ดอ โฆว 49

ลอง อาโกบ วี ม็องการา ดัว ดี ฆอน อัน

1อาโกบ ตึอน วี แดะ ฆอน อัน ดอน อี ตัห โดง กอย อัน. อัน ต็อห, “แตห เบ ตัห ดี นี, แตห โอว ปึอน ดี แค ดี เบ ปี ดี กาดูห เบ นา อาต ฮาว.

2แตห เบ ตัห กาฌูะ, เบ ฆอน อาโกบ, แตห เบ โทม โฆรห อาอีซาเรลัะ อี มูห ฆูณ เบ.

3แม อารูเบน, แม มูห ฆอน ฆีณ โอว. แม แฮะ ปึอน โปลม โอว, ดอ หณัม กืน อาซาก โอว. แม ดี แยต ดี อาต อี, แม บอ มึห ซาเร ตาง หลึอม อี. 4แม ยี ตู ปึอน อึบ โปลม แม, ปี อี ตู ปึอน อึบ อึม นัมมูกซารา. โคว, นา อาต นี ฮาว แม อาว ฮู หมึอม หลึอม อี. แม แฮะ ตัห โดง อีด ฆูณ แม, แฮะ ปี ลึร ซาเร โอว, แตห โอว วี กลึร.

5อาซีเมโอน ฆาย อาเลวี, บาย ปี อู ฆู. บาย แฮะ โบง อี ฮาย กาเซา. 6โอว ตู ซี นับ ลอง ปี ดี คราม บาย. โอว ตู ซี กอย รึม โดบ บาย. โคว, ดอ รู กาเซา บาย, บาย แฮะ ง็อห ยัม อี. บาย มืร แฮะ ดาคึย บอ แตห มามัก มึห เซา, อาว ฮู ปึอน ฮาว. 7โอว ดืง บาย, โกบ น็อห รู บาย ตู นับ ดี จู. โอว ตู แตห บาย กอย รึม, แตห บาย วี ฮาว แบน โปละ แบน โปละ แคง มืง อีซาเรลัะ.

8แม อายูดา, แม ยี ดี โทม อูกัด อูวา อี อืบ แม. แม วี แป รันซู แม เซเซ. เฆ ฆอน ฆูณ แม ดี วี โฆม ดี อาต แม. 9อายูดา ยี ปี ฆอน มาครังซี อี แฮะ ฮอต โฮม ยัง โดว ปี ง็อห อัน. แฮะ ฮอต อัน วี อีด. อาว มึห อาเซ อี ยัะ บยีต อัน. 10อายูดา ดี แบน ดา กาณา อี อึบ อี เซเซ. ปวน อัน อาว โตต ดอ เหมา. เฆ ดี โฆม ดี อาต อัน, เฆ บอ อืบ มยูก อัน เซเซ. 11อัน ดี ครัม กาเซา, แตห อัน ปึอน ดี ปัก มาโลว อัน ดี เฮ มางูน, แตห อัน ปึอน ดี ปัก มังปร็อง อัน ดี เฮ บอด. อัน บอ ปึอน ดี ลัห ครึง อัน แคง อึม มางูน. 12อัน ดี ปึอน ดี เดียง อึม มางูน, แตห งาย อัน กอ เรณ. หราง อัน กอ ลูย ปี อึม ปู มามัก.

13แม อาเฌบูโลน, แม ยี กอย ดี โคบ อึม นัมมูกซารา. โดง กอย แม บอ มูห โดง คยัะ เฆ รึร ซังโพว. โดง กอย แม ดี ฌัม มืง ซีโดน.

14อาอีซาคา ปี มาโลว อี มึห โปลม. อัน ปี มาโลว ดี กอย กาแต โกรวกราม ปี ดี ปัห อัน. 15อัน บอ ยึร โดง ดี คยัะ อัน แฮะ หมึอม, กาดาย อี กอย กาตัด อัน แฮะ บอด. โคว, อัน บอ ต็อห ดี ปัห โกรว จัน, แบน หมาย อี เฮา.

16แม อาดาน, แม ดี อึบ อาโมยว แม ปี เฆ ครึร อาโมยว อีซาเรลัะ ดี อึบ ครึร เฆ. 17ฆอน อาดาน, อัน ดี แบน ปี ฮัณ อี กอย ดี โคบ อึณเตณ. อัน ปี ฮัณ ดี บัร ดี โฌะ กาหนูต มังปร็อง, แตห อี ป็อะ มังปร็อง วี โจห.”

18ปัน ตี อาโกบ วี ต็อห, “อึย แม เฌาพรา, โอว ดีเกน แม, แตห แม ตัห คยอด เย.”

19อาโกบ วี ต็อห, “เฆ พึง ดา ปรา เฆ ต็อห ดี ตัห ปรา แคะ ปี มึห อาฆัด. อัน ยี ดี โดบ เฆ, แตห อัน วี ดึห วีว โกรว ปี ปรา เฆ.

