Maalʉko 8

ɄYeesu ahubhaliisya abhantu ɨelufu zinɨ

(Mataayo 15:32-39)

1Mu habhaazyo hɨnɨɨho, ɨmpʉga ɨngoosi ɨyamwabho ɨya bhantu yahabhʉngɨɨne nantele. Saga bhahali nɨ shalye. Ɨpo ʉYeesu ahabhakwizya abhasundwe bhaakwe, ahabhabhʉʉzya huje, 2“Abhantu ɨbha bhali peeka naatɨ ɨnsiku zitaatu, ɨhubhalolela ɨnkʉmbʉ hu nongwa ya‑aje, saga bhali nɨ shalye. 3Nkashele ɨmbaleshe bhabhalaje humwabho nɨ nzala, bhagaziliha mwi‑idala, nantele bhamo bhafumile hutali.”

4Abhasundwe bhaakwe bhahamʼmwamula bhahaga, “Ɨpa pi‑igona, nʉʉmo ʉmuntu wa‑agazyaga ɨntogito ɨzya‑akwɨlane abhantu bhonti ɨbha.”

5ɄYeesu ahabhabhʉzɨɨlɨzya huje, “Muli nɨ ntogito zilɨnga?” Bhahamʼmwamula bhahaga, “Tili nɨ ntogito pʉnga (7).” 6ɄYeesu ahabhalajizya abhantu bhonti huje, bhakhale pa nsi. Aheega ɨntogito ziila pʉnga (7), ahanʼsalifya ʉNgʉlʉbhɨ, ahamensulanya. Ahabhapeela abhasundwe bhaakwe huje, bhabhagabhile abhantu. 7Nantele, bhahali nɨ nswɨ ɨndoodo, nantele nyishe lwene. Zyope ahasalifya hwa Ngʉlʉbhɨ, ahabhalajizya huje, bhabhapeele abhantu.

8Abhantu bhahalya, bhahanguta na‑asagazye. Abhasundwe bhahabhʉngaanya ɨvyalye vya vyahasyalile, bhahamemya amaseje pʉnga (7). 9Abhantu bha bhahaliiye ɨshalye bhahali ɨelufu zinɨ. ɄYeesu ahabhalaga abhantu bhaala huje, bhabhalaje humwabho. 10Nalinaali lwene ahatʉʉha mu waato na bhasundwe bhaakwe, bhahabhala hu nsi ɨyɨ Dalumanuuta.

ABhafalisaayo bhahwanza ɨshimanyishizyo afume hwa Yeesu

(Mataayo 12:38-42; 16:1-4)

11ɄYeesu na bhasundwe bhaakwe lwa bhaafiha hu Dalumanuuta, aBhafalisaayo bhahɨnza hwa Yeesu. Bhahanda adaliihane nawo huje, bhamʼmwʉbhɨle. Bhahanzaga huje, abhalolesye ɨshimanyishizyo sha shimanyisya huje, afumile hwa Ngʉlʉbhɨ.

12ɄYeesu ahazugumila mu mwoyo. Ahayanga huje, “Yeenu amwɨ mubhantu bhɨ habhaazyo ɨha muhwanza alole ɨshimanyishizyo? Ɨhubhabhʉʉzya amwɨ lyoli huje, anɨ saga ɨnza hubhalolesye ɨshimanyishizyo nashimo abhantu abhɨ habhaazyo ɨha.” 13Ahabhaleha, ahatʉʉha nantele mu waato. Ahanda ashʉʉle na bhasundwe bhaakwe, na‑alobhoshe hwi‑isyɨla ɨlyɨnjɨ ɨlyɨ nsʉmbi.

ɄYeesu ahubhasunda abhasundwe hu nongwa ya Bhafalisaayo nɨ ya Heloode ʉAntipa

(Mataayo 16:5-12)

14Abhasundwe bha Yeesu bhahɨwɨɨlwe apaye ɨntogito zinyinji. Bhahali nɨ ntogito yeeka lwene mu waato. 15ɄYeesu ahabhasunda huje, “Mwenyaaje haani na‑abhe maaso nʉ safu wa Bhafalisaayo nʉ wa Heloode ʉAntipa,#8:15 safu wa Bhafalisaayo nʉ wa Heloode ʉAntipa ɄYeesu ahalɨnganisyaga ʉsafu ʉwo nʉ sonsheelezi ʉbhiibhi ʉwo aBhafalisaayo nʉ Heloode ʉAntipa bhahabhombaga hwa bhantu. Ʉsonsheelezi wa Bhafalisaayo wahali wɨ manyizyo ɨzi‑ilenga. Wope ʉHeloode ʉAntipa ahali nʼsonsheelezi wɨ madala amabhiibhi. Abhasundwe bha Yeesu saga bhahazyaganyaaga zyonti ʉYeesu zya‑ahayangaga. ʉmwɨnɨ.”

