Mataayo 6
6
Ɨmanyizyo ɨzya hubhaavwe abhapɨɨna
1ɄYeesu ahajendeelela ayanje ahaga, “Mubhe maaso mugandi abhombe ɨnyinza pitagaalila lya bhantu huje bhabhalole. Nkashele mubhomba ɨsho, saga munza hwambɨɨlɨle ʉmʼposheelo afume hwa Daada weenyu wa‑ali hu mwanya. 2Ɨshi, lwa muhubhaavwa abhapɨɨna, mugandi ahwiyanje hwa bhantu nanshi abhagulugulu sha bhabhomba mu nyumba ɨzya‑apuutile na‑amanyiilile, na mu madala huje abhantu bhabhasʉmbe. 3Lyoli ɨhubhabhʉʉzya huje bhambɨlɨɨye nzɨɨla ʉmʼposheelo gwabho. Leelo aawe lwʉ‑ʉhubhaavwa abhapɨɨna, ʉnʼkhono gwaho ʉgwa hu mongo gugandi amanye ɨgo ʉnʼkhono ʉgwa hu lɨɨlo sha gubhomba.#6:3 Ʉnʼkhono gwaho ʉgwa hu mongo gugandi amanye ɨgo ʉnʼkhono ʉgwa hu lɨɨlo sha gubhomba hwa huje ʉgandi ahwibaade hwa bhantu, hwope na hwa mʼmanyani waaho ʉwa mu pɨɨpɨ. 4Ahwavwe hwaho hubhanje hu mfiso hu nongwa ya‑aje ʉDaada waaho wa‑alola ga gabhombeha hu mfiso, ahayihusomba.”
Ɨmanyizyo ɨzya humʼpuute ʉNgʉlʉbhɨ
(Luuka 11:2-4)
5ɄYeesu ahajendeelela ayanje ahaga, “Ɨshi lwa mupuuta hwa Ngʉlʉbhɨ, mugandi abhe nanshi abhagulugulu. Abheene bhasʉngwa ahwilolesye hwa bhantu lwa bhapuuta hwa Ngʉlʉbhɨ mu nyumba ɨya‑apuutile na‑amanyiilile, na mu madala amalehano huje abhantu bhabhasʉmbaje. Lyoli ɨhubhabhʉʉzya huje bhambɨlɨɨye nzɨɨla ʉmʼposheelo gwabho. 6Leelo aawe lwʉ‑ʉpuuta hwa Ngʉlʉbhɨ, ʉtʉʉshe hu mpanda yaaho na‑agalile ʉlyango. Ɨpo nkʉ‑ʉpuutaje hwa Daada ʉNgʉlʉbhɨ wa saga aloleha. Wope ʉDaada ʉNgʉlʉbhɨ wa‑alola ga gabhombeha hu mfiso, ahayihusomba.
7Nantele, lwa mupuuta hwa Ngʉlʉbhɨ, mugandi abwaganishe nanshi sha bhabhomba bha saga bhamʼmwɨtɨɨshe ʉNgʉlʉbhɨ. Abheene bhasɨɨbha huje bhanza hwʉmvwɨshe hu mazwi gaabho aga‑abwaganishe. 8Ɨshi leelo, mugandi apuute nanshi abheene sha bhapuuta, pɨpo ʉDaada weenyu amɨɨnye ɨgo ga muhwanza sha musɨɨle amwɨ hunʼnaabhe.
9Ɨshi amwɨ lwa mupuuta hwa Ngʉlʉbhɨ, mugaje,
‘Wee Daada weetu wʉ‑ʉli hu mwanya,
itaawa lyaho limwamihwaje.#6:9 itaawa lyaho limwamihwaje Ɨpa itaawa hwa huje yʉ Ngʉlʉbhɨ yʉʉyo wa‑akhondɨɨye huje amwamihwaje, pɨpo mʼfinjile.
Ʉwumwɨnɨ waaho wɨnzaje.
10Zyʉ‑ʉzigɨɨne, zibhombehaje mu nsi ʉmu,
nanshi sha zibhombeha hu mwanya.
