Luk 22

Bekuŋwu be Bezwifi bafumba ne ubuuma Zezu

1Itsinda dze lipembe le nde udzulu dze kumvu Paki dzaya bakaka. 2bekuŋwu be bekabi be bisemi bye Nzambi ne belakisi be bitsila bedze ne ufumba nda bangu bibuuma Zezu, ni bangu bedze ne bongo ve batu.

3Ye Satan enyidzile se unlima ŋwen Zuda we kumvu mboko Isikalyoti, wedze se yimvu ye betuma bedzi iku ne bole. 4Zuda atse kuta yimvu ne bekuŋwu be bekabi be bisemi bye Nzambi, ne bibutu bye bewolo be ndaku ye Nzambi, ne ufumba nda wangu itse sumbise bangu Zezu. 5Bangu batsisa, ye bangu bekuta ndaka ye ukaba Zuda bedolo. 6Zuda amekidze, afumba nda wangu isumbise bangu Zezu isolo ulayi ne unkuka.

Zezu aluma bebingi bedzi ne uyebise itsinda dze Paki

7Vusa ve itsinda dze pembe ye nde yila yi landise pembe dze kumvu Paki va dzanga, dze bibuuma bindomvene ne udza se itsinda dzadzu. 8Zezu aluma Pyeli ne Zan, wangu ne bangu ati: «Tsekayi lamba bila bye itsinda dze Paki.» 9Bangu basuŋwule nedzi ati: «We tondo witi betse lamba dzangu ni wi?» 10Zezu ne bangu ati: «Ndili ye beyi bi bidzangele se ngundu, beyi bekwanyele ne muutu abapa mbungu ye mangu. Bingayi wangu se ndaku yedzi inyidzilele.» 11Tandayi ne kuŋwu we ndaku yayu ati: «Kuŋwu asuŋwule we ati, liyi ye ndaku yami idzele bila bye itsinda dze Paki, besu ne bebingi bami ni yowi?» 12«Muutu wayu alakele beyi liyi ye ndaku yi neni yidzi ikulu ye bamana yebise, ne bineni byesi. Ayayu ni buma ye beyi bilambele bila bye itsinda.» 13Bangu batse, bakobise mesi nda Zezu etanda bangu, ne bangu balamba bila bye itsinda dze Paki.

Bila bye Kuŋwu

14Ndili ye udza ya dzanga, Zezu asunda untsitsi ne udza bila bane betuma bedzi. 15Zezu ne bangu ati: «Me tondo dza bila bye itsinda dze Paki kone ne beyi, me ne ubanda yene membaba. 16Yayu, me tanda beyi, me nde tse vele dza bila bye Paki, nzii ne vʉsa ve mamvu mamu mitse ya se Ukani ve Nzambi.» 17Yumana, ye Zezu iboko kopi ye melaku, avʉtise Nzambi live, amana vʉtise Nzambi live, ne bebingi bedzi ati: «Bokayi kopi ye melaku yi, notayi tima ye beyi, 18me tanda beyi, me nde tse vele noto melaku, nzii ne vʉsa ve Ukani ve Nzambi vitse ya.» 19Ye Zezu eboko pembe, amana vutise Nzambi live, atsitaka pembe akabaka bangu pembe ati: «Ayi ni nyulu yami, yami ikaba utsina ne beyi. Pikayi vavu mendili mesi ne uyivile me.» 20Wangu akaba bangu ne kopi ye melaku, bemana dza, ati: «Kopi yi, ni umbatsi ve ndimvu ve tsawen ve tima ye Nzambi ne batu, unsu ŋwami nwe tse tanga utsina ne beyi. 21Wayayi muutu witse sumbise me adzi wa, untsitsi kone nami ne udza bila. 22Ee, we yikwene Muutu atse waa nda Nzambi etanda, ni ndoko ne muutu witse sumbise wangu!» 23Ye bebingi be Zezu bewowe tima ye bangu ati: «Witse sumbise Zezu tima ye bebe ni nza?»

Witakwe boko tima ye bebingi be Zezu ni nza?