16Abhasundwe bhaakwe bhahanda abhʉʉzanye bhɨɨbho hu bhɨɨbho bhahaga, “Ayanjile ɨsho hu nongwa ya‑aje, saga tipayile ɨntogito ziila.” 17ɄYeesu ahamɨɨnye zyonti zya bhakwepelana, ahabhabhʉzɨɨlɨzya huje, “Yeenu amwɨ mukwepelana huje, saga muli nɨ ntogito? Hwa huje nɨ‑ɨshi lwene saga muhuzyaganya na huzimanye nazimo? Amooyo geenyu makhome huzimanye zyonti zyɨ‑ɨyanga? 18Hwa huje amwɨ muli na maaso, saga mulola nahamo? Gope amakutu muli nago, leelo saga muhuzyaganya nazimo? Ɨshi, saga muhwizuha? 19Ahabhaazyo haala anɨ lwa nahamensulanyaaga ɨntogito zisaanu ziila na hubhapeele abhantu ashile ɨelufu zisaanu, mwahabhʉngɨɨnye ɨviseje vilɨnga ɨvyɨ vyalye vya vyahasyalile?” Bhahamʼmwamula bhahaga, “Tahabhʉngɨɨnye ɨviseje ishʉmi na vibhɨɨlɨ.”

20ɄYeesu ahabhabhʉzɨɨlɨzya huje, “Lwa nahamensulanya ɨntogito pʉnga (7) na hubhapeele abhantu ɨelufu zinɨ, mwahabhʉngɨɨnye amaseje galɨnga gɨ vyalye vya vyahasyalile?” Bhahamʼmwamula bhahaga, “Amaseje pʉnga.”

21Ɨpo ahabhabhʉzɨɨlɨzya ahaga, “Nɨ‑ɨshi saga muhuzyaganya nka zimo?”

ɄYeesu ahumʼponia ʉnʼtonko

22ɄYeesu na bhasundwe bhaakwe bhahafiha hu shipanga ɨshɨ Betisayida. Abhantu bhamo bhahanʼneeta hwa Yeesu ʉnʼtonko ʉmo. Bhahanʼnaabha ʉYeesu huje, amʼpalamansye na humʼponie. 23ɄYeesu ahanʼkhata ʉnʼkhono ʉnʼtonko ʉla, ahabhala nawo panshɨnjɨ pa shipanga shiila. Ahanʼswɨlɨla amatɨ mu maaso, ahamʼmɨɨha ɨnyoobhe mu maaso, ahamʼmʉzɨɨlɨzya huje, “Ɨshi, wanda alole hohonti?”

24Ʉmuntu ʉla aheenya, ahayanga huje, “Ɨhubhalola abhantu, lyoli bhaloleha nanshi amakwi ga gajenda.”

25ɄYeesu ahabhɨɨha ɨnyoobhe nantele mu maaso, ʉmuntu ʉla ahasimishizya ahwenye. Ahanda alole ɨvintu vyonti shinza. 26ɄYeesu ahamʼmʉʉzya huje, “Bhalaga hu khaaya, ʉjendele hwʉhwu, ʉsahaabhale hu Betisayida.”

ɄPeeteli ayanga huje ʉYeesu yʉ Kilisiti

(Mataayo 16:13-20; Luuka 9:18-21)

27ɄYeesu na bhasundwe bhaakwe bhahasogola hu Betisayida, bhahabhala hu vipanga ɨvya mu pɨɨpɨ ni‑ibooma ɨlyɨ Kayisaliiya Filiipi. Lwa bhajenda mwi‑idala, ʉYeesu ahabhabhʉzɨɨlɨzya abhasundwe bhaakwe huje, “Ɨshi, abhantu bhayiga anɨ nɨ weenu?” 28Bhahamʼmwamula bhahaga, “Bhamo bhayiga aawe we Yoohani ʉMwozi, bhamo bhayiga we Eliya ʉnʼkuwi wa Ngʉlʉbhɨ ʉwɨ mandɨ. Bhamo bhayiga ʉli nʼkuwi ʉmo mwa bhakuwi bha Ngʉlʉbhɨ abhanjɨ abhɨ mandɨ.” 29Ahabhabhʉzɨɨlɨzya huje, “Ɨshi amwɨ muyiga anɨ nɨ weenu?” ɄPeeteli ahamʼmwamula ahaga, “Aawe we Mʼfyʉli.”#8:29 Mʼfyʉli Mu njango ɨyɨ Shiyunaani ɨsimbwilwe huje, Kilisiti, mu njango ɨyɨ Shiebulaniya bhayiga, Meesiya. ABhayahuudi bhahaliyangaga itaawa lya Meesiya huje, muntu ʉyo ʉNgʉlʉbhɨ anʼsaluuye abhe Mʼfyʉli. Bhaazya izwi Kilisiti hu Ngalulanyo ɨyɨ Mazwi aMajenu hu malishilo wɨ shitaabu ɨshi. 30ɄYeesu ahabhasunda ahaga, “Musahasheele humʼmʉʉzye ʉmuntu wowonti huje, anɨ nɨ Mʼfyʉli.”

