2 HKAWHKAM LABAU 35
35
Yoshia Galaw Ai Shalai Wa Ai Poi
(2Hk 23:21-23)
1Yoshia gaw dai Madu hpe shagrau sha-a na nga, Yerusalem mare e Shalai Wa Ai Poi galaw wu ai. Shanhte gaw shawng na shata a shi mali ya shani e dai poi a matu yam nga ni sat ma ai. 2Shi gaw Nawku Htingnu kata hta daw jau amu galaw na matu hkinjawng ni hpe lit shatsam nhtawm dai bungli atsawm sha gun hpai na matu n-gun jaw wu ai. 3Shi gaw dai Madu a matu ap nawng ai Israela a sara ni ngu ai Lewi masha ni hpe ndai matsun maroi ga ni hpe mung jaw wu ai: “Dawi a shadang sha Hkawhkam Shawlumon gap da ai Nawku Htingnu kata hta dai Chyoi Pra Ai Ga Shaka Sumpu tawn da mu. Nanhte gaw dai hpe shara mi kaw nna shara mi de galoi mung hpai sit lu na myit dai n rai; rai ti mung nanhte gaw dai Madu nanhte a Karai Kasang hte shi a amyu masha Israela hpe daw jau lu na rai myit dai. 4Hkawhkam Dawi hte shi a shadang sha Hkawhkam Shawlumon nanhte hpe shatsam da sai lit ni hte maren, amyu lakung hku hkan nna Nawku Htingnu kata hta shara la shajang mu; #2Hl 8:14. 5nanhte hta na nkau mi gaw Israela amyu masha hta na dinghku shagu hpe karum madi shadaw na matu nanhte hkum nan hpareng la mu. 6Nanhte gaw Shalai Wa Ai Poi a matu sagu kasha ni hte bainam ni hpe sat na rai myit dai. Dai rai nna ya chyawm gaw nanhte nan htung hte maren jasan jaseng da nhtawm dai Madu Mawshe hku jaw ya ai matsun maroi ga ni hpe nanhte a kahpu kanau Israela masha ni hkan mai lu hkra shagu hkungga ni hkyen lajang da mu.”
7Hkawhkam Yoshia gaw Shalai Wa Ai Poi hta amyu masha ni lang na matu shi a sagu hpung hte yam nga hpung hta na sagu, sagu kasha hte bainam kasha mun masum hte usu hkying masum jaw wu ai. 8Shi a du salang ni mung, amyu masha ni mung, hkinjawng ni hte Lewi masha ni lang na matu jaw ma ai. Nawku Htingnu woi hpareng ai du salang ni ngu na Hkinjawng Kaba Hilkia, Zehkaria, hte Yehiela ni mung hkinjawng ni hpe dai poi laman lang na shagu hkungga ni a matu sagu kasha, bainam kasha hkying lahkawng kru tsa hte usu masum tsa jaw ma ai. 9Lewi masha ni a ningbaw ni ngu na Hkonania, Shemaia hte shi kanau Nehtanela, Hashabia, Yeiela hte Yozabad ni mung Lewi masha ni shagu hkungga nawng ya na matu sagu kasha, bainam kasha hkying manga hte usu manga tsa jaw ma ai.
10Shalai Wa Ai Poi a matu lam magup lajang shajin da ngut jang, hkawhkam wa hkang da sai hte maren, hkinjawng ni hte Lewi masha ni tinang nang a shara ni la shajang nga ma ai. 11Sagu kasha ni hte bainam ni hpe sat ngut ai hpang, Lewi masha ni gaw dai ahpyi gaw nhtawm, hkinjawng ni mung tawn hkungri ntsa e sai lapri bun ma ai. 12Dai hpang shanhte gaw Mawshe a Tara hta tsun matsun da sai hte maren, dai ni hpe hkungga nawng ya lu hkra nga, wan nat hkungga a matu yam nga ni hpe amyu masha ni a lapran dinghku u hpung hku nna garan ma ai. 13Htung lai hte maren, Lewi masha ni gaw Shalai Wa Ai Poi shagu hkungga ni hpe wan hte kakang ai hte chyoi pra ai hkungga ni hpe di bu, di jang hte di pa ni hta shadu nna amyu masha ni hpang de dai shan tin tin sa jaw ma ai. #Pru 12:8-9. 