HEBRE 2

Hkye Hkrang La Ai Lam Kaba

1Dai re ai majaw anhte lam n yit mat wa u ga, anhte na la sai dai teng man ai lam hta grau nna kangka ai hte magra noi nga lu ra ga ai. 2Lamu kasa ni a n-gup hte anhte a ji wa ni hpe tsun da ai mungga gaw teng man ai tara rai nna, dai tara hpe n madat n mara tawt lai ai ni gaw tinang hte ging dan ai ari hkam la na ma ai lam teng yang gaw, 3ndai hte wa galu kaba ai hkye hkrang la ai chyeju tara hpe anhte n gawn n sawn di ga yang gaw, anhte gara hku nna yubak mara a daw dan ai kaw na kaning rai lawt lu na ga ta? Dai hkye hkrang la ai lam hpe shawng npawt e Madu a n-gup hte nan tsun shana nna, na la ai ni gaw dai tara teng nga ai lam sakse madun mani ai. 4Dai hta kaga Karai Kasang gaw shi nan lamik kumla ni, mauhpa amu amyu myu galaw dan ai hku nna mung, Chyoi Pra ai Wenyi hte seng ai chyeju kumhpa ni hpe shi a myit ai hku hte maren garan jaw ai hku nna mung, shanhte a sakse ni hta jat kahtap nna madun dan nga ai.

Anhte Hpe Hkye Hkrang La Ai Lam De Woi Wa Ai Wa

5Karai Kasang gaw, ya anhte tsun nga ga ai du na ra ai mungkan ga ningnan hpe lamu kasa ni a up hkang ai npu e tawn da wu ai n rai. 6Chyum Laika shara mi hta,

“Karai Wa e, shinggyim masha gaw kaning re ai wa rai nna nang shi hpe myit dum nga n ta;

yu maya masha gaw kaning re ai wa rai nna nang shi hpe lanu lahku kawan yu nga n ta?#Yob 7:17; Shk 8:4; 144:3.

7Nang shi hpe chyahkring mi lamu kasa ni hta loi mi shagrit ai hku hpan da nit dai,

rai ti mung hpung shingkang hte arawng sadang shi a ntsa e janmau shagup ya nu ai, yawng mayawng a ntsa e up hkang na ahkang mung nang shi hpe jaw nit dai,” nga nna mahtang tsun da nga ai.

8Chyum laika hta Karai Kasang gaw shinggyim

masha hpe hpan da nna, “Yawng mayawng a ntsa e up hkang na ahkang jaw nu ai,” nga ai gaw nga yawng nga pra mahkra hpe up shangun ai ngu mayu ai re. Rai ti mung arai yawng mayawng shi a npu e tawn da nga ai gaw, anhte ya garai n mu ga ai. 9Rai ti mung anhte mu lu ai wa gaw Karai Kasang a chyeju a majaw yawng mayawng a matu si hkam lu hkra aten ladaw chyahkring mi laman sha lamu kasa ni hta shagrit da hkrum ai Yesu Hkristu nan rai nga ai. Dai Madu chyawm gaw si hkrung si htan a nni nkri hkam la wu ai majaw, ya hpung shingkang hte arawng sadang janmau shagup da nga ai hpe anhte mu lu ga ai. 10Yawng mayawng hpe hpan da nna bau sin yu lanu lahku nga ai Karai Kasang gaw, kasha ni law law hpe hpung shingkang hkam la shangun lu na matu nni nkri hkam ai hku nna Yesu hpe jahkum shatsup ya wu ai. Ning rai Karai Kasang galaw ai lam gaw mai ang ai lam sha rai nga ai, hpa majaw nga yang, shanhte hkye hkrang la hkrum na matu woi wa ai wa gaw Yesu nan rai nga ai.

11Yesu gaw masha ni hpe shanhte a yubak mara ni kaw na shachyoi shapra la mu ai. shi hte rau shachyoi shapra la hkrum sai ni yawng gaw Kawa langai sha lu nna shanhte hpe hpu nau ni ngu na shi n kaya wu ai. 12Yesu gaw,

“Nang galaw ai amu a lam nye a hpu nau ni hpe ngai tsun shana ya na nngai;

shanhte a hpawng shingra ka-ang e, nang hpe ngai mahkawn shakawn na nngai,” ngu nna Karai Kasang hpe tsun wu ai.

13Bai Yesu gaw, “Ngai gaw Karai Kasang hta kam hpa manoi manat nga na nngai,” nga nna mung, “Karai Kasang ngai hpe jaw da sai kashu kasha ni hte rau ndai shara e nga nga nngai,” nga nna mung tsun ai.#Shk 18:2; Esa 8:17; 12:2; Yhn 17:6,9-12.

14Kasha ni ngu nna shi shanhte hpe shamying wu ai hte maren, asai ashan dagraw ai masha ni rai nga ma ai. Yesu shi hkum nan mung shanhte zawn asai ashan dagraw ai shinggyim masha hkum hkrang rau rum hkam la wu ai. Shing rai hkam la ai lam gaw si hkrung si htan hpe up ai nat wa a atsam hpe jahten shabyak kau na matu rai nga ai. 15Ndai lam hku nna si hkrung si htan hpe hkrit ai majaw prat tup mayam tai nga ai ni hpe shalawt dat wu ai. 16Hpa majaw nga yang, shi gaw lamu kasa ni hpe karum na matu sa ai n rai, Chyum Laika hta tsun nga ai hte maren, Abraham a aru arat ni hpe karum na matu she sa ai re ai lam dan leng nga ai. 17Dai re ai majaw shi gaw, masha ni a yubak mara ni hpe raw dat kau ya lu na matu matsan dum chye ai kangka re ai hkinjawng agyi kaba tai ai hku nna Karai Kasang a magam bungli gun hpai lu u ga, lam shagu hta shi a kahpu kanau ni mu hkrum hkam sha nga ai lam ni hpe shanhte hte rau rum hkam sha nu ai. 18Ya shi gaw agung alau hkrum let shi hkum nan nni nkri hkrum yu sai majaw, agung alau hte nni nkri hkrum ai ni hpe karum lu nga ai.

Currently Selected:

HEBRE 2: JCLB

Highlight

Copy