Luke 21

Nzɔle a mukuili wa mukaase

1Gutsɔ nzɔ Nzɛmbi, Sése àchimbele mise nàmɔne bichine biàsosenge badɔle va itchige chibàsosenge bɔ. 2Ndɛ nàbàmɔne na mukuili mukaase wusàbade na matsɔnge vɛ, àsose ndile badɔle bɔli. 3Avanekaniva Sése àlɛle ndé: «Mumbuli mɛ lɛle béne mé, lendji le mukuili mukaase wunewu avédi, lelutili mandji ma baate bane botchi bavédi. 4Badɔle ba bichine bavédi, ndile ba bɔ basalidi na nzale mu sade maambe mabɔ na bɔ vɛ. Tɔ mukuili mukaase wunewu lendji lotchi le ndɛ mbé fuade moyi mu lɔ, ni le ndɛ védi.»

Sése alébele ndé nzɔ Nzɛmbi nibápanze

5Sése nàlɛle baate bakɛ bàbàyambelenge mu bubuɛ bua nzɔ Nzɛmbi na niongele mamani mamabuɛ ma bàtonge yɔ, na bikumbe bibàvedenge Nzɛmbi ndé: 6«Bikumbe biotchi bi béne laniongele binebi, béne lesákábamɔne biɔ gu busu a muénde vɛ. Namoni a mamani ma bàtonge nzɔ muɛne na mɔ nimánigege.»

Maambe mamanɔne mámákáyade

7Baate muɛne nibàfule Sése bo: «A Kumu, maambe muɛne lekɛse na mákáyade? Bése maambe muɛne kabuni lekáyabe?» 8Sése nàkale bɔ ndé, rambelani. Baate mvuabɔvɛ nibáyade gu sɔge béne na ndoge a mɛ. Bɔ nibálɛle béne ti: «“Mɛ ni Mutu wu Nzɛmbi àsɔle.” “Lekɛse lematɔde.”» Yachilelani maambe ma baate muɛne. 9Va béne lekáyoge baate báyole misame mia midinge na mia maambe ma leyongese, yabadani na ibɛyi. Maambe muɛne buédi mákápáyade. Tɔ lɔ kábade anilechikele la maambe muɛne vɛ. 10Vayulavane ndɛ nàbàlɛle bɔ ndé: «Baate ba lekake lekime nibáluane mudinge na baate ba léne lekake. Kumu a tsɛnge yéne, nàluane mudinge na kumu a tsɛnge kime.» 11Mu bitchige bitchige, tɔtɔ niyitsoke. Nzale na bivonge nibikogele matsɛnge motchi. Baate nibàmɔne maambe mamanɔne na bilémbe bia mulinge mulinge bibikámate gu yulu. 12Tɔ maambe muɛne motchi napayade, nibápákuate béne na muɛse béne mimbɔnde. Bɔ nibákabe béne gu buvége na béte béne mutsɔ manzɔ mabakokene mu bɔnde na lɔngese mabige Nzɛmbi gu sɔsese béne. Bɔ nibátɛte béne gutsɔ manzɔ ma tsugu na béte béne va busu bua bakumu ba matsɛnge na va busu bua bivonde bibiatome bitini bia matsɛnge mu tate gua ndoge a mɛ. 13Lɔ ni Lɛkɛse le béne lekápase bumbanze bua maambe motchi ma béne lemoni na yoge. 14Yabadani na ibɛyi mu mabige ma béne lekápose mu kale maniute ma béne. 15Mɛ nivɛde béne mabige na buyédi. Nimulɔ bambɛne ba béne básákátongele maambe ma béne lekálɛle bɔ na kuáte page vɛ. 16Bataate ba béne na bangu ba béne na baane ba bataate ba béne babakaase na bababagele na bambɛgi ba béne na bangage ba béne, nibákabele béne kase. Bɔ nibábome baate mvuabɔvɛ va pfuɛchi a béne. 17Baate botchi nibàbɛle béne mu mbate a mɛ. 18Tɔ lenange ti lemochi la gu yulu mutsuɛ mia béne lesákádubuge vɛ. 19Guadani. Mu lembande le béne lasade, béne nilefuade moyi wa mubunamubu.

Sése alébele ndé musɛnge a Sérusalɛme nágude

20Va béne lekámɔne bagɔdi bákádinge musɛnge a Sérusalɛme, yabani ti lekɛse la guduse musɛnge muɛne lematɔde. 21Avane baate bábákábade va kɛse a Sudé, buédi bákáyɛnde gu suɛme gu yulu a mikɔnge. Baate bábákábade gutsɔ musɛnge a Sérusalɛme na bɔ nibáyɛnde vale na musɛnge muɛne. Baate bábákábade gutsɔ manungi báyábágabege gutsɔ musɛnge muɛne. 22Muti lɔ ni lekɛse le Nzɛmbi ákátchise bichi Sérusalɛme chigi, na mu kuanise maambe motchi màbàkome gutsɔ ichange cha mabige mɛndi. 23Mimbɔnde kábade gulidi bakaase bábákábade na mimi na bábákánuise baane mabɛne lekɛse muɛne. Muti maambe mamanɔne nimákogele musɛnge wotchi. Nzɛmbi nátchise baate muɛne chigi. 24Nibábome baate mvuabɔvɛ na mayɛnge. Nibákabe bane gu buvége gutsɔ matsɛnge makime. Baate ba makake makime nibátome musɛnge a Sérusalɛme kuange nachi lekɛse le Nzɛmbi ákáchingese bɔ mu sade tchambe muɛne.

Leyade la mɛ Wuwàbɔnge ndjime a baate

25Gutsɔ letɛdi na tsungi na bamvuilili, nibámɔne bilémbe bibásámamɔne na bukale vɛ. Gu tɔtɔ bɔɔme nibukuáte baate va bɔ bákáyoge kɛle mingébe mia mubuwuwavɛnangulu. 26Baate bakɛ nibákuade na bɔɔme va bɔ bákátasenge maambe mámákáyade gu tɔtɔ. Muti Nzɛmbi nágɛle maambe motchi ma gu yulu mulinge. 27Avanekaniva baate bákámɔne mɛ Wuwàbɔnge ndjime a baate mɛ káyade gutsɔ mabungi na bungudi bua buyumune buɛme. 28Va béne lekámɔne maambe muɛne motchi mákáyade, chitesani mitéme mia béne muti lekɛse le Nzɛmbi ákápose béne gu buvége ka bɛle.

Ifuɛni cha muti wubatɛde fingié

29Avanekaniva Sése àtàdele bɔ kokome ndé: «Kɛngesani muti wubatɛde fingié na miti miéne miotchi. 30Va béne lamɔne miɔ kafunde mia funde, béne lɛlenge ti mvulu ka bɛle na tube. 31Namoni a va béne lekámɔne maambe muɛne, yabengani ti leyade la Buyumune bua Nzɛmbi ka bɛle. 32Mumbuli mɛ lɛle béne mé, baate ba mvuɛgi básákapagude maambe muɛne motchi pakuani vɛ. 33Yulu na tɔtɔ nibiviɔge. Tɔ lebige la mabige ma Nzɛmbi ti lemochi lechitoge niambene vɛ.»

Badani na bungose

34«Rambelani. Ya viɔsani lekɛse na sade mikungi. Na niɔde malame mu lange voki bade gua na ibɛyi cha maambe ma bulɔnge bunebu. Mbégi béne nilekémege mɛ Wuwàbɔnge ndjime a baate mɛ yáde itsundiatsundi. 35Letsuge muɛne lekábade gulidi baate ba bulɔnge bunebu, ndile ngane a va buni batchui bakɔlege mu lechinge itsundiatsundi. 36Badani na bungose. Bɔndani lekɛse lotchi mu guade va busu bua maambe muɛne motchi mámákáyade. Tsɔvane béne nileguade va busu bua mɛ Wuwàbɔnge Ndjime a baate na ngɔmbe.»

37Tsuge yotchi, Sése nàlɔngesenge gu nzɔ Nzɛmbi na niange. Va buchi buavindenge, ndɛ nàyɛndenge gu yulu mukɔnge wa miti mi batɛde ba olivié gu lase. 38Na kɛtianguɛli, baate mvuabɔvɛ nibàyadenge gu nzɔ Nzɛmbi gu yoge maambe ma ndɛ lɔngesenge.

Currently Selected:

Luke 21: NZB

Highlight

Copy