Luuka 16

Ɨshifwani ɨsha mwɨmɨɨlɨli ʉnʼshevu

1Ɨpo ʉYeesu ahabhabhʉʉzya abhasundwe bhaakwe ahaga, “Hwahali nʉ nʼtabhazi ʉmo wa‑ahali nʉ mwɨmɨɨlɨli ʉwɨ shʉʉma shaakwe. Ʉnʼtabhazi ʉla ahʉmvwɨzye huje, ʉmwɨmɨɨlɨli waakwe ʉyo anangaanya ɨshʉʉma shaakwe. 2Ɨpo ʉnʼtabhazi ahanʼkwizya, ahamʼmʉʉzya ahaga, ‘Nongwa wɨlɨ ɨzi, zyɨ‑ɨhwʉmvwa hu mbombo yaaho? Lolesya ɨmbaazyo zya zilolesya shʉ‑ʉbhombɨɨye ɨshʉʉma shaanɨ, pɨpo saga ʉkhondɨɨye abhe mwɨmɨɨlɨli waanɨ nantele!’

3Ʉmwɨmɨɨlɨli ʉla ahahwibhʉzɨɨlɨzya mwene mu mwoyo gwakwe ahaga, ‘Ʉnʼgoosi waanɨ ahunshɨmbɨzya mu mbombo. Ɨshi, ɨmbala‑abhombe lyenu? Alime, ɨndi mwolo, hwope alaabhe, ɨlola ɨnsoni. 4Ɨshi, naamanya shɨ‑ɨmbala‑abhombe huje, nahejelelwaje na bhantu mu khaaya zyabho, lwa neefwa mu mbombo ɨnɨ.’

5Ɨpo ʉmwɨmɨɨlɨli ʉla ahanʼkwizya shila muntu wa‑ahɨsɨwaaga nʉ nʼgoosi waakwe. Ahamʼmʉzɨɨlɨzya ʉwa hwande ahaga, ‘Ahuhwɨsya vilɨnga ʉnʼgoosi waanɨ?’ 6Ahamʼmwamula ahaga, ‘Ahunɨɨsya amadebe ɨmya yeeka agɨ nyemba agɨ mizeyituuni.’ Ahamʼmʉʉzya ahaga, ‘Ega ikalaata ɨli lya lisimbwilwe vya‑ahuhwɨsya. Khala lubhilo, simba amashʉmi gasaanu.’ 7Ʉmwɨmɨɨlɨli ahamʼmʉzɨɨlɨzya ʉwa bhɨɨlɨ ahaga, ‘Nawe ahuhwɨsya vilɨnga?’ Ahamʼmwamula ahaga, ‘Amagunila ɨmya yeeka agɨ ngano.’ Ʉmwɨmɨɨlɨli ʉla ahaga, ‘Ega ikalaata ɨli lya lisimbwilwe vya‑ahuhwɨsya, simba amagunila amashʉmi naana.’

8Ɨpo ʉnʼtabhazi ʉla ahanʼsʉmba ʉmwɨmɨɨlɨli wa saga nʼgolosu, sha‑ahabhombile hu njeele. Ɨnjanjile ɨsho hu nongwa ya‑aje, abhantu bha saga bhamʼmwɨtɨɨshe ʉNgʉlʉbhɨ, bhabhomba ɨmbombo zyabho na bhamwabho hu njeele ashile bha bhamʼmwɨtɨɨshe ʉNgʉlʉbhɨ. 9Ɨshi ɨhubhabhʉʉzya aje, mubhavwaje abhanjɨ hu shʉʉma sheenyu ɨsha mu nsi ʉmu huje, lwa shamaliha, mwahaposheelwe mu khalo ʉwa wiila.

