Luc 17

Ndongi tsi Sesu

1Sesu negwambile bebingitsi bandi re «Mambu mabegisi batu gu mabi mesakambu. Tumbe milogu gu mutu wavagi re bembatsi bevagi mabi. 2Dinonge re bemutungi mungori andi dimani dineni, bekumubume gu nzube vyagenu negukubegise batu be nzusu mu mabi. 3Bandekenanu.»

«Gere mwane taye makuva dibi, musyembi. Pasi re amasinge tsyembu tsine, munyesi. 4Gere asekuvage dibi nyongu yine guyireru mumuse, gere aseruge nyongu yine guyireru gu ndyayu gusekulembige. Munyesi.»

Gitu

5Bilumbi bi Sesu bemwambile re «Fumu, duvegi gitu gineni.» 6Fumu negubagule re «Pasi re gitu ginwapagili gi gigegi munongumosi ne mulunde gegi wu muri wanengure moutarde, nubenze gwambile muri wune re rubuge, yende kwevare gu nzube agumugobise.»

Gidyanzu gi mudyanzitsi

7«Mutu nye vegari enu pasi re ane mudyanzitsi wafuli butambe, vo wabandekeni migambe mi bibulu, agamweni guruge agumwambile re “Ruge, yange.” 8Disabenze vagu. Agumwambile re “Ndambili biguye, sanze bidwaru, tsambe tavuli, wukuseperile biguye mu gipele, gigumbi gi nyalili ne gunu. Pasi re nimamane ndyagwandi wukuyi, wukunu.” 9Asabenze gabusile mudyanzitsi andi diboti mbare asekinze dyambu di asemurume gudyanze. 10Yenu gwandi, pasi re numavage dibe senurume, yambilanu re “Dube dyanzitsi besane musumbu, dusevage ke gidyanzu gi besedurume guvage.”»

Sesu beluse digumi dibatu bebelange bwatsi

11Ve Sesu yendile gu Serisalem avyogile ve ndilu musyengi wu Samari ne Galile. 12Neguvuduge ve kodu dimbu, digumi di batu bene bwatsi negusemubengusene. Besikeme tage nandi. 13Bamuge re «Sesu, Fumu, dulu ngebe.» 14Negubene, abambile re «Yendanu gwekwerigitse gu bevegitsi be pagu.» Vane, ve bendilange gumbu bevegitsi be pagu, yawu botsu negulabe re babeluge. 15Wumosi vegari awu negulabe re amabeluge, negugabuge nzime, akwene dumisange dine di Nyambi ne mune mugangu. 16Negusekuteme ve byeru bi Sesu mbami vetsi, negumugabusile diboti. Mutu wune ayibange mwisi Samari. 17Vane Sesu negwambile re «Sa digumi dyotsu di batu disebeluge. A kambemosi begu? 18Yawu botsu gu sandi mutu wusepikile gusegabusile Nyambi diboti ka mweni wuwu?» 19Vane, negumwambile re «Rambuge, yende, gitu gi agu gyakwobule.»

Tugu bulongu bu Nyambi

20Batu be dibundu di Farisi negwivule Sesu: «Nyambi guruge gigumbi gye gusegube kanangu etu?» Abagule re «Nyambi saguruge mambu gere givave gyalabeni. 21Besabenze gwambile re “Gengisanu ayi vave.” “Ayi gune.” Yabanu re Nyambi ayi vegari enu.»

Tugu yi Mwane Mutu

22Vane, Sesu negwambile bebingitsi bandi re «Gugube gigumbi gi nuguronde gulabe Mwane Mutu, tumbe nusakunde mwene. 23Batu begunwambile re “Ayi gune.” “Ayi vave.” Tumbe nuyagwende, nuyagwende mbangu. 24Neve dusyemu dwavedemini gu nzambi, giyalele gi andi gigulabene gu tandu ne bande, digube munongumosi ne wisi Mwane Mutu gurugile. 25Tumbe nesi aguruge Mwane Mutu agurekenge veveni. Dilale dine muni digumugale. 26Wisi wu Mwane Mutu gukunde rugile, mambu megube munongumosi ne gigumbi gi Nowe. 27Gigumbi gi Nowe, batu bayange, banungu, bongenange, bonzange bane bawu, kwange ne wisi Nowe yingenine gu watange. Giningu gineni negupande, gikuboke batu botsu. 28Mambu megube munongumosi ne gigumbi gi Lote. Gigumbi gi Lote, batu bayange, banungu, besumbange, besumbisange, bevarange, berungange. 29Tumbe wisi wu Lote yusugile gu Sodom, Nyambi bonduse ruvi ne fule gere mvule. Dibeboke yawu botsu. 30Wisi Mwane Mutu agulabenine, mambu megube munongumosi. 31Wisi wune, mutu wugube ve gilembi, asakunde denge gigumbi gigwingene gwekebe mifune gu ndagu andi, munongumosi ne wugube gu gyambe, asakundegabuge gumbu gi andi. 32Rangeminanu dyambu di mugatsi Lote. 33Mutu wakebi gurare monyi andi aguyitsyemune. Awugutsyemuse monyu andi gukyelu ami aguyidenge. 34Nyanwambili, dibeti di wisi wune, batu bebeyi begube gu gitsige gimosi. Wumosi agubongu, wune agusisu. 35Begetu bebeyi begube banigi milunde mbure mosi. Wumosi agubongu, wune agusisu. 36[Bebagele bebeyi begube gu gyambe. Wumosi agubongu, wune agusisu#17.36 Girini gigi giserendu mu mbili bisangumu bi gulu bi Girek..]» 37Bebingitsi negwivule Sesu re «A diguvyogile gu mbure gye, Fumu?» Abagule re «Ave gubile gibindi, reve gubile gwandi dibundu di nyunge.»

Currently Selected:

Luc 17: SWJ

Highlight

Copy