Luke 19

Sése ayɛnde gu mboge a Saché

1Va Sése àsote gu musɛnge a Sériko, àlande musɛnge muɛne nàbuane na mutu wubàtɛdenge Saché. 2Saché ichine na ivonde cha babongi ba mapaga àbade. 3Ndɛ tɔndenge mɔne Sése tɔ mu itɛle bukubi na piti a baate mvuayɔvɛ, ndɛ àsatoge Sése mɔne vɛ. 4Ndɛ yɛnde matine gu busu, nàvate gu yulu muti wu batɛde Sikomɔre. 5Sése àtɔde va tchine muti muɛne, achimbele mise, amɔne Saché, nàlɛle ndɛ ndé: «Saché sotege namukase, mɛ lɔlɔ lɔ mɛ lase gu mboge a wɛ.» 6Tine a tine Saché àsotege, nàyake Sése na ngɔmbe. 7Baate bàmɔne tchambe muɛne, nibàningenenge pfuɛchi abɔ muɛne nabɔ muɛne bo: «Lebagele lineli muki ayéndi gu mboge a mutu ngua bubi bua maambe wunewu?» 8Saché akukule va pédi a Sése, nàlɛle ndɛ ndé: «Kumu mɛ vɛde ipɛchi cha mabuɛ mɛmɛ gulidi baate babavɛ na matsɔnge. Ti mɛ bɔnge badɔle ba mutu na imbabe, mɛ gabese ndɛ makabe ka mana.» 9Avanekaniva Sése àlɛle ndɛ ndé: «Lɔlɔ Nzɛmbi apotili itsuku cha wɛ chotchi, muti wɛ na wɛ mutégede a Barame. 10Mɛ Wuwàbɔnge ndjime a baate mɛ gu sage na gu pɔtele baate botchi babaniambene mɛ yidi.»

Kokome a basɛli batate

11Va Sése àbade ka bɛle natɔde gu Sérusalɛme, nàtadele baate bàbàyogenge maambe ma ndɛ yàmbalenge kokome. Baate bàtasenge ndile bo bɔ bamabage Buyumune bua Nzɛmbi. 12Sése nàlɛle bɔ ndé: «Lebagele la gutsɔ itsuku cha miyumune, nàyɛnde gu tsɛnge avale mu ndé bavɛde ndɛ butome bua bade kumu a tsɛnge. Vayulavane, ndɛ akagabege gu tsɛnge a ndɛ.» 13Ndɛ napayɛnde, àtɛde lekumi la baséli bɛndi, àvɛde mutu mutu dɔle wa lefune la lenɔne, nàlɛle bɔ ndé: «Funani tsɔnge na dɔle wa lefune la lenɔne wu mɛ védi mutu mutu kuange nachi mɛ káyade.» 14Tɔ baate ba tsɛnge a ndɛ bàbàbɛlenge ndɛ, nàbàtchindege baate gu lɛle baate ba tsɛnge yi ndɛ yɛnde ti: «Bése lesatɔnde ti ndɛ bade kumu a bése vɛ.» 15Bamane ndɛ vɛde bukumu, agabege, atɛde baséli bɛndi ba ndɛ vɛde dɔle wa lefune la lenɔne nàfule buni mutu mutu àsade na dɔle muɛne. 16Muséli atsomi ayade, nàlɛle ndɛ ndé: «A kumu, na dɔle wa lefune la lenɔne wu wɛ védi mɛ, mɛ funi lekumi la badɔle ba lefune la lenɔne.» 17Kumu nàlɛle ndɛ ndé: «Buédi. Wɛ muséli wumubuɛ ngua maambe maledite mu maambe mamakɛge. Mɛ vɛde wɛ buyumune bua tome lekumi la misɛnge.» 18Muséli wa muyɔli àyade, nàlɛle ndɛ ndé, a kumu, na dɔle wa lefune la lenɔne wu wɛ védi mɛ, mɛ funi badɔle batane ba lefune la lenɔne. 19Kumu nàlɛle ndɛ ndé, mɛ vɛde wɛ bukumu bua tome misɛnge mitaane. 20Muséli wa mutate àyade, nàlɛle ndɛ ndé, a kumu, na dɔle wa lefune la lenɔne wu wɛ védi mɛ, mɛ ndɛ gutsɔ kɔngedite mɛ gàde mɛ nàsuɛge. 21Mɛ bɔɔme bua wɛ mɛ mɔne muti wɛ inɔne cha mutu. Wɛ bɔngenge bikumbe bibia vɛ biawɛ na tɔlenge bi wɛ vɛ vade. 22Kumu a ndɛ nàlɛle ndɛ ndé, wɛ muséli wu mubi. Wɛ kuidi mbɛle mu maambe ma wɛ yémbili. Wɛ yɛbi wo mɛ inɔne cha mutu, mɛ bɔngenge bikumbe bibia vɛ biɛme na tɔlenge bi mɛ savade vɛ, 23wɛ kamuki wɛ bise sose dɔle a mɛ wa lefune la lenɔne gu itchige chibafunili badɔle mu wo va mɛ káyade mɛ kabage tsɔnge ambuli? 24Avanekaniva kumu àlɛle baate botchi bàbàbade vane ndé: «Patelani ndɛ dɔle wa lefune la lenɔne, béne levɛde ndɛ gulidi muséli wu funi mɛ tsɔnge ambuli.» 25Baate muɛne nibàkale ndɛ bo: «A Kumu ndɛ ngɛ amabage lekabe lambuli. 26Ndɛ nàlɛle bɔ ndé, mumbuli mɛ lɛle béne mé, mutu wulidi na mabuɛ, babuɛse ndɛ mabuɛ makime. Tɔ mutu wu wavɛ na mabuɛ, bapatele ndɛ kiti mua lendji la mabuɛ le ndɛ tase ndé alidi nalɔ. 27Tsualani bambɛne bɛme bàbàsatondi ti mɛ bàde kumu a tsɛnge a bɔ vɛ, béne lebome bɔ va mise mɛmɛ.»

