Luuka 13

Lambaji ɨmbiibhi huje, mugandi ayaje

1Ahabhaazyo hɨnɨɨho, abhantu bhamo bha bhahanʼtejelezyaga ʉYeesu, bhahamʼmʉʉzya huje, “ɄPilaato ahabhabudile aBhagalilaaya bhamo, lwa bhahabhoolaga ɨnsangu zyabho ɨzya‑alʉngʉlɨzye zya bhahamʼfumiziizye ʉNgʉlʉbhɨ.” 2ɄYeesu ahabhaamula ahaga, “Wɨlɨ, musɨɨbha huje, aBhagalilaaya ɨbho bhahabhombwilwe ɨsho hu nongwa ya‑aje, bhahali bhabhomba mbiibhi ashile aBhagalilaaya abhanjɨ bhonti? 3Ndaadi! Nkashele saga mulamba ɨmbiibhi zyenyu, namwɨ mwahayiyaziwa mwenti shɨnɨɨsho! 4Nantele musɨɨbha aje, bhope bhaala ishʉmi na naana bha bhahagwɨlɨɨlwe nɨ shidunku#13:4 shidunku Pahali pantu ɨpo ʉnʼnɨndɨɨlɨli awe ʉnʼnwi ahakhalaga huje, atandɨɨle na‑asimishizye aje, ʉnanzi wowonti wugandi afumile. Hu Izilaeeli, ɨshidunku shahazengwaga pa mwanya pa lubhaga lwɨ mabooma na mu magʉnda huje abhalʉgʉ awe abhiibha bhagandi atʉʉshe, awe ɨhanu zyope zigandi atʉʉshe. na‑afwe ʉhwo hu Silowamu, bhahali bhabhomba mbiibhi ashile abhantu abhanjɨ bhonti bha bhahakhalaga hwi‑ibooma ɨlyɨ Yelusaleemu? 5Ndaadi! Nkashele saga mulamba ɨmbiibhi zyenyu, namwɨ mwahayiyaziwa mwenti shɨnɨɨsho!”

Ɨshifwani ɨshi‑ikwi lya saga lihwela amantongooni

6Ɨpo ʉYeesu ahabhabhʉʉzya abhantu ɨbho ɨshifwani ɨshamwabho ahaga, “Hwahali nʉ muntu ʉmo wa‑ahatotile ikʉ mu nʼgʉnda gwakwe ʉgwɨ zabiibu. Shila mwaha ahabhalaga ahwenye amakʉ, leelo saga ahalolaga nka hamo. 7Ɨpo ahamʼmʉʉzya ʉmʼmomvi waakwe ʉwɨ nʼgʉnda ahaga, ‘Enya! Hu maaha gataatu ɨhwɨnza atʉngʉle amantongooni mwi‑ikwi ɨli, leelo saga ɨhugaaga! Ɨshi, ʉlidumule ikwi ɨli hu nongwa ya‑aje, linangaanya ʉnʼgʉnda lwene!’

8Leelo, ʉmʼmomvi ʉla ahamʼmwamula ʉmwanɨɨsho nʼgʉnda ahaga, ‘Mwɨnɨ, ʉleshe ʉmwaha ʉgu, ɨnsagulile na hulibhɨɨshɨle ɨbuuli, 9nkashele lyela ʉmwaha gwa guhwɨnza, yahayibha shinza! Leelo nkashele saga lyela, ɨpo ʉhadumulaje.’ ”

ɄYeesu ahumʼponia ʉnʼshɨ pi‑isiku ɨlyɨ Sabaato

10Isiku limo ɨlyɨ Sabaato, ʉYeesu ahabhamanyizyaga abhantu mu nyumba ɨya‑apuutile na‑amanyiilile. 11Mu nyumba ɨyo hwahali nʉ nʼshɨ ʉmo, wa‑ahali ni‑ipepo lya lyahamʼmɨɨshɨle mʼminu hu maaha ishʉmi na naana. Ʉnʼshɨ ʉyo ahagondɨɨne ʉnʼsana gwakwe, nantele gwahapotwaga lwonti agoloshe.

12ɄYeesu lwa wanʼnola, ahanʼkwizya huje, ayɨnze hwa mwene. Ɨpo ahamʼmʉʉzya ahaga, “Maayɨ, ɨʼponiizye ʉbhinu waaho, ɨshi wasatulwa.” 13ɄYeesu ahamʼmɨɨshɨla ɨnyoobhe. Pɨnɨɨpo lwene ahagoloha ʉnʼsana gwakwe, ahanda humʼmwamishe ʉNgʉlʉbhɨ.