11Ʉtipeele ɨshalye sheetu ɨshɨ nsiku zyonti.
12Ʉtikhobhoshelaje ɨmbiibhi zyetu,
nanshi atɨ sha tihubhakhobhoshela ɨbho bha bhahutibhombela shibhiibhi.
13Ʉtilongozyaje huje tigandi ahwinjile mu njelo,
leelo ʉtifyʉle afume hwa Mʼmiibhi ʉla ʉSeetano,
pɨpo ʉwumwɨnɨ, ikhone nʉ mwamu, vyaho wiila na wiila!
Aameni!’ ”#6:13 pɨpo ʉwumwɨnɨ, ikhone nʉ mwamu, vyaho wiila na wiila! Aameni Amazwi ɨgo saga galɨɨho mu nsimbo zimo ɨzyɨ mandɨ ɨzyɨ Shiyunaani.
14ɄYeesu ahayanga nantele ahaga, “Nkashele muhubhakhobhoshela abhantu ɨmbiibhi zyabho, wope ʉDaada weenyu wa‑ali hu mwanya anza hubhakhobhoshele namwɨ ɨmbiibhi zyenyu. 15Leelo nkashele saga muhubhakhobhoshela ɨmbiibhi zyabho, wope ʉDaada weenyu wa‑ali hu mwanya saga anza hubhakhobhoshele namwɨ ɨmbiibhi zyenyu.”
Ɨmanyizyo ɨzya hwiyiime alye
16ɄYeesu ahajendeelela ayanje ahaga, “Ahabhaazyo lwa muhwiyiima alye hu nongwa yɨ mpuuto, pa maaso geenyu pagandi alolesye ʉzugumizu nanshi abhagulugulu sha bhabhomba. Ɨnjanjile ɨsho, pɨpo abheene bhalolesya ʉzugumizu pa maaso gaabho huje abhantu bhabhalole aje bhahwiyiimile alye hu nongwa yɨ mpuuto. Lyoli ɨhubhabhʉʉzya huje bhambɨlɨɨye nzɨɨla ʉmʼposheelo gwabho. 17Leelo aawe nkashele ʉhwiyiimile alye, ʉsamvye hu maaso na‑apotozye ɨnyemba hwi‑itwe, 18huje abhantu bhagandi amanye aje ʉhwiyiimile alye. ɄDaada ʉNgʉlʉbhɨ wa saga aloleha pa pazelu, ʉyo wa‑amɨɨnye mwene. Wope ʉDaada ʉNgʉlʉbhɨ wa‑alola ga gabhombeha hu mfiso, ahayihusomba.”
Ɨmanyizyo ɨzya hwibhɨɨshɨle ɨmfuha hu mwanya
(Luuka 12:33-34)
19Ɨpo ʉYeesu ahabhabhʉʉzya ahaga, “Mugandi ahwibhɨɨshɨle ɨmfuha mu nsi ʉmu, ʉmwo ʉmuswa nɨ hama vinangaanya, bhope abhiibha bhabhugula na hwibhe. 20Leelo muhwibhɨɨshɨle ɨmfuha hu mwanya, ʉhwo ʉmuswa nɨ hama saga vinangaanya, nantele ʉhwo abhiibha saga bhabhugula awe ahwibhe. 21Paala pa mubhɨɨshɨle ɨmfuha zyenyu, gope amooyo geenyu gahayibha pɨnɨɨpo.”
Ʉlukhozyo ʉlwɨ mʼbɨlɨ
(Luuka 11:34-36)
22ɄYeesu ahonjela ayanje ahaga, “Amaaso gaaho kolobooyi yɨ mʼbɨlɨ gwaho. Amaaso gaaho nkashele galola shinza, ʉmʼbɨlɨ gwaho gwonti gubha nʉ lukhozyo. 23Leelo amaaso gaaho nkashele gafwiye, ɨpo ʉmʼbɨlɨ gwaho gwonti gubha nɨ hiisi. Nkashele ʉlukhozyo lwa luli muuhati yaaho saga lukhozya, lyoli ɨhiisi ɨbha ngoosi tee!”
