Luke 13

Ugɛle gua mulinge

1Avanekaniva baate bàyade gu lɛle Sése tchambe le Pilate àsade le ndɛ bome bichi Ngalilé va bɔ bàvɛde malage gulidi Nzɛmbi. 2Sése nàkale bɔ ndé: «Béne latase ti bàbome bichi Ngalilé muɛne muti bɔ bàlotele baate botchi mabi sade? 3Anibone vɛ. Mumbuli mɛ lɛle béne mé, béne ti lesagɛle mulinge vɛ, béne nilekuáde ndile ngane a bichi Ngalilé muɛne. 4Baate ba lekumi na pɔɔmbe, ba nzɔ yiyinéni ya gu Siluwé yàrage gu yulu abɔ, na bome bɔ, béne latase ti tchambe muɛne làyadele gulidi bɔ muti bɔ bàlotele bichi Sérusalɛme mabi sade? 5Anibone vɛ. Mumbuli mɛ lɛle béne mé, ti béne lesagɛle mulinge vɛ, béne nilekuáde ndile ngane a bu baate muɛne bàkuade.»

Kokome muti wuwavɛ bote milonde

6Sése nàtadele bɔ kokome ndé: «Lebagele nàvade muti wubatɛde figuié gutsɔ nungi a ndɛ. Letsuge lemochi, ndɛ yɛnde gu nungi gu tɔle milonde, ndɛ àsàbakese milonde vɛ. 7Avanekaniva lebagele muɛne làlɛle muséli a ndɛ ndé, biléme ka bitate mɛ yade gu tɔle milonde, tɔ mɛ sabakese miɔ vɛ. Kuange mɛ muti muɛne, muti mɛ samɔne lebuɛ lɛndi vɛ. 8Muséli nákale ndɛ ndé, a kumu, paniage ndɛ mu iléme chinechi mɛ pa bundele tɔtɔ na témbe matchibi mabibodi mu tunge a ndɛ. 9Bombe iléme chicháyade nábote milonde.Ti asabote milonde vɛ, tsɔvane wɛ kakuange ndɛ.»

Sése abɛlese mukaase wu letɛnge làfute mungɔnge letsuge lebavome

10Letsuge lebavome, Sése nàlɔngesenge baate gutsɔ nzɔ yibàbɔndenge Nzɛmbi. 11Mukaase wu letɛnge làfute mungɔnge mu lekumi la biléme na biléme pɔɔmbe na ndɛ nàbade vane. 12Sése àmɔne mukaase muɛne, àtɛde ndɛ, nàlɛle ndɛ ndé: «A nguɛme, mabéde ma wɛ bédi na mɔ, mamafuade.» 13Sése abéke ndɛ miɔge gu yulu mungɔnge, ndɛ chimbege, nàkakese Nzɛmbi. 14Ivonde chichàkɛlenge nzɔ yibàbɔngenge Nzɛmbi àmɔne kéchi, muti Sése àbɛlese mukaase letsuge lebavome, nàlɛle piti a baate yiyàbade vane ndé: «Tsuge ya sade bisale ndile samene ilidi. Yadani mu tsuge muɛne mu bɛlese maniute ma béne. A mu yade letsuge lebavome vɛ.» 15Sése nàkale ndɛ ndé: «A baate ba ngua levédi banebe, béne ka lesapose bibodi bia béne gutsɔ bivange mu vɛde biɔ mambe ma niɔde mu letsuge lebavome vɛ? 16Mvuati na mutégede a Barame wa mukaase wunewu, wu Diabele àfute mungɔnge mu lekumi la biléme na biléme pɔɔmbe, ka bachitoge ndɛ bɛlese mu letsuge lebavome vɛ?» 17Bambɛne ba Sése nibàkuade na tsoni mu maambe ma ndɛ yambele. Piti a baate nayɔ niyàkuade na ngɔmbe mu maambe motchi mamabuɛ ma Sése àsadenge.

Kokome mulonde a muti wu batɛde mutarede

18Sése nàlɛle bɔ ndé: «Mɛ Buyumune bua Nzɛmbi na yiki mɛ fuanese? Buɔ na biki mɛ fuanese? 19Buɔ na mulonde a muti wu batɛde mutarede wu mutu àbɔnge mu vade gutsɔ nungi a ndɛ mɛ fuanese. Ndɛ mɛne, atɔde, baniodi bayade, bɔ bakatonge manzɔ mabɔ mutsɔ matake mɛndi.»

