Yoohani 12

ɄMaliya ahumʼpotozya ʉYeesu ɨnyemba

(Mataayo 26:6-13; Maalʉko 14:3-9; Luuka 7:36-50)

1Lwa zyahasyala ɨnsiku nʼtanda afishe ɨshikulukulu ɨshɨ Paasaka, ʉYeesu ahabhala nantele hu Besaniya, mu shipanga ɨsho ahanʼzyʉsyɨzye ʉLaazalo. 2Ɨpo abhantu bhamo abha paala bhahanʼteleshela ʉYeesu ɨshalye ɨsha nalyabheela, wope ʉMaalita ahabhatengaanya. ɄLaazalo ahali ʉmo mwa bhajenu ɨbho bhahali bhalya pa meeza peeka nʉ Yeesu. 3Ɨpo ʉMaliya aheega ahasupa ahɨ nyemba ɨzyɨ mpɨɨya ɨngoosi zya zinunshila shinza, ahamʼpotozya ʉYeesu mu manama na‑asyʉmʉle ni‑isisi lyakwe.#12:3 Enya Luuka 7:38, ɨshifwani ɨsha nʼshɨ nanshi ɨsho ahumʼpotozya ɨnyemba ʉYeesu. Ɨnyumba yonti yahamema ʉnunsi ʉwɨ nyemba. 4Leelo ʉmo mu bhasundwe bhaakwe, ʉYuuda Sikalyoti, ʉyo ahanʼsambushiiye ʉYeesu pamandɨ, ahayanga ahaga, 5“Yeenu ɨnyemba ɨzyo saga zyakaziwaaga hu dinaali ɨmya zitaatu#12:5 Ɨdinaali ɨmya zitaatu hwa huje ɨmpɨɨya zya zyahalɨngaanaga nʉ mʼposheelo ʉgwa humʼposheezye ʉmuntu hu mwaha gweka. na hubhapeele abhapɨɨna ɨmpɨɨya ɨzyo?” 6ɄYuuda saga ahayanjile ɨsho hu nongwa ɨya hubhasaajile abhapɨɨna, leelo ahayanjile ɨsho hu nongwa ya huje ahali mwibha. Ʉmwene ya yʉʉyo ahali abhuta ɨmbuguulu ɨyɨ mpɨɨya, hu habhaazyo ahinji ahali ahwibha afume mu mbuguulu ɨla. 7Ɨpo ʉYeesu ahamʼmʉʉzya ʉYuuda ahaga, “Mugandi hunʼtaamye ʉnʼshɨ ʉnʉ, munʼneshe, abhɨɨshɨle ɨnyemba hu nongwa yi‑isiku ɨlyo bhahayihunsyɨla. 8Abhapɨɨna bhali peeka naamwɨ ɨnsiku zyonti, leelo anɨ saga ɨnza‑abhe peeka naamwɨ ɨnsiku zyonti.”

Abhalongozi bha Bhayahuudi bhajeehana hunʼgoje ʉLaazalo

9Ɨshi abhantu abhinji lwa bhʉmvwa huje ʉYeesu ali mu shipanga ɨshɨ Besaniya, bhahabhala hunʼnole ʉYeesu peeka nʉ Laazalo ʉyo ʉYeesu ahanʼzyʉsyɨzye. 10Ɨpo abhalongozi bha bhasayi bha Ngʉlʉbhɨ bhahanda ahwanze idala ɨlya hunʼgoje ʉLaazalo, nanshi sha bhahwanza hunʼgoje ʉYeesu. 11Afumilane nɨ nongwa ɨzya‑azyʉshe hwa Laazalo, aBhayahuudi abhinji bhahabhaleha abhalongozi bhaabho, bhahamʼmwɨtɨha ʉYeesu.

Bhahumʼmwambɨɨlɨla ʉYeesu hu luseshelo hwi‑ibooma ɨlyɨ Yelusaleemu

(Mataayo 21:1-11; Maalʉko 11:1-11; Luuka 19:28-40)

12Isiku ɨlyɨ ndaabhɨ yaakwe, ɨmpʉga ɨngoosi ɨya bhantu ɨyo yahali ɨhwɨnza ahwanje ɨshikulukulu ɨshɨ Paasaka, yahʉmvwɨzye huje ʉYeesu ahali mwi‑idala ahwɨnze hu Yelusaleemu. 13Ɨpo bhaheega ɨnsamba afume mu makwi agɨ manshindo, bhahafuma abhale humʼmwambɨɨlɨle ʉYeesu. Bhahanda abwaje ibwago bhahaga,

“Amwamihwaje#12:13 Amwamihwaje Mu njango ɨyɨ Shiyunaani ɨsimbwilwe huje, Hosaana hwa huje, tifyʉle. ʉNgʉlʉbhɨ!

