Luuka 24

Azyʉshe hwa Yeesu

(Mataayo 28:1-10; Maalʉko 16:1-8; Yoohani 20:1-10)

1Ɨshi, isiku ɨlya Pamulʉngʉ nashampwi, abhashɨ bhaala bhahabhala hu nkʉngwa. Bhaheejile ɨnyemba zya zinunshila shinza zya bhahazilɨngɨɨnye nzɨɨla. 2Lwa bhaafiha, bhahalola iwe ɨlyo bhahagubishiiye pa nkʉngwa libhungulusiiwe, lili panshɨnjɨ pa nkʉngwa. 3Ɨpo bhahatʉʉha muuhati, bhahagwaga ʉmʼbɨlɨ gwa Mwɨnɨ ʉYeesu nagumo. 4Lwa bhali aswije, bhahagunduha haani hubhalole abhasahaala bhabhɨɨlɨ bha bhakwɨte amenda amazelu ga galawuha‑lawuha, bhɨmɨlɨɨye pa pɨɨpɨ nabho. 5Abhashɨ ɨbho bhahakhatwa nʉ wooga. Bhahasulamiha amatwe gaabho pa nsi. Ɨpo abhasahaala bhaala bhahabhabhʉʉzya bhahaga, “Yeenu muhumʼmwanza wa‑ali mwʉmi mwa bhafwe? 6Saga alɨɨho ɨpa! Azyʉshɨle! Mwizuhaje amazwi ga‑ahabhabhʉzɨɨzye lwa‑ali hu mukowa ʉgwɨ Galilaaya peeka naamwɨ. 7Ahajile, ‘Anɨ nɨMwana wa Muntu ɨhwanziwa abhɨɨhwe mu nyoobhe zya bhabhomba mbiibhi na‑akhomeelwe pa shikhobheehanyo, leelo isiku ɨlya taatu, nahayizyʉha’!”

8Abhashɨ bhaala bhahiizuha amazwi ga Yeesu. 9Ɨpo bhahasogola pa nkʉngwa paala, bhahabhala, bhahabhabhʉʉzya ɨnongwa ziila zyonti abhasundwe bha Yeesu ishʉmi na weeka, peeka na bhanjɨ bhonti. 10Abhashɨ ɨbho bha bhɨɨbha, ʉMaliya ʉwa hu Magidaala, ʉYoana, ʉMaliya ʉnyina wa Yaakobo, peeka na bhashɨ abhanjɨ bha bhahali peeka nabho.

11Abhasontwa lwa bhʉmvwa ɨnongwa ɨzyo, bhahalola zyɨ pezu, bhahakhaana hubhɨɨtɨshe. 12Leelo ʉPeeteli ahɨmɨɨlɨla lubhilo, ahashɨmbɨla abhale hu nkʉngwa. Lwa waafiha, ahiina muuhati mu nkʉngwa, ahalilola ikɨbha lyene lya bhahanʼsyɨlɨɨye ʉYeesu. Ɨpo ahasogola paala sha‑aswiga hwɨ‑ɨzyo zya zifumiiye.

ɄYeesu ahubhaloleshela abhasundwe bhaakwe bhabhɨɨlɨ

(Maalʉko 16:12-13)

13Isiku lyɨnɨɨlyo, abhasundwe bha Yeesu bhabhɨɨlɨ bhahabhalaga hu shipanga shimo ɨsho itaawa lyakwe bhahagaga Emawu. Ɨshipanga ɨsho shahali patali, ɨnjendo yɨ masaala gabhɨɨlɨ mwi‑idala afume pi‑ibooma ɨlyɨ Yelusaleemu. 14Mwi‑idala, abhasundwe bhaala bhahayangaga ɨnongwa zyonti zya zyahafumiiye. 15Lwa bhajendeelela ayanje ɨzyo, ʉYeesu yʉʉyo ahɨnza, ahabha ajenda peeka nabho, 16leelo ʉNgʉlʉbhɨ ahabhabhɨɨshɨle huje, bhagandi humʼmanye huje yʉ Yeesu.

