YAWHAN 5

Hka Lawng Makau E Machyi Shamai Ya Ai

1Dai hpang Yuda masha ni a nawku htung hte seng ai poi langai mi nga ai rai nna, Yesu gaw Yerusalem mare de lung wa ai. 2Yerusalem mare na Sagu Chyinghka makau e Hebre ga hku Betzahta #5:2: Betzahta: Behtesda, Behtesda ndai mying ni maren sha re. ngu ai hka lawng langai mi nga ai, dai hka lawng hpe shinggrup nna jarawp manga mung gap da ma ai. 3Dai jarawp ni hta, machyi makaw re ai ni, myi kyaw ai, lagaw hten ai, hkum katsing si ai masha ni law law taw nga ma ai. 4(Karai Kasang a lamu kasa langai mi gaw jahkring jahkring sha hka lawng de yu sa nna hka hpe shamu shangun wu ai rai nna, dai masha ni gaw hka shamu wa na hpe la nga ma ai. Shing rai hka shamu wa ai hte rau shawng nnan hka lawng de shang lu ai wa gaw ana ahkya mat nga malu ai) #5:4: Manuscript: Manuscripts nkau mi hta n shalawm da ma ai majaw, Dr. Hanson gale ai hta n bang shalawm ai re. 5Dai yang e sumshi matsat ning tup machyi ai masha langai mi mung lawm nga ai. 6Yesu gaw dai wa kaleng taw nga ai hpe mu nna, shing rai machyi ai na la sai, chye wu ai majaw, dai wa hpe, “Nang mai mayu n ni?,” ngu nna san wu ai.

7Dai machyi ai wa gaw, “Madu e, hka shamu wa jang, hka lawng de ngai hpe woi shang na masha n lu nngai; ngai shang na ngu nga yang, kaga masha langai ngai nye a shawng e shang mat mat re ai,” ngu nna shi hpe htan wu ai.

8Shaloi Yesu gaw, “Rawt u, na a hpun nba panep la hpai nna hkawm wa su,” ngu nna dai wa hpe tsun wu ai. 9Shaloi jang dai masha gaw mai mat wa nna, shi a hpun nba panep hta hpai let hkawm mat wa ai.

Dai shani gaw Bansa Nhtoi rai nga ai. 10Dai re ai majaw, ahkang aya lu ai Yuda masha ni gaw, dai machyi mai ai wa hpe, “Dai ni Bansa Nhtoi rai nga ai rai nna, nang hpun nba panep hpai ai gaw anhte a tara hte nhtan shai nga ai,” ngu mu ai.#Pru 20:10; Neh 13:19; Mat 12:2; Mrk 2:24.

11Dai wa gaw, “Ngai e shamai ya ai wa ngai hpe na a hpun nba panep hta hpai nna hkawm wa su, nga nna ngai hpe tsun ai,” ngu nna shanhte hpe htan mu ai.

12Shanhte gaw, “Nang hpe hpun nba panep la hpai nna hkawm wa su nga ai wa gaw kadai wa rai ta?,” ngu nna san mu ai.

13Rai ti mung machyi mai ai wa gaw, Yesu hpe kadai re ai n chye kau dat wu ai, hpa majaw nga yang, dai yang e masha hpawng nga ai majaw Yesu gaw mayun pru mat wa sai.

14Dai hpang Madu Yesu gaw, Nawku Htingnu e dai wa hpe mu hkrup nna, “Yu u, ya nang hkam kaja nit dai; shawng na hta grau sawng ai tsin-yam n hkrum n ga, yubak bai hkum galaw et,” ngu nna shi hpe tsun wu ai.

15Dai wa gaw pru wa nna shi hpe shamai ya ai wa gaw, Yesu rai nga ai hpe, ahkang aya lu ai Yuda masha ni hpe tsun dan wu ai. 16Bansa nhtoi hta shamai shatsai ai lam galaw ai majaw, dai shani kaw nna Yesu hpe zingri sharu shatsang ai lam galaw hpang wa ma ai. 17Shaloi Yesu gaw, “Nye Wa gaw ya du hkra pyi amu galaw nga ai rai nna, ngai mung galaw lu na rai nga ai,” ngu nna shanhte hpe htan mu ai.

