NINGPAWT NINGHPANG 42

Nai Mam Mari Na Matu, Egutu Mung De Yu Sa Ai Yosep A Kahpu Ni

1Egutu mung e nai mam nga ai hpe Yaku chye wu yang, shi gaw shi a shadang sha ni hpe, “Nanhte hpa majaw shada da sha yu hkat nga myit ni? 2Yu mu, Egutu mung e nai mam ni nga nga ai hpe ngai na nngai; anhte kyet si ai n hkrum u ga, dai mung de yu sa nna nai mam ni sa mari la masu,” ngu tsun wu ai. #Kas 7:12. 3Yosep a kahpu ni marai shi hte gaw nai mam mari na nga, Egutu mung de yu sa ma ai. 4Rai ti mung, Yaku gaw Yosep a kanau Benyamin hpe chyawm gaw kahpu ni hte rau n shangun dat wu ai; hpa majaw nga yang, shi hta n hpru n mai ai lam lama ma hkrum hkra na wu ai hpe shi hkrit tsang ai majaw rai nga ai.

5Hkanan mung hta mung hku hku wa ai majaw, Yaku a shadang sha ni, nai mam mari na nga, kaga masha ni hte rau du shang wa ma ai. 6Egutu mung a mungdu Yosep gaw mungkan shara shagu na du sa ai masha ni hpe nai mam ni dut ya nga wu ai. Yosep a kahpu ni du sa nhtawm shi man e ga du hkra dingnyawm dagup nga ma ai. 7Yosep gaw shi a kahpu ni hpe mu ai shaloi, shi shanhte hpe chye matsing wu ti mung, shanhte hpe n chye ai zawn shi galaw dan wu ai. Shi gaw shanhte hpe nsen shaja let, “Nanhte kanang na du sa ai ni rai myit ta?,” ngu nna san wu ai.

Shanhte gaw, “Nai mam malu masha mari na matu Hkanan mung kaw nna anhte du sa raga ai,” ngu nna htan mu ai.

8Yosep mahtang shi a kahpu ni hpe chye matsing wu ti mung, shanhte shi hpe n chye matsing da mu ai. 9Yosep gaw shanhte a lam hte shi mu ai yup mang ni hpe myit dum let, “Nanhte kin-yu ni rai nga myit dai; anhte a mungdan n-gun kya ai hpe sa yu ai ni she rai nga myit dai,” ngu nna shanhte hpe tsun mu ai. #Nin 37:5-10.

10Shanhte mahtang, “N rai law madu e, na a mayam ni lusha mari na san san a matu sha du sa ga ai. 11Anhte yawng mung kahpu kanau ni hkrai rai nga ga ai. Anhte kin-yu ni n rai nga ga ai. Madu e, anhte gaw ding man ai masha ni she rai nga ga ai,” ngu nna htan mu ai.

12Yosep gaw shanhte hpe, “N rai law, nanhte gaw anhte a mungdan n-gun kya ai hpe sa yu ai ni she rai nga myit dai,” ngu nna tsun wu ai.

13Shanhte mung, “Madu e, anhte gaw Hkanan mung hta nga ai kawa langai a shadang sha kahpu kanau shi lahkawng ni rai ga ai. Kanau langai mi mahtang si mat nna hpungdim wa chyawm gaw anhte kawa hte rau ya naw nga nga ai,” ngu nna tsun mu ai.

14Yosep gaw, “Ngai tsun sai hte maren, nanhte gaw kin-yu ni she rai nga myit dai. 15Dai lam teng n teng nanhte chyam yu ai hkrum na myit dai. Nanhte a kanau hpungdim wa hpe ndai shara de n woi sa myit dai rai yang chyawm gaw galoi mung pru wa lu na myit dai n rai, ngu nna hkawhkam wa a mying hta ngai dagam da made ai. 16Nanhte tsun ai ga teng ai n teng ai hpe chyam yu lu hkra, nanhte hta na marai langai mi wa nna shi hpe wa woi la mu; ngam ai ni hpe chyawm gaw htawng hta sharen da na mawe ai. Dai hku n rai yang, hkawhkam wa teng teng hkrung nga ai hte maren, nanhte kin-yu ni rai nga myit dai,” ngu nna tsun wu ai. 17Dai hpang shi shanhte hpe htawng hta masum ya sharen da wu ai.

18Masum ya du ai shani hta Yosep gaw shanhte hpe, “Ngai gaw Karai Kasang hpe hkrit kamyin ai wa rai nga nngai. Dai rai nna mabyin lam langai mi a ntsa hta ngai nanhte a asak hpe jahkrung da ya na made ai rai nna ning di mu: 19Nanhte ding man nga myit dai hpe chyam yu lu hkra, nanhte hta na marai langai ngai hpe htawng hta sharen da nna, ngam ai ni mahtang kawsi kyet nga ai nanhte a dinghku masha ni hpang de nanhte lu mari da lu sai nai mam ni la nna nhtang wa masu. 20Dai hpang nanhte a kanau hpungdim wa hpe ngai hpang de woi sa wa mi; dai hku galaw ai gaw nanhte tsun ai dai teng man ai lam gaw sakse tai wa nna, nanhte mung si na myit dai n rai,” ngu nna tsun wu ai.

21Shanhte mung dai ga hpe myit hkrum ya mu ai rai nna, shanhte shada da mung, “Rai sa, anhte a kanau wa hpe anhte galaw kau ai amu ni a majaw ya, anhte nni nkri hkrum sha nga saga ai; shi a myit masin hta na ru yak tsin-yam tsindam kaba hpe anhte mu nna, karum la na matu shi hpyi nem ti mung, anhte n madat kau ya saga ai. Dai re ai majaw ya anhte ndai ru yak tsin-yam tsindam hkrum sha nga saga ai,” ngu nna tsun hkat ma ai.

