2 HKAWHKAM LABAU 28
28
Yuda Hkawhkam Ahaza
(2Hk 16:1-4)
1Ahaza gaw asak hkun ning hta hkawhkam tai wa nna Yerusalem mare hta shi kru ning up nga ai. Shi gaw shi a kaji kawa Hkawhkam Dawi a kaja ai kasi hta n hkan nang nga ai; shing rai hkan nang na malai, dai Madu n ra sharawng ai amu hpe shi galaw nna, 2Israela hkawhkam ni a kasi hta hkan nga ai. Shi gaw nhprang arai hte galaw ai Bala sumla ni hpe jaw shangun nna, 3Israela masha ni rawt lung wa yang, mungdan kata kaw nna dai Madu gawt shapraw kau ai masha ni a matsat shabat re ai arawn alai hta hkan dagraw nang nna Hinom Kadit e manam pyaw ai baw nat nawng nhtawm shi a shadang sha ni hpe pyi hpara sumla ni a matu wan nat hkungga shatai wu ai. 4Tara maigan masha ni a nawku shara ni hta mung, kawng ntsa hkan e mung, hpun npu hkan e mung, shagu hkungga ni hte manam pyaw ai baw hte hpe shi nawng jau ya nga ai.
Suri Hte Israela Majan Byin Ai
(2Hk 16:5)
5-6Hkawhkam Ahaza yubak galaw wu ai majaw dai Madu shi a Karai Kasang gaw Suri hkawhkam hpe gasat dang shangun wu ai. Yuda bawng masha law law ni hpe Damasku mare de woi wa ma ai. Dai Madu mung Remalia a kasha Israela Hkawhkam Peka hpe Ahaza a ntsa awng dang shangun wu ai rai nna lani jan e sha magrau grang htum ai Yuda hpyenla 120,000 sat kau ma ai. Dai Madu shanhte a kaji kawa ni a Karai Kasang gaw ndai zawn byin shangun wu ai; hpa majaw nga yang, Yuda masha ni shi hpe kabai kau ai majaw rai nga ai. #2Hk 16:5; Esa 7:1. 7Zihkri mying ai Israela hpyenla wa gaw Hkawhkam Ahaza a kasha Masea, hkawhkam htingnu up hkang ai Azrikam hte hkawhkam wa a malai up hkang aya lu ai Elkana hte hpe sat kau wu ai. 8Yuda masha ni gaw shanhte hte hpu nau daw hkat nga ti mung, Israela hpyen luksuk mahtang numsha ni hte ma kaji bawng masha 200,000 hte hpe rim la nhtawm lanep law law hte hpawn Samari mare de woi mat wa ma ai.
Myihtoi Oded
9Oded mying ai dai Madu a myihtoi langai mi gaw Samari mare e nga nga ai; dai wa gaw mare de shang wa na shara hta Yuda bawng masha ni hte rau nhtang wa ai Israela luksuk ni hte shi hkrum wu ai; shi gaw, “Dai Madu na a kaji kawa ni a Karai Kasang gaw Yuda ni hpe masin yu pawt ai majaw shanhte hpe awng dang shangun nga ai; rai ti mung ya chyawm gaw nanhte shanhte hpe grai n hkru ai hku sat kau manit dai lam hpe shi na nu ai. 10Ya mung Yuda hte Yerusalem mare na lasha numsha ni hpe mayam shatai na maw nga myit dai. Nanhte mung dai Madu nanhte a Karai Kasang hpe shut kau nga manit dai hpe nanhte n chye nga myit ni? 11Nye a ga madat mu! Ndai bawng masha ni gaw nanhte a kahpu kanau ni hte kajan ni rai ma ai. Shanhte hpe wa kau shangun mu, shing n rai yang dai Madu masin kahtet nna nanhte hpe ari jaw na ra ai,” ngu nna tsun wu ai.
