ƗMbombo ɨzya Bhasontwa 12

ɄPeeteli ahwigulilwa mu hoobhe

1Ɨshi mu nsiku ɨzyo ʉmwɨnɨ ʉHeloode ʉAgilipa ahabhakhata abhantu bhamo abhɨ shