Luc 22

Suda kasaki Sesu gumbu bivunde bi migage

1Mumengu wu pembi tsisarandi, wanengu re «Pake» mbere wukebeli. 2Bivunde bi bevegitsi be pagu, bivunde bi migage mi Moyise bekebange dyele di guboke Sesu. Tumbe bedumange bumongu. 3Gigumbi gine, Sate kwingene gu murime Suda Iskaryote mubingitsi wumosi wu Sesu, akumuvege pikile tsibi. 4Suda negwende gwegulusenu ne bivunde bi bevegitsi be pagu, ne bivunde bi bandekenange ndagu Nyambi neve begusakile Sesu. 5Bekube ne mune mugangu, bemuvangenine re begumuvege doli. 6Suda negusinge, akukebange dyele, ne gigumbi giboti gi gusakile Sesu gutsweminine bumongu.

Sesu kalambisi biguye bi mumengu Pake

7Gigumbi gi mumengu wu pembi tsisarandi negukike, wugutabule tabe ngori yibeguye ve mumengu Pake. 8Sesu negurume Pyere ne San negubambile re «Yendanu gwetsonzige neve dugulambile gilambu gi mumengu Pake.» 9Pyere ne San bemwivule re «Warondi re dweyilambile gu?» 10Sesu negubagule re «Yulu anu, ve nuguvudugile gu yadi, nugubengune ne mutu wunangule putise mambe. Mubingi anu kwange negu ndagu yi yandi gwingene. 11Yambilanu mungwe ndagu re “Mulonzi gakwivuli mbure yi yandi guse lile mumengu Pake ne bebingitsi bandi.” 12Agunurigitse gu yulu girini gipambuge gine bivave byotsu gu gari are gu nugulambile mulambu Pake.» 13Negwende, beragusenu byotsu ke neve Sesu bambilile. Belambe mulambu Pake.

Gilambu gi Fumu

14Gigumbi gi guye ne gukike, atsambe ve tavuli ne bilumbi. 15Negubambile re «Nine mugangu wuneni wu guye gilambu gi mumengu Pake mbure mosi nenu nesi nigukenge. 16Mbare, nyanwambile re nzakunde guye mulambu, kwange gigumbi gi Nyambi gurigitsile disumu di mumengu Pake, gu bulongu bu Nyambi.» 17Negubonge dimogi, negugabusile Nyambi diboti. Ayambile re «Bonganu dimogi didi nwanganu yenu botsu. 18Mbare nyanwambili vave nzagukunde gunu melamu me milunde mi vigne, kwange ve bulongu bu Nyambi bugurugile.» 19Sige abonge pembi, agabusile Nyambi diboti. Ayitabule, abegabile. Negwambile re «Dudu dunyuru du ami du nyasaki gukyelu enu. Gabenanu nuketangeminange gigumbi gyotsu.» 20Negubonge gwandi dimogi, negumane guye abevege dyoni. Negwambile re: «Melamu mame mabagenu ne pangeni yone yi melungu mami medeke gukyelu enu.» 21Tumbe labanu, mutu wugunzake ayi ve tavuli mbure mosi nami. 22Negungenze, Mwane mutu agufu neve Nyambi yandi beni tsonzigile. Tumbe milogu gu mutu wugunzake gu batu babi. 23Bepakile gwivusene yawu ne yawu nye vegari etu benze vage dyambu dine.

Givunde nye vegari etu?

24Digumi ne bebeyi di bebingitsi be Sesu, bekusosange yawu ne yawu nonge bekuyabe mutu wu givunde vegari awu. 25Sesu negwambile re «Kanangu tsi bulongu tsyadyamisi batu babegobisi, banengure “Bevagitsi be meboti.” 26Tumbe yenu, nuyavage ne yawu. Givunde vegari enu, ayibi munongu mosi ne mugegi. Gidyeti vegari enu, ayibi munongu mosi ne mutu wadyanzili bembatsi. 27A wugaye ve tavuli ne watsambi tavuli givunde nye? Sa re wugaye ve tavuli mba? Tumbe menu nzane batu bane, nivegari enu munongu mosi ne mutu wanudyanzili. 28Yenu, nusanzise. Nusenzindile ve nzibile mu meguge. 29Redibandu, nyanuvegi dinyange digubegise batu, neve taye ami pege dinyange digubegise batu. 30Nuguye, nugunu mbure mosi ve tavuli ami yi bulongu bu ami ve nigubile Kanangu. Vane, nugube metsagene ve gipu gi bundumbe gu gutabule bumbanze bu digumi di bifumbe ne bifumbe bibeye bi bane be Iserayel.»

Sesu yambili Pyere re wugukale

31Fumu Sesu negwambile Simu re: «Simu, wubandekene. Sate segwivule gubembe mirime mi enu nonge gitu gi enu gikupupe. 32Tumbe nzelembe Nyambi gukyelu agu, nonge gitu gi agu gukyelu ami gikole tsyemuge. Ndyayu gigumbi giwugukunde pagile gitu, yamuse bane betaye tsi agu.» 33Pyere negumwambile re «Fumu, nikike gugwende nagu gu nzugu, nesi gu dufu.» 34Sesu negumwambile re «Pyere, nyakwambili nemuni, nesi koku yirege yigwambile wugukale nyongu yireru re wusandyabi.»

