Mataayo 28

Azyʉshe hwa Yeesu

(Maalʉko 16:1-10; Luuka 24:1-12; Yoohani 20:1-10)

1Lwa lyashila isiku ɨlyɨ Sabaato, nashampwi nagamazansha pi‑isiku ɨlya Pamulʉngʉ, ʉMaliya ʉwa hu Magidaala peeka nʉ Maliya ʉwɨnjɨ bhahabhala ahwenye ɨnkʉngwa ɨla. 2Nalinaali, intensya igoosi lyahashila. Ʉnʼtumi wa Mwɨnɨ ʉNgʉlʉbhɨ ahiiha afume hu mwanya, ahabhala pa nkʉngwa, ahalibhungulusya iwe liila panshɨnjɨ na hulikhalile. 3Ɨsheeni sha nʼtumi ʉyo shahalawuuhaga nanshi ɨntalala yɨ mvula na menda gaakwe gahali mazelu tee. 4Abhalɨndɨɨlɨli abhɨ nkʉngwa ɨla lwa bhagalola ɨgo, bhahayinga na hwogope tee, bhahagwa pa nsi na‑abhe nkati bhafwe. 5Leelo ʉnʼtumi ʉla ahabhabhʉʉzya abhashɨ bhaala ahaga, “Mugandi ahwogope! Ɨmɨɨnye huje muhumʼmwanza yʉ Yeesu ʉyo bhahanʼkhomelɨɨye pa shikhobheehanyo. 6Saga alɨɨho ɨpa! Azyʉshɨle nanshi sha‑ahayanjile. Ɨnzaji, mulole ɨpo bhahanʼgoneleziizye. 7Ɨshi, bhalaji nalinaali mubhabhʉʉzye abhasundwe bhaakwe huje, ‘Azyʉshɨle afume hwa bhafwe, nantele abhatagaliiye abhale hu mukowa ʉgwɨ Galilaaya. Ʉhwo hwa hwʉhwo mwahayihunʼnola.’ Musahɨɨwe zya nabhabhʉʉzya.”

8Ɨpo abhashɨ bhaala bhahasogola nalinaali pa nkʉngwa sha bhali nʉ wooga ʉwo wahasangɨɨne nʉ luseshelo ʉlugoosi. Bhahashɨmbɨla abhale hubhabhʉʉzye abhasundwe bha Yeesu ɨnongwa ɨzyo. 9Ɨpo ʉYeesu ahakhomaana na bhashɨ bhaala ahaga, “Mwagona!” Abhashɨ bhaala bhahazʉmbɨɨla hwa mwene, bhahasugamila na humʼpuute hwi‑idala ɨlya hunʼkhate amanama gaakwe. 10Ɨpo ʉYeesu ahabhabhʉʉzya ahaga, “Mugandi hwogope. Bhalaji mubhabhʉʉzye abhasundwe bhaanɨ bhabhale hu mukowa ʉgwɨ Galilaaya, ʉhwo bhanza hunaaje.”

Abhalɨndɨɨlɨli bhayanga ilenga

11Abhashɨ bhaala lwa bhali mwi‑idala bhajenda, abhalɨndɨɨlɨli bhamo bha bhahalɨndɨlɨlaga ɨnkʉngwa ɨya Yeesu bhahasogola na‑abhale mwi‑ibooma ɨlyɨ Yelusaleemu. Bhahafiha na hubhabhʉʉzye abhalongozi bha bhasayi bha Ngʉlʉbhɨ gonti ɨgo gahabhombɨɨshe.

12Ɨpo abhalongozi bha bhasayi bha Ngʉlʉbhɨ peeka na bhagoosi bha Bhayahuudi bhahabhʉngaana peeka na‑ajeehane, huje bhabhapeele ɨmpɨɨya ɨnyinji hu mfiso abhalwi bhaala. 13Bhahabhabhʉʉzya bhahaga, “Nkashele ʉmuntu wowonti ahubhabhʉzɨɨlɨzya hwɨ‑ɨgo ga gabhombɨɨshe mugaje, ‘Abhasundwe bhaakwe bhahɨnzɨle nʉsiku ahwibhe ʉmʼvimba gwakwe lwa tigonile ʉtulo.’ 14Nkashele ʉPilaato wʉmvwa ɨgo, atɨ tɨnza‑ayanje nawo huje musahabhe na mayɨmba.” 15Abhalɨndɨɨlɨli bhaala bhaheega ɨmpɨɨya ziila, bhahabhomba nanshi sha bhahamanyiziiwe. Ɨnongwa ɨzyo zyahanyampaana hwa Bhayahuudi afishe ɨleelo.

Ɨndajizyo ɨzya hu malishilo ɨzya Yeesu hwa bhasundwe bhaakwe

(Maalʉko 16:14-18; Luuka 24:36-49; Yoohani 20:19-23; ɨMbombo ɨzya Bhasontwa 1:6-9)

16Abhasundwe bha Yeesu ishʉmi na weeka bhahabhalile hu mukowa ʉgwɨ Galilaaya hwi‑igamba ɨlyo ʉYeesu ahabhalajiziizye. 17Lwa bhanʼnola, bhahamʼpuuta, leelo bhamo mu bhasundwe ɨbho bhahabha nɨ nsyoho ɨya hwɨtɨshe huje yʉ Yeesu. 18Ɨpo ʉYeesu ahazʉmbɨɨla, ahabhabhʉʉzya huje, “ɄNgʉlʉbhɨ ampiiye ikhone lyonti ɨlya hu mwanya nɨ lya mu nsi. 19Ɨshi, bhalaji mubhalʉmbɨɨlɨle abhantu mu nsi zyonti huje bhabhe bhasundwe bhaanɨ na hubhoozye hwi‑itaawa ɨlya Daada, ɨlya Mwana, nɨ lya Mʼpepo ʉMʼfinjile. 20Mubhamanyizyaje akhate gonti ɨgo ɨmbalajiziizye amwɨ. Nanɨ ɨmbala‑abhe peeka naamwɨ ɨnsiku zyonti, afishe hu malishilo wɨ nsi.”

Currently Selected:

Mataayo 28: SBK

Highlight

Copy