12Dingdung mungdan hpe woi awn ai masha mali ngu na Yehohanan a kasha Azaria, Meshilemot a kasha Berehkia, Shalum a kasha Yehikia hte Hadlai a kasha Amaza hte gaw luksuk a shamu shamawt ai lam ni hpe hkap ninghkap ya ma ai. 13Shanhte gaw, “Ndai bawng masha ni hpe ndai de hkum woi wa myit! Anhte mahtang dai Madu hpe shut kau saga ai. Anhte hpe ari jaw lu na daram shi hpe pawt sindawng shangun saga ai. Ya mung anhte a mara bai shut jat hkra lama mi hpe nanhte galaw mayu nga myit dai,” ngu nna tsun ma ai. 14Dai rai nna luksuk hpyenla ni gaw bawng masha ni hte lanep arai ni hpe amyu masha ni hte shanhte a ningbaw ni a lata hta ap ya nga ma ai. 15Shaloi lu rim wa ai lanep arai kaw nna bu hpun palawng, bawng masha ni hpe garan jaw na matu masha mali hpe san da nga ma ai. Dai ni gaw shanhte hpe bu hpun palawng shabu jahpun nna hkyepdin shadin ya let shanhte sha na, lu na malu masha alaw alam jaw ya ma ai. Hkrun lam hkawm sa na matu nau wa n-gun kya nga sai ni hpe chyawm gaw lawze ni hta shajawn nhtawm Yuda lamu ga hta nga ai Namhtan Hpun Mare ngu ai Yerihko de du hkra bawng masha ni yawng hpe sa sa dat ma ai. Dai hpang Israela masha ni mung Samari mare na shanhte a dum nta de bai nhtang mat wa ma ai.
Ahaza Gaw Asuri Kaw Karum Hpyi ai
(2Hk 16:7-9)
16-17Edom masha ni gaw Yuda mung hpe bai shang hpya bang wa nhtawm bawng masha law law rim woi mat wa ma ai rai nna Hkawhkam Ahaza hpe sa karum la na matu Asuri Hkawseng Tiglat Pilesa hpe n-gun hpyi wu ai. 18Dai aten hta nan Hpilisti masha ni mung sinna maga de nga ai bum lagaw ni hkan na mare ni hte Yuda mung a dingda maga de na mare ni hpe sa shang hpya ma ai. Shanhte gaw Bet Sheme mare, Aiyalon mare, Gederot mare ni hpe mung, Sohko mare, Timna mare hte Gimzo mare ni hte de a kahtawng ni hte hpawn gasat kashun la nna dai hkan e dinggrin a nga nga ma ai. 19Yuda Hkawhkam Ahaza mahtang shi a amyu masha ni a ahkaw ahkang hpe shut kau ya nna dai Madu hpe hkap daw kau wu ai majaw dai Madu gaw Yuda a ntsa e ru yak tsin-yam tsindam shapraw dat nga ai. 20Asuri hkawseng gaw shi hpe sa karum la na malai sa ninghkap nhtawm ru yak tsin-yam tsindam shabyin dat wu ai. 21Dai rai nna Ahaza gaw Nawku Htingnu hte hkawhkam htingnu na ja rai hpe mung, amyu masha ni a ningbaw ni a dum nta hkan na ja rai hpe mung la nhtawm hkawseng wa hpe sa sak jaw wu ai, dai zawn galaw wu ti mung shi sa karum la nga ai n rai.
Ahaza A Yubak Ni
22Ahaza a ru yak ni gaw grai sawng wa ti mung dai masha Ahaza gaw shawng de na hta grau sawng hkra dai Madu hpe shut kau nga ai. 23Shi gaw shi hpe gasat dang kau ai Suri masha ni a karai ni hpe shagu hkungga ni nawng ya wu ai. Shi gaw, “Suri karai ni gaw Suri hkawhkam ni hpe karum ya nga ai; shanhte hpe ngai hkungga nawng ya ai rai yang, ngai hpe mung dai ni karum la mai na ma ai,” ngu nna tsun wu ai. Dai gaw shi a ntsa e mung, shi a mung hta mung tsin-yam tsindam shapraw dat ai amu rai nga ai. 24Dai hta kaga, shi gaw Nawku Htingnu na arung arai ni yawng hpe la nna, agrawp shadaw kau nhtawm Nawku Htingnu pat kau wu ai. Yerusalem mare daw shagu hkan tawn hkungri ni hpe sharawt tawn da wu ai. 25Shi gaw maigan karai ni hpe manam pyaw ai baw nat nawng na matu Yuda mung na mare kahtawng shagu hta tara maigan ni a nawku shara ni hpe gap da wu ai. Ndai lam hku nna dai Madu shi a kaji kawa ni a Karai Kasang a pawt sindawng ai gaw shi hkum nan hta du wa shangun nga ai.
26Shi hkaw nnan dung ai kaw nna hpang jahtum du hkra na mabyin lam yawng mayawng hte hpe bk Yuda hte Israela Hkawhkam ni a Labau Laika hta ka matsing da nga ai. 27Hkawhkam Ahaza si mat jang, shi hpe hkawhkam lupwa hta n re ai sha Yerusalem mare hta lup makoi da nga ma ai. Shi a kasha Hezekia gaw shi a hkang hta hkawhkam tai wa sai. #Esa 14:25.
Currently Selected:
2 HKAWHKAM LABAU 28: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.