ƗMbombo ɨzya Bhasontwa 6

Asalulwe hwa bhaavwi pʉnga

1Mu nsiku ɨzyo abhooziwa bhahajendelelaga ahwonjeelele. Mwɨ‑ɨbho hwahali na bhaala bha bhahayangaga ɨnjango ɨyɨ Shiyunaani#6:1 Shiyunaani ABhayahuudi abhinji hu Izilaeeli bhahayangaga ɨnjango ɨyɨ Shiebulaniya, leelo bhamo bhahakhaanaga ayanje ɨnjango ɨyo, bhahanda ayanje ɨnjango ɨyɨ Shiyunaani. na bhaala bha bhahayangaga ɨShiebulaniya. Hwahafumila ɨmbuno mwa Bhayahuudi bha bhahayangaga ɨShiyunaani na bhaala bha bhahayangaga ɨShiebulaniya. Bhaala bha bhahayangaga ɨShiyunaani bhahahwibhunaga huje, bhaala bha bhahayangaga ɨShiebulaniya saga bhahabhavwaga abhafwɨle bhaabho, lwa bhabhagabhila ɨvyalye vyɨ nsiku zyonti. 2Ɨpo abhasontwa bhaala ishʉmi na bhabhɨɨlɨ bhahabhabhʉngaanya abhooziwa bhonti, bhahabhabhʉʉzya bhahaga, “Saga ɨkhondɨɨye huje, atɨ tileshe amanyizye izwi lya Ngʉlʉbhɨ, nka tigabhilaje abhantu ɨvyalye. 3Ɨshi amwɨ mubhaholo bheetu, afumilane naamwɨ saluli abhalume pʉnga (7) bha bhasimishiziiwe shinza, ɨbho ʉMʼpepo ʉMʼfinjile ahubhalongozya, nantele bhatengamazu. Ɨbho bha tibhabhɨɨshe mu mbombo ɨnɨ ɨya‑agabhe ɨvyalye 4huje, atɨ tihwifumyaje hunʼnaabhe ʉNgʉlʉbhɨ, alʉmbɨɨlɨle na‑amanyizye abhantu izwi lyakwe.”

5Lwa bhʉmvwa izwi ɨlyo, bhonti bhahalisʉngwa. Nka bhahanʼsalula ʉSiteefano, ʉmuntu wa‑ahali nʉ lwɨtɨho haani hwa Ngʉlʉbhɨ, wope ʉMʼpepo ʉMʼfinjile ahanʼnongolaga. Nantele, bhahanʼsalula ʉFilipo, ʉPulokoolo, ʉNikanooli, ʉTiimoni, ʉPalimeena nʉ Nikolaawo ʉwa hu Antiyokiya wa saga ahali Nʼnyahuudi leelo wa‑ahasamiiye mu mpuuto ɨzyɨ Shiyahuudi. 6Abhalume pʉnga (7) bhaala bhahabhabhɨɨha pitagaalila pa bhasontwa. Abhasontwa bhahabhapuutila hwa Ngʉlʉbhɨ na hubhabhɨɨshɨle ɨnyoobhe hubhasaye, alolesye aje, bhasaluliilwe.

7ƗNongwa ɨNyinza ɨzya Yeesu zyahajendeelela anyampaane mwa bhantu. Abhooziwa pi‑ibooma ɨlyɨ Yelusaleemu bhahonjelelaga haani abhe bhinji, nantele abhasayi bha Ngʉlʉbhɨ abhinji bhope bhahamʼmwɨtɨha ʉYeesu.

Akhatwe hwa Siteefano

8ɄNgʉlʉbhɨ ahamʼpiiye ɨmpyana ɨnyinji ʉSiteefano, nantele ahamʼpiiye ikhone ɨlinji, wope ahabhombaga amayele nɨ vimanyishizyo ɨvigoosi mwa bhantu. 9Leelo, aBhayahuudi bhamo bhahadalihanaga nawo. Ɨbho bhahafumile mu nyumba ɨya‑apuutile na‑amanyiilile,#6:9 nyumba ɨya‑apuutile na‑amanyiilile Mu njango ɨyɨ Shiyunaani bhayiga, isinagoogi. Bhaazya izwi Nyumba ɨya‑apuutile na‑amanyiilile hu Ngalulanyo ɨyɨ Mazwi aMajenu hu malishilo wɨ shitaabu ɨshi. ya bhahagaga ya Bhantu aBhasatulwe. Abhamo mwɨ‑ɨbho bhahafumile mwi‑ibooma ɨlyɨ Kileene nɨ lyɨ Alekizandiliya. Bhamo bhahafumile mu mukowa ʉgwɨ Kilikiya nʉ gwɨ Aasiya. Ɨbho bhonti bhahadalihanaga nʉ Siteefano, 10leelo ahabhamenaga, pɨpo ahayangaga amazwi agɨ njeele hwi‑ikhone lya Mʼpepo ʉMʼfinjile.

11Ɨpo bhahabhasoha abhantu bhamo aje, bhayanje ilenga huje, “ɄSiteefano anʼnijile ʉMoose nʉ Ngʉlʉbhɨ.” 12Ayanje ɨsho, amazwi ɨgo gahabhaviisya haani abhagoosi, abhamanyizyi abhɨ ndajizyo zya Moose, peeka na bhantu abhanjɨ. Ɨpo bhahanʼkhata ʉSiteefano, bhahanʼtwala mwi‑ikoloti. 13Bhahabhaleeta mwi‑ikoloti abhasimishizi abhi‑ilenga bha bhahagaga, “Ʉmuntu ʉnʉ saga aleha huyilije ɨnyumba ɨmfinjile ɨya Ngʉlʉbhɨ nɨ ndajizyo zya Moose! 14Tahamʼmwʉmvwɨzye ayanga huje, ʉYeesu ʉwa hu Nazaleeti anza‑abhugulanye ɨnyumba ɨmfinjile ɨya Ngʉlʉbhɨ, nantele anza‑agalulanye amiiho gaala ʉMoose ga‑ahatileshɨɨye.”

15Abhantu bhonti bha bhahakhɨɨye mwi‑ikoloti liila, bhahanʼzyamila ʉSiteefano, bhahalola hu maaso gaakwe hubhalilana nʉ nʼtumi.

Currently Selected:

ƗMbombo ɨzya Bhasontwa 6: SBK

Highlight

Copy