Luc 10

Gidyanzu gi megumi mane gumereru me bebingitsi be Sesu.

1Gigumbi ne guvyoge, Fumu kusale megumi mane gumereru me batu be nzusu. Akubetinde bebeye ne bebeye ve wusu andi mu yadi tsyotsu ne mbure tsi yandi beni pikilange gwende. 2Negwambile re «Gibuge gi gineni gyabure mbili pinde tumbe gu sandi mbili batu begutsibuke. Lembanu fumu gibuge atindi bedyanzitsi begutse buke pinde.» Reguvage re gu batu be ne mugangu gulu musamu ami, tumbe gu sandi mbili batu begumunenze. 3Yendanu, nubandekene nyanutindi gere bane be medombi vegari batu be munongu mosi ne minzi. 4Nuyabege nesi doli, nesi pengi, nesi pondu tsinzusu. Nuyatsyemuse gigumbi mu nzile neguvege batu mbulu. 5Pasi re nwagwingeni gu ndagu, nuku re gwambile re «Pembi ne polu yi Nyambi yibi nenu.» 6Gu gari ndagu yine, gere gu mutu wu kindi kindi, dubonzu du Nyambi dugusale nandi. Gere sanane, dubonzu dwakundigabuge nenu. 7Tsagenanu gu ndagu yine, yanganu, nwanganu byotsu bibe gunuvege, mbare mubingitsi agavegu doli tsi yandi se dyanze. Nuyabe tsatsake, tsagenanu gu ndagu yi nusesundile. 8Ve nugwingenine gu yadi, gere betsige besenusinge, yanganu byotsu binuguvegu. 9Belusanu bibedu bi yadi yine bambili anu re «Bulongu bu Nyambi bwabambeme nenu.» 10Tumbe ve nugwingenine gu yadi yi batu besanurondi, yendanu mu mimbambe, bambili anu re 11«Dwanukukumuni difufundu di yadi yenu disename mu byeru bi etu, gununweritse. Yabanu re, bulongu bu Nyambi bwabambeme nenu.» 12Nyanwambili, wisi wu Nyambi gusetabulile bumbanze bu batu be yadi yiyi, begube ne mbele vyagenu ne batu be Sodom.

Yadi tyabusi gube ne gitu

13Milogu gu batu batsageni gu yadi Korasin. Milogu gwandi gu yenu batu batsageni gu Betsayide. Mbere bimage bivagu vegari enu, bivagilu gu Tir ne gu Sidu batu be yadi tsine mbere bedware dikwili, mbere bekalule mbetsi mutsageninu. 14Re dibandu wisi Nyambi gutabulile bumbanze, mbele yi Tir ne Sidu yisagube yineni vyagenu ne yenu. 15A ndyayu Kaperenawum wapikili re Nyambi gukugobise vyagenu ne bembatsi? Nesi ndyayu wugusunde kwange ne gu batu bafu. 16Sesu nekunde gwambile bebingitsi bandi re «Wotsu wanulilu aganyulilu. Wotsu wabusi gunulilu agabusi nyulilu gwandi. Wotsu wambusi agabusi wusetume.»

Kabugu yi megumi mane gumereru me batu be Sesu rume

17Megumi mane gumereru me batu be sesu rume begabuge ne mune mugangu, negusemwambile re «Fumu, nesi menyuni mabi mesedugobise gukyelu dine di agu.» 18Sesu negubambile re «Nzelabange Sate gabondugi gu yulu gere dusyemu.» 19Yulu anu, nzenuvege dinyange digunige nyoge, kuru ne ndure yotsu yi Sate, gusagube givave gi gunuvage nzuki. 20Tumbe, nuyabe ne mugangu mbare menyuni mabi manudedugili, yibanu ne mugangu mbare Nyambi marende mine menu gu yulu mu gisangumu gi monyu. 21Gigumbi gine, Sesu negubase ne mugangu wu dinyuni diboti, negwambile re «Taye, Fumu yulu ne yi butambe, nyakudumisi mbare wuseswege binami mambu mane. Tumbe wameyabise batu be munongu mosi ne bane begegi. Diboti Taye nyakudumisi mbare wuseronde re dibili nane.» 22Taye ami asepege bivave byotsu. Gusa mutu wayabi Mwane vengu ke Taye, gu sandi mutu gwandi wayabi Taye ke Mwane. Ne batu be Mwane agarondi re beyabi Taye. 23Negugeluge gu bebingitsi bandi, negubambile kayawu vike re «Diboti yenu nwalabi mambu mane. 24Ne gungenze, nyanwabili, mbili bebigitsi ne kanangu be ronde labe me nwalabi tumbe besemene. Gulu me nwagulu tumbe besemulu.»

Gilombi gi mutu wuboti wu Samari

25Givunde gi migage mi Moyise negurambuge, ayise gwambile Sesu gu gumumange murime: «Mulonzi, Nyambi garondi re nivagi tsye nikudenge monyu yi peke peke?» 26Sesu negumwambile re «Agye girendu mu mugage Moyise? Wamulilu tsye?» 27Negumwagule re «Direndu re ronde Fumu Nyambi agu ne murime agu wotsu, ne dinyuni di agu dyotsu, ne ngudu tsi agu tsyotsu, ne pikile tsi agu tsyotsu. Ronde mbatsi agu nevu wakwerondili.» 28Sesu negumwagule re «Wusegwagule dikengi, vagange ke nane gigumbi gyotsu nonge wukube mbure mosi ne Nyambi mwendu ne mwendu.» 29Tumbe yandi guguronde kweswege, akwivule Sesu re «A mbatsi ami yiniguronde nye?» 30Sesu negumwagule re «Gube wisi mutu wurambugile gu Serisalem ayendange gu Seriko. Abengune ne bikongu, bemudumbe byotsu bibe nandi, bemudimbe beli gufu, benegwende.» 31Mu nzile yine ya mosi muvegitsi pagu wuvyogilange vane. Negulabe mutu wu bikongu be dimbe amugonge. 32Mwisi gifumbe gi Levi wuvyogilange gwandi vane, negulabe mutu wu bikongu bedimbe amugonge. 33Tumbe mwisi Samari neguvuduge ve mutu wune wudimbu ne bikongu, negumulu ngebe. 34Abambeme nandi, amubuge ne matsi ne melamu. Amunangule amusunze ve yulu gibulu gi yandi ayendilange amubege bekwende gu ndagu tsi beni akubugungu. 35Mbongwali, mwisi Samari avuduse fure beye atsisambule mutu wudenge ndagu beni negumwambile re «Tarili gibedu gine pasi doli tsisa dugu nigusegundige ve nigugabugile.» 36Sesu negwivule mutu wune: «Batu bane ba reru nye yibe mbatsi yi mutu wu dimbu ne bikongu?» 37Ayagule re «Mutu wusemulu ngebe.» Sesu negumwambile re «Yende, vage nevu mutu wune asevagile.»

Marte ne Mari

38Ve Sesu ne bebingitsi bandi bendilange mu nzile, bevuduge ve dimbu. Ditsageninange mugetu wanengure Marete, abingise gu ndagu andi. 39Ayibange ne ketu yanengure Mari, yi tsagene ve mbeke Fumu negulungu ndongi tsi andi. 40Marete ayibange ne mbili bidyanzu bigulambile beni, ne gubambeme ne Sesu amwambile re «Fumu, nyayabi re wusarondi re ketu ami anzili vike gudyanze bidyanzu byotsu vike. Kabe mwambile re arugi gusenyamuse.» 41Fumu negumwagule re «Marete, Marete, waregemi gukyelu mbili mambu. 42Dyambu dimosi dine musumbu, Mari sesale dikabu diboti di mutu sabenze mudumbe.»

Currently Selected:

Luc 10: SWJ

Highlight

Copy