NINGPAWT NINGHPANG 35

Karai Kasang Gaw Yaku Hpe Behtela E Shaman Ya Ai

1Karai Kasang gaw Yaku hpe, “Behtela de ya jang sa wa nna, dai yang e nga nga u. Na nhpu Esaw kaw na hprawng mat wa ai shaloi, nang kaw dan pru ai Ngai Karai Kasang a matu, dai yang e tawn hkungri langai galaw u,” ngu nna tsun wu ai. #Nin 28:11-17.

2Dai rai nna Yaku mung shi a dinghku masha ni hte shi hte rau nga nga ai ni yawng hte hpe, “Nanhte lu ai maigan hpara sumla ni hpe shapraw kau mu, tinang hkum hpe tinang dai shachyoi shapra nna asan aseng re ai hpun palawng ni bu hpun mu. 3Ngai ru yak tsin-yam tsindam hkrum ai aten hta ngai hpe karum la nna ngai hkawm sa ai shara shagu hkan mung ngai hte rau anga nga ai Karai Kasang a matu tawn hkungri galaw na ngu ai Behtela de sa wa na matu ndai shara kaw nna anhte pru sa wa saga,” ngu nna tsun wu ai. 4Dai rai nna shanhte gaw maigan hpara sumla mahkra hte na hta kai ai shanghkawng ni, Yaku a lata de ap kau mu ai. Dai arai ni hpe Shehkem makau e tu ai wamyi hpun nhpang e shi lup kau ya wu ai.

5Yaku hte shi a shadang sha ni pru wa hkyen nga yang, hkrit hpa kaba gaw grup yin na mare masha ni a ntsa e, du pru wa ai majaw, dai masha ni shanhte hpe n hkan shachyut ma ai. 6Yaku hte shi hte rau hkawm sa nga ai masha yawng hte gaw, ya aten e Behtela ngu nna shamying ai dai Hkanan mung na Luza mare de du ma ai. 7Dai yang e, tawn hkungri langai hpe shi galaw wu ai. Dai shara hpe Behtela shara na Karai Kasang a matu ngu nna shamying wu ai; hpa majaw nga yang, kahpu a lata kaw na shi hprawng mat wa yang, dai shara e Karai Kasang shi nan Yaku hpe shadan dan ai shara rai nga lu ai. 8Rebeka hpe yu lajang ai Debora si mat nna, Behtela a dingda maga na wamyi hpun nhpang e lup makoi kau mu ai. Dai rai nna dai hpun hpe, “Hkrap Ai Wamyi Hpun,” ngu nna shamying mu ai.

9Yaku gaw Mesopotamia mung kaw nna nhtang wa wu yang, Karai Kasang shi kaw kalang mi bai dan pru nhtawm shi hpe shaman ya wu ai. 10Karai Kasang gaw shi hpe, “Na a mying Yaku rai nga lit dai; rai ti mung, ndai aten kaw nna Israela ngu na rai nga lit dai,” ngu nna tsun wu ai. Karai Kasang gaw shi hpe Israela ngu nna shamying wu ai. #Nin 32:28. 11Karai Kasang gaw shi hpe, “Ngai gaw Chyahtum Chyalai N-gun Rawng Ai Karai Kasang rai nga nngai. Kashu kasha law law mayat maya u; amyu baw ni nang hta na pra hkrat wa nhtawm hkawhkam ni a kaji kawa mung nang tai na rin dai. 12Abraham hte Isak yan hpe ngai jaw ai lamu ga gaw nang hpe mung, na a hpang na amyu matu ni hpe mung ngai jaw na we ai,” ngu nna shi hpe tsun wu ai. #Nin 17:4-8. 13Dai hpang Karai Kasang mung shi kaw nna pru mat wa wu ai. 14Karai Kasang shi hpe ga shaga ai dai shara hta Yaku gaw masat dingsat nlung langai jung da nna, dai hta e sabyi ntsin hte tsanlun sau ni ru bun let nawng da wu ai. 15Dai shara hpe Behtela ngu nna shi shamying wu ai. #Nin 28:18-19.

Rahkela Si Mat Ai

16Yaku hte shi a dinghku masha ni Behtela kaw nna pru mat wa nhtawm Ehprat kaw nna loi mi naw tsan ai shara hta shanhte naw nga nga yang, Rahkela hta shangai nhtoi gu nna shinggyim machyi laja lana hkrum sha wu ai. 17Shing rai shangai yak nga yang, shangai karum ai jan gaw, “Hkum hkrit et; shadang sha langai nang bai lu nit dai,” ngu nna shi hpe tsun wu ai. 18Rai ti mung, shi si wa nna shi a nsoi nsa hkyet mat wa yang, shi a shadang sha hpe Benoni ngu nna shamying da wu ai. Rai ti mung shi a kawa chyawm gaw Benyamin #35:18: Benyamin: Ndai mying hpe Hebre ga hku, “Gam kaja ai shadang sha” ngu ai re. ngu nna shamying wu ai.

19Rahkela si mat ai shaloi, ya aten e Betlehem ngu nna tsun ai Ehprat de sa wa ai lam makau hta shi hpe lup makoi da mu ai. 20Yaku mung dai yang e, masat dingsat nlung langai jung da wu ai rai nna dai gaw dai ni du hkra Rahkela a lup hpe naw matsing da ya nga ai. 21Yaku gaw matut hkawm mat wa nhtawm Edera langchyi a man maga mi hta shara la nna shi a sum de da nga wu ai.

Yaku A Shadang Sha Ni

(1Hl 2:1-2)

22Yaku dai mung hta nga nga yang, Rubin mahtang shi kawa a lashi num Bila kaw shang nna kanawn kau wu ai; dai lam hpe Yaku na wu ai rai nna sindawng kahtet wu ai.

Yaku hta shadang sha ni shi lahkawng nga ma ai. #Nin 49:4. 23Lea a shadang sha ni gaw, Rubin (Yaku a shadang sha alat), Simun, Lewi, Yuda, Yisahka hte Zebulun hte rai ma ai. 24Rahkela a shadang sha ni gaw Yosep hte Benyamin yan rai ma ai. 25Rahkela a mayam num Bila a shadang sha ni gaw Dan hte Naphtali yan rai ma ai. 26Lea a mayam num Zilhpa a shadang sha ni gaw Gad hte Ashe yan rai ma ai. Ndai hte gaw Mesopotamia mung e shangai ai shadang sha ni rai ma ai.

Isak Si Mat Ai

27Yaku gaw Abraham hte Isak shanu nga ai Hebron makau na shi kawa Isak nga ai Mamre kahtawng de sa wa wu ai. #Nin 13:18. 28Isak gaw asak latsa e matsat shi ning du hkra nga nna, 29asak kung ugut gu ai aten hta si wa nu ai; shi a shadang Esaw hte Yaku hkan nau shi hpe lup makoi kau ma ai.

Currently Selected:

NINGPAWT NINGHPANG 35: JCLB

Highlight

Copy