18Ning nga nna tsun ai majaw mung, Bansa Nhtoi hte seng ai Tara hpe tawt lai ai hta n ga, Karai Kasang hpe shi a Kawa re ai ngu nna shi hkum hpe Karai Kasang hte shabung wu ai majaw, ahkang aya lu ai Yuda ni shi hpe sat kau lu na lam grau nna tam ma ai. #Yhn 7:19; 10:30; Hpl 2:6.

Kasha A Ahkang Aya

19Dai re ai majaw, ngai nanhte hpe kaja wa teng teng tsun made ga, Kasha gaw tinang a myit ai hku hte hpa mung n galaw lu ai; Kawa galaw ai amu ni hpe mu lu ai hte maren shi galaw nga ai. Kawa galaw ai lam shagu Kasha wa mung hkan galaw lu na rai nga ai. 20Kawa gaw Kasha hpe tsaw ra wu ai rai nna, shi nan galaw nga ai amu yawng mayawng Kasha wa hpe madun wu ai, ndai amu ni hta grau kaba ai amu ni hpe pyi galaw na matu Kawa gaw Kasha hpe madun dan na ra ai rai nna, nanhte yawng mau mahka na marin dai. 21Kawa gaw si ai ni hpe jahkrung sharawt la nna asak jahkrung ya ai zawn Kasha wa mung shi ra ai ni hpe asak jahkrung ya wu ai. 22Kawa gaw kadai hpe mung tara n dara ai sha, tara dara ai ahkang ma hkra Kasha wa hpe ap ya nu ai. 23Dai rai nna masha ni gaw Kawa hpe hkungga ai hte maren, Kasha wa hpe mung hkungga na mara ai. Kasha wa hpe n hkungga ai masha kadai mung, Kasha wa hpe shangun dat ai Kawa hpe n hkungga ai wa rai nga ai.

24Ngai nanhte hpe teng teng tsun made ga, nye a ga madat mara nna ngai hpe shangun dat ai wa hpe kam sham ai wa kadai mung, htani htana asak lu la wu ai. Shi gaw tara daw dan ai n hkrum ai sha, si ai kaw na asak hkrung ai de kawt lai wa ai wa rai nga ai. 25Ngai nanhte hpe teng teng tsun made ga, si nga ai ni gaw Karai Kasang a Kasha a nsen na lu na ahkying du wa ra ai rai nna dai ahkying gaw ya e pyi rai nga ai. Dai hpe na la ai ni mung asak hkrung nga na mara ai. 26Kawa gaw shi hkum dai asak daju rai nga ai hte maren, shi gaw Kasha wa hpe mung asak daju shatai nu ai. 27Shi gaw Masha Kasha rai nga ai majaw tara dara na ahkang mung shi hpe ap ya nu ai. 28Ndai lam hpe nanhte hkum mau myit, masha jasi ni nlang hte gaw shi a nsen na nna shanhte a lup ni hta na pru wa na ahkying du na ra ai. 29Kaja ai arawn alai hkan sa galaw ai ni gaw htani htana asak hkrung ai lam hkam la na matu mung, n shawp ai arawn alai hkan sa galaw ai ni chyawm gaw tara daw dan ai hkrum lu na matu mung, si ai kaw na hkrung rawt shajang na mara ai.#Esa 26:19; Dan 12:2; 1Ko 15:52; 1Ht 4:16.

Yesu A Lam Sakse Hkam Ai Ni

30Ngai gaw nye a myit hte hpa mung n galaw lu nngai; ngai gaw Karai Kasang tsun ai hte maren sha jeyang nngai; nye a jeyang daw dan ai lam mung ding man li ai; hpa majaw nga yang, ngai gaw ngai ra ai lam hkan galaw na matu shakut nga nngai n rai, ngai e shangun dat ai wa a ra ai lam hkan galaw na matu chyu sha tam shakut nga nngai.