ɄYeesu akuwa afwe na‑azyʉshe hwakwe

(Mataayo 16:21-28; Luuka 9:22-27)

31Ɨpo ʉYeesu ahanda hubhamanyizye abhasundwe bhaakwe huje, “Anɨ nɨMwana wa Muntu ɨhwanziwa alabhe hu minji. Nantele, lyoli abhagoosi, abhalongozi bha bhasayi bha Ngʉlʉbhɨ na bhamanyizyi abhɨ ndajizyo zya Moose#8:31 abhagoosi, abhalongozi bha bhasayi bha Ngʉlʉbhɨ na bhamanyizyi abhɨ ndajizyo zya Moose Ɨmpʉga zitaatu ɨzi zyahali likoloti lya Bhayahuudi. Bhaazya izwi Ikoloti hu Ngalulanyo ɨyɨ Mazwi aMajenu hu malishilo wɨ shitaabu ɨshi. bhahayihuhaana na hungoje. Leelo isiku ɨlya taatu afume afwe hwanɨ, nahayizyʉha.” 32ɄYeesu ahabhabhʉzyaga abhasundwe bhaakwe ɨnongwa ɨzyo pa pazelu. ɄPeeteli lwa wʉmvwa, ahanʼkwizya panshɨnjɨ, ahanda hunʼnonganye. 33ɄYeesu ahagaluha, ahabheenya abhasundwe bhaakwe. Ahanʼnonganya ʉPeeteli huje, “Epa hwitagaalila lyanɨ, Seetano! Ʉsɨɨbha zya saga zya Ngʉlʉbhɨ, lyoli ʉsɨɨbha zya zili zya bhantu.”

34Ahabhʉngaanya ɨmpʉga ya bhantu peeka na bhasundwe bhaakwe huje, bhɨnze hwa mwene. Ahabhabhʉʉzya huje, “Ʉmuntu wowonti ʉyo ahwanza humbɨnjɨɨlɨle anɨ, saga ahwanziwa huje, ahwisaagaje yʉʉyo, lyoli ahwifumyaje anyeemule ɨshikhobheehanyo shaakwe,#8:34 Anyeemule ɨshikhobheehanyo shaakwe hwa huje hunʼtinishe ʉNgʉlʉbhɨ hu mwoyo gwonti na hugɨɨtɨshe amalabha, hwope na‑afwe hu nongwa ya Yeesu. nka‑ayandaje humbɨnjɨɨlɨle anɨ. 35Hwope ʉmuntu ʉyo ahwanza ahwifyʉle ʉwʉʉmi waakwe, ahayihuwuteezya. Lyoli ʉla wa‑afumya ʉwʉʉmi waakwe hu nongwa yaanɨ na hu nongwa yɨ Nongwa ɨNyinza afume hwa Ngʉlʉbhɨ, ahayihuwufyʉla. 36Ʉmuntu anza huhaaje hantu heenu, nkashele wawaaga ʉtabhazi wonti ʉwa mu nsi ʉmu, leelo awuteezye ʉwʉʉmi waakwe ʉwa wiila na wiila? 37Ɨshi ʉmuntu agaafumya hantu heenu ahagoosi ataane nʉ wʉʉmi waakwe? Saga halɨɨho nahamo! 38Mu habhaazyo ɨha abhantu ha bhabhomba ɨmbiibhi, saga bhahunʼsaaga ʉNgʉlʉbhɨ. Lwɨ‑ɨhwiha na bhantumi abhasangalusu mu mwamu wa Yise waanɨ, anɨ nɨMwana wa Muntu nahayihunʼnolela ɨnsoni ʉmuntu wowonti wa‑ahundolela ɨnsoni anɨ nɨ manyizyo zyanɨ pa bhantu ɨbho.”

Currently Selected:

Maalʉko 8: SBK

Highlight

Copy