Actes 2

Tugu Dinyuni Diboti

1Wisi mumengu Patekote, yawu botsu babe mbure mosi. 2Vane ne vane, duvogusu durugile gu nzambi munongu mosi ne mukunge, dubase ndagu yotsu gubabile metsagene. 3Belabe ndimi tsibe gere milutsu mi ruvi, tsi pasuge tsi sunde mu miru mi batu botsu babe gu ndagu yine. 4Yawu botsu bebase ne Dinyuni Diboti, bambilange melongu me nzusu neve Dinyuni Diboti be begisange.

5Gigumbi gine, gube gu Serisalem Sif tsi sungeme ve misu me Nyambi, tsi rugilange mu melongu motsu me butambe. 6Ne gulu duvogusu dune, begukeme mu mebundu. Besutu, mbare bulu batu bavagili Nyambi gitu gwambile melongu mawu. 7Yawu botsu besutu ne mugangu, ne gwambilange re «Batu babe bagwambili, botsu be sandi bisi Galile? 8Gye dwabulilu mu melongu metu? 9Ve gari etu bemosi barugili gu Parete, Medi, Elamite, Mesopotami, Sudé, Kapadose, Pon, Asi, 10Firesi, Pafili, Esipete, Libi yive mbeke yadi Sirene, berugile gu Rom, 11Kerete ne Arabi. Bemosi beburu Sif, bane bekaluge gu gulembe Nyambi Iserayel. Lavane dwabulu gwambile gu melongu metu mambu meneni me Nyambi vage.» 12Yawu botsu besekundeyabange dyambu dyavyogi bekwambilange yawu ne yawu re «Dyambu dine reguvage re tsye, dyagwambili re tsye?» 13Tumbe bemosi bekubedokange, bekwambilange re «Bagolu.»

Mambu me Pyere yambile

14Vane Pyere, releme ne gilonge gi digumi ne gilumbi gimosi, ayambile gu yulu re «Yenu, Sif, ne yenu nwatsageni ve Serisalem, yulu anu dikengi, di nyagwambili ne gukutise dyavyogi. 15Batu babe, besegolu neve nwapikili, wisi ki mekyele. 16Tumbe me nutselabe re mambile mubigitsi Sowele mekalabeni. Yulu anu:

17“Nyambi yambile re Tsufu tsi musitu,

niguvege Dinyuni di ami batu botsu.

Bane benu be bebagele ne be begetu begubigise gukyelu ami.

Niguberitse befudu mambu mone,

binunu bi enu bigudoru ndosi.

18Wisi wune niguvege Dinyuni di ami

bedyanzitsi bami be bebagele ne be begetu,

sige begwambile gere bebigitsi.

19Nigurigitse bimage gu yulu gu nzambi

ne ndimbu gutsi gu mutambe.

Gu gube melungu, ruvi, ne dimungi di mutseruvi.

20Nyangu yigube diviseme,

tsungi yigubenge gere melungu.

Nesi wisi Fumu wu guruge, wisi wuneni, wufwaru.

21Vane botsu begurombe Fumu begobulu#2.21 Sowel 3.1-5.”»

22Vane Pyere ne gwambile re «Batu be Iserayel, yulu anu di nyanwambili, Nyambi nurigitse kengeli re Sesu yi Nasarete abe mutu wu yandi beni rume, mbare amuvege dinyange diguvage bimage, mambu meneni ne ndimbu tsyamamu vegari etu, nevu yenu beni nwameyabili. 23Mutu wune, wunusaku ne tondeni Nyambi, nevu atsonzigile mbetsi. Yenu, numugomise mu kurusu ne gumubokise ne batu besayabi Nyambi. 24Tumbe Nyambi murambuse, ne gumwobule mu mukengu dufu, mbare gufu sabe ne ngudu yi gumugange. 25Davide yambile gukyelu Sesu re

“Nilabange gigumbi gyotsu Fumu ve wusu ami,

mbare ayi ve mbeke ami, nzaregemi.

26Re dibandu murime ami wubase ne mugangu,

munu ami wagwimbi ne mugangu,

nesi gu ngili, dunyuru du ami dwakoli ne gitu.

27Vyage, wusanzisi gu bulongu bu batu bafu,

wusagusise mbatsi agu yi suli gubole, gu ngili.

28Watigitse nzile yabegi gu monyu,

wambasi ne mugangu pasi re wu vane#2.28 Gisangumu gi nimbu (Psaume) 16.8-11.”»

29Pyere negukunde gwambile re «Bembatsi nami anu, nyanwambili dikengi re mukoku etu Davide: afu, atsigu ne pesi andi yalabeni kwange ne muni gumbu gi etu. 30Tumbe abange mubigitsi, ayabange re Nyambi muvangenine ne dibagi re nigubyatse mwane agu wumosi kanangu ve givinge gi agu. 31Davide bigise re Kirisete gurambuge gu dufu. Akwambile re

“Nyambi sagumusise gu bulongu bu batu bafu,

duyuru du andi dusagubole gu ngili.”

32Sesu yi nyanwambili, Nyambi murambuse gu dufu, yetu botsu du mbeye. 33Nyambi Taye muvege dinyange digutsagene ve mebagele mandi, avegu Dinyuni Diboti divangeninu, sige aduvege dyoni. Neve nwalabili ne gulu nemuni. 34Davide sepande gu nzambi, tumbe ayambile re

“Nyambi Fumu ayambile Fumu ami Kirisete re

Ruge guse tsagene ve mebagele mami.

35Kwange ne nigusunze batu bakuvini gutsye byeru bi agu#2.35 Gisangumu gi nimbu (Psaume) 110.1.”

36Bane botsu be Iserayel bayabi dikengi re Sesu yi nugomine mu kurusu, Nyambi mamubyatse Fumu ne Kirisete.»

37Batu negulu nane, babe ne nyongi gu mirime, bivule Pyere ne bilumbi bimosi bi Sesu re «Bembatsi, adwavagi tsye?» 38Pyere negubagule re «Kalulanu mitsageninu mi enu, mutu ne mutu abatisu gu mambe mu dine di Sesu Kirisete. Vane, Nyambi gubunzule bitsimbu bi enu, agunuvege Dinyuni Diboti. 39Mbare ndagi nutungile Nyambi, yenu ne bane benu ne batu be tage, botsu be Nyambi Fumu etu gurombe.» 40Pyere kunde gwambile gu gubetsugise negubegwarise re «Batu be nemuni, batu babi. Ragemanu nawu, Nyambi gunwobule.» 41Mbili batu besinge mambu me Pyere yambile, bebatisu. Wisi wune babe gotsu toseni yireru tsi batu tsikundu mu dibundu di batu besinge Sesu.

Monyu wu dibundu direge di Serisalem

42Gigumbi gyotsu batu besinge Sesu benenzungu ne bilumbi. Babange munongu mosi ne batu beburu ne nguye mosi bayange pembi mbure mosi, belembange mbure mosi. 43Bilumbi bevagange mbili bimage ne dimbu, batu bekulungu wome Nyambi. 44Botsu besinge Sesu babange di awu dimosi, ne gugabenange byotsu bibange nawu. 45Besumbisange binange bi awu, ne meboti mawu ne gugabenange doli tsine yawu ne yawu mudugambu. 46Wisi wotsu di awu dimosi, bebengunange gigumbi gyotsu gu ndagu Nyambi. Bekuyange pembi mbure mosi mu ndagu tsi awu ne mugangu. 47Bedumisange Nyambi, berondungu ne bumongu bwotsu. Sige wisi wotsu Fumu kundange mu dibundu di awu batu be yandi yobulange.

Currently Selected:

Actes 2: SWJ

Highlight

Copy