17ɄYeesu ahabhabhʉzɨɨlɨzya huje, “Muyanga nongwa bhʉlɨ ʉhwu mujenda?” Abhantu bhaala bhahɨmɨɨlɨla sha bhazugumiiye. 18Weeka mwɨ‑ɨbho, ʉyo itaawa lyakwe yʉ Kileyoopa, ahamʼmwamula ahaga, “Wɨlɨ, weewe wʉmwene mu bhantu bhonti abha hu Yelusaleemu, wa saga ʉmɨɨnye zya zibhombɨɨshe ʉhwo, mu nsiku nyishe ɨzi?” 19Wope ʉYeesu ahaga, “Huli nongwa nshi?” Bhahamʼmwamula bhahaga, “Ɨnongwa zya bhahamʼmombɨɨye ʉYeesu ʉwa hu Nazaleeti. Ʉmuntu ʉyo ahali nʼkuwi, nantele ahali ni‑ikhone igoosi pitagaalila lya Ngʉlʉbhɨ na bhantu bhonti hu nongwa yɨ mbombo zyakwe na mazwi gaakwe. 20Leelo, abhalongozi bha bhasayi bha Ngʉlʉbhɨ na bhagoosi bheetu abhanjɨ bhahanʼtwala huje, alongwe na‑abudwe. Ɨpo bhahamʼbuda hwi‑idala ɨlya hunʼkhomeele pa shikhobheehanyo. 21Ʉyo ya yʉʉyo atɨ wa tahanʼsʉbhɨlaga huje, ahayihutigombola atɨ tiBhaizilaeeli. Ɨshi, sanyʉʉnʉ lisiku lya taatu afume abhombeshe hwɨ‑ɨzyo zyonti.

22Nantele, abhashɨ bhamo mu mpʉga yeetu bhatigundusiizye tee. Sanyʉʉnʉ na shampwi, bhabhalile hu nkʉngwa, 23leelo saga bhagwajile ʉmʼvimba gwa Yeesu. Bhɨnzɨle hutibhʉʉzye huje, abhantumi bha Ngʉlʉbhɨ bhabhaloleshɨɨye na hubhabhʉʉzye huje ʉYeesu azyʉshɨle. 24Ɨpo bhamo mu mpʉga yeetu bhabhalile hu nkʉngwa, bhope bhazyajile zili shishiila nanshi abhashɨ bhaala sha bhayanjile, leelo ʉmwene saga bhanʼnolile.”

25Ɨpo ʉYeesu ahabhabhʉʉzya ahaga, “Amwɨ muli bhapezu! Yeenu amooyo geenyu gali makhome ahwɨtɨshe gonti ga gahayangwilwe na bhakuwi bha Ngʉlʉbhɨ? 26Wɨlɨ, ʉMʼfyʉli saga ahanziwaaga ashilile hu malabha ɨgo gonti, pamandɨ pa‑ahatʉʉhaje mu mwamu waakwe?” 27Ɨpo ʉYeesu ahabhabhʉʉzya zyonti zya zihunʼnyanga ʉmwene mu Nsimbo ɨMfinjile. Ahayanga ɨzyo ahwande mu vitaabu vya Moose nɨ vitaabu vyonti vya bhakuwi bha Ngʉlʉbhɨ.

28Lwa bhapalamila afishe hu shipanga sha bhahabhalaga, ʉYeesu ahabha nkati ashizanya. 29Ɨpo abheene bhahanʼkʉndɨɨlɨzya bhahaga, “Tigone miya! Enya hwila, ɨhiisi yope ɨpalamiiye.”

Ɨpo ʉYeesu ahatʉʉha mu nyumba, ahakhala nabho. 30Ɨshi, ʉYeesu lwa‑ahali akhɨɨye peeka nabho alye ɨshalye, aheega ɨntogito, ahasalifya hwa Ngʉlʉbhɨ, ahamensulanya, ahabhapeela. 31Ahabhaazyo hɨnɨɨho, ʉNgʉlʉbhɨ ahabhiigula amaaso gaabho, bhahamʼmanya huje yʉ Yeesu. Wope ʉYeesu, pɨnɨɨpo ahateega pa maaso gaabho. 32Ɨpo bhahabhʉzɨlɨzanya bhahaga, “Wɨlɨ, amooyo geetu saga gahasansamuushe shinza, hu habhaazyo ɨho ahayangaga naatɨ mwi‑idala na hutibhʉʉzye zya zili mu Nsimbo ɨMfinjile?”

33Ahabhaazyo hɨnɨɨho bhahasogola, bhahaweela hu Yelusaleemu. Ʉhwo bhahabhaaga abhasundwe bha Yeesu ishʉmi na weeka bhabhʉngɨɨne peeka na bhanjɨ. 34Bhaala bha bhahabhʉngɨɨne, bhahabhabhʉʉzya bhaala bhabhɨɨlɨ bhahaga, “Lyoli ʉMwɨnɨ weetu azyʉshɨle! Anʼnoleshɨɨye ʉSiimoni!”

35Ɨpo bhope bhaala bhabhɨɨlɨ bhahabhamamilaga zyonti zya zibhafumiiye mwi‑idala, na shiila ʉYeesu sha wamanyiha hwa bheene lwa‑ahamensulanyaaga ɨntogito na hubhapeele.