Kokome a pfupfuchi yiyanzanzese mapɛ

20Sése nàbàlɛle bɔ ndé: «Mɛ Buyumune bua Nzɛmbi na ki mɛ fuanese? 21Buɔ na pfupfuchi yibatɛde levain yi mukaase abɔnge mu buge na farine mu nzanzese mapɛ mɛ fuanese.»

Mutu na ákáningele gutsɔ Buyumune bua Nzɛmbi

22Sése nàyɛndenge gu sérusalɛme nàtɔsenge tsaange Buyumune bua Nzɛmbi gutsɔ mala na misɛnge mia va kɛse yéne yotchi. 23Mutu nàfule Sése ndé: «A Kumu, lekabe la baate lelekáfuade moyi wa mubunamubu ndile latcitse?» 24Sése nàkale bɔ ndé: «Guasani maniute ma béne mu bage Buyumune bua Nzɛmbi. Mumbuli mɛ lɛle béne mé baate mvuabɔvɛ nibátɔnde bage buɔ tɔ basákátogele vɛ.» 25Va kumu a nzɔ ákásoge gu dibege nzɔ, béne ba lekábade gu mbɛdi niledumenge nàlɛlenge ndɛ ti, a Kumu, kɔkɔle a wɛ didele bése nzɔ. Tɔ ndɛ nákale béne ndé, Matani mɛ vane mɛ sayɛbi gu béne lamate vɛ. 26Avanekaniva béne lekákale ndɛ ti: «Bése a béne ngɛ làtcadenge na niɔdenge itchige imochi. Wɛ ngɛ wɛ lɔngesenge bése mu yulu mimbambe mia misɛnge mia bése.» 27Ndɛ nábálɛle béne ndé: «Matani va pédi a mɛ, mɛ sayɛbi gu béne lamate vɛ. Béne botchi nibachidi ba maambe mamabi.» 28Va béne lekámɔne Barame na Isake na Sakɔbe na babigi ba mabige ma Nzɛmbi gutsɔ Buyumune bua Nzɛmbi, nibávɛde béne gu mbɛdi, agone ni gu béne lekálélenge na guɛde makéke. 29Baate ba matsɛnge motchi nibámate ngule a tande na ngule a bande mu tchade biéle itchige imochi gutsɔ Buyumune bua Nzɛmbi. 30Baate bábákábade gu mbise nibákise gu busu. Namoni a baate bábákábade gu busu nibàbade ka gu mbise.

Sése amɔne tinge a bichi Sérusalɛme

31Baate balebuli la Bafarichi bàkukele va pédi a Sése nibàlɛle ndɛ ti: «Mate vaneva, muti Irodi wɛ asage mu bome.» 32Sése nàkale bɔ ndé: «Yɛndani béne lelɛle Irɔdi wulidi na buyédi ngane a bua mungani ti, lɔlɔ na mbɛdi mɛ ki matɛnge mɛ funze na bɛlese babéde. Tsɔvane mbise a mbɛdi, mɛ mane isale chɛme. 33Tɔ lɔlɔ, na mbɛdi, na mbise a mbɛdi, mɛ muénde ayɛnde. Muti mubigi a mabige ma Nzɛmbi achibuɛyi kuade vale na Sérusalɛme vɛ.»

34Sése nàlɛle bɔ ndé: «A bichi Sérusalɛme, a bichi Sérusalɛme, béne nibalabome babigi ba mabige ma Nzɛmbi na tɛtele baate ba Nzɛmbi atchindege béne mamani. Lekɛse lotchi mɛ bédingi ndile na nzale akokese béne va pédi a mɛ ngane a buni kɔke wa mukɛdi akokese baane bɛndi gutsɔ mapɛpi mɛndi. Tɔ béne lesachinge tchambe muɛne vɛ. 35Nimulɔ, Nzɛmbi akitamene béne. Mumbuli mɛ lɛle béne mé, béne lechibamɔne mɛ vɛ, nachi béne lekálɛle ti, misaange gulidi mutu wu Malumbi atcindigi.»

Currently Selected:

Luke 13: NZB

Highlight

Copy