1 HKAWHKAM 4
4
Shawlumon A Du Salang Ni
1Ya Shawlumon gaw Israela mung ting a hkawhkam rai nga ai, 2ndai ni gaw shi a du salang kaba ni rai nga ma ai:
Hkinjawng: Zadok a kasha Azaria
3Hkaw wang kata na amu madu ni: Shisha a kasha Elihorep yan Ahiya
Labau ka hpareng: Ahiluda a kasha Yehoshahpat
4Hpyen luksuk hpe up hkang ai wa: Yehoiada a kasha Benaia
Hkinjawng ni: Zadok hte Abiahta
5Ginwang mung du ni: Nahtan a kasha Azaria
Hkawhkam wa hpe hpaji jaw ai wa: Nahtan a kasha hkinjawng Zabuda
6Hkawhkam htingnu na shangun ma ni hpe hpareng ai wa: Ahisha
Bungli hpareng ai wa: Abda a kasha Adoniram
7Shawlumon gaw Israela mung e ginwang mung du marai shi lahkawng hpe san tawn da wu ai. Shanhte gaw hkawhkam wa hte hkaw wang na nta masha ni a matu, shanhte a ginwang ni kaw na lusha shahpa karum ya mu ai. Shanhte gaw laning mi hta shata mi marai langai ngai lit la ya nga ma ai. 8Da ndai gaw du salang shi lahkawng hte shanhte lit la hpareng ai ginwang ni a mying jahpan ni rai nga ai:
Benhura: Ehprim mung na bum ga
9Bendeke: Makaza mare, Shalabim, Bet Sheme, Elon, hte Bet Hanan mare ni
10Benhese: Arubot hte Sohko mare ni, Hehpera lamu ga ting
11Benabinadab, shi gaw Shawlumon a shayi sha Tahpat hpe hkungran la ai wa rai nga ai: Dora ginwang ting
12Ahiluda a kasha Bana: Tanak, Megido mare ni, Bet Shan makau na ginwang yawng,
Zarehtan mare makau, Yezrela mare a dingda daw, Abela Mehola hte Yokmeam mare de du hkra
13Bengebara: Gilead mung na Ramot mare, Manashe amyu matu na Yaira lakung lama madu da ai Gilead mung na kahtawng ni; Bashan mung na Argoba ginwang hta bunghku kum nna mare chyinghka ni hta magri mang htinggrang grang ai mare kaba kru shi
14Ido a kasha Ahinadab: Mahanim ginwang
15Ahimaza, shi gaw Shawlumon a kaga shayi sha Basemat hpe hkungran la ai wa rai nga ai: Naphtali a lamu ga
16Hushai a kasha Bana: Ashe ginwang hte Bealot mare
17Parua a kasha Yehoshahpat: Yisahka lamu ga
18Ela a kasha Shime: Benyamin lamu ga
19Uri a kasha Gebera: Amori hkawhkam Sihon hte Bashan hkawhkam Oga yan up hkang lai wa sai Gilead ginwang
Ndai shi lahkawng hta kaga, mung ting hpe yu ai mung du langai naw nga nga ai.
Ngamu Ngamai Ai Shawlumon A Prat
20Yuda hte Israela amyu masha ni gaw panglai hkin-gau ntsa e taw ai zaibru zawn law htam wa nga ma ai rai nna, shanhte gaw kabu gara ai hte lu lu sha sha rai ma ai. 21Shawlumon a mungdan chyawm gaw Uhprat hka nu kaw nna Hpilisti hte Egutu mung a lamu ga jarit du hkra masha amyu ni yawng nga ai shara ni lawm nga ai. Shanhte gaw Shawlumon a prat htum hkra shi a up hkang ai npu hta taw nna shi hpe ahkun hkanse ni jaw ya nga ma ai.#Nin 15:18; 2Hl 9:26.
22Shawlumon hpe shani shagu jaw ra ai lusha shahpa ni gaw mani ai muk shadung muk dang jahku shi, n mani ai shadung dang latsa matsat shi; 23kawn tawn ai dumsu kasha shi, udat e rem da ai dumsu hkun, sagu latsa hta kaga chyahkyi, shan nga, zau nyi hte rem da ai u ni law law rai nga ai.
24Shawlumon gaw Uhprat hka nu a sinna maga de na lamu ga yawng, Uhprat hka nu makau nga ai Tipsa mare kaw nna sinna maga Gaza mare du hkra up hkang nga ai. Uhprat hka nu a sinna de na hkawhkam ni yawng shi up hkang ai npu hta taw mat ma ai rai nna, htingbu mungdan ni yawng hte ngwi pyaw sim sa ai hte nga nga wu ai. 25Shi ahkrung nga dingsa Yuda hte Israela mung na amyu masha ni shim lum ai hte shanu nga lu ma ai majaw, dinghku shagu tinang nang a sabyi ru ni hte lakum hpun ni hta ngwi pyaw ai hte nga lu ma ai.
26Shawlumon gaw leng garawt ai gumra ni a matu gumra lawng mun mali hte gumra dap hta lang ai gumra mun mi hkying lahkawng lu nga ai.#1Hk 10:26; 2Hl 1:14; 9:25. 27Shi a mung du marai shi lahkawng hte gaw shata mi hta marai langai mi di nna shi a matu masat da ya sai hte maren, hkawhkam Shawlumon shi hkum nan a matu hte hkawhkam hkaw e sha ai ni yawng a matu ra ai malu masha ni hpe shapraw ya nga ma ai; shanhte hta ra ai lam magup hpe mung tut nawng jaw ya nga ma ai. 28Mung du shagu hte gaw leng garawt ai gumra ni hte bungli shangun ai yam nga ni a matu muk-yaw mam hte yihku ni hpe ra ai made shapraw ya ra nga ma ai.
29Karai Kasang gaw Shawlumon hpe shadawn n lu hkra grai kaba nna laklai ai hpaji byeng-ya hte mahkra hpe dinghkren mu mada lu ai nyan hpaji hte machye machyang hpaji jaw ya nga ai. 30Shawlumon gaw Sinpraw maga de na hpaji rawng ai ni hte Egutu mung na hpaji rawng ai masha ni yawng hta grau nna hpaji rawng nga ai. 31Shi gaw masha yawng mayawng hta hpaji rawng htum ai wa rai nna Ezrahi masha Ehtan, Mahola kasha Heman, Hkalahkola, Darda ni hta pyi grau nna hpaji rawng nga ai majaw htingbu mungdan ni hkan shi a gumhkawng ai lam chyam bra mat wa nga ai.#Shk 89 Ga Baw. 32Shi gaw ga shagawp hkying masum hte mahkawn mangoi ga hkying mi hta n-ga, ka shagawp da wu ai.#Gsh 1:1; 10:1; 25:1; Smg 1:1. 33Shi gaw Lebanon bum ga na marau hpun kaw nna bunghku ntsa e tu ai husup hpun ni du hkra hpe tsun nga ai; shi gaw yam nga ashu ashan ni a lam, u amyu myu ni a lam, gumrawt hkawm ai baw hte nga amyu ni a lam hpe mung tsun nga ai. 34Mungkan ga ntsa na hkawhkam ni yawng shi tsun ai hpaji byeng-ya a lam hpe na lu nga ma ai majaw shi a hpaji ga hpe madat hkam la na matu masha ni hpe shangun dat nga ma ai.
Currently Selected:
1 HKAWHKAM 4: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.