ดอ โฆว 22

ลอง เฌาพรา เทว น็อห อาบราฮัม

1วาย อัน ตี เฌาพรา ต็อห ดี เทว น็อห อาบราฮัม ตึอน. อัน เฌา ต็อห, “อึย อาบราฮัม.” อัน เวียะ โฆรห ตี ต็อห, “อึร, โอว กอย ดี นี, แม เฌา.”

2ปัน ตี เฌาพรา วี ต็อห, “แม แดะ ฆอน แม, อี มูห ฆอน ปี ร็อก แม อี จืร อาแซก. บอ แม บอ ฆอน แม อู วี ตี, บาย อา วี โลว ฮาว แคง มืง โมวรียา. บาย ฮี ฌัม แคง มืง ตี, แม โลว หลู ฆอน แม ดี โอว, แตห อึณ แบน ปี หลู ปี โฮม กาซึม เงา. แม โลว หลู อัน แดง นอน ปี ดี บยัะ โอว ดี แม.”

3ปัน ตี อาบราฮัม บอ เจว ยีต, เบลห กอบ ดี มาลา อัน. อัน บอ แดะ หมาย อัน อา วี บอ อาแซก, แตห เฆ โดบ อัน. อัน มืร ซีโลห เฮ, แตห อึณ แบน มา เงา. แฮะ ฮอต, อัน เลห ฮาว โดง ปี จัร เฌาพรา อัน ฮาว. 4อึณ บอ ฌัม โอย ซีแง, อาบราฮัม วี ยอด, บอ ยึร โดง ปี ต็อห เฌาพรา ดี อัน, อึณ กอย นา กาโต็ง. 5อัน ต็อห ดี แดเจณ อัน, “แตห บาย กอย ดี นี. แตห บาย บัร มาลา โอว. บอ โอว บอ อาแซก, ยาย ดี ฮาว นา ตัะ ดอย, แตห ยาย กรึบ เฌาพรา. ยาย แฮะ ฮอต กรึบ อัน เฌา, ยาย ดี วี ตัห.”

6ปัน ตี อัน ดึห มา เงา ปี โลว เฆ อาดา ปี ดี หลู ปี โฮม กาซึม เงา, ดัว ดี อาแซก, แตห อัน โฆ็ง. อัน วี โฆ็ง เงา บอ อาตึม, ฮาว. ปาย ตี ฆาย อา วี ลาย กาโดบ ฮาว.

7อาแซก ตึอน ต็อห ดี ฆูณ อัน, “อึย, ฆูณ.”

อาบราฮัม วี ต็อห, “อึร, ฆอน โอว, โอว กอย ดี นี.”

อัน วี ดีหมอด ต็อห, “อาย มึห ดี โฆ็ง เงา เฆ มา เงา. เหมา มาบู ปี โลว หลู อาย?”

8อาบราฮัม ตึอน วี ต็อห, “อึย, ฆอน โอว, เฌาพรา ดี วี แตห อาย ยึร มาบู ปี โลว หลู อาย.” ปัน ตี ฆาย อา วี วี กาโดบ ฮาว.

9ฆาย แฮะ ฮอต ฌัม โดง ปี บยัะ เฌาพรา ดี อัน, อัน วี โบง กาโช็ง หลู ดี เฌาพรา โดง กอย ฆาย ตี. อัน ดึห เบลห อึณปึม เฮ, วี ปัก อาแซก อี มูห ฆอน อัน, เบลห แดง เฮ ตี. 10ปัน ตี อัน ดึห อาตึม, โจะ แด อัน, ต็อห ดี ซัด ยัม ฆอน อัน. 11ดอ อัน ตี อามู อามาด เฌาพรา อี กอย แคง ฆางหราว แดะ อัน ต็อห, “อึย อาบราฮัม.”

อัน วี ต็อห, “โอว กอย ดี นี.”

12อามู อามาด เฌาพรา วี ต็อห, “แกวะ โจะ แด แม, แกวะ โบง มาเซ ดี ฆอน แม. ดอ ตี นี, โอว แฮะ นับ, แม แฮะ โยว โอว. แม ตู โฆรบ อูน ฆอน ปี ร็อก แม.”

13ดอ อัน ตี อาบราฮัม ตึอน วี ยอด. อัน บอ ยึร, มาบู อาโล็ง อู โดว แฮะ กอย แคง นัง, อาว ฮู ปึอน เลห. อัน ฮาว ดึห มาบู ตี, หลู ดี เฌาพรา, แตห อึณ แบน ปี ดี หลู ปี โฮม กาซึม เงา, แตห อึณ กาดาง ฆอน อัน. 14อาบราฮัม ตึอน แตห โดง ตี จืร, “เฌาพรา ยึร ปี โลว โอว.” ปาย ตี กอ ฌัม อาตึร เฆ ดูอี กาลาง ลอง นอน ตี ต็อห, “อึณ มูห โดง ดี แตห เฌาพรา ดูอี ยึร ปี โลว เฆ.”#22:14 เฆ ต็อห ปาย ตี โคว, อัน เฌา จอย อาบราฮัม ยึร มาบู ปี ดี โลว หลู

15ปัน ตี อามู อามาด เฌาพรา วี แดะ อาบราฮัม ปอ อู เฌณ, กาลาง โฆรห อี เลห แคง ฆางหราว. 16อัน ต็อห, “เฌาพรา ต็อห ดี แม, ‘โอว เฌาพรา แฮะ มูห, แฮะ หมาน, ตู นับ ดี กาโลว. โคว, โอว ดัว กาดีก ซัดฌา ดี แม. บอ กาดีก ซัดฌา ตี แฮะ หมาน ปี โอว แฮะ หมาน. แม แฮะ หงา ดี หลู ฆอน แม ดี โอว. แม ตู มึห ฆอน ปอ อู วี. แม ยี ตู โฆรบ อูน ฆอน ตี, ตู แคร โอว ดึห ฆอน แม ตี. 17โคว, โอว ดี บอ ม็องการา ดัว ดี แม กืน กาเซา. โอว ดี โบง แตห เฆ หลูกหลาน แม กืน กาเซา, แตห เฆ กืน แคะ กืน ซีมัณ อี กอย แคง เบลณ, แตห เฆ กืน แคะ กืน กาฮาต อี กอย โคบ อึม นัมมูกซารา. เฆ หลูกหลาน แม, เฆ ดี บอ อึบ รันซู เฆ. 18เฆ อาโมยว ดูอี, อี กอย ดอน นา ดอน โปละ แดง กาดาย, เฆ ดี ลาย ม็องการา ดัว, ต็อห, “แตห เฌาพรา ม็องการา ดัว ดี แม ปี อัน เฌา แฮะ ม็องการา ดัว ดี หลูกหลาน อาบราฮัม ตึอน.” เฆ ดี กาลาง ปาย ตี โกบ แฮะ โบง โดบ แม แคะ ปี จัร โอว แม โบง.’”

19อามู อามาด เฌาพรา ตึอน แฮะ ฮอต กาลาง ปาย ตี อาบราฮัม วี เวณ โดง กอย หมาย อัน. เฆ วี ฮาว ดี รึม, ฌัม โดง จืร บีราเซบา. อัน วี กอย เหลณ แคง มืง บีราเซบา ตี.

ลอง ฆอน อานาโฮว

20ปัน ตี อึณ วี มึห ดูอี อี กาลาง ดี อาบราฮัม ลอง อีกัด อัน. เฆ ต็อห, “บอ นาง แมก แฮะ มึห ฆอน อีมาย ดัว ดี อีกัด แม อี จืร อานาโฮว. 21ฆอน อานาโฮว ตึอน, อี มูห ฆอน ฆีณ อัน จืร อาอูด. แฮะ ฮอต, อึณ วี มึห วา อี จืร อาบูด ฆาย อาเกมูเอน. อาเกมูเอน ตี บอ แบน ฆูณ อาราม. 22อึณ มึห บอ อาเกเซด, อาฮาโซว, อาพีดาด, อายีจาบ บอ อาเบด.” 23อาเบด แฮะ แบน ฆูณ นาง แบก. เฆ ฆอน อีมาย ดา วี ตี, เฆ มูห ฆอน นาง แมก. ฆูณ เฆ มูห อานาโฮว อี มูห อีกัด อาบราฮัม ตึอน. 24บอ อีบึณ อานาโฮว ปอ อู วี, อี จืร นาง รูมา แฮะ ปึอน ฆอน อีมาย. เฆ จืร อาเทบา, อาฆาฮาม, อาทาฮาซา บอ อามาคา.

Currently Selected:

ดอ โฆว 22: pce

Highlight

Copy