Luk 17
17
Mendondzi me Zezu
1Zezu ne bebingi bedzi ati: «Yetse dze si ne mamvu miluma muutu ne upika mesumu. Ndoko ne muutu wiluma boko ne upika mesumu. 2Wuku bakuta wangu imanyan dzi neni se tsʉngu, bayisa wangu se nzali ye metsimba. Toko wangu aluma ŋwana unte motu ne ulewe Nzambi 3Pikayi kebe.
Ti ŋwana mama apika we dzamvu dzibi, wa wowe nedzi, wangu ti amekidze ati, apika we dzamvu dzibi, boloko wangu.» 4Ti ŋwana mama apika mamvu mebi bidzuku untsami ne vusa, ti wangu aya vutse bidzuku untsami nowe ati: «Ma yene ubi ne mamvu mami me pika we, uve wa boloko wangu.»
Ivukidze
5Betuma be Zezu nedzi ati: «Kuŋwu velise ivukidze dze besu.» 6Kuŋwu akalule ne bangu ati: «Beyi ti bedzi ne ivukidze nda limbulu lite le ŋwili ŋwen kumvu mutadi, beyi betuka tanda ne ŋwili ŋwu, wundze tseke kunive se nzala ye metsimba, ye ŋwangu wi kuuna beyi.»
7«Ti tima ye beyi yedzi ne muutu, widzi ne undzanzi wi funda senze, ti ya wata vavu wi bata bibodzi. Ye undzanzi iyinga mekuba.» Wangu atuka tanda nedzi ati: «Sunda untsitsi we dza bila?» 8Nyen, wangu atandele nedzi ati: «Lamba me bila, swa mikanda mye tselele, we ya kaba me bila. Ndili yami imanele dza ne unoto, nowe wa dza wa noto. 9We nde tangwe undzanzi wowe ne sadzi yowe meluma wangu pika.» 10Ne beyi se, ndili ye beyi bipika mesi me beme luma beyi pika, tandayi witi: «Besu bedzi ni bedzanzi be nde yulu. Besu beme pika si me besu biki pika.»
Zezu asaka batu iku bedze ne fima
11Ye Zezu edze ne utse kwele ye Zeluzalemi, wangu asuta tima ye undilu ŋwen ngundu ye Samali ne Galile. 12Ndili yedzi ewasa nyidzile se mbuka mbotu, batu iku bedze ne fima, bangu baya kwanye nedzi, badze ulayi nedzi. 13Ye bangu bewula unsima ati: «Zezu, Kuŋwu, yene besu tsesi.» 14Zezu ayene bangu, wangu ne bangu ati: «Tsekayi laka nyulu ne bekabi bye bisemi bye Nzambi.» Ye bangu bedze ne utse, bangu balunga. 15Motu tima ye bangu, ayene ati, wangu alunga, aye vutse mbisa, ne ukumise Nzambi yanga, yanga. 16Wangu anaŋwen sina mekulu me Zezu, panza se senze, avutise wangu live. Muutu wayu edze ni we Samali. 17Ye Zezu etanda ati: «Be iku besi bake lunga? Boko betanyi ne benayi bawayi? 18Muutu ti ne motu ake yivɨle ne uya vʉtise Nzambi live, mbisa ye unzenze ŋwun?» 19Zezu nedzi ati: «Telime we tse, ivukidze dzowe dza lungise we.»
Ukani ve Nzambi va yawa
20Batu be Falizi basuŋwule ne Zezu ati: «Ukani ve Nzambi ve tse ya ni ndili yowi?» Wangu akalule ne bangu ati: «Ukani ve Nzambi nde ya nda yila ye biyene.» 21Nde tse tanda ati: «Vangu vu wa, na vangu vu wu, ni Ukani ve Nzambi vedzi ni tima ye beyi.»
22Ye Zezu etanda ne bebingi bedzi ati: «Ndili ye tse ya ye beyi bitse fumba yene we yikwene Muutu, dzakene vusa votu, ni beyi nde tse yene wangu.» 23Batu betse tanda beyi ati: «Wangu aya wa, wangu adzi wu, beyi nde tanga ne utse wawu.» 24Nda ikulu dzi welime kwalala ayi kwele nzii ne kwele mboko, ye tse dze ni vavu, vʉsa ve we yikwene Muutu itse ya. 25Ni uve we yikwene Muutu abanda yene membaba me yitsi, ne batu be lolo betse lewe wangu. 26Mesuta ndili ye Nowe, ni mitse suta ndili ye we yikwene Muutu, me tse ya si vavu. 27Batu bedze ne udza ne unoto, bedze ne ubalive, nzii ne vʉsa ve Nowe enyidzile se linzi yineni. Ndili ye Nowe enyidzile se linzi mvula we uneni anon, batu besi bawaa. 28Yetse dze ni nda ndili ye Lote. Batu bedze ne udza ne unoto, bedze ne usumba bila ne usumbise, bedze ne ukuna mekʉba ne utunga mendaku, 29nzii ne vusa ve Lote eteme Sodom. Ndili yedzi enangwe Sodome, Nzambi aluma ŋwunyan ne fla nda mvula iyinga ikulu ne ukwa kule ye batu, bangu besi bawaa. 30Yetse dze ni vavu, vʉsa ve we yikwene Muutu itse ya. 31Vʉsa vavu, witse dze kule ŋwanza ŋwen ndaku, nde tse tuka vele sunda, ne uboko bila bidzi se ndaku, ne wi tse dze se kʉba, nde tse vele vʉtse ndaku. 32Yivelekayi, ŋwadzi we Lote! 33Wi tse fumba bata libɨku ledzi, atse fiya langu, ni wi tse fiya libɨku ledzi atse bata langa. 34Me tanda beyi: «Pindzi yayu, batu bole betse dze se ilaka dzotu, betse boko muutu motu, moko avuka. 35Batu bole betse dze ne sika nzaka unsamba, betse boko motu, moko avuka. 36Mebaka mole me tse dze se kuba, betse boko dzotu, dzoko dza vuka.» 37Bebingi bedzi basuŋwule wangu ati: «Kuŋwu mamvu mamu me tse suta ni wi?» Wangu akalule ne bangu ati: «Buma yidzi ne tsindzi ne menyungu me tse kukene si wayu.»
Currently Selected:
Luk 17: WUM
Highlight
Share
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