Asayiiwe wa‑ahwɨnza hwi‑ikhone lya Mwɨnɨ ʉNgʉlʉbhɨ.

ɄNgʉlʉbhɨ asayaje ʉMwɨnɨ ʉwa hu Izilaeeli.”#Bhaazya ɨNsalifyo 118:25-26.

14Ɨpo ʉYeesu ahayaaga ɨnyaana yɨ ndogobhi, ahazʉbha pa mwanya#12:14 Enya Luuka 19:35, ɨshifwani ɨsha Yeesu pa mwanya pa nyaana ndogobhi. nanshi ɨsho ɨsimbwilwe mu Nsimbo ɨMfinjile huje,

15“Amwɨ mubhantu bha hwi‑ibooma ɨlyɨ Sayuuni#12:15 Sayuuni Ɨli litaawa lyɨnjɨ ɨlyɨ Yelusaleemu. mugandi hwogope,

ʉMwɨnɨ weenyu ahwɨnza, ali pa mwanya pa nyaana ndogobhi!”#12:15 ndogobhi ABhayahuudi bhahabhɨɨshɨle ɨndogobhi huje vibhe vyʉma vya‑anyeemule abhantu awe amazigo. Abhamwɨnɨ bhahapandaga mu ndogobhi lumo lwene. Abheene bhahapandaga mu falaasi ɨzyɨ lʉgʉ. Ɨpo ʉYeesu lwa‑ahapandile mu ndogobhi hu habhaazyo ɨho atʉʉha hu Yelusaleemu, ahali alolesya huje ʉmwene ahwɨnza hu tengaanu nanshi ʉmwɨnɨ ʉmwoloolo. Bhaazya Zakaliya 9:9.

16Hu habhaazyo ɨho, abhasundwe bha Yeesu saga bhahazyagɨɨnye ɨzyo. Leelo hu habhaazyo ɨho ʉYeesu azyʉha, ɨpo bhahiizuha huje ɨgo gahali gasimbwilwe nzɨɨla hu nongwa yaakwe na huje abhantu bhahali bhamʼmombɨɨye ɨsho.

17Abhantu ɨbho bhahali peeka nʉ Yeesu hu habhaazyo ɨho ahanʼkwiziizye ʉLaazalo afume mu nkʉngwa na hunʼzyʉsye, bhahali bhahubhabhʉʉzya abhantu ɨgo bhahagalolile na hwʉmvwe. 18Ɨshi abhantu abhinji bhahʉmvwɨzye ɨnongwa ɨzyɨ mayele ɨgo ahabhombile, sha shɨɨsho bhahafumile hu Yelusaleemu abhale humʼmwambɨɨlɨle ʉYeesu. 19Leelo aBhafalisaayo bhahabhʉzɨlɨzanya bhahaga, “Mulola wɨlɨ? Saga tibhajiiye abhombe lyolyonti! Enya, abhantu bhonti bhahunʼnondolezya ʉmwene.”