31Ngai gaw nye a lam ngai nan ngai sakse hkam la nga nngai rai yang gaw ngai hkam ai sakse teng na li ai n rai. 32Rai ti mung nye a lam sakse hkam ya ai wa kaga langai mi she nga ai. Dai wa nye a lam tsun sakse hkam ya ai lam gaw teng man nga ai hpe ngai chye nngai. 33Nanhte gaw Yawhan hpang de kasa ni hpe shangun dat myit dai rai nna, shi gaw teng man ai lam maga de sakse hkam ya nu ai.#Yhn 1:19-27,32. 34Ngai gaw masha langai mi e sakse hkam ya ai lam lu la ra ai wa n rai, rai ti mung nanhte hkye hkrang la hkrum myit ga, ngu nna ndai lam ngai tsun nngai. 35Yawhan gaw pyengdin langai mi zawn tu grung ai hte htoi nga ai rai nna, nanhte gaw shi a nhtoi hta tawng marang mi kabu pyaw nga mayu myit dai.#Mat 13:20; Mrk 6:20; 2Pe 1:19. 36Rai ti mung ngai lu ai sakse gaw Yawhan hkam ya ai sakse hta grau kaba li ai, hpa majaw nga yang, ngai galaw ai gaw, ngai gun hpai shangut na matu, nye Wa e ngai hpe ap ya ai amu ni rai nga ai rai nna, ya ngai gun hpai nga ai amu ni e pyi, ngai hpe nye Wa e shangun dat ai lam sakse hkam ya nga ai. 37Ngai hpe shangun dat ai nye Wa mung nye a lam sakse hkam ya ni ai. Nanhte gaw nye Wa a nsen hpe galoi mung n na yu myit dai, shi a myiman hpe mung n mu yu myit dai. 38Shi shangun dat ai wa hpe nanhte n kam n sham myit dai majaw, nanhte a kraw lawang ni hta shi a mungga mung n rawng malit dai. 39Chyum laika ni hta na nanhte htani htana asak mu tam la lu na re ai, nga nna shadu myit dai majaw, dai laika ni hta nanhte hkan sawk hti yu rai myit dai, dai laika ni nan nye a lam sakse hkam nga ai!#Yhn 5:46; Trj 18:15,18; Luk 16:29; Kas 17:11. 40Dai re ai mi, asak hkrung ai lu la na matu nanhte gaw ngai hpang de n sa mayu myit dai.

41Ngai gaw masha e shakawn shagrau ai hkam la na lam tam nga nngai n rai. 42Rai ti mung nanhte kaning re ai masha ni rai nga myit dai hte nanhte hta Karai Kasang hpe tsaw ra ai myit n rawng nga malit dai hpe ngai chye nngai. 43Ngai gaw nye Wa a ahkang aya hte du sa nngai rai ti mung nanhte ngai hpe n hkap la myit dai, kaga langai wa mi tinang nan a ahkang aya hte du sa ai rai taw gaw, nanhte shi hpe hkap la na marin dai. 44Nanhte gaw shada da shakawn shagrau nna arawng sadang jaw ai hpe hkam la mayu myit dai, rai ti mung langai sha rai nga ai Karai Kasang e jaw ai shakawn shagrau ai hpe hkam la na matu gaw nanhte n shakut myit dai, dai re ai mi nanhte gaw ngai hpe kaning rai kam sham lu na myit ta? 45Nye Wa a man e ngai nanhte hpe mara shagun na ra ai ngu nna hkum nawn myit, nanhte hpe mara shagun na wa gaw, nanhte myit mada shamyet shanat nga ai Mawshe nan rai nga ai. 46Mawshe hpe nanhte kaja wa sha kam myit dai rai yang gaw, ngai hpe mung kam na rai myit dai, hpa majaw nga yang, Mawshe gaw nye a lam ka da nu ai. 47Rai ti mung nanhte gaw Mawshe ka da ai hpe n kam myit dai majaw nye a ga hpe kaning rai kam lu na myit ta? ngu nna shanhte hpe tsun mu ai.

Currently Selected:

YAWHAN 5: JCLB

Highlight

Copy