NINGPAWT NINGHPANG 18
18
Abraham Hpe Ga Sadi Jaw Da Sai Shadang Sha
1Dai Madu gaw Mamre mare na chyoi pra ai hpun ni tu ai shara hta nga ai Abraham kaw dan pru wu ai. Abraham gaw shani jan ja dik ai aten e, 2shi a sum chyinghka lam kaw dung let mada yu dat yang, dai shara hta masha marai masum tsap nga ma ai hpe mu wu ai. Shanhte hpe mu ai hte rau, sa tau la na nga shi rawt sa wa wu ai. #Heb 13:2. 3Shi gaw ga de myi man dingnyawm dagup nhtawm, “Madu ni e, chyeju hte nye a nta e n hkring ai sha hkum lai wa myit; ngai gaw nanhte hpe daw jau na matu nang e nga nga nngai. 4Nanhte a lagaw kashin na hka la sa ya made ga; ndai hpun npu hta nanhte ban sa la lu na myit dai. 5Nanhte a matu lusha mung la sa ya na nngai; dai gaw nanhte matut hkawm sa na hkrun lam a matu n-gun awai la shangun na ra ai. Nanhte gaw de a matu nye a dum nta de du sa manit dai; dai rai nna ngai nanhte hpe daw jau lu n ga law,” ngu nna shi tsun wu ai.
Shanhte mung, “Chyeju kaba sai, anhte mung hkap la ya saga ai,” ngu nna htan mu ai.
6Abraham mung sum kata de tin tin shang wa nhtawm Sara hpe, “Na a kaja htum ai muk shadung hpai mi hpe tin tin la nhtawm nkau mi hpe muk pa kaba u,” ngu nna tsun wu ai. 7Dai hpang shi gaw dumsu hpung nga ai de gat sa nna nu nu nai nai rai hpum sau ai dumsu kasha hpe dun wa nhtawm shangun ma hpe ya wu ai; dai hpe jin jin lajang da na matu mung shatin wu ai. 8Shi gaw htawbat, nga chyu hte dumsu shan nkau mi hpe la nna dai masha ni a man e, lusha hpe shachyip jaw wu ai. Dai hpun npu hta shi hkum nan shanhte hpe daw jau ai hte shanhte mung sha nga ma ai.
9Dai hpang shanhte gaw shi hpe, “Na a madu jan Sara kanang nga nga a ta?,” ngu nna san mu ai.
Shi gaw, “Shi gaw wora sum kata e nga nga ai,” ngu nna htan wu ai.
10Shanhte hta na langai wa gaw, “Ya kaw nna shata jahku a hpang ngai bai du na ring ngai; shaloi na a madu jan Sara shadang sha langai lu na ra ai,” ngu nna tsun wu ai.
Sara mung shing nga tsun ai wa a shingdu na sum a chyinghka makau e nga nga nna madat nga ai. #Rom 9:9. 11Ya Abraham hte Sara yan gaw aprat grai kaba masai rai nna Sara hta numsha hking mung htum mat salu ai. 12Dai majaw Sara gaw, “Ya ngai gumgai ni ai hte n-gun yawm mat ni ai, dai rai yang num la kanawn ai hta ngai naw pyaw lu na rai nga a ni? Dai sha n-ga, nye a madu wa mung dingla mat sai,” ngu nna shi kraw e mani nga ai. #1Pe 3:6.
13Dai hpang dai Madu gaw Abraham hpe, “Sara gaw hpa majaw mani let, ‘Ngai gaw grai gumgai sayang me, kaja wa kasha lu na rai nga a ni?,’ ngu nna tsun ai hpe san wu ai. 14Dai Madu n dang galaw lu ai amu nga nga a ni? Ngai tsun da sai hte maren, ya kaw nna shata jahku du jang, ngai bai du na ring ngai, dai shaloi Sara gaw shadang sha langai mi lu na ra ai,” ngu nna tsun wu ai. #Luk 1:37.
15Sara chyawm gaw shi hkrit nga ai majaw, “Ngai n mani nngai,” ngu nna dai ga hpe ningdang kau wu ai.
Rai ti mung, shi mahtang, “Rai sa, nang mani nit dai,” ngu nna htan wu ai.