ɄYeesu ahubhaloleshela abhasundwe bhaakwe

(Mataayo 28:16-17; Maalʉko 16:14; Yoohani 20:19-20)

36Abhasundwe bha Yeesu lwa bhali ayanje ɨzyo, pɨnɨɨpo ʉYeesu yʉʉyo ahɨmɨɨlɨla paahati yaabho. Ahabhalamuha ahaga, “Ʉtengaanu wubhe peeka naamwɨ!” 37Bhahagunduha, bhahadelegana tee, bhahasɨɨbhaga huje bhahunʼnola nʼzimu.

38Leelo, ʉYeesu ahabhabhʉʉzya ahaga, “Yeenu muzugumila? Yeenu muli nʉ wooga mu mooyo geenyu? 39Enyi ɨnyoobhe zyanɨ na manama gaanɨ, anɨ nɨɨnɨ. Amwɨ mpalamansyi, mulole. Ʉnʼzimu saga ali nʉ mʼbɨlɨ awe amafupa, nanshi sha muhundola anɨ ɨndi nʉ mʼbɨlɨ na mafupa.”

40ɄYeesu lwa waamala hubhabhʉʉzye amazwi ɨgo, ahabhalolesya abhasundwe bhaakwe amabhazi aga mu makhono na mu manama gaakwe. 41Ɨpo abhasundwe bhaakwe bhahasha tee, ʉhwu bhaswiga afishe asɨɨbhe huje, lumo lyoli saga yʉʉyo! Pɨɨpo ʉYeesu ahabhabhʉzɨɨlɨzya ahaga, “Muli nɨ shalye shoshonti ɨpa?” 42Bhahamʼpeela ahamensulwe hɨ nswɨ ɨnyooshe. 43Ahaposheela na‑alye pitagaalila lyabho.

Amazwi ga Yeesu aga hu malishilo

(Mataayo 28:18-20; Maalʉko 16:15-18; Yoohani 20:21-23; ɨMbombo ɨzya Bhasontwa 1:6-8)

44Pamandɨ ʉYeesu ahabhabhʉʉzya ahaga, “Ɨga ga nahabhabhʉzyaga ahabhaazyo haala lwa nahali peeka naamwɨ. Nahabhabhʉzɨɨzye huje, gonti ga gahasimbwilwe hu nongwa yaanɨ mu ndajizyo zya Moose, mu vitaabu vya bhakuwi bha Ngʉlʉbhɨ na mu shitaabu ɨshɨ Nsalifyo, gahanziwaaga aje, gabhombeshe.”

45Ɨpo ahabhiigula ɨnjeele zyabho huje, bhazyaganyaaje ɨNsimbo ɨMfinjile ɨzyo. 46Ahabhabhʉʉzya ahaga, “Ɨsimbwilwe huje, ʉMʼfyʉli ahayilaviwa na‑afwe, leelo isiku ɨlya taatu, ahayizyʉha afume mwa bhafwe. 47Nantele hwi‑ikhone lyakwe abhantu abhɨ nsi zyonti, ahwande hwi‑ibooma ɨlyɨ Yelusaleemu, bhahayilʉmbɨɨlɨlwa aje, bhalambe hu mbiibhi zyabho huje, ʉNgʉlʉbhɨ abhakhobhoshele. 48Amwɨ muli bhasimishizi bhɨ nongwa ɨzyo zyonti.

49Ɨshi tejeelezyi! Ɨhunʼsonteelezya huliimwɨ ʉMʼpepo ʉMʼfinjile ʉyo ʉDaada ahalapile huje, ahayihubhapeela amwɨ. Leelo, mukhale mwi‑ibooma ɨli ɨlyɨ Yelusaleemu afishe lwa mwahayambɨɨlɨla ikhone afume hu mwanya hwa Ngʉlʉbhɨ.”

ɄYeesu abhala hu mwanya

(Maalʉko 16:19-20; ɨMbombo ɨzya Bhasontwa 1:9-12)

50Ɨpo ʉYeesu ahabhalongozya abhasundwe bhaakwe mwi‑ibooma ɨlyɨ Yelusaleemu, ahabhala nabho hunshɨnjɨ ya yahali pɨɨpɨ nɨ shipanga ɨshɨ Besaniya. Lwa bhaafiha ɨpo, ahagolosya ɨnyoobhe zyakwe hu mwanya, ahabhasaya. 51Lwa‑ali hubhasaye, ahabhaleha na‑anyeetulwe abhale hu mwanya.#24:51 Enya ɨMbombo ɨzya Bhasontwa 1:9, ɨshifwani ɨsha Yeesu nanshi ɨsho anyeetulwa abhale hu mwanya.

52Ɨpo bhahanʼsugamilila na humʼpuute. Bhahaweela hu Yelusaleemu sha bhashiiye tee. 53Ɨnsiku zyonti, bhahabhanga mu lubhaga lwɨ nyumba ɨmfinjile ɨya Ngʉlʉbhɨ na humʼmwamishe ʉNgʉlʉbhɨ.

Currently Selected:

Luuka 24: SBK

Highlight

Copy