Humʼmombele ʉNgʉlʉbhɨ nɨ shʉʉma
(Luuka 16:13)
24ɄYeesu ahajendeelela ayanje ahaga, “Saga alɨɨho ʉmuntu wa‑abhajiiye hubhabhombele abhamwɨnɨ bhabhɨɨlɨ, pɨpo ahayihumʼviitilwa weeka na hunʼgane ʉwamwabho, awe hunʼtinishe weeka na hunʼsyonshele ʉwɨnjɨ. Saga mubhajiiye humʼmombele ʉNgʉlʉbhɨ peeka nɨ shʉʉma hu habhaazyo heeka.”
Ɨmanyizyo ɨzya hunʼsʉʉbhɨle ʉNgʉlʉbhɨ
(Luuka 12:22-31)
25“Ɨshi ɨhubhabhʉʉzya huje mugandi ataamiwe hu nongwa yɨ wʉʉmi weenyu aje munza‑alye yeenu, munza‑amwele yeenu awe munza‑akwate yeenu. Ɨnjanjile ɨsho, pɨpo ʉwʉʉmi wushila ɨshalye, nantele ʉmʼbɨlɨ gwope gushila amenda. 26Enyi ɨnyonyi, saga zitota hwope saga ziyabhila, nantele saga zibhʉngaanya mu vyanga, leelo ʉDaada weenyu wa‑ali hu mwanya, ahuziswɨla ɨzyo. Ɨshi amwɨ, wɨlɨ saga ahubhasaajila tee ashile ɨnyonyi? 27Nantele, weenu mwaliimwɨ hwa hwitaamye hwakwe, abhajiiye ahwiyonjeezye ʉwʉʉmi waakwe nkamba hu habhaazyo hashe lwene?
28Yeenu muhwitaamya asɨɨbhe huje mukwate yeenu? Enyaaji ʉweezya ʉwa mwi‑igona sha wukula. Saga wubhomba ɨmbombo nkɨ‑ɨmo awe asone amenda gaakwe wʉʉwo. 29Leelo ɨhubhabhʉʉzya, hwope ʉmwɨnɨ ʉSolomooni mu mwamu waakwe wonti, saga ahakwɨte amenda na‑akhondele nanshi ʉweezya ʉwu! 30Ɨshi, nkashele ʉNgʉlʉbhɨ ahuwukwatizya ʉweezya ʉwa mwi‑igona nanshi ɨshi, ʉwo sanyʉʉnʉ wulɨɨho, shandaabhɨ yaakwe wutaagwa mu mwoto, wɨlɨ, ʉNgʉlʉbhɨ saga ahubhabhombela shinza tee amwɨ, mubhantu mwa muli nʉ lwɨtɨho ʉludoodo?
31Ɨshi mugandi ahwogope huje, ‘Tɨnza‑alye yeenu? Awe tɨnza‑amwele yeenu? Awe tɨnza‑akwate yeenu?’ 32Ɨnjanjile ɨsho, pɨpo gonti ɨgo ga bhabhomba ɨbho bha saga bhamʼmɨɨnye ʉNgʉlʉbhɨ, leelo ʉDaada weenyu ʉwa hu mwanya amɨɨnye huje muhuvyanza ɨvintu ɨvyo. 33Leelo amwɨ anzaji nasʉʉti ʉwumwɨnɨ ʉwa Ngʉlʉbhɨ#6:33 Anzaji nasʉʉti ʉwumwɨnɨ ʉwa Ngʉlʉbhɨ hwa huje tihwanziwa ahwifumye na hunʼtinishe ʉNgʉlʉbhɨ hu habhaazyo honti mu lemvu weetu. na‑abhombe ɨgo ga gakhondɨɨye pitagaalila lyakwe, ɨpo na ganjɨ ɨgo gonti ahayihubhapeela lwene.
34Ɨshi mugandi ahwogope hu nongwa yɨ ndaabhɨ, pɨpo agɨ ndaabhɨ ganza hwilolesye geene. Shila lisiku lili na mayɨmba gaakwe.”
Currently Selected:
Mataayo 6: SBK
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.