14Shing re ai amu galaw ngut jang, Lewi masha ni gaw shanhte hte Arun matu mara kaw na hkinjawng ni a matu shan lusha lajang tawn da ma ai; hpa majaw nga yang, hkinjawng ni mahtang yam nga ni hpe shana de du hkra hkum ting nat nawng ai amu hte shagu hkungga sau man ni hpe nat ai amu ni hta kyin nga ma ai. 15Asap amyu lakung na Lewi mahkawn mangoi hpung ni gaw Hkawhkam Dawi a tsun matsun ai ga hte maren, shanhte hpe masat da ya ai shara ni hta nga nga ma ai; Asap, Heman hte hkawhkam wa a myihtoi Yeduhtun ni rai ma ai. Nawku Htingnu chyinghka sin ai sin langa ni gaw shanhte a shara ni kaw nna n pru sa ra ma ai, hpa majaw nga yang kaga Lewi masha ni mahtang dai ni a matu Shalai Wa Ai Poi hkyen shachyip da ya nga ma ai. #1Hl 25:1. 16Dai rai nna Hkawhkam Yoshia hkang da nu ai hte maren, dai Madu hpe nawku na amu magup mung, Shalai wa Ai Poi galaw sha na mung, tawn hkungri ntsa e wan nat hkungga ni hpe nawng ya na matu mung, dai shani e nan lajang shajin da ma ai. 17Rau hpawng nga ai Israela amyu masha ni yawng gaw Shalai wa Ai Poi hte Matsi N Rawng ai Muk Sha Poi hpe sanit ya tup galaw nga ma ai. #Pru 12:1-20. 18Myihtoi Samuela a prat kaw nna ndai zawn re ai Shalai wa Ai Poi galoi mung garai n galaw yu nga ai. Hkawhkam Yoshia, hkinjawng ni, Lewi masha ni hte Yuda, Israela hte Yerusalem mare masha ni galaw ai ndai zawn re ai Shalai wa Ai Poi shawng de na hkawhkam ni kadai mung n galaw yu ma ai. 19Yoshia hkaw dung ai shi matsat ning hta ndai poi hpe galaw ma ai.
Yoshia A Hkaw Dung Ai Jahtum Prat
(2Hk 23:28-30)
20Hkawhkam Yoshia gaw Nawku Htingnu a matu amu magup galaw lajang ngut ai hpang Egutu Hkawhkam Niko gaw Uhprat hka nu makau na Hkarhkeme mare gasat na matu hpyen luksuk langai woi lung wa wu ai. Yoshia chyawm gaw shi hpe hkap hkum shakut wu ai, 21rai ti mung Niko gaw Yoshia hpang de ning ngu shiga shana dat wu ai: “Ngai gasat nga ai ndai majan gaw nang Yuda Hkawhkam wa hte hpa n seng nga ai. Nang hpe gasat na matu ngai pru sa ai n rai; nye a gumlau hpyen ni hpe gasat na she ngai pru sa nngai. Tin tin rai galaw na matu Karai Kasang ngai hpe tsun ni ai. Karai Kasang gaw nye a maga de nga nga ai majaw ngai hte nhtan shai ai lam hkum galaw et; dai n rai yang shi nang hpe jahten shamyit kau na ra ai.” 22Rai ti mung Yoshia chyawm gaw htim gasat na matu myit daw dan jahkut da wu ai. Karai Kasang gaw Niko hku nna tsun shadum nga ai ga hpe shi n madat hkraw wu ai rai nna, shi hkum hpe shi nsam makoi galai kau nhtawm Megido pa layang na majan ginra de pru sa mat wa wu ai.
23Dai majan gasat ai laman hte yang, Hkawhkam Yoshia gaw Egutu masha wa a pala gap hkra ai hkrum mat wu ai. Shi gaw shi a shangun ma ni hpe, “Ngai gaw sawng hkra machyi hkrum ni ai! Ngai hpe woi wa mi,” ngu nna tsun wu ai. 24Shanhte mung shi a hpyen leng hta na shayu la nhtawm hpang na hpyen leng hta shajawn let Yerusalem mare de woi wa ma ai. Dai yang e shi si mat nna hkawhkam ni a lupwa hta lup makoi da ma ai. Yuda hte Yerusalem na amyu masha ni yawng mung shi a majaw hkrap ngu hkrap ngoi nga ma ai.
25Myihtoi Yeremia gaw Hkawhkam Yoshia a matu sharung shayawt ga hpe shagawp da nga ai; shi a matu sharung shayawt yang lang ai dai mahkawn gaw mahkawn mangoi chye ai numsha, lasha ni a matu Israela mung hta htung lai langai tai wa sai. Dai mahkawn mangoi hpe shinggyin da ai sharung shayawt laika hta mu lu nga ai.
26Yoshia galaw ai amu magup ngu na dai Madu hpe nawku daw jau ai lam, Tara madat mara ai lam, 27hte shi a labau npawt ndung hkren hpe Israela hte Yuda Hkawhkam ni a Labau Laika hta ka matsing da nga ai.
Currently Selected:
2 HKAWHKAM LABAU 35: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.