Sodom A Matu Abraham A Hpyi Lajin Ai Ga
16Dai hpang masha dai ni gaw Sodom mare hpe mada lu ai shara langai mi de sa mat wa ma ai; Abraham mung shanhte hpe hkan sa dat na nga, shanhte hte rau sa wa nga ai. 17Dai Madu gaw, “Ngai galaw na amu Abraham hpe makoi magap da na nngai n rai. 18Shi a amyu matu ni mung galu kaba wa nna n-gun hte hpring ai amyu tai wa na mara ai; Shi a jaw e, amyu baw ni yawng hpe ngai shaman ya na nngai. 19Abraham gaw shi a shadang sha ni hte shi a matu mara ni nye a ga hpe madat mara nna ding hpring teng man ai amu hpe galaw ai lam hta shi hkang lu na matu ngai shi hpe lata la ni ai. Shanhte hkan shatup ai rai yang, nye a ga sadi hte maren, shi a matu lam shagu hpe ngai shadik ya na nngai,” ngu nna shi kraw e tsun wu ai.
20Dai hpang dai Madu gaw Abraham hpe, “Sodom hte Gomora mare hpe mara shagun ai nsen hkrit hpa rai nga malu ai rai nna shanhte a yubak gaw grai wa kaba nga malu ai. 21Ngai na la sai dai mara shagun ai nsen ni, teng ai n teng ai hpe chye lu na matu, ngai nan yu yu na nngai,’ ngu nna tsun wu ai.
22Dai hpang masha lahkawng pru mat wa nhtawm Sodom mare de matut sa mat wa ma ai, rai ti mung dai Madu gaw Abraham hte rau naw hti ngam nga ai. 23Abraham gaw dai Madu hpang de sit sa nna, “Mara n kap ai ni hpe mara kap ai ni hte rau nang teng teng jahten kau na wu ni? 24Dai mare hta e mara n kap ai masha manga shi nga dam yang, dai mare ting hpe nang naw jahten kau na wu ni? Dai manga shi hpe hkye mawai la na matu mare dai hpe n ngam da na wu ni? 25Nang gaw teng teng mara n kap ai ni hpe sat kau na n rai nga ndai. Dai gaw mai byin na n rai! Shing re ai amu hpe nang galaw lu na n rai nga ai. Nang galaw ai rai yang, mara n kap ai ni mung, mara lu ai ni hte rau ari jaw ai hkrum na mu ai. Dai gaw n mai byin ai lam rai nga ai. Ga ntsa ting a tara agyi wa gaw teng man ai hku daw dan na rai wu ai,” ngu nna san wu ai.
26Dai Madu gaw, “Sodom mare hta mara n kap ai masha manga shi hpe ngai mu ai rai yang shanhte a majaw mare ting hpe ngai ngam da na we ai,” ngu nna htan wu ai.
27Abraham gaw, Madu e, ndai zawn matut nna wam tsun ai nye a ga hpe mara dat ya e law. Ngai gaw shinggyim masha sha rai nna hpa tsun na ahkaw ahkang pyi n lu ai wa rai nga nngai. 28Rai ti mung, mara n kap ai masha manga shi n nga ti mung, mali shi manga dang gaw nga dam nhten; shing rai marai manga yawm nga ai majaw mare ting hpe jahten kau na wu ni?,” ngu nna bai tsun wu ai.
Dai Madu gaw, “Dai mare hta mara n kap ai masha mali shi manga hpe ngai mu ai rai yang, ndai mare hpe jathen na n rai,” ngu nna htan wu ai.
29Abraham bai tsun wu ai gaw: “Ndai mare hta marai mali shi sha gaw mahkoi mi nga dam nhten.”
Shi gaw, “Ndai mare hta marai mali shi nga ai rai yang, ngai jahten kau na n rai,” ngu nna bai tsun wu ai.
30Abraham gaw, “Madu e, masin hkum pawt et, ngai naw tsun we ga; dai mare hta marai sumshi nga ai rai yang, gara hku law?,” ngu nna tsun wu ai.
Shi mung, “Marai sumshi hpe ngai mu mada ai rai yang, ngai n jahten na nngai,” ngu nna tsun wu ai.
31Bai Abraham gaw, “Madu e, ndai zawn matut nna wam tsun ai nye a ga hpe chyeju hte mara dat ya e law. Masha marai hkun hpe mu ai rai yang gara hku law?” ngu nna tsun wu ai.
Shi mung, “Dai marai hkun hpe ngai mu ai rai yang, n jahten kau na we ai,’ ngu nna tsun wu ai.
32Abraham mung, “Madu e chyeju hte masin hkum pawt et, ndai lang mi sha gaw ngai naw tsun we ga. Marai shi hpe mu ai rai yang, kaning di na wu ni?,” ngu nna tsun wu ai.
Shi chyawm gaw, “Dai yang e marai shi nga ai rai yang, dai mare hpe ngai jahten kau na we ai n rai,” ngu nna tsun wu ai. 33Abraham hte shaga ngut ai hpang dai Madu mung wa mat wa nna Abraham mung shi a dum nta de nhtang mat wa wu ai.
Currently Selected:
NINGPAWT NINGHPANG 18: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.