20แม อาเซน, แม ดี มึห โหงว กืน เลห แคง นา แม. แม ดี บอ มึห ปี ดี โฮม ซีแงห กาเซา ปี ปี ดี โฮม คูนดีคัม.

21แม อานาบทาลี, แม ปี มาบวห อี เลห ฮาว แคง แปร. ฆอน อัน ยี ชีด กาเซา.

22แม อาโยว, แม ปี รา เฮ อี มึห เบล กืน. แม กอย โคบ อึม โตห. รา อัน ยี ตาง โต็ง. 23ดา อี โฆ็ง อัะ ดี บอ รู ดี อัน. เฆ บอ บัณ อัน. 24เฆ ยี ตู ออง. เฌาพรา แตห อาโยว โฆ็ง ซีคยา อัะ อัน, แตห อัน บอ ลีง บลา อี. เฌาพรา ปี ดูอี เฮียง มาบู. อัน เฌา บอ ปี มาว, อาว นับ ดี รัร. ปวน อัน ตาง, อัน วี บัร อาโกบ บอ ฆอน อัน. 25เฌาพรา อี จอย แม, อี มูห เฌาพรา อี อึบ โตต ดอน โมยว, เฌาพรา ตี ดี ม็องการา ดัว ดี แม, แตห นา หมึอม ปี ดัว อัน ดี แม เลห แคง ฆางหราว, เลห บอ นา ครึม แคง กาดาย. แตห นา หมึอม ปี ดัว เฌาพรา ดี แม เลห แคง วัต บอ แคง ปู อีบึณ แม. 26แคะ ปี ม็องการา แตห ฆูณ ดัง แม ดี แม, แตห อึณ ตาง หลึอม ปี ม็องการา แตห เฆ อี กอย ดี อาต โอว. นา หมึอม ปี ดี ดัว เฌาพรา ดี อาโยว ตึอน แฮะ ตาง หลึอม นอน อี กอย เซเซ ดอน นา ดอน โปละ. แตห อาโยว ปึอน โตต ฌึร ตี. โคว, อัน แฮะ กอย กาย็อห ดี อีกัด อัน.

27แม อาเบนยาม, แม ปี มาโซว แปร อี เหรต ปี ดี โฮม อัน. ซีณวัห อัน ฮาว เหรต ปี ดี โฮม อัน, บา ดี อับ อัน บอ กอย กาซาง แคะ ปี ปึอน อัน.”

28อา ตี มูห เฆ ครึร อาโมยว อีซาเรลัะ ฆึร ดี อา ครึร. ฆูณ เฆ แฮะ กาลาง โฆรห ตี ดอ ม็องการา ดัว อัน ดี ดอน อี. อัน แฮะ ม็องการา ดัว ดี เฆ อู วี อู โมยว, แตห อึณ โดบ ปี ดี กาอาบ เฆ ปึอน.

29อาโกบ แฮะ ฮอต กาลาง โตต ดอน โมยว, อัน วี หมาณ ดี เฆ ต็อห, “โอว หงา ดี ยัม, โอว ดี วี กอย รึม โดบ เฆ อี แฮะ ฮอต ยัม ดี อาต. แตห เบ ดีบ โอว โดง ดีบ เฆ ฆูณ โอว อี มูห กาเดา มาว อี กอย แคง โดง นา อาเอเพโรน, อี มูห อาโมยว เฮทีด ตึอน. 30อึณ มูห กาเดา มาว อี กอย แคง โดง นา อี จืร มาดเปนลา. อึณ กอย อาต ฌัม เบ โดง จืร มัมเร แคง มืง ตาง กานัณ. กาเดา มาว ตี, อาบราฮัม ตึอน แฮะ จึห ดี ดา อี จืร อาเอเพโรน, อี มูห อาโมยว เฮทีด. อาบราฮัม ตึอน แฮะ จึห กาเดา มาว ตี บอ โดง นา อี กอย กาตัด อัน, แตห อึณ แบน บาเรว. 31แคง กาเดา มาว ตี, เฆ แฮะ เบลห อาบราฮัม ตึอน ฆาย อีบึณ อัน อี จืร นาง ซารา. แฮะ ฮอต เฆ วี เบลห บอ อาแซก บอ อีบึณ อัน อี จืร นาง แบก. โอว มืร แฮะ เบลห นาง เลอา แคง กาเดา มาว ตี. 32อึณ มูห โดง นา บอ กาเดา มาว ปี จึห ฆูณ ดัง เอ ดี ดูอี อาโมยว เฮทีด.”

33อาโกบ ตึอน แฮะ ฮอต กาลาง ปาย ตี อัน วี อีด แดง กาโช็ง อีด อัน. แฮะ ฮอต, พึอม อัน บอ โตต. อัน แฮะ ฮาว กอย รึม โดบ เฆ ดูอี อาโมยว อัน อี แฮะ ยัม ดี อาต อัน.

Currently Selected:

ดอ โฆว 49: pce

Highlight

Copy