NINGPAWT NINGHPANG 26
26
Gerara Mare Hta Isak Shanu Nga Ai
1Abraham a prat hta byin ai hkuwa hta kaga, dai mung e hkuwa kaga mung naw nga nga ai. Isak gaw Gerara mare e nga ai Hpilisti Hkawhkam Abimelek hpang de sa mat wa wu ai. 2Dai Madu mung Isak kaw dan pru nna, “Egutu mung de hkum sa et; ngai nang hpe nga shangun ai ndai mungdan e nga u. 3Ndai yang e nga u, ngai nang hte rau nga nga nna nang hpe shaman ya na nngai. Nang hpe mung, na a amyu matu ni hpe mung ndai mung ting ngai jaw na mawe ai; shing rai na nwa Abraham hpe ngai shagrin da sai ga sadi hpe ngai shatup na we ai. 4Na a mayu matu ni hpe lamu na shagan ni zawn ngai shalaw na mawe ai rai nna, dai ni yawng hpe ndai mung ting ngai jaw na mawe ai. Amyu baw ni yawng mung na a amyu matu ni hpe ngai shaman ya ni ai hte maren shanhte hpe shaman ya na matu hpyi lajin wa na mara ai. #Nin 22:16-18. 5Abraham gaw nye a ga madat nna nye a tara ni hte hkang da ai ga ni yawng hpe shadik shatup nu ai majaw ngai nang hpe shaman ya na nngai,” ngu nna tsun wu ai.
6Dai majaw Isak gaw Gerara mare e nga nga wu ai. 7Dai yang na lasha ni shi a madu jan a lam hpe san mu ai rai nna, shi gaw ngai jan re, ngu wu ai, hpa majaw nga yang, Rebeka nachying ahpraw tsawm htap nga ai rai nna, dai yang na lasha ni Isak hpe sat kau nhtawm Rebeka hpe woi la kau ya na hpe shi hkrit tsang nga wu ai majaw shi a madu jan rai nga ai hpe shi n yin la gwi wu ai. #Nin 12:13; 20:2. 8Ya dai yang e Isak nga ai nhtoi tsawmra mi na jang, Hkawhkam Abimelek gaw hkuwawt hku nna gum yu dat wu yang, Isak hte Rebeka makrai chyai nga ma ai hpe mu wu ai. 9Abimelek mung Isak hpe shaga la nhtawm, “Yu u, shi gaw na a madu jan rai nga lit dai! Dai re ai mi shi gaw na a kajan re ngu nna nang hpa rai tsun n ta?,” ngu nna tsun wu ai.
10Abimelek mung, “Nang anhte hpe kaning rai galaw kau nu ni? Ndai yang na nye a lasha langai ngai na a madu jan hte aloi sha yup hkrup taw gaw, anhte shut hpyit ai mara a matu nang hta lit nga na lit dai,” ngu nna tsun wu ai. 11Abimelek gaw shi a amyu masha ni yawng hpe, “Ndai wa hpe mung, shi a madu jan hpe mung, shut ai wa kadai mung sat kau ai hkrum na ru ai,” ngu nna sadi jaw wu ai.
12Dai Madu gaw Isak hpe shaman ya wu ai majaw, dai mung e shi yi galaw wu yang shawoi shi galaw yu sai shaning ni hta dai shaning e htam latsa grau nna shu la wu ai. 13Shi gaw matut nna ngamu ngamai wa ai rai nna grai lu su wa wu ai. 14Sagu dumsu uhpung hte shangun ma law law shi lu ai majaw Hpilisti masha ni shi hpe yu manawn nga ma ai. 15Dai re ai majaw Abraham naw hkrung nga yang shi kawa Abraham a shangun ma ni e htu da ai hka htung ni hpe shanhte kaput kau ya mu ai.
16Dai hpang Abimelek gaw Isak hpe, “Nang gaw anhte hta grau nna n-gun ja nga nit dai majaw anhte a mungdan kaw nna pru mat wa nu,” ngu nna tsun wu ai. 17Shing rai Isak gaw dai mung kaw na pru mat wa nhtawm Gerara Kadit e shi a sum hpe gap nna dai yang e nga nga ai. 18Shaloi Isak gaw kawa Abraham a aprat e htu nna shi si mat ai hpang e, Hpilisti masha ni kaput kau ya ai hka htung ni hpe bai htu hpaw ai hte de a amying ni hpe mung, shi kawa shamying da ya ai hte maren bai shamying da wu ai.
19Isak a shangun ma ni mung dai kadit hta hka htung langai mi htu ma ai rai nna dai hta hka rawng ai hpe shanhte mu ma ai. 20Gerara na sagu rem ai ni hte Isak a sagu rem ai ni gaw, “Ndai hpe anhte she madu ga ai,” ngu nna tsun let ga law hkat ma ai. Dai majaw Isak gaw hka htung dai hpe, “Ga Law Ga La,” ngu nna shamying da nga ai.
21Isak a shangun ma ni mung kaga hka htung langai mi hpe htu ma ai; dai hta mung ga law ga la byin ai majaw hka htung dai hpe “N Ju N Dawng” ngu nna shamying wu ai. 22Shi mung dai yang na htawt nhtawm kaga hka htung langai bai htu wu ai. Dai hta chyawm gaw ndang kalang hpa mung n nga sai rai nna shi gaw dai shara hpe “Shanglawt” ngu nna shamying wu ai. Ya chyawm gaw dai Madu anhte hpe ndai ga e nga na matu anhte hpe shanglawt jaw nu ai; dai rai nna anhte ndai mung e ngamu ngamai wa saga ai,” ngu nna tsun wu ai.
23Isak gaw dai kaw nna pru nhtawm Berasheba de sa wa wu ai. 24Dai shana jang, dai Madu gaw shi kaw dan pru nna, “Ngai gaw na a kawa Abraham a Karai Kasang rai nga nngai; hkum hkrit et, ngai nang hte rau rai nga nngai. Nye a shangun ma Abraham hpe jaw ai ga sadi hte maren, ngai nang hpe shaman ya nhtawm amyu matu law law mung nang hpe jaw na we ai,” ngu nna tsun wu ai. 25Isak mung dai yang e tawn hkungri galaw nna dai Madu hpe nawku wu ai. Dai hpang shi a sum hpe dai yang e jung da ai hte shi a shangun ma ni mung kaga hka htung langai mi htu ma ai.
Isak hte Abimelek Yan A Lapran Na Myit Hkrum Ga Shaka
26Dai shaloi, Abimelek gaw shi a hpaji jaw Ahuza hte shi a hpyen dap hpe up ai hpyen du Hpikola yan hte rau Isak hpe sa hkrum na nga, Gerara kaw nna pru sa wa ma ai. #Nin 21:22. 27Dai rai nna Isak gaw, “Shawng de nanhte ngai hpe grai wa n hku hkau myit dai. Nanhte a mung kaw nna mung ngai hpe pru mat wa shangun manit dai mi, ya hpa lam a majaw nanhte ngai kaw du sa nga myit ni?,” ngu nna hkap san wu ai.
28Shanhte gaw, “Dai Madu nang hte rau nga nga ai hpe ya anhte chye saga ai. Dai majaw anhte a lapran hta dagam ai myit hkrum ga shaka langai mi tawn da na lam anhte myit lu ga ai. 29Anhte nang hpe n machyi shangun ga ai zawn nang mung anhte hpe n machyi shangun na ga sadi hkam la na matu anhte ra sharawng nga ga ai. Nang hpe anhte yu matsan dum ga ai majaw ngwi pyaw simsa ai hte nanhte hpe pru wa shangun saga ai. Dai Madu nang hpe shaman ya nga sai gaw hpa ung ang shara n nga nga ai. 30Isak gaw shanhte a matu lusha poi hkyen ya mu ai hte shanhte dai hpe lu sha nga ma ai. 31Hpang jahpawt manap jau jau aten hta, langai hte langai tinang nang a ga sadi hpe jaw nhtawm dai hpe dagam nna dazik dawk da mu ai. Isak gaw shanhte hpe wa manu yaw, ngu nna shakram dat nhtawm jinghku majing ni zawn shanhte n ja let hka bra mat wa ma ai.
32Dai shani jang, Isak a shangun ma ni gaw, “Anhte hka mu saga ai,” nga nna shanhte htu da sai hka htung a lam shi hpe wa tsun dan mu ai. 33Shi mung dai hka htung hpe, “Dagam Ga Shaka” ngu nna shamying wu ai. Dai gaw Berasheba mare mying lu wa ai lam rai nga ai.
Esaw La Ai Maigan Num Ni
34Ya Esaw a asak mali shi ning du jang, Heti numsha lahkawng rai nga ai Eri a shayi sha Yudit hte Elon a shayi sha Basemat yan hpe la wu ai. 35Dai yan gaw Isak hte Rebeka hpe myit ru shoi chyum shangun mu ai.
Currently Selected:
NINGPAWT NINGHPANG 26: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.
