NINGPAWT NINGHPANG 10
10
Noa A Shadang Sha Ni A Aru Arat Ni
(1Hl 1:5-23)
1Ndai lam ni gaw Noa a shadang sha ni rai nga ai, Shem, Ham hte Yahpet ni a aru arat ni rai ma ai. Dai masum hte gaw sha-u ing ai hpang e shadang sha ni hpe shaprat ma ai.
2Ya Yahpet a shadang sha ni gaw Goma, Magoga, Madai, Yawan, Htubala, Meshek hte Htira ni rai ma ai. Shanhte gaw shanhte a mying ni hta hkan nna ran yu wa ai amyu bawsang ni a kaji kawa ni tai wa masai. 3Goma a aru arat ni gaw Ashkena, Rihpat hte Htugama amyu masha ni rai ma ai. 4Yawan a aru arat ni gaw Elisha, Spain, Kupru hte Roda amyu masha ni rai ma ai. 5Shanhte gaw zunlawng ni hte panglai hkin-gau mayan hku shanu nga ai amyu masha ni a kaji kawa ni rai ma ai. Dai ni gaw Yahpet a aru arat ni rai nna, tinang mungdan ni hta abaw asang kaga ga rai shanu nga nhtawm, shaga ai ga mung kaga ga rai nga ai.
6Ham a shadang sha ni gaw Hkusha, Egutu, Libya hte Hkanan ni rai ma ai. Shanhte a mying ni hta hkan nna amyu bawsang ni a kaji kawa ni tai wa masai. 7Hkusha a matu mara ni gaw Seba, Hawila, Saphta, Rama hte Sabhtahka amyu masha ni rai nga ai. Rama a matu mara ni gaw Sheba, hte Dedan amyu masha ni rai ma ai. 8Hkusha gaw Nimrod mying ai shadang sha hpe shaprat nna dai wa gaw mungkan ga hta shawng paw pru ai share ninghkrin kaba tai wa sai. 9Dai Madu a karum la ai gawp e, shi gaw jaugawng kaba rai nga ai rai nna masha ni mung, “Dai Madu gaw nang hpe Nimrod zawn jaugawng kaba shatai u ga!,” nga nna tsun ma ai. 10Shawng na shi a mungdan hta Babelon mung na Babelon mare, Erek hte Ahkad mare masum mung lawm nga ai. 11Dai mung kaw nna Asuri mung de shi sa wa nhtawm Ninewe, Rehubut Ira, hte Hkala mare ni hpe mung, 12Ninewe hte Hkala mare kaba yan a lapran na Resen mare hpe mung de da wu ai.
13Egutu a matu mara ni gaw Ludi, Anam, Lehab, Nahtuha, 14Pahtrusa, Hkasluha hte Hpilisti masha ni pra hkrat wa ai Kreti amyu masha ni rai ma ai.
15Hkanan a shadang sha ni hta alat Sidon hte Het rai ma ai. Shan a amying hta hkan nna amyu bawsang ni a kaji kawa ni tai wa masai. 16Hkanan gaw Yebusi, Amori, Girgashi, Hiwi, 17Arki, Sini, Arwadi, Zimari hte Hamahti amyu masha ni a kaji kawa mung rai nga ai. 18Kaga ga re ai Hkanan a amyu bawsang ni chyawm gaw 19Hkanan a lamu ga jarit ni rai nga ai Sidon mare kaw nna dingda maga Gerara hku hprang rai nna Gaza makau du hkra, bai sinpraw maga de Sodom, Gomora, Adma hte Zeboim mare ni hku hkrawn rai nna Lasha mare makau du hkra ran mat wa ma ai. 20Dai ni gaw lakung lama kaga ga, shaga ai ga kaga ga, mungdan ni kaga ga hte amyu bawsang ni kaga ga re ai Ham a matu mara ni rai ma ai.
21Yahpet a kahpu kaba Shem gaw Hebre amyu masha ni yawng a kaji kawa rai nga ai. 22Shem a shadang sha ni gaw Elam, Ashura, Arhpaza, Luda hte Aram ni rai nna shanhte a mying ni hta hkan nna pra nga ai amyu masha ni a kaji kawa ni tai wa nga masai. 23Aram a matu mara ni gaw Uza, Hula, Gehta hte Meshek amyu masha ni rai nga ai. 24Arhpaza mung Shela a kawa rai nna, Shela gaw Ebera a kawa rai nga ai. 25Ebera mung shadang sha lahkawng lu wu ai; langai wa a mying gaw Hpelek rai nga ai, hpa majaw nga yang shi a prat hta mungkan ga na masha ni ga karan mat nga ma ai. Kaga langai wa a mying gaw Yoktan rai nga ai. 26Yoktan a matu mara ni gaw Almoda, Shelep, Hazarmawet, Yara, 27Hadoram, Uzala, Dikla, 28Ubala, Abimaela, Sheba, 29Ohpira, Hawila hte Yoba amyu masha ni rai ma ai. Shanhte yawng gaw Yoktan a amyu matu ni rai ma ai. 30Shanhte shanu nga ai lamu ga gaw Mesha mare kaw nna sinpraw maga Sehpara bum du hkra maden nga ai. 31Dai ni gaw lakung lama kaga ga, shaga ai ga kaga ga, mungdan ni kaga ga, amyu bawsang ni kaga ga re ai Shem a matu mara ni rai ma ai.
32Ndai amyu masha ni yawng hte gaw Noa a matu mara ni hta na pra hkrat wa ai hte lakung lama hta hkan nna langai hte langai ran wa ai amyu baw ni a lam rai nga ai. Dai sha-u ing ai hpang ginding aga hta pra nga ai amyu baw ni yawng gaw Noa a shadang sha ni hta na ran yu wa ai ni rai ma ai.
Currently Selected:
NINGPAWT NINGHPANG 10: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.