Gusindile dikwanu

35Sesu negukunde gwambile bebingitsi bandi re «Ve ninurumine nusabe ne doli, nusabe ne pengi, nusabe ne pondu, nukambilu ne givave?» Bemwagule re «Vyage.» 36Vane akunde bambile re «Tumbe vave, mutu wune doli abongi. Wune pengi ayibongi. Wusa ne mbetsi dibambu, asumbisi ngoye andi kutu nonge akusumbe dibambu. 37Nyanwambili nane, nonge dyambu direndu mu gisangumu gi Nyambi gukyelu ami digulabene: “Nirangu mu dibundu di batu babi.”» Kabe motsu merendu gukyelu ami megulabene. 38Bemwambile re «Fumu, labe dune mebambu mebeye netu.» Sesu bagule re «Revotsu.»

Sesu galembi gu mukongu miri mi Olivi

39Neve avagilange ne mbetsi, Sesu vuduge, ayende gu mukongu wu miri myanengu re Olivi. Bebingitsi bandi bemubinge. 40Neguvuduge gu mbure yine, abambile re «Lembanu nonge ve Sate gunumangile mirime nutsatse beruge.» 41Vane, negurageme mwepesu nawu, akuteme, alembange. 42Ayambilange re «Fumu, gere warondi, ragemise nami dimogi didi dimeguge.» Nesi nane nyakwivuli, diyabe di menu nyarondi tumbe di ndyabeni warondi. 43[Vane yanze yi Nyambi negumurugile guse mudyotse. 44Negugangu ne busane, Sesu kelembange veveni. Meberi me gidwuku gi andi mekubange munongumosi ne meberi me melungu, mekedekange vetsi#22.44 Birini bibi biserendu mu mbili bisangumu bi gulu bi Girek.] 45Negumane lembe, arambuge ayende gu bebingitsi bandi aberagesenu bebyelu ne busane. 46Negubambile re «Gye nwaningilili? Rambuganu, lembanu nonge mirime mi enu mitsatse bembu ne Sate.»

Sesu magangu

47Sesu mbere kyagwambili ne bebingitsi bandi. Suda mubingitsi wumosi wu Sesu ruge ne dibundu di batu, abambeme nandi gu gumugumberene. 48Sesu negumwambile re «Suda ve wakumbereni vane, reve wasakili Mwane mutu?» 49Bebingitsi be Sesu negulabe neve dyambu dine diguvyogile, bemwivule re «Fumu dubenze dimbe batu babe ne mebambu metu?» 50Mubingitsi wumosi wu Sesu, atabule diru di mebagele di mudyanzitsi wu givunde gi muvegitsi pagu. 51Tumbe Sesu negwambile re «Sisanu revotsu, negubembe diru disetabulu adibeluse.» 52Sesu negukunde gwambile bivunde bi bevegitsi be pagu, bivunde byabandekeni ndagu Nyambi ne bivunde bimosi biruge gusemugange re «Agye nwarugili ne mebambu, ne pengu gusekange mambu gere gikongu?» 53Wisi wotsu nzibange nenu gu gari ndagu Nyambi nusakangange. Tumbe digwere didi di enu di ndure diviseme.

Pyere magale Sesu

54Bivunde bibandekenange ndagu Nyambi negumane gange Sesu, bemubege gu gari ndagu givunde gi muvegitsi pagu. Pyere akubingange Sesu dutsyesi ne dungowu. 55Bebangise ruvi ve kane betsagene, Pyere atsagene nawu ve mbeke ruvi. 56Mudyanzitsi mugetu wu bivunde bi bevegitsi be pagu negumwene ve mbeke ruvi negumugengile dikengi. Negumwambile re «Mutu wuwu gwandi atsibe nandi.» 57Tumbe Pyere negugale. Negwambile re «Mugetu, nzamuyabi.» 58Gigumbi kwe mutu mosi gwandi negumwene, amwambile re «Ndyawu gwandi wu mutu Sesu.» Ayagule re «Mutu, vyage nzamutu andi.» 59Digwere dimosi neguvyoge, mutu wunzusu negutsigise re «Mutu wuwu atsibe ne Sesu mba yandi gwandi mwisi Galile.» 60Tumbe Pyere negugale re «Mutu, nzayabi di ndyayu warondi gwambile.» Vane ne vane ve yandi yambilange koku negwambile. 61Fumu negugeluge, negugengise Pyere, vane ne vane Pyere negurangemine dyambu dimwambile Fumu re «Nemuni nesi koku yirege yigwambile, wugukale nyongu yireru re wusandyabi.» 62Pyere neguvuduge alile veveni.

Sesu masyengu ne gudimbu

63Batu bebandekenage Sesu bekumusyevange bekumudimbange. 64Bemukubige ginengu, bemwivule re «Rese, nye sekudimbe?» 65Bekemwambilange mbili mambu megumusyenge.

Sesu vewusu Bivunde bi dibundu

66Wisi negutsamuge, dibundu di bivunde bi Sif, bivunde bi bevegitsi be pagu ne bivunde bi migage mi Moyise be bengune. Bebege Sesu vewusu bivunde bi dibundu dyatabuli misosu. 67Bemwivule re «Ndyayu re Kirisete yi Nyambi rume? Dwambili.» Sesu negubagule re «Nesi nzenwambile nusagusinge, 68pasi re nzenwivule ngoku, nusagunyagule. 69Tumbe ne kyawu tsitsi Mwane mutu agube metsagene ve mebagele me Nyambi yine ndure.#22.69 Labanu mu Gisangumu gi nimbu (Psaumes) 110.1» 70Batu botsu bambile re «Kabe ndyayu wu mwane Nyambi?» Abagule re «Yenu beni nwamane gwambile ni mwane Nyambi.» 71Vane bambile re «Dusegandi ne mugangu mbeyi, yetu beni dwagulu mambu me yandi beni segwambile.»

Currently Selected:

Luc 22: SWJ

Highlight

Copy