NINGPAWT NINGHPANG 40

Yosep Gaw Bawng Masha Ni A Yup Mang Ni Hpe Htai Ai

1Aten ram ram lai mat wa ai hpang, Egutu hkawhkam kaw sabyi jau ai wa hte muk kabaw ai agyi yan hkawhkam wa hpe shut kau mu ai. 2Ndai sabyi jau ai wa hte muk kabaw ai agyi yan hpe shi masin pawt ai majaw, 3Yosep hpe sharen da ai dai sin langa ni a du wa a nta na htawng hta e shan hpe sharen da mu ai. 4Shan gaw htawng kata hta nhtoi tsawmra mi na hkra sharen da ai hkrum ma ai hte sin langa a du wa gaw shan hpe yu na, shangun ma hku Yosep hpe lit shatsam da wu ai.

5Dai yang e, htawng rawng nga ai sabyi jau ai wa hte muk kabaw agyi yan gaw lana jan hta sha, 6lachyum kaga ga rawng ai yup mang langai hpra mu ma ai. Hpang jahpawt e Yosep shan kaw sa yang, shan myi man sum nga ai hpe shi mu wu ai. 7Shi gaw shan hpe, “Nan hpa majaw dai ni tup grai myit ru nga myit ni?,” ngu nna san wu ai.

8Shan gaw, “An yup mang langai hpra mu ga ai. Rai ti mung, dai yup mang a lachyum hpa rai nga ai hpe htai dan lu na masha kadai mung ndai yang e n nga nga ai,” ngu nna htan mu ai.

Yosep gaw, “Yup mang ni hpe htai na marai atsam ni hpe Karai Kasang jaw ya nga ai. Dai rai nna nan a yup mang ngai hpe tsun dan yu mi,” ngu nna tsun wu ai.

9Dai rai nna sabyi jau ai wa gaw, “Nye a yup mang hta, yu u, nye a man e, 10sabyi ru langai mi tu nga nna, dai hta lakung masum kung nga ai. Alap lap wa ai hte rau pu majawm ai hte pu pu nga ai rai nna sabyi si sumbaw ni myin nga ai. 11Hkawhkam wa a sabyi gawm hpe ngai lang da nhtawm sabyi si sumbaw ni hpe gawm kata de shup bang nna dai hpe hkawhkam wa a lata de jaw nngai,” ngu nna tsun dan wu ai.

12Yosep gaw, “De a lachyum ndai hku rai nga ai. Sabyi lakung masum gaw masum ya rai nga ai. 13Masum ya rai jang, hkawhkam wa nang hpe shapraw dat nna mara dat ya na ra ai. Dai sha n-ga, na a aya hta nang hpe bai dang da na ra ai. Shawng de nang shi a man e, sabyi jau yu nit dai hte maren, shi a gawm hte shi hpe nang jau lu na rin dai. 14Rai ti mung, lam shagu hta nang ngamu ngamai wa ndai shaloi, chyeju hte ngai hpe dum nga e; hkawhkam wa a man e nye a lam tsun dan lu nit ga, chyeju hte ngai hpe matsan dum la e. Ndai htawng kaw nna pru lu na mung, ngai hpe karum la e. 15Ngai gaw Hebre masha ni a mung kaw nna shagyeng rim woi la hkrum ai wa rai nga nngai. Ya ndai Egutu mung hta mung htawng e rim bang da hkrum na daram kaba ai ari hte ging dan ai amu hpa hpe mung n galaw shut kau yu nngai,” ngu nna tsun dan wu ai.

16Dai sabyi jau ai wa a yup mang chyawm gaw myi man pa shangun lu na lachyum rai nga ai hpe muk kabaw ai agyi wa chye wu yang, shi mung Yosep hpe, “Ngai mung yup mang langai mu nngai; dai gaw muk rawng ai ka masum hpe nye baw ntsa e gup da we ai. 17Ntsa jahtum na muk ka hta hkawhkam wa a matu kabaw hkut da sai muk amyu hkum sumhpa yawng rawng nga li ai rai nna, ntsa malen u ni mung dai ni hpe shaw sha ma ai,” ngu nna hkai dan wu ai.

18Yosep mung, “De a lachyum gaw da ndai hku rai nga lit dai; dai muk ka masum gaw masum ya rai nga ai. 19Masum ya rai jang hkawhkam wa nang hpe shalawt dat nna baw kahtam di kau ya na ra ai. Dai hpang na a hkum hpe hpun shadaw hta noi da na mara ai; ntsa malen u ni mung na a ashan hpe achye sha na mara ai,” ngu nna htai ya wu ai.

20Masum ya nhtoi lai jang, hkawhkam wa shi a shangai nhtoi shani hta, shi a du salang ni yawng hpe lusha poi galaw daw wu ai; dai hpang sabyi jau ai wa hte muk kabaw ai agyi yan hpe shi a du salang ni a man de woi shapraw dat wu ai. 21Shi gaw sabyi jau ai wa hpe shawng na shi a aya hta bang da wu timung, muk kabaw ai agyi wa hpe chyawm gaw sat kau wu ai. 22Dai lam yawng gaw Yosep htai da sai hte maren byin wa sai. 23Rai ti mung, sabyi jau ai wa mahtang Yosep hpe galoi mung n myit dum ai sha shi a lam yawng hpe malap kau wu ai.

Currently Selected:

NINGPAWT NINGHPANG 40: JCLB

Highlight

Copy