24Ye bebingi be Zezu bedze ne lwana tima ye bangu, ne ufumba yiba wi takwe boko ubutu. 25Zezu ne bangu ati: «Bekani be melongo benyokile bangu, ne bidzi ne ukuŋwu kule bangu, befumba nati bebanga bangu bembatsi be batu. 26Ni beyi nde pika nda bangu, ni wi takwe boko tima ye beyi uve adze nda ŋwana unte, ne widzi butu ye boko uve adze nda uŋnzanzi. 27Ni wi takwe boko ni nza, wi dza bila na wi kabaka bila, yedzi ni wi dza bila, kavavu? Yayu me, medzi tima ye beyi ni nda undzanzi we beyi. 28Beyi bedze si kone nami ndili yami edze se membaba. 29Ni me, me tuka kaba beyi Ukani nda Tata wami ekaba me. 30Yayu beyi betse dza bila, ne unywa kone nami se Ukani vami, ye beyi bitse dze mitsitsi se bibuma bye bekani, ne upama mamvu me mekaka iku ne mole me batu be Izayeli.»

Zezu atanda nda Pyeli itse luna wangu

31Zezu atanda ne Simon Pyeli ati: «Simon, Simon, yuka me tsenguse we, Satan asuŋwule ne unyingise beyi nda binyigise mbulu se lipila ne unanguse bipandzi. 32Ni ma bondo nowe, toko wa fiya ivukidze. Yowe itse ya vutse kwele yami, wa kaba ne baana be tata singa.» 33Pyeli ne Zezu ati: «Kuŋwu, tsawen me tuka tse ungenenge benu, ma waa benu.» 34Zezu akalʉle nedzi ati: «Me tanda we, Pyeli velolo, sangwe we susu ne ulongo, uve wa tanda bidzuku bisatu witi we nde yiba me.»

Bedolo, ŋwanza, ne pusenzulu

35Ye Zezu evele tanda bangu ati: «Ndili yami eluma beyi ne utse tanda misisili mive, beyi beke bapa bedolo, myanza, ne bekotoko, beyi befiya yila ti ne yotu?» Bangu bakalule ati: «Nyen, besu beke fiya yila ti ne yotu.»

36Ye Zezu etanda ne bangu ati: «Ni tsaŋwen, widzi ne bedolo abapa, widzi ne wanza aboko, we nde pusezunlu, asumbise ingoyi ne usumba pusezunlu.» 37Me tanda beyi, uve me betende se Sangunvu ye Nzambi nami maya, se Sanguvu ye Umpende batende ati: «Batu betse boko muutu yu nda umpita, ni, me betanda nami, me tse ya.» 38Bebingi bedzi nedzi ati: «Kuŋwu, yene bepusenzulu bole.» Zezu akalule ne bangu ati: «Ya kuka.»

Zezu abondo kule kudzi ye Olivye

39Zezu apula ne utse se Kudzi ye kumvu ŋwili ŋwen olivye, nda wangu ipika keke ne kala. Bebingi bedzi babinga wangu. 40Ndili yedzi ekalwe buma mene, wangu ne bangu ati: «Bondayi ne ubomo singa, yayu ndili ye bitse maama beyi, beyi nde naŋwen.» 41Ye Zezu eteme kone ne bebingi bedzi, alawise va metambi ne bangu, avuna mebongo se senze abondo 42ati: «Tata, ti wa tondo, lawuse membaba mami inotele nda binoto mangu. Ni we nde pika nda mi tondo, ni pika nda wi tondo.» 43Ye tuma we Nzambi motu eyinga ikulu ne ukaba wangu singa. 44Zezu ayene bongo ne bayi, yedzi evele bondo ne singa. Itukume dze dzi dza yikwe nda metanga me unsu mi naŋwen sina. 45Amana bondo, yedzi etelime, aya kwele ye bebingi bedzi. Wangu akobise bangu bembula badamba subii, 46yedzi etanda ne bangu ati: «Beyi benanga bembula ni neyi? Nyusayi, beyi bebondo, ne ubomo singa ndili ye bitse maama beyi.»