22Rubin chyawm gaw, “Ma hpe n machyi shangun na matu, ngai tsun ni ai; rai ti mung, nanhte mahtang n madat ya myit dai. Shi a si hkrung si htan a matu, ya anhte ari jaw ai hkrum nga saga ai,” ngu nna tsun wu ai. #Nin 37:21-22. 23Yosep gaw shanhte kaning nga tsun ai hpe chye na wu ti mung, shanhte dai lam hpe n chye mu ai; hpa majaw nga yang, shanhte mahtang shi hpe ga gale ai wa hte tsun tsun di wu ai majaw rai nga ai. 24Yosep gaw shanhte kaw nna pru mat wa nhtawm sa hkrap nga wu ai. Shanhte kaw bai nhtang shang wa nna ga shaga ngut jang Simun hpe shaw shapraw la nhtawm shanhte a man e shi hpe gyit tawn wu ai.

Yosep A Kahpu Ni Hkanan Mung De Bai Wa Ai

25Yosep gaw shi kahpu ni a daw hta nai mam ni hte baw jahpring ya nhtawm, langai hte langai a nhpye htingpa hta mung tinang a gumhpraw bai bang ya nna, hkrun lam a matu malu masha jaw dat na hkang dat wu ai. Dai mung galaw da nga sai. 26Kahpu ni gaw lawze ni hta shanhte mari da sai nai mam ni hpe htaw nna pru mat wa ma ai. 27Shanhte gaw shawng de lana mi but yu sai dabang sa ra hta langai wa mi gaw shi a lawze hpe lusha jaw na nga, shi a nhpye htingpa hpaw dat wu yang, dai nhpye htingpa mahka hta shi a gumhpraw ni hpe mu wu ai. 28Shi gaw shi a kahpu ni hpe shaga la nhtawm, “Nye a gumhpraw ngai hpe bai bang ya mi ai. Dai gaw nang e nye a nhpye htingpa hta rawng nga li ai!,” ngu nna tsun wu ai. Shanhte mung myit mak mat nna hkrit gari let Karai Kasang anhte hpe hpa wa mi galaw nu ai kun?,” ngu nna shanhte shada da san hkat mu ai.

29Hkanan mung e nga ai shanhte a kawa Yaku kaw du wa yang, shanhte hta hkrum kadup ai lam yawng hpe tsun dan mu ai. 30“Dai Egutu mungdu wa gaw anhte hpe ja ja tsun nna, shi a mung hpe kin-yu yu shadu mani ai. 31Bai, ‘Anhte chyawm gaw kin-yu ni n rai ga ai, ding man ai masha ni she rai nga ga ai. 32Anhte gaw kawa langai kaw na shadang sha marai shi lahkawng rai nga ga ai. Kanau langai mahtang n nga mat nna, hpungdim wa gaw Hkanan mung e, anhte a kawa hte rau naw nga nga ta sai,” ngu nna anhte htan ga ai. 33Dai wa gaw, “Nanhte ding man ai masha ni rai myit yang mung, ndai hku nna sawk shapraw yu made ga; nanhte hta na marai langai mi ngai hte rau nga nna, ngam ai ni mahtang nanhte mari da sai nai mam ni hte hpawn, kawsi kyet nga ai nanhte a dinghku masha ni hpang de la wa masu. 34Nanhte a kanau hpungdim wa hpe ngai hpang de woi sa wa marit. Shaloi nanhte gaw kin-yu ni n rai nga myit dai sha, ding man ai masha ni she rai nga myit dai hpe ngai chye lu na made ai. Nanhte a hpu nau wa hpe ngai mung nanhte a lata de bai ap ya ai hte nanhte mung ndai yang e shanu nga lu nna, hpaga yumga galaw lu na myit dai,” ngu nna tsun wu ai.

35Dai hpang shanhte mung shanhte a nhpye htingpa ni hpe htawk yu mu yang, shanhte langai hte langai tinang nang a gumhpraw tingsan ni hpe mu ma ai. Shanhte dai gumhpraw tingsan ni hpe mu ma ai shaloi, shanhte hte shanhte a kawa Yaku ni hkrit gari nga ma ai. 36Shanhte a kawa gaw shanhte hpe, “Nye a kasha ni yawng hpe jasum kau shangun na nanhte ra nga myit ni? Yosep n nga sai, Simun mung n nga sai. Ya Benyamin hpe mung la kau ya na nanhte ra sharawng nga myit dai. Ngai mahtang dai nni nkri hpe hkam sha ai wa rai nga n hka!,” ngu nna tsun wu ai.

37Rubin gaw shi a kawa hpe, “Benyamin hpe nang hpang de, ngai bai n woi nhtang wa ai rai yang, nye a shadang sha lahkawng yan hpe nang sat kau ya lu na ndai. Dai re ai majaw nye a lata hta shi hpe ap ya e, ngai shi hpe bai woi nhtang wa na nngai,” ngu nna tsun wu ai.

38Rai ti mung, Yaku gaw, “Nye a kasha gaw nanhte hte rau yu sa lu na n rai; shi a kahpu mung si mat salu ai, shi langai chyu sha ngam sai. Hkrun lam e shi hta lama ma mung byin hkrum chye nga ai. Ya ngai asak kaba ugut gu ni ai rai nna, ngai hpe yawn hkyen ai amu shabyin nna sat kau na myit dai,” ngu nna tsun wu ai.

Currently Selected:

NINGPAWT NINGHPANG 42: JCLB

Highlight

Copy