10Ʉmuntu wowonti wa‑ahwɨmɨɨlɨla hu lʉnjɨsu hu vintu ɨvidoodo, ʉyo agɨmɨɨlɨla hu lʉnjɨsu na hu vintu ɨvinji. Leelo nkashele ʉmuntu saga mwɨmɨɨlɨli nʼnʉnjɨsu hu vintu ɨvidoodo, saga abhajiiye abhe mwɨmɨɨlɨli nʼnʉnjɨsu na hu vintu ɨvinji. 11Ɨshi, nkashele saga muli bhɨmɨɨlɨli bhalʉnjɨsu abhɨ shʉʉma ɨsha mu nsi ʉmu,#16:11 Ɨshʉʉma ɨsha mu nsi ʉmu vintu ɨvyo ʉNgʉlʉbhɨ abhapiiye abhantu mu nsi ʉmu. Ɨshʉʉma ɨshɨ lyoli wʉʉmi ʉwa wiila. weenu agabhapeela ɨshʉʉma ɨshɨ lyoli? 12Nantele, nkashele saga muli bhɨmɨɨlɨli bhalʉnjɨsu abhɨ shʉʉma sha wamwenyu, weenu agabhapeela ɨshʉʉma ɨsha‑abhe sheenyu mwɨmwɨ? 13Saga alɨɨho ʉmʼmomvi wa‑abhajiiye hubhabhombele abhamwɨnɨ bhabhɨɨlɨ, pɨpo ahayihumʼviitilwa weeka na hunʼgane ʉwamwabho, awe hunʼtinishe weeka na hunʼsyonshele ʉwɨnjɨ. Saga mubhajiiye humʼmombele ʉNgʉlʉbhɨ peeka nɨ shʉʉma hu habhaazyo heeka.”

14Ɨshi, aBhafalisaayo lwa bhʉmvwa amazwi ɨgo, bhahanda hunʼsʉfwanye ʉYeesu hu nongwa ya‑aje, bhahazigɨɨne tee ɨmpɨɨya. 15ɄYeesu ahabhabhʉʉzya ahaga, “Amwɨ muhwibhɨɨha bhagolosu pa maaso ga bhantu, leelo ʉNgʉlʉbhɨ agamɨɨnye ga gali mu mooyo geenyu. Aminji ga galoleha huje, gakhondɨɨye pa maaso ga bhantu, ʉNgʉlʉbhɨ ahugaviitilwa!”

Ɨmanyizyo ɨzyɨ ndajizyo

(Mataayo 11:12-13; 5:31-32; Maalʉko 10:11-12)

16ɄYeesu ahonjela ayanje ahaga, “Ɨndajizyo zya Moose nɨ nsimbo ɨzya bhakuwi bha Ngʉlʉbhɨ abhanjɨ abhɨ mandɨ, zya zibhalongoziizye abhantu afishe hu habhaazyo aha Yoohani ʉMwozi. Afume hu habhaazyo ɨho, ɨNongwa ɨNyinza ɨzyɨ wumwɨnɨ ʉwa Ngʉlʉbhɨ zilʉmbɨɨlɨlwa, nantele abhantu abhinji bhalɨnga tee atʉʉshe hwi‑ikhone. 17Leelo hupʉpʉʉsu tee ɨmwanya nɨ nsi ahwepe, ashile ahwefwe nkamba hasimbo heeka ahɨ ndajizyo zya Moose.

18Ʉnʼnume wowonti wa‑ahunʼneha ʉnʼshɨ waakwe na hweje ʉnʼshɨ ʉwɨnjɨ, abhomba weegu. Wope wa‑ahwega ʉnʼshɨ wa‑alehwilwe nʉ nʼnume waakwe, abhomba ʉweegu.”

Ʉnʼtabhazi nʉ mʼpɨɨna ʉLaazalo

19ɄYeesu ahonjela ayanje ahaga, “Hwahali nʉ nʼtabhazi ʉmo, wa‑ahakwataga amenda aminza agɨ mpɨɨya ɨnyinji. Ɨnsiku zyonti ahalyanga ɨshalye ɨshɨ mpɨɨya ɨnyinji. 20Ɨshi, ʉmʼpɨɨna ʉmo wa bhahagaga Laazalo, ʉyo ahali na malonda ʉmʼbɨlɨ gwonti, ɨnsiku zyonti bhahamʼmɨɨhaga pa lyango gwa nʼtabhazi ʉla.#16:20 ɨnsiku zyonti bhahamʼmɨɨhaga pa lyango gwa nʼtabhazi ʉla Bhahabhombaga ɨshi, pɨpo gahali miiho gaabho aga hubhaavwe abhantonko na bha saga bhajenda. Nantele, ɨmanyizyo zyabho zyahakhajilizyaga hubhalolele ɨnkʉmbʉ abhantu nanshi ɨbho na‑aje, bhapewaaje hohonti. Hubhaavwe hohonti, nsayo hwa Ngʉlʉbhɨ. Bhaazya ɨMbombo ɨzya Bhasontwa 3:1-6. 21Ʉmwene ahanyonywaga huje, bhamʼpeelaje vya vyahalagalaga afume pa meeza pa‑ahalyanga ʉnʼtabhazi ʉla. Ashile ɨgo, ɨmbwa zyahɨnzaga na humʼmyante amalonda gaakwe.

