HEBRE 4

1Ya Karai Kasang gaw anhte hpe ngwi pyaw ban sa ai lam hkam la shangun na nga nna tsun da ai ga ndat jaw da mani ai. Dai ga ndat jaw da sai ngwi pyaw ban sa ai lam hpe nanhte hta na langai mi mung n lu la ai n nga myit ga, anhte sadi nga ga. 2Hpa majaw nga yang, anhte gaw moi shawng de na masha ni hte maren, dai Kabu Gara Shiga hpe na yu saga ai. Rai ti mung shanhte na lu ai Kabu Gara Shiga gaw, shanhte a matu akyu n nga malu ai, hpa majaw nga yang, shanhte na la ai shaloi shanhte dai hpe makam masham hte n hkap la ma ai. 3Kam sham ai ni anhte chyawm gaw, Karai Kasang ga ndat jaw da sai ngwi pyaw ban sa ai lam hpe hkam la lu ga ai. Dai gaw,

“Ngai shanhte hpe pawt sindawng mawe ai rai nna,

‘Shanhte hpe ngai jaw na ngu ai ngwi pyaw ban sa ai mung de galoi mung n shang lu mu ga,’ ngu nna ngai ga ndat hte dagam da ni ai,’” nga nna shi tsun ai ga hte maren sha rai nga ai.

Mungkan ga hpe shi nnan hpan da ai ten kaw nna shi galaw ra ai amu hpe yawng shangut da nu ai. Rai tim ndai ga hpe shi naw tsun wu ai. #Heb 3:11-14; Shk 95:11. 4Hpa majaw nga yang, Chyum Laika shara mi hta sanit ya nhtoi hte seng nna, “Karai Kasang gaw sanit ya nhtoi hta shi a magam bungli yawng kaw na hkring sa nga ai,” nga nna tsun da nga ai. #Nin 2:2; Pru 20:11; 31:17. 5Ndai lam hte seng nna bai kahtap tsun tawn ai gaw, “Ngai jaw na ngu ai ngwi pyaw ban sa ai mung hta shanhte galoi mung n shang lu na ma ai,” nga nna tsun da nga ai. 6Dai Kabu Gara Shiga hpe shawng na la ai ni gaw, dai shiga hpe n kam n sham ma ai majaw dai ban sa ai de n shang lu ma ai. Dai rai nna, dai ban sa ai hpe kaga masha ni hpe mahtang hkam la na ahkang jaw kau mu ai. 7Shing rai hkam la ai lam hpe, “Dai ni” ngu ai nhtoi kaga langai mi Karai Kasang bai masat da ya sai, ngu ai lam langai mi hte sakse madun nga ai. Madu gaw Chyum Laika hta tsun da sai hte maren, shaning law law na ai hpang Dawi a n-gup hte,

“Nanhte dai ni shi a nsen na myit yang gaw,

nanhte du hkum ja nga myit,” nga nna bai tsun ai.#Heb 3:7; Shk 95:7.

8Lama wa Karai Kasang ga sadi jaw da sai ban sa ai lam hpe Yawshu gaw amyu masha ni hpe jaw ngut sai rai yang, nhtoi kaga a lam Karai Kasang hpang e bai tsun sana n rai. 9Dai rai nna sanit ya shani hta Karai Kasang ban sa nga ai zawn Karai Kasang a amyu masha ni a matu ban sa na shani nhtoi lani mi naw nga nga ai. 10Hpa majaw nga yang, Karai Kasang ga ndat jaw da ai ban sa ai hpe hkam la sai ni kadai mung, Karai Kasang ban sa ai zawn, shi a amu bungli hta na ban sa na ra ai. 11Dai rai nna shanhte a n kam n sham ai a majaw ban sa ai de n shang lu ai Israela masha ni zawn anhte kadai hta mung n byin u ga, dai ban sa ai de shang lu na matu anhte atsam htum hkra shakut shaja nga ga.

12Hpa majaw nga yang, Karai Kasang a mungga gaw, ahkrung nga ai hte alet nga ai rai nna, nshan lahkawng maga dai ai hpa baw ntawng nhtu hta mung grau dai nga ai. Dai gaw wenyi hte myit masin hpe mung, nra hkrihkraw hte laswi hpe mung, yawng dinghkren ginhka chye nna masha a kraw lawang kata na maw mawn ai lam ni hte myit mamyit hte hpe jeyang hparan ya nga ai. 13Karai Kasang n mu n chye hkra makoi magap da lu ai hpa mung n nga ai; yawng mayawng gaw shi a man e dan leng nga ai rai nna anhte galaw ai lam shagu shi hpe jahpan dan lu na rai nga ga ai.#Yob 26:6; Shk 33:13-14; 90:8; Gsh 15:11.

Hkinjawng Agyi Kaba Ngu Ai Yesu

14Dai rai nna anhte yin la kam sham nga ai nawku htung makam masham hta maju jung nga ga, hpa majaw nga yang, Karai Kasang a man de hkrang shang wa sai Karai Kasang a Kasha Yesu ngu ai Hkinjawng Agyi Kaba langai mi hpe anhte lu nga ga ai. 15Hpa majaw nga yang, anhte a Hkinjawng Agyi Kaba wa gaw, anhte a ra rawng gawng kya ai lam hpe matsan n chye dum ai wa n rai. Anhte zawn lam shagu hta gunglau hkrum yu ti mung yubak mara n galaw ai Hkinjawng Agyi Kaba she anhte lu ga ai. 16Dai rai nna anhte nden ja ai myit hte Karai Kasang a chyeju tingnyang man de sit shang wa ga. Shing rai yang anhte gaw matsan dum ai lam hkam la lu na hte, ra kadawn ai aten hta nan anhte hpe karum ai chyeju lu la na ga ai.

Currently Selected:

HEBRE 4: JCLB

Highlight

Copy