Sése ayɛnde bone a baate gu Sérusalɛme

28Sése amane bɔ tadele kokome muɛne, ndɛ nàyɛnde bone a baate bɛndi gu Sérusalɛme.

Sése asote gu musɛnge a Sérusalɛme

29Va bɔ babàde ka bɛle nàtɔde gu musɛnge a Bétefachi na musɛnge a Bétani, gu yulu a mukɔnge miti mi batɛde ba olivié, Sése atchindege baate bɛndi bɔli, nàlɛle bɔ ndé: 30«Yɛndani gu bole buni buasongene na bése a béne. Va béne lekisote gone, béne lɔ nilebákase muane a niame wu bàtɛde ane wu mutu asanage gu yulu a ndɛ vɛ bakotele. Béne leniangele ndɛ, béne letsuale mɛ ndɛ guni.» 31Ti mutu afule béne ndé wu tumi béne mu niangele ndɛ naa? Béne lekakaale ndɛ ti: «Kumu ni wulidi na nzale a ndɛ.»

32Baate ba ndɛ tchindege bàyɛnde, nibàbakese maambe motchi ngane a buni Sése àlɛle bɔ. 33Va bɔ bàniangele muane a niame, bakumu ba niame, nibàfule bɔ bo: «Wu tumi béne mu niangele muane a niame wunewu naa?» 34Bɔ nibàkale bakumu ba niame bo: «Kumu niwulidi na nzale a ndɛ.» 35Avanekaniva bɔ bàbéte muane a niame gulidi Sése. Bɔ bayale mangoyi gu yulu a muane a niame, nibànagese Sése. 36Va Sése àyɛndenge, baate nibàyalenge matsaande ma bɔ mu ndjile. 37Va Sése àbade ka bɛle nàtɔde gu Sérusalɛme, mu ndjile yibàkolenenge gu tchine mukɔnge a miti mi batɛde ba olivié, piti a baate niyàtsakene na ngɔmbe na yimbese Nzɛmbi mu bimuile bi bɔ bàmɔne bi Sése àsàdenge. 38Bɔ nibàlɛlenge bo:

«Bubuɛ gulidi Kumu wuwayade mu ndoge a Nzɛmbi.

Pɔle na buyimbe bibade na Nzɛmbi wulidi gu kɛti a yulu.» 39Baate ba lebuli la bafarichi bàbàbade gutsɔ piti a baate, nibàlɛle Sése bo: «Kubuse baata bawɛ bàbade lingii.» 40Sése nàkale bɔ ndé: «Mumbuli mɛ lɛle béne mé ti mɛ kubuse baate banebe, mamani maneme lɔlɔ, lɔ kanimama ki tsakene na ngɔmbe.»

Sése aléle mu musɛnge a Sérusalɛme

41Va Sése àbade ka bɛle natɔde gu musɛnge a Sérusalɛme, ndɛ kɛngese musɛnge muɛne, nàléle mu ndɛ. 42Ndɛ nàlɛle ndé: «Sérusalɛme. Mu letsuge la lɔlɔ, wɛ saditigi mutu wuwatsuale wɛ pɔle vɛ. Nimulɔ wɛ chibámɔne maambe muɛne vɛ.» 43Tɔ yabe wo letsuge nigone lelidi, le bambɛne bawɛ bákátonge mirombe mu luane na wɛ. Bɔ nibádinge wɛ na bamege wɛ ngule na ngule. 44Bɔ nibágudese wɛ béne a baate bawɛ. Bɔ básákaniage lemani lebàtonge wɛ nalɔ ti lemochi vɛ muti wɛ satchikichi wo Nzɛmbi àyidi gu pɔtele wɛ vɛ.

Sése afunze basumbichi gutsɔ nzɔ yibabɔnde Nzɛmbi

45Sése àningele gutsɔ nzɔ yibabɔnde Nzɛmbi, àbàkese baate bàbàsombesenge gutsɔ yɔ, afunze bɔ, nàlɛle bɔ ndé: 46Bàkome gutsɔ ichange cha mabige ma Nzɛmbi bo: «Nzɔ yineyi niyibade nzɔ yibabɔnde Nzɛmbi. Tɔ béne nilekitili yɔ ka nzɔ bayibi.» 47Tsuge yotchi, Sése nàlɔngesenge baate gutsɔ nzɔ yibàbɔndenge Nzɛmbi. Bivonde bia bavédi ba malage na basupili ba mangidi ma Nzɛmbi na bivonde bia baate, nibàsagenge lesoge la bome Sése. 48Tɔ bɔ bàsàbakese lesoge labome ndɛ vɛ muti piti a baate yàyogenge na tchikese maambe ma ndɛ yàmbelenge.

Currently Selected:

Luke 19: NZB

Highlight

Copy