14Ɨpo ʉnʼnongozi ʉwɨ nyumba ɨya‑apuutile na‑amanyiilile ahaviitwa tee hu nongwa ya‑aje, ʉYeesu ahamʼponiizye ʉnʼshɨ ʉla pi‑isiku ɨlyɨ Sabaato. Ʉnʼnongozi ʉla ahabhabhʉʉzya abhantu ahaga, “Alɨngaane nɨ ndajizyo zyetu, hu lʉngʉ gweka huli nɨ nsiku nʼtanda zya zyɨtɨshɨlɨɨlwe ɨzya‑abhombe ɨmbombo. Ɨshi, mwɨnzaje ɨnsiku ɨzyo huje, bhabhaponiaje ʉbhinu weenyu, leelo isiku ɨlyɨ Sabaato, ndaadi!”

15ɄMwɨnɨ ʉYeesu ahamʼmwamula ahaga, “Amwɨ muli bhagulugulu! Wɨlɨ, mwaliimwɨ alɨɨho ʉmuntu wa saga ahuyigulila ɨngʼombe yaakwe awe ɨndogobhi mwi‑igoma huje, ɨbhale amwele amɨnzɨ pi‑isiku ɨlyɨ Sabaato? 16Ɨshi, ʉnʼshɨ ʉnʉ ʉwɨ shikholo ɨsha Abulahaamu, ʉSeetano anʼnyɨmvyɨzye hu maaha ishʉmi na naana. Wɨlɨ, saga akhondɨɨye huje, asatulwe pi‑isiku ɨlyɨ Sabaato?”

17ɄYeesu lwa wayanga ɨgo, abhalʉgʉ bhaakwe bhonti bhahalola ɨnsoni. Leelo abhanjɨ bhonti bhahashiiye tee hu nongwa yɨ mbombo ɨnyinza ɨzya‑aswijizye ɨzyo ʉYeesu zya‑ahabhombaga.

Ɨshifwani ɨshɨ mbeyu yi‑ihaladaali

(Mataayo 13:31-32; Maalʉko 4:30-32)

18Ɨpo ʉYeesu ahabhabhʉʉzya ahaga, “Ʉwumwɨnɨ ʉwa Ngʉlʉbhɨ wulɨngaana nɨ yeenu? Ɨndɨngaanisye nɨ yeenu? 19Wulɨngaana nanshi ɨmbeyu ɨyi‑ihaladaali,#13:19 Ihaladaali likwi lya lili nɨ mbeyu ɨndoodo tee nanshi ɨnzembwa. Ikwi ɨlyo nkashele lyamela, libha ligoosi hashe, hwope ɨnyonyi zitenjeela ɨvyansʉ mu nsamba zyakwe. yɨ‑ɨli ndoodo tee, ɨyo ʉmuntu ya‑ahatotile mu nʼgʉnda gwakwe. Nkashele yaamela, libha likwi ligoosi, nɨ nyonyi zyope zitenjeela ɨvyansʉ mu nsamba zyakwe.”

Ɨshifwani ɨshɨ safu

(Mataayo 13:33)

20ɄYeesu ahonjela ayanje nantele ahaga, “Ʉwumwɨnɨ ʉwa Ngʉlʉbhɨ wuli nanshi ɨshi. 21Wulɨngaana nanshi ʉsafu ʉwo nʼshɨ ʉmo aheejile na‑asangaanye nʉ bhusu ʉwinji. Lwa wakhanda, ʉsafu wuula wahadudula ɨshikhando shonti.”

Atʉʉshe mu wumwɨnɨ ʉwa Ngʉlʉbhɨ

(Mataayo 7:13-14, 21-23)

22ɄYeesu lwa‑ahabhalaga hu Yelusaleemu, ahashilile mu mabooma amagoosi na madoodo, sha‑amanyizya abhantu. 23Isiku limo ʉmuntu ʉmo ahamʼmʉzɨɨlɨzya ahaga, “Wee Mwɨnɨ, abhantu ɨbho ʉNgʉlʉbhɨ ahayihubhafyʉla, bhahayibha bhashe lwene?”

ɄYeesu ahamʼmwamula ahaga, 24“Mubagaje atʉʉshe mu wumwɨnɨ ʉwa Ngʉlʉbhɨ ashilile ʉlyango ʉnʼnyeela. Lyoli ɨhubhabhʉʉzya, abhinji bhahayilɨnga atʉʉshe, leelo bhahayipootwa. 25Ahabhaazyo hahwɨnza ɨho ʉmwanɨɨsho nyumba ahayigalila ʉlyango, ɨpo mwahayɨmɨɨlɨla panzɨ, mwahayanda ahwiguzye na hunʼnambe huje, ‘Wee mwɨnɨ, tigulile!’ Leelo ʉmwene ahayihubhaamula huje, ‘Saga ɨmbamɨɨnye, nantele saga ɨmɨɨnye hwa mufumile!’

