Luke 11

Zezi ayiziga lemigi le kabwono

1Cugu lemon Zezi kabwono nca biri lemon. Nde kamana kabwono, olwoni a nde omon ŋa nde ndi: «Kolokolo we Mfumu, lyele bizi maami ma alyele bizi, ntini ye abwono bizi, mva ka kiigi yiziga Za Batise alwoni a nde.» 2Ŋaa Zezi ŋa bo ndi: «Ntini ye abwono be Njyami, be le lyeli ni:

Taara,

ŋaa nkuumu a we e cece anyima yo,

omfumu o we oya

3Mpa bizi biila e bizi ba ecugu eso.

4Bologo amaami a bizi maabi, ma lesa we.

Mva lemigi lebologo bizi baari ba baasa bizi maami maabi.

Ndaga kanyina Satan katuma bizi ma kasa maami maabi.»

5Ŋaa Zezi vuri dugi ŋa alwoni a nde ndi: «Yo ŋa aka mbuuru omon nca be ŋa ndigi, ŋaa ndigi yi baga nde nca otuma mpiibi ma kaya lyele nde ndi: Ndigi, ma difa mi ampeembe tari. 6Kabila ndigi a mi omon maaya onjia mpila mi, ŋaa mi biila ba kampa nde kali. 7Ŋaa aka buga wo ka kanca njo wua akaala ŋa nde ndi: Ndaga mi ka weele, njo ama mana binda, bira baana yiga ma tolo leka, mi kimabuna kavura temeŋe ma kaya mpa we biila ŋi. 8Mi elyele be ni, aka se ndigi aka saraga ma kaya mpa nde biila ma nkeri ndigi o bo ŋi. Nde kama temeŋe ma eweeli ebuga ba ka weeli nde. 9Yia biri ye elyele mi be ni: Lelaa ŋa Njyami, nde ampa be, lesaga ŋa nde, be lebaga, leberege ka onyua njo nde, Njyami anaana be yo. 10Okorogo mpini mbuuru wo alaa ŋa Njyami, nde ampa nde. Ŋaa aso ba baasaga ka mpila Njyami, baabaga. Ŋaa nde ka naana njo ma mbuuru wo aberege. 11Kanca be ba ataara eli mwana kalaa nde ncu, nde mpi nde ntaari na? 12Eli mwana kalaa bi nde mpi nde ngya na? 13Ŋaa aka angaa maami obi mva be, leyaa kampa baana a be biibi beeve, ŋa to nkuza Taara wo yulu ka kwono kampa Oduduma Santi ba baalaa nde ŋa nde?»

Zezi acuta kapundu keebi

14Cugu lemon Zezi curi kapundu kamon kaka kiigi liga nkina jui. Ŋaa nde kama cura ko, nkina yiga alyele, ŋa ekoli baari. 15Ŋaa ake ba kalyele ndi: «Nde ni ma mpari mfumu a epundu wo baacwolo ndi Bezebile ka acura epundu beebi.» 16Ŋaa akima ayi ma kayiiŋa nde oyeri, ŋaa bo ŋa nde ndi: «Sa bizi mpiri ya ye mvyere ni mpari a we mpila Njyami yeewa.» 17Ŋaa Zezi kiigi ma mana yaa ecimiŋi e bo, nde ŋa bo ndi: «Omfumu eli baari ŋa ombayi, ba ajwana, lebigi kali, ŋa anjo maava yila abuga, mon ŋa mon. 18Ŋaa be lelyele ni Bezebile mbuuru wo ampa mi mpari ma kacura epundu beebi! Ŋaa aka bwa Satan yiga ajwana bila nde-ankulu, ŋaa omfumu o nde kama je levuzu bunu? 19Ŋaa aka mi ecura epundu beebi ma mpari Bezebile, ŋaa alwoni a be, ma mpari a na bo ba acura jo? Ma bwa bo ankulu baaka ankani a be. 20Ŋaa Njyami mbuuru wo ampa mi mpari ma kacura epundu beebi. Ma bwa se, mpari ye omfumu o Njyami omi ya mpila be.

21«Aka mbuuru a balaga ŋa mpari, ŋa anjazi, nde akiele njo nde, ŋaa kabaga ka nde kaka pie pie. 22Ŋaa aka mbuuru a balaga okima woovuli nde mpari kaya, kajuana bila nde, kavula nde, mpiini nde anjazi eli nde ma lege lila ma mon. Ŋaa mbuuru woovuli nde wua kabi biibi be empiini nde bya eso, kabi bila ŋa andigi a nde. 23Mbwuru eli kabila mi ŋi, nde ŋa bele mi. Ŋaa mbuuru wo abiza kayamaŋa mi ma kuzuga, nde acazaga baari.»

Eyi vurigi ba kapundu keebi

24Ŋaa Zezi ndi: «Ntini ye acwuga kapundu keebi kanca mbuuru, ko kayeni nca biri eli kalogo kali, ma kasaga biri le kawuuma. Ko kabiza baga, ko ndi: Mi evuruga nca njo mi. 25Ŋaa ntini ye yavuruga ko, ko katanaŋa njo ami kwomo, ami selege, 26ŋaa ko kayeni saga epundu beebi ekima ncaami, ba evuli kancomi kia nkeri, ŋaa jo eyi nyunuŋa nca nde, jo eki. Ŋaa yiga eki e mbuuru wua yiga evuli eki encomi.»

Kase ŋa ba baayuga mbari a Njyami

27Ŋaa Zezi alyele bwa, okaazi omon, sati jui ka kari a baari, ŋa Zezi ndi: «Kase kali ŋa okaazi wo kuli we, wo vuri mpa we abiele.» 28Ŋaa Zezi kaali ŋa nde ndi: «Kase nke kaka ŋa baari ba baayuga mbari a Njyami, ŋa baba anyima yo.»

