เฆ ยอด ลึมลา แม, แตห เฆ บัร แม ตา แด เฆ, แกวะ แตห เปลา แม ตา ดูห ดี มาว.’”

7เฌา เยซู วี ต็อห, “แคง บับ เฌาพรา อึณ บอ แดม อูน ปอ อู โมยว. อึณ ต็อห, ‘แกวะ เทว น็อห เฌาพรา, อี มูห อัน เฌา ปี กรึบ แม.’”

8ปอ อู เฌณ โบว กานัม วี แตห เฌา เยซู กอย แดง นอน จา กาเซา, วี บยัะ ดี อัน มาน มืง ดอน โปละ แดง กาดาย นี, แตห อัน บอ ยอด อาพูง ดังโคว แคง มืง เฆ ตี. 9อัน วี ต็อห, “โอว ดี ดัว โตต ฌึร ตี ดี แม, เซ แม โฆม ดี อาต โอว, กรึบ โอว.”

10เฌา เยซู วี ต็อห, “แม โบว กานัม อี จืร ซาตาน, แม เลห เตา โดง กอย โอว. แคง บับ เฌาพรา อึณ แฮะ แดม อูน ต็อห, ‘แม โลว กรึบ มี เฌาพรา อี มูห เฌาพรา ปี กรึบ แม. แม โลว โบง มี ฆาน เฌาพรา อู กาดัง ตี, แกวะ กรึบ ปอ กาดัง.’”

11เฌา เยซู แฮะ ฮอต กาลาง โฆรห ตี, โบว กานัม วี เลห ตัะ โดง กอย อัน. เฆ อามู อามาด เฌาพรา บอ ตัห ลึมลา อัน.

ลอง เฌา เยซู จูห ดี กาลาง ดี อี ลอง เฌาพรา

12เฌา เยซู บอ ยึร ซาดาง ลอง อายอฮาน ตึอน. เฆ แฮะ ฮอต เหมต คร็อง อัน แคง กาปึม. วาย วี นับ อัน ลอง อัน ตี, อัน วี ฮาว เวณ แคง อืง ฆาลีเล. 13อัน เลห แคง มืง นาซาเรต, วี ฮาว กอย แคง มืง กาเปนารึม. มืง ตี กอย ดี โคบ อึม ดึง กาตัด โดง กอย เฆ ครึร อาเฌบูโลน ฆาย ครึร อานาบทาลี. 14ปาย ตี, อึณ บอ แบน ปี ปี ดึอม ต็อห ดูอี อี บยาน โฆรห เฌาพรา อี จืร อาอีซายัะ. อัน แฮะ ดึอม ต็อห,

15“โดง กอย เฆ ดูอี ครึร อาเฌบูโลน เฆ ดูอี ครึร อานาบทาลี, อึณ กอย โดบ อึณเตณ อี ฮาว โดง กอย อึม ตาง นา เฆต ซีแง บอ ดี โคบ แบลง ยอดาน. อึณ บอ มึห อืง ฆาลีเล อี มูห โดง กอย เฆ ดูอี อาโมยว เฮา.

16เฆ ดูอี อี กอย ดี ตี, อึณ ปี, เฆ กอย แคง อับ ว็อง. อึณ ปี, เฆ แฮะ ยึร บลาง ตาง. บอ เฆ ดูอี อี ตู นับ ลอง อาซาก ปี ดัว เฌาพรา, เฆ ปี ดูอี อี แฮะ รีน ดี ยัม, เฆ มืร แฮะ ยึร บลาง อี ปี อึณเตณ อี แตห เฆ ลอด ยัม.”

17อู ซีณ ดอ กอย เฌา เยซู แคง มืง นาซาเรต ตึอน, อัน จูห ดี กาลาง ดี ดูอี กืน. อัน ต็อห, “แตห เบ โหลห บอ แวน หมาบ เบ. โคว, อาคราว ดี อึบ เฌาพรา กาดาย นี แฮะ กาตัด ดี ตัห.”

ลอง เฌา เยซู แดะ ดีแบ อัน

18อู ซีแง เฌา เยซู ฮาว โคบ บาง อึม ฆาลีเล ตึอน. ดอ อัน ตี อัน บอ ยึร ฆาย อูกัด อูวา อา วี. ฆาย มูห ดูอี เหมต ฆา, โฆ็ง อึณรับ, บยัว แคง อึม. อึณ มูห อาซีโมน, อี จืร บอ อาเปตารู บอ วา อัน อี จืร อาอันดารู. 19เฌา เยซู ต็อห ดี ฆาย, “บาย ตัห โดบ โอว. โอว ดี แตห บาย แดะ ดูอี เฮา ตัห โดบ โอว.” 20เฌา เยซู แฮะ ฮอต กาลาง โฆรห ตี, ฆาย วี เบลห แวน อึณรับ ฆาย อู เฌณ, วี ฮาว โดบ อัน.

21อัน วี ฮาว ปอ อี แจก, วี ยึร ฆาย อูกัด อูวา ปอ อา วี. อึณ มูห อายาโกบ อี มูห ฆอน อาเฌเบเด, บอ วา อัน, อี จืร อายอฮาน. บอ ฆาย บอ ฆูณ ฆาย อี จืร อาเฌเบเด, เฆ กอย รึม แคง รึร, อึณปราย อึณรับ เฆ. เฌา เยซู วี แดะ ฆาย. 22แฮะ ฮอต, ฆาย วี เลห แคง รึร, วี แตห ฆูณ ฆาย กอย นา ปัน. ฆาย วี ฮาว โดบ เฌา เยซู อู เฌณ.

ลอง เฌา เยซู แตห ดูอี เซา วี แกน

23เฌา เยซู บอ ฮาว แบน โปละ แบน โปละ แคง อืง ฆาลีเล, วี มาโนว เฆ ดูอี อี กอย แคง โฌง กรึบ เฆ ดูอี อายูดา เฌาพรา. อัน กาลาง ดี เฆ ลอง เฌาพรา ดี อึบ กาดาย, แตห ดูอี แบน น็อห ดาคึย. แคะ มึห เฆ ดูอี เซา แบน โมยว แบน โมยว, แคะ มึห เฆ ดูอี อี ตู คัะ, เฌา เยซู มืร แตห อึณ หราย โตต ดอน โมยว. 24เฆ ดูอี อี กอย แคง มืง ซูรี บอ มืง, เฆ บอ นับ ลอง อัน ตี. แฮะ ฮอต, เฆ วี ตึย ดูอี มึห เซา แบน โมยว แบน โมยว, แตห เฆ ฮาว ฌัม โดง กอย เฌา เยซู. อึณ บอ มูห ดูอี มึห เซา กาเซา, ดูอี มึห กานัม แคง โดว โบ็ง, ดูอี มึห งาน, บอ เฆ ดูอี แด เฆ เปลา ยัม บลาก, อัน ปีแกน โตต เฆ. 25อึณ มึห ดูอี กืน กาเซา, อี โดบ อัน. เฆ ดูอี ตัห อืง ฆาลีเล, เฆ อี ตัห แคง อืง มืง ฆึร มืง, เฆ อี ตัห มืง เยรูซาแลม, อืง ยูดา บอ เฆ อี ตัห นา ตัะ แบลง ยอดาน, เฆ บอกาเฆลียด โดบ อัน.

Currently Selected:

มท 4: pce

Highlight

Copy