26Ɨpo mwahayiga, ‘Tɨɨtɨ tahalyanga na‑amwele peeka naawe!#13:26 Tahalyanga na‑amwele peeka naawe hwa huje, bhahamwelaga ɨdivaayi ya bhahasanganyaaga na mɨnzɨ huje, abhantu bhagandi akholwe. Nantele aawe wahatimanyizyaga mu vipanga vyetu!’ 27Leelo ʉmwene ahayiga, ‘Lyoli ɨhubhabhʉʉzya huje, saga ɨmbamɨɨnye, nantele saga ɨmɨɨnye hwa mufumile! Epi amwɨ huliinɨ, mubhabhomba mbiibhi!’

28Ɨpo mwahayihunʼnola ʉAbulahaamu, ʉIsaaka, ʉYaakobo na bhakuwi bhonti bhali mu wumwɨnɨ ʉwa Ngʉlʉbhɨ. Leelo amwɨ mwɨmwɨ mwahayibha mutajiilwe hwʉnzɨ. Ʉhwo hwa hwʉhwo mwahayililaga na‑azyeguzye amiino! 29Nantele abhantu afume ɨmbali zyonti ɨzyɨ nsi bhahayɨnza, bhahayilyanga peeka mu wumwɨnɨ ʉwa Ngʉlʉbhɨ.

30Mutejeelezye! Abhantu bha saga bhatinihwa hu habhaazyo ɨha, bhahayitinihwa hu habhaazyo ha hahwɨnza, nantele bha bhatinihwa hu habhaazyo ɨha, saga bhahayitinihwa hu habhaazyo ha hahwɨnza.”

ɄYeesu asʉngama hu nongwa ya bhantu abha hu Yelusaleemu

(Mataayo 23:37-39)

31Ahabhaazyo hɨnɨɨho, aBhafalisaayo bhamo bhahabhala hwa Yeesu, bhahamʼmʉʉzya huje, “Sogola ɨpa, bhalaga hu mabooma aganjɨ hu nongwa ya‑aje, ʉHeloode ʉAntipa ahwanza hubude.” 32ɄYeesu ahabhaamula ahaga, “Bhalaji muyibhʉʉzye ɨmbɨla#13:32 ɨmbɨla ABhayahuudi abheene bhahagaga ɨmbɨla nshevu nanshi ɨhaawa, nantele bhahagaga ɨgobela ilenga. ɨyo huje, ‘Enya! Sanyʉʉnʉ nɨ ndaabhɨ ɨshɨmbɨzya amapepo na hubhaponie abhabhinu. Isiku ɨlya taatu nahayimalɨɨzya ɨmbombo yaanɨ.’#13:32 Sanyʉʉnʉ nɨ ndaabhɨ ... Isiku ɨlya taatu Ɨnjango ɨnɨ saga hwa huje, ʉYeesu ahayibha amalile ɨmbombo yaakwe hu nsiku zitaatu, leelo hwa huje hu habhaazyo hashe lwene. 33Peeka nɨ‑ɨgo ɨhwanziwa ashʉʉle sanyʉʉnʉ, ɨndaabhɨ na‑alɨnde ɨndaabhɨ, pɨpo saga ɨhwanziwa huje, ʉnʼkuwi abudwe ʉhwɨnjɨ, lyoli hu Yelusaleemu hwene!

34Amwɨ mubha hu Yelusaleemu, amwɨ mubha hu Yelusaleemu! Ahwande halɨ muhubhagoga abhakuwi bha Ngʉlʉbhɨ. Nantele, abhantu ɨbho bhasonteleziiwe huliimwɨ nʉ Ngʉlʉbhɨ, muhubhakhoma na mawe. Halɨnga nahanzaga hubhabhʉngaanye peeka huje, ɨmbalɨndɨɨlɨle nanshi ɨnkuku shɨ‑ɨhwʉbhatila ʉtwana nkuku twakwe pa nsi yɨ mapiho gaakwe, leelo saga mwahɨtɨhaga! 35Tejeelezyi! Ɨshi, ʉNgʉlʉbhɨ ahayihubhaleha amwɨ ni‑ibooma lyenyu! Ɨshi ɨhubhabhʉʉzya, lyoli saga mwahayihundola nantele, afishe hu habhaazyo haala ha mwahayiyanga aje, ‘Asayiiwe wa‑ahwɨnza hwi‑ikhone lya Mwɨnɨ ʉNgʉlʉbhɨ.’ ”#Bhaazya ɨNsalifyo 118:26.

Currently Selected:

Luuka 13: SBK

Highlight

Copy