Bakwata Zezu

47Ndili yedzi edze ne utanda vavu, unkuka ŋwen batu ŋwaya. Muutu we kumvu Zuda se betuma bedzi iku ne bole, edze busu ni ve bangu, yedzi etsindene kone Zezu ne usanzile wangu. 48Ni Zezu nedzi ati: «Zuda, we sanzile we yikwene Muutu ni ne usumbise wangu?» 49Ye bebingi be Zezu beyene mitse ya, bangu basuŋwule wangu ati: «Kuŋwu, besu belwana ne bepusenzulu be besu?» 50Ye umbingi we Zezu motu, etsita iluyi dze boko ye sangwe dze uŋnzanzi we kuŋwu we uneni we bekabi be bisemi bye Nzambi. 51Zezu ati: «Dzikayi, ya kuka.» Zezu abetime ne iluyi dze muutu mene, alungise wangu. 52Yumana vavu, ye Zezu etanda ne bekuŋwu be bekabi be bisemi bye Nzambi, ne bekuŋwu be bewolo bibata ndaku ye Nzambi, ne bibutu beya boko wangu ati: «Beyi beya ne bepusenzulu, ne bipanda, ne uya kwata me nda umpita? 53Masi mesi medze ne beyi se ndaku ye Nzambi, ni beyi beke kwata me. Ni ayi ni ndili ye beyi, ne ye batu bidzanza se pinzi.»

Pyeli aluna ati wangu nde yiba Zezu

54Bangu bakwata Zezu, ye bangu betse nedzi se ndaku ye kuŋwu we bekabi be bisemi bye Nzambi. Pyeli edze ne ubinga Zezu ne ulayi. 55Batakise ŋwunyan tima ye lipaŋgu. Batu mitsitsi uŋkolo ŋwen ŋwunyan, ne Pyeli asunda untsitsi kone bangu. 56Undzandzi we ŋwatu ayene Pyeli untsitsi uŋkolo ŋwen ŋwunyan. Wangu awaya Pyeli too ne bangu ati: «Ne muutu yu se edze bane Zezu.» 57Ni Pyeli akalule ne ŋwatu mene ati: «Nyen me nde yiba wangu.» 58Yumana, muutu moko ayene Pyeli nedzi ati: «Nowe, we ni umbingi we Zezu.» Ni Pyeli akalʉle ne muutu wayu ati: «Nyen, kaka me.» 59Bemana vavu, ndili mbotu ye suta, muutu moko aya sikidze ati: «Umbu amene, muutu yu, nedzi edze bane Zezu, nedzi ni muutu we Galile.» 60Ni Pyeli akalʉle ati: «Me nde yiba mowe ifumba tanda.» Ndili mene mbotu yedzi edze ne uwowe, sangwe we susu alongo. 61Zezu ayikwene awaya Pyeli too. Ye Pyeli eyivile me Kuŋwu etanda wangu, Kuŋwu etanda wangu ati: «Ve lolo, sangwe we susu nde longole ti we nde lunele me bidzuku bisatu.» 62Pyeli apula se lipaŋgu alila uyitsi. 63Batu bedze ne bata Zezu basewe Zezu, babuuma Zezu luba. 64Bangu badziba Zezu panza, nedzi ati: «Tanda, we me damaka we ni nza?» 65Ye bangu bavele tanda Zezu mamvu moko meyitsi ne utukene wangu.

Zezu busu ve bepami be Bezwifi.

66Ndili ye vusa ve se ŋwen, bibutu bye Bezwifi, kuŋwu we bekabi be bisemi bye Nzambi, ne belakisi be bitsila bakwanye. Bangu babapa Zezu busu ve bepami beneni, 67ye bangu besuŋwule wangu ati: «We ni we Nzambi etobo? Tanda besu.» Zezu akalule ne bangu ati: «Ti ma tanda beyi, beyi nde mekidzele me, 68ti ma kaba beyi undzitsi, beyi nde kalʉlele me. 69Ni tsawen mene yi, we yikwene Muutu asundele untsitsi kwele ye boko ye sangwe ye Nzambi we singa.» 70Ye besi betanda ati: «Yayu we ni Ŋwana we Nzambi?» Zezu akalule ne bangu ati, beyi mene ni bitanda ati: «Me ni Ŋwana we Nzambi.» 71Ye bangu betanda ati: «Besu baya nde dzamvu ne batu boko ne uya pɨta Zezu. Besu mene bayuka medzi me wowe.»

Currently Selected:

Luk 22: WUM

Highlight

Copy