Ekaali e Zezi ŋa baari ba baalaa nde mpiri

29Ŋaa lembuuru lewayi kapaana Zezi, ŋa nde yiga alyele ŋa bo ndi: «Leca li leebi. Lo le sagi mpiri. Lo leka mamono mpiri nkima ŋi, kangula mpiri e mva ye Zonase wo ntuma Njyami. 30Se e Zonase kiigi mpiri ye baari a Ninive, ŋaa Mwana Mbwuru se aka mpiri ye leca li. 31Ma cugu le opami, mfumu wo okaazi woonini, awa kasi ka Seba, nde asaraga ma kampama baari ba leca li, ŋaa nde aciniŋa bo, kabila nde fi ancwo ma okiri ma kayuga ncimi a mfumu kasi wo acwoli ma Salomon. Ŋaa mono kaŋaa, ŋaa mbuuru woovuli Salomo. 32Baari a Ninive ba asaraga ma cugu le opami, bila leca li. Bo ba aciniŋa lo. Kabila bo amaakaala etuma, ntini ye yugi bo mbari ye Zonase. Ŋaa mono kaŋaa, ŋaa mbuuru woovuli Zonase.»

Miizi a we mva munda njuru a we

33Zezi avura lyele ndi: «Mbwuru akanasa munda ma kaje lonoŋo yo ncina mbisa ŋi. Okorogo nde akuta yo ka okami a njo, ma buni ba ba anyunuŋa amoni kafii. 34Miizi a we munda njuru a we. Ŋaa ntini ye ka miizi a we yemiŋi, njuru a we eso se eli kanca kafii. Ŋaa aka miizi a we abi, njuru a we se eli kanca lempiibi. 35Ŋaa ma bwa sa oyeri ncanke kafii kakali ma we ka kirigi lempiibi. 36Ŋaa aka njuru a we eso eli kanca kafii. Se kabari kakali nca lempiibi kali. Ŋaa yo eso ye kanca kafii, mva ka ampa munda we kafii ka yo.»

Zezi afala bila afarizi ŋa ayizigi angiri

37Ntini ye mani lyele Zezi bwa, Ofarizi omon ocigi nde ma kaya ja ka njo nde. Ŋaa Zezi nyuniŋi mpila nde ma kaja. 38Ekoli Ofarizi ma nde wo omoni Zezi aja, eli nde kisa acuka jiala mva kaasa bo ŋi. 39Ŋaa Mfumu ŋa nde ndi: «Be afarizi be kakese njii ye mbaza bila ye kapele. Ŋaa ato nca etuma e be, jo ema lwula ma nkeri. 40Ojiri o be ba! Njyami wo osa njii, ka nde-ankulu wo sa nca kari ŋi? 41Ŋaa jaa leve laasa be kiigi le yamaŋa le abuga a baari baali nca kaama, ŋaa ma asiili maaka cece ka miizi a Njyami.

42«Nya eli ŋa be afarizi! Okorogo be lempa Njyami bugu le lewayi#11.42 Bugu le Njyami ka ma ka Dime, lencege bila le ncwuzu ye angwunu. Okorogo be katele bila abuga ŋi, be se njala Njyami kali. Ŋa ma maami ma abaana sa be, ŋaa be lebizi maamon kalimiŋa.

43«Nya eli ŋa be afarizi! Kabila be ŋa njala ebiri encomi nca anjo ma ba abwono Njyami. Be kasaga onkuunu ka ebiri beema kuga baari. 44Nya eli ŋa be! Kabila be mva amwuma maama aporogo#11.44 Amwuma ma a ma porogo ka Israel, we ka kuma yila abuma maa, we yiga ka cece ŋi eli baari baayira yila mon ma adumaŋa.»

45Oyizigi angiri omon nca bo yagi mbari ŋa Zezi ndi: «Mfumu, ewobi ba lyele we bi yiga ni we atuga bizi se!» 46Ŋaa Zezi kaali ndi: «Nya ŋa be se ba le eyiziga angiri, be aya lempa baari olemi eli be-ankulu njala bo kabira kali. 47Nya ŋa be! Be aya le ncwa amwuma ba antuma Njyami, ba ankaaga a be baabuma. 48Be lesa bwa, be leyalaga maami maasa ankaaga a be. Kabila bo amaabuma antuma Njyami, ŋa amana be abaana ka le cua amwuma. 49Yia biri eli Njyami ma ncimi a nde ma alyele ndi: Mi etuma antuma a mi bila antuma bo baabuma ake ŋa bo baampa baamon mpasi. 50Yia biri eli Njyami apama leca le lubu, ma antuma a nde a ncie baabuma kaasa baana okiri, 51Ee! Lubu mi elyele be ni, Njyami aje kampama leca li, kaasa buma bo Abele tii Zakari, wo obumi bo kampaniŋi a ncaga bila Njo Njyami.

52«Nya eli ŋa be ayizigi angiri! Kabila be le ma yiziga baari oyeri ba kayaa Njyami. Ŋaa okorogo be-ankulu le kanyunuŋa ŋi, ŋa be le ma akala baari ba baasaga nyunuŋa baa njila.» 53Ntini ye ecwugi Zezi ma nca njo ofarizi wua, ayizigi angiri ŋa afarizi kiigi amabira nkeri, ŋa bo ba kalege nde ejugu ba ekukuna. 54Ŋaa bo ba kasaga oyeri beeli ndi nde kalyele, ŋaa bo abanaŋa nde.

Currently Selected:

Luke 11: teg

Highlight

Copy