ɄYeesu ayanga hu nongwa ya‑afwe hwakwe

20Bhahalɨɨho abhantu bhamo ɨbho saga Bhayahuudi mwa bhantu ɨbho bhahabhalile hu Yelusaleemu humʼpuute ʉNgʉlʉbhɨ hu habhaazyo ahɨ shikulukulu ɨshɨ Paasaka. 21Abhantu ɨbho bhahabhala hwa Filipo ʉyo ahafumaga mu shipanga ɨshɨ Betisayida hu mukowa ʉgwɨ Galilaaya, bhahanʼnaabha bhahaga, “Wee nʼgoosi, tilaabha tiyanje nʉ Yeesu.” 22ɄFilipo ahabhala humʼmʉʉzye ʉAnduleeya ɨgo abhantu bhaala bhahalaabhile. Ɨpo ʉFilipo nʉ Anduleeya bhahabhala humʼmʉʉzye ʉYeesu. 23ɄYeesu ahabhaamula ahaga, “Ahabhaazyo aha‑amwamihwe anɨ nɨMwana wa Muntu hafishile. 24Lyoli ɨhubhabhʉʉzya, nkashele ɨmbeyu yɨ ngano saga ɨsyɨlwe pa longo na‑abhole, saga ɨbhajiiye amele, leelo nkashele ɨsyɨlwe, ɨmela na hwezye amantongooni gaminji. 25Ʉmuntu wowonti wa‑ahwanza ahwifyʉle ʉwʉʉmi waakwe, ahayihuwuteezya. Leelo ʉmuntu wowonti ʉyo ahayihuwuteezya ʉwʉʉmi waakwe mu nsi ʉmu hu nongwa yaanɨ, ahayihuwaaga ʉwʉʉmi ʉwa wiila. 26Ʉmuntu wowonti ʉyo ahumbombela anɨ, ahwanziwa ambɨnjɨlɨzyaje. Nantele poponti ɨpo ɨndi, pa pɨɨpo ʉmʼmomvi waanɨ ahayibha. ɄDaada waanɨ ahayɨnza hunʼtinishe ʉmuntu wowonti ʉyo ahumbombela anɨ.

27Ɨshi ɨnandile azugumile tee mu mwoyo gwanɨ. Saga ɨmɨɨnye ɨzya‑ayanje. Wɨlɨ, ɨnjanje huje, ‘Wee Daada, ɨhulaabha ʉmfyʉle hu habhaazyo ahɨ mayɨmba’? Ndaali, saga ɨmbajiiye alaabhe ɨsho, pɨpo ɨnɨnzɨle mu nsi ʉmu ayɨmbe na‑afwe. 28Wee Daada Ngʉlʉbhɨ, ɨhulaabha ʉbhalolesye abhantu ʉmwamu waaho.”

Ɨpo ʉNgʉlʉbhɨ ahayanga afume hu mwanya ahaga, “Wee Mwana waanɨ, ɨmbalolesiizye abhantu ʉmwamu waanɨ, nantele nahayijendeelela hubhalanje.” 29Ɨshi ɨmpʉga ya bhantu ɨyo yahali paala lwa yʉmvwa izwi afume hu mwanya, bhamo bhahaga, “Ɨlyo lizwi lyɨ ntalala,” abhanjɨ bhahaga, “Ʉnʼtumi wa Ngʉlʉbhɨ ayanga nʉ Yeesu.” 30Leelo ʉYeesu ahabhabhʉʉzya ahaga, “Izwi ɨlyo mwʉmvwɨzye afume hu mwanya saga lya hunaavwe anɨ, leelo lyahali lya hubhaavwe amwɨ. 31Ɨshi ahabhaazyo hafishile ɨho ʉNgʉlʉbhɨ ahubhalonga abhantu bhonti. Ɨshi hafishile ahabhaazyo ha Ngʉlʉbhɨ aha hunʼshɨmbɨzye ʉSeetano wa‑ali nʼnongozi wɨ nsi ɨnɨ. 32Anɨ hu habhaazyo lwa bhanzʉvyɨzye pa mwanya, nahayihubhakwesanga bhonti huje bhɨnze hwaliinɨ.” 33ɄYeesu ahayanjile ɨsho alolesye ɨsho ahayifwa.

34Ɨpo ɨmpʉga ɨya bhantu yahamʼmwamula ʉYeesu yahaga, “Tibhaziizye mu Nsimbo ɨMfinjile huje ʉMʼfyʉli ahayibha mwʉmi wiila.#Bhaazya ɨNsalifyo 110:4. Ɨshi yeenu ʉyiga abhantu bhahayihunʼzʉvya pa mwanya ʉMwana wa Muntu? Wɨlɨ, ʉMwana wa Muntu yʉ naanu?” 35ɄYeesu ahabhabhʉʉzya ahaga, “Ʉlukhozyo#12:35 Ʉlukhozyo Ɨpa ʉYeesu ahwiyanga huje ya yʉʉyo lukhozyo lwɨ nsi. luli peeka naamwɨ hu habhaazyo hashe lwene. Mujendelelaje ajende mu lukhozyo hu habhaazyo ɨho lulɨɨho, huje ɨhiisi ɨsahabhamene, pɨpo ʉmuntu wa‑ajenda mu hiisi saga amanya ʉhwo abhala. 36Ɨshi mʼmwɨtɨhaji ʉyo lukhozyo hu habhaazyo ɨho asɨɨle ali peeka naamwɨ, huje mubhe bhantu ɨbho bhakhala mu lukhozyo.” Hu habhaazyo ɨho ʉYeesu ayanga amazwi ɨgo, ahayileha ɨmpʉga ɨla, ahabhala na hwifise.