22Pamandɨ ʉmʼpɨɨna ʉLaazalo ahafwa. Abhantumi bha Ngʉlʉbhɨ bhahamʼmwega, bhahamʼmɨɨha mu pɨɨpɨ nʉ Abulahaamu hu mwanya. Ʉnʼtabhazi ʉla wope ahafwa, bhahanʼsyɨla. 23Ɨpo ʉnʼtabhazi ʉla lwa‑ali ayɨmbe tee huzimu, ahanʼnola ʉAbulahaamu sha hutali ali peeka nʉ Laazalo. 24Ahanʼkwizya hwi‑izwi igoosi ahaga, ‘Wee daada Abulahaamu, ɨhulaabha ʉndolele ɨnkʉmbʉ! Ɨyɨmba tee mu mwoto ʉgu. Ɨhulaabha ʉnʼsonteelezye ʉLaazalo, adumbishe ahayoobhe mu mɨnzɨ, ayɨnze, antolisizye mu lumɨlɨ lwanɨ huje, lupole.’

25Leelo ʉAbulahaamu ahamʼmwamula ahaga, ‘Mwana waanɨ ʉyizuhaje huje, ahabhaazyo haala lwa wahali mwʉmi, wahali nɨ vintu vyonti ɨvinza, leelo ʉLaazalo ahali mu mayɨmba. Ɨshi, ʉmwene ajinjiziwa ɨpa, nawe ʉyɨmba. 26Peeka nɨ‑ɨgo, paahati yeetu naamwɨ pali ni‑iliina igoosi tee. Iliina ɨlyo libhɨhwɨlwe huje, abhʉ‑ʉhwu bhagandi ahwɨnze ʉhwo huliimwɨ, bhapotwaje alobhoshe. Nantele bhope abhʉ‑ʉhwo, bhapotwaje ahwɨnze ʉhwu huliitɨ.’

27Ʉnʼtabhazi ʉla ahamʼmʉʉzya ʉAbulahaamu nantele ahaga, ‘Ɨshi daada, ɨhulaabha ʉnʼsonteelezye ʉLaazalo abhale hu khaaya ya yise waanɨ. 28Ʉhwo ɨndi na bhanakwetu bhasaanu. Abhale hubhasunde aje, bhazileshe ɨmbiibhi zyabho huje, bhagandi ahwɨnze hu mayɨmba ʉhwu.’ 29Ɨpo ʉAbulahaamu ahamʼmwamula ahaga, ‘Abhaholo bhaaho bhali nɨ Nsimbo ɨMfinjile zya zyahasimbwilwe nʉ Moose na bhakuwi bha Ngʉlʉbhɨ abhanjɨ abhɨ mandɨ. Bhʉmvwaje ɨzyo!’

30Leelo ʉnʼtabhazi ʉla ahaga, ‘Ndaadi, daada Abulahaamu! Ʉmuntu nkashele afume hwa bhafwe, abhale hwa bheene, ɨpo bhanza‑alambe ɨmbiibhi zyabho.’ 31ɄAbulahaamu ahamʼmwamula ahaga, ‘Nkashele saga bhahugatiniha ga gahasimbwilwe nʉ Moose na bhakuwi bha Ngʉlʉbhɨ abhanjɨ abhɨ mandɨ, hwope ʉmuntu nkashele wazyʉha afume hwa bhafwe, saga bhanza hwɨtɨshe.’ ”

Currently Selected:

Luuka 16: SBK

Highlight

Copy