YEREMIA 52
52
Yerusalem Hkrat Sum Ai
(2Hk 24:18-25:7)
1Zedekia gaw Yuda hkawhkam tai wa ai shaloi asak hkun langai ning rai nna Yerusalem hta shi langai ning up nga ai. Shi a kanu a mying gaw Hamutala rai nna Libna mare hta nga ai Yeremia a shayi sha rai nga ai. 2Hkawhkam Zedekia gaw Hkawhkam Yehoiakim galaw ai lam hte maren dai Madu hpe n hkru ai amu galaw shut nu ai. 3Dai Madu gaw Yerusalem hte Yuda amyu masha ni hpe pawt sindawng wu ai majaw shanhte hpe shi a myi man kaw na gawt shapraw kau wu ai.
Zedekia gaw Babelon Hkawhkam Nebuhkadneza hpe gumlau wu ai, 4dai rai nna, Nebuhkadneza hte shi a hpyen luksuk ni gaw Zedekia hkaw dung ai jahku ning na shata shi a nhtoi shi ya shani e Yerusalem hpe gasat ma ai. Shanhte gaw mare shinggan e dap jung nna mare grup grup kaduk ni htu nhtawm mare bunghku hpe wang da ma ai, #Eze 24:2. 5Zedekia hkaw dung ai shi langai ning du hkra dai mare hpe wang da ma ai. 6Dai shaning a shata mali a nhtoi jahku ya ngu na shani hta, dai mare e hkuwa kaba wa ai majaw amyu masha ni sha na lusha hpa mung n nga nga sai. 7Mare bunghku ni mung daw agrawp mat nga ai. Babelon masha ni dai mare hpe wang da nga ma ti mung, hpyenla ni yawng gaw hkawhkam wa a sun makau na bunghku lahkawng a lapran na chyinghka lam hku shana e pru mat wa nhtawm Yawdan Kadit ang ang de hprawng pru mat wa ma ai. #Eze 33:21. 8Rai ti mung, Babelon hpyen luksuk ni gaw hkawhkam Zedekia hpe hkan shachyut nang nna Yerihko pa layang e rim la lu ma ai; shi a hpyenla ni yawng mung shi hpe shakram kau da ma ai. 9Zedekia gaw Hamat mung Ribla mare e nga ai Hkawhkam Nebuhkadneza hpang de woi sa ai hkrum ai hte dai yang e Nebuhkadneza gaw shi hpe tara daw dan wu ai. 10Dai Ribla mare e Zedekia yu nga yang, Zedekia a shadang sha ni hpe shi a man e sat kau ma ai; Yuda mung na du salang ni hpe mung sat kau ma ai. 11Dai hpang, Zedekia a myi hpe achyaw baw kau ya nhtawm, hpri sumri hte gyit nna Babelon mung de woi wa ma ai. Zedekia gaw shi si mat ai shani du hkra, Babelon mung e htawng rawng nga wu ai.
Nawku Htingnu Hpe Jahten Shaza Kau Ai
(2Hk 25:8-17)
12Babelon Hkawhkam Nebuhkadneza hkaw dung ai shi jahku ning ngu na, shata manga e nhtoi shi ya shani hta, hkawhkam wa a hpaji jaw hkringmang hte luksuk hpyen du rai nga ai Nebuzaradan gaw Yerusalem de shang wu ai. 13Shi gaw Yerusalem na Nawku Htingnu, hkawhkam htingnu ni hte Yerusalem hta nga ai ahkyak masha ni a dum nta ni yawng hpe nat kau wu ai; #1Hk 9:8. 14shi a hpyenla ni gaw mare bunghku ni hpe agrawp shadaw kau ma ai. 15Dai hpang, Nebuzaradan gaw dai mare hta ngam nga ai amyu masha ni, kung kyang ai amu galaw masha ni hte Babelon mung de rap sa wa na ni hpe Babelon mung de woi mat wa wu ai. 16Rai ti mung, shi gaw matsan htum ai amyu masha ni hpe Yuda mung e shangam kau da nhtawm, sut gan n madu lu ai ni hpe dai mung na sabyi sun ni hte hkauna hkan amu shang galaw na matu tawn kau da wu ai.
17Dai Babelon masha ni gaw magri mang shadaw ni hte Nawku Htingnu kata hta nga ai leng ni hpe mung, kaba ai magri mang angdung ni hpe mung agrawp mani kau nna dai magri mang ni yawng hpe Babelon mung de la mat wa ma ai. #1Hk 7:15-47. 18Shanhte gaw shingban ni hte tawn hkungri hpe jasan jaseng yang lang ai dap dagawt ban, pyengdin shadun ni, shagu hkungga nawng jau ai kaw na sai lapri yang lang ai jarung, manam pyaw ai baw wan nat hkungga nawng jau yang lang ai jarung ni hte Nawku Htingnu kata nawku daw jau ai shaloi lang ai kaga magri mang hte seng ai arung arai ni yawng hpe mung la mat wa ma ai. 19Shanhte gaw aja gumhpraw ni hte galaw da ai ban jarung ni hte wan n-ga mara lang ai di ni, shagu hkungga nawng jau ai kaw na sai lapri yang lang ai jarung ban ni, wan n-wu dagawt kau ai ban pa ni, pyengdin shadun ni, manam pyaw ai baw hkungga nawng jau yang lang ai jarung ni hte sabyi hkungga ru jaw ai shaloi lang ai jarung nga manga mahkra hte hpe mung la mat wa ma ai. 20Hkawhkam Shawlumon Nawku Htingnu gaw gap yang lang na matu galaw da ai shadaw lahkawng, leng ni, usu shi lahkawng hte hpai shadaw da ai grai li nna kaba ai angdung magri mang arung arai ni rai nga ai. 21-22Bung ai shadaw lahkawng hta langai hte langai gaw tsaw de pe 27 rai nna grup grup de pe 18 rai nga ai. Dai gaw hpungkraw rai nna hpri rai gaw yungnu 3 htat nga ai. Dai shadaw yan a ntsa na magri mang bandung gaw pe 7 chyen rai nna, de a grup grup mahkra hta hkainu si nampan ni hte mahkri shawn maka ka shatsawm da nga ai. Dai ni yawng hpe mung magri mang hte galaw da nga ai. 23Mahkri shawn maka ka da ai shadaw langai hpra hta, hkainu si nampan maka yawng latsa rai nna, jahku shi kru hpe ga kaw na mu lu nga ai.
Babelon Mung De Woi Mat Wa Hkrum Ai Yuda Amyu Masha Ni
(2Hk 25:18-21,27-30)
24Hpyen du Nebuzaradan gaw jat nna hkinjawng agyi Seraia hpe mung, shi hta lawu grit re ai hkinjawng Zehpania hte kaga ahkyak ai Nawku Htingnu salang masum hte hpe mung woi mat wa wu ai. 25Hpyen hpung ni hpe woi awn ai hpyen du wa hpe mung, dai mare hta naw ngam nga ai hkawhkam wa kam lu ai hpaji jaw salang sanit shi hpe mung, hpyen du wa a ningtau rai nga ai hpyen rung jahpan jum agyi wa hte kaga ahkyak ai masha marai kru shi ni hpe mung woi mat wa wu ai. 26Nebuzaradan gaw dai masha ni hpe Babelon hkawhkam wa nga ai Hamat mung Ribla mare de woi wa wu ai. 27Hkawhkam wa gaw dai shara e shanhte yawng hpe adup ai hte kahtam sat kau wu ai.
Dai rai nna, Yuda amyu masha ni gaw shanhte a mungdan kaw nna tsasam mungdan de bawng woi la hkrum nga ma ai. 28Da ndai gaw Nebuhkadneza woi mat wa ai bawng dung masha ni a ka matsing da ai jahpan rai nga ai. Shi hkaw dung ai sanit ning hta, Yuda masha 3,023 hte hpe woi wa nu ai; 29shi matsat ning hta, masha 832 hpe Yerusalem mare kaw nna woi wa nu ai, 30hkun masum ning hta e, Yuda masha 745 hpe Nebuzaradan a lata hte woi wa sai. Yawng rai yang, woi la hkrum ai masha yawng 4,600 rai nga sai.
31Ewila-merodak Babelon hkawhkam tai wa ai shaning hta, bawng dung nga ai kaw na shalawt dat na nga, Yuda Hkawhkam Yehoiahkin hpe matsan dum ai myit madun dan wu ai. Dai byin ai shaning gaw Yuda Hkawhkam Yehoiahkin bawng dung hkrum ai sumshi sanit ning, shata shi lahkawng a hkun manga ya shani e rai nga ai. 32Ewila-merodak gaw shi hpe matsan yu dum wu ai hte shi hte rau Babelon mung e bawng dung nga ai kaga hkawhkam ni yawng hta grau kaba ai arawng sadang hte ahkang aya jaw wu ai. 33Dai rai nna, Yehoiahkin gaw bawng dung hpun palawng hpe galai kau nna shi a ngam nga ai asak prat tup hkawhkam wa a sha ku hta sha lu nga wu ai. 34Shi hkrung nga ai prat dingsa e, shani shagu na shi a ra kadawn ai lam hpe man man garan jaw ya hkrum nga wu ai.
Currently Selected:
YEREMIA 52: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.