ABhayahuudi abhinji bhakhaana humʼmwɨtɨshe ʉYeesu

37Peeka na huje ʉYeesu ahabhombile amayele aminji pitagaalila lyabho, hwope ɨsho abhantu abhinji saga bhahamʼmwɨtɨɨshe. 38Ɨli lyahafumiiye ɨsho huje libhombeshe izwi ɨlyo ahayanjile ʉnʼkuwi ʉYesaaya ahajile,

“Wee Mwɨnɨ, weenu ʉyo ayɨtɨɨshe ɨnongwa zyetu?

Nantele, ʉMwɨnɨ anʼnolesiizye weenu ikhone lyakwe?”#Bhaazya Yesaaya 53:1.

39Saga bhahalɨnjɨle ahwɨtɨshe hu nongwa ya huje ʉNgʉlʉbhɨ ahayanjile ashilile hwa nʼkuwi ʉYesaaya ahajile,

40“Atonkʉʉye amaaso gaabho

na hugabhɨɨshe makhome amooyo,

huje amaaso gaabho gagandi alole,

gope amooyo gaabho gagandi ahwaganye,

huje bhasahaweele huliinɨ

huje ɨmbafyʉle.”#Bhaazya Yesaaya 6:10.

41ɄYesaaya ahali ahunʼnyanga yʉ Yeesu ɨpa, pɨpo ahawulolile ʉmwamu waakwe.

42Abhalongozi abhinji bha Bhayahuudi bhahamʼmwɨtɨɨshe ʉYeesu. Leelo saga bhahayangaga pa pazelu huje bhamʼmwɨtɨɨshe, pɨpo bhahabhogopaga aBhafalisaayo huje bhasahabhadaje mu nyumba ɨzya‑apuutile na‑amanyiilile. 43Abhalongozi ɨbho bhahasʉngwaga huje abhantu bhabhabaadaje tee ashile huje ʉNgʉlʉbhɨ abhabaadaje.

Abhantu bhahayilongwa hu mazwi ɨgo ayanjile ʉYeesu

44Ɨpo ʉYeesu ahayanga hwi‑izwi igoosi ahaga, “Ʉmuntu ʉyo ahunɨɨtɨha anɨ, saga ahunɨɨtɨha nɨɨnɨ nɨmwene, leelo ahumʼmwɨtɨha nʉ‑ʉyo wa‑ahansonteleziizye. 45Ʉmuntu wowonti ʉyo andolile anɨ, ahunʼnola nʉ‑ʉyo wa‑ahansonteleziizye. 46Anɨ ɨnɨnzɨle huje ɨmbe lukhozyo lwa mu nsi, huje shila muntu wa‑ahunɨɨtɨha anɨ agandi ajendeelele akhale mu hiisi. 47Ʉmuntu ʉyo ahwʉmvwa amazwi gaanɨ, leelo saga ahugalondolezya, anɨ saga ɨhunʼnonga, pɨpo saga ɨnɨnzɨle mu nsi hubhalonje abhantu, leelo hubhafyʉle. 48Shɨnɨɨsho, ʉmuntu wowonti ʉyo ahuhaana anɨ peeka na mazwi gaanɨ ahayilongwa, amazwi ɨgo ɨyanga ga gɨɨgo gahayihunʼnonga pi‑isiku ɨlya hu malishilo. 49Anɨ saga nahayanjile hwi‑ikhone lyanɨ nɨɨnɨ, lyoli yʉ Daada ʉyo wa‑ahansonteleziizye, ya yʉʉyo wa‑ahandajiziizye ɨzya‑ayanje, nɨ‑ɨsho ɨhondɨɨye ayanje. 50Nantele, ɨmɨɨnye huje ɨndajizyo zyakwe zihubhapeela abhantu ʉwʉʉmi ʉwa wiila. Ɨpo nanɨ ɨyanga ɨgo ʉDaada waanɨ ahandajiziizye hugayanje.”

Currently Selected:

Yoohani 12: SBK

Highlight

Copy