MAHTE 4

Yesu Agung Alau Hkrum Ai Lam

(Mrk 1:12-13; Luk 4:1-13)

1Dai hpang Nat e gunglau ai hkrum u ga, dai Wenyi gaw Yesu hpe nam mali de woi bang wa nu ai. #Mrk 1:12-13; Luk 4:1-13. 2Ya shani mali shi ya, shana mali shi na tup, shi lusha gam ai hpang Yesu kawsi wu ai. 3Shaloi, dai gunglau ai Nat shi kaw du nna, “Nang Karai Kasang a Kasha rai n-yang gaw, ndai nlung ni hpe muk tai mu ga, tsun u!,” ngu wu ai.

4Rai ti mung Yesu gaw, “Masha gaw muk hte sha hkrung nga lu na n rai, Karai Kasang a n-gup hta na pru ai mungga nlang hte hte hkrung nga lu na ra ai, nga nna chyum laika hta tsun nga ai,” ngu nna htan wu ai. #Trj 8:3.

5Shaloi Nat gaw Yesu hpe, dai Chyoi Pra ai Yerusalem Mare de woi wa nna Nawku Htingnu a tsaw dik ai nchyun e shadun da nhtawm, #Neh 1:1,18; Esa 48:2; Shr 11:2. 6“Nang Karai Kasang a Kasha rai n yang gaw, na hkum nan le de jahkrat dat u: hpa majaw nga yang,

‘Karai Kasang gaw, na a matu shi a lamu kasa ni hpe shi hkang da nu ai rai nna,

shanhte gaw na a lagaw nlung hta n ahtu u ga,

shanhte a lata ni hte nang hpe pawn la na mara ai nga nna ka da nga ai,’”

ngu nna shi hpe tsun wu ai. #Shk 91:11-12.

7Yesu gaw, “Dai Madu na a Karai Kasang hpe nang chyam yu lu na n rai, nga nna mung ka da nga ai,” ngu wu ai. #Trj 6:16.

8Bai, Nat gaw, nachying tsaw la ai bum ntsa de shi hpe woi lung wa da nna, mungkan ga na mungdan ni hte dai ni a hkik hkam ai arawng sadang hpe, shi hpe madun dan nhtawm, 9“Nang dingnyawm nna ngai hpe nawku n yang gaw, ndai yawng mayawng hte hpe ngai nang hpe jaw na de ai,” ngu nna Yesu hpe tsun wu ai.

10Shaloi Yesu gaw, “Satan e pru mat wa u! ‘Dai Madu na a Karai Kasang hpe nang nawku lu na rai nna, shi hpe hkrai daw jau lu na re ai!, nga nna she ka da nga ai,” ngu nna shi hpe htan wu ai. #Trj 6:13; 10:20.

11Shaloi jang dai Nat gaw shi kaw na pru mat wa nna, lamu kasa ni du nna shi hpe galaw daw mu ai.

Galile Mung E Yesu Magam Gun Hpang Ai Lam

(Mrk 1:14-15; Luk 4:14-15)

12Yawhan hpe htawng hta rim bang da ai lam Yesu na wu yang, shi Galile mung de htawt sa mat wa ai. #Mat 1:14; Luk 3:20; Yhn 4:43. 13Yesu gaw Nazaret mare e anga nga ai; Zebulun mung hte Naphtali mung a lapran Galile nawng makau e nga ai Kaperna-um mare de shi sa du nna anga nga ai. 14Ndai zawn byin wa ai lam gaw, myihtoi Esaia tsun ai ga dik wa shangun na matu rai nga ai. Myihtoi Esaia gaw:

15“Zebulun hte Naphtali mung,

Yawdan hka wora hkran, nawng de sa wa ai lam,

dingyang na amyu kaga ni nga nga ai Galile mung,

16nsin kata e nga pra nga ai masha ni gaw,

nhtoi kaba hpe mu lu na mara ai,

si ai mung hte de a shingnip kata e nga pra nga ai ni a ntsa de

nhtoi dawng pru na ra ai,” nga nna htawn tsun ai. #Esa 42:7; Luk 2:32.

17Dai aten kaw nna Yesu gaw, “Sumsing lamu a mungdan du magang ra ai rai nna, nanhte a yubak mara ni kaw na myit malai lu nna kayin wa marit!,” nga nna hkaw tsun hpang nga ai. #Mrk 1:14,45.

Nga Hkan Sha Ai Masha Mali Hpe Shaga La Ai Lam

(Mrk 1:16-20; Luk 5:1-11)

18Ya, Yesu Galile nawng makau e garet hkawm nga yang, shan nau rai nga ai nga hkan sha ai masha marai lahkawng, Petru ngu ai Simun hte shi a kanau Andre yan gaw, shan a sumgawn langai mi hte nawng hta e nga hkan nga ma ai hpe shi mu hkrup wu ai. #Mrk 1:16-18; Luk 5:2; Yhn 1:40-42. 19Yesu gaw shan hpe, “Ngai kaw hkan nang marit, masha hpe hkan hkwi na lam ngai nan hpe sharin ya made ga,” ngu nna shan hpe shaga wu ai. #Luk 5:10-11. 20Shaloi jang shan a sumgawn ni hpe kau da nna shi kaw hkan nang ma ai.

21Bai dai kaw nna hkawm wa yang, kaga shan nau rai nga ai Zebedi a kasha Yaku hte kanau Yawhan hpe mu hkrup wu ai. Shan gaw kawa Zebedi hte rau li hta nga nga nna shanhte a sumgawn ni hpe kapa nna hkyen lajang nga ma ai. Yesu gaw shan hpe shi a hpang hkan nang na matu shaga la mu ai. 22Shaloi jang, li hte shan a kawa hpe kau da nna Yesu kaw hkan nang ma ai.

Sharin Shaga, Hkaw Tsun, Shamai Shatsai Hkawm Ai Lam

(Luk 6:17-19)

23Yesu gaw Galile mung ting hta kawan hkawm let, tara jawng ni hta sharin shaga nga nna, dai Mungdan a lam Kabu Gara Shiga ni hpe hkaw dan ai hte, mung masha ni a machyi makaw amyu myu hte ana ahkya amyu myu hpe shamai shatsai ya wu ai. #Mat 9:35; Mrk 1:21,34,39; Luk 4:15,44. 24Dai majaw shi a kajai gumhkawng ai shiga gaw, Suri mung ting hta pri rai wa sai rai nna, masha ni gaw, hkum n pyaw ai ni, ana ahkya amyu myu a majaw machyi hkam sha nga ai ni, nat kap ai ni, ma mu mu ai ni hte lagaw lata katsing si ai ni hpe shi hpang de woi sa mu ai rai nna, shi shanhte hpe shamai shatsai ya mu ai. 25Shing rai, Galile mung hte Dekapoli mung, Yerusalem mare hte Yawdan hka wora hkran na masha wunawng wuwa kaba shi kaw hkan nang ma ai.

Currently Selected:

MAHTE 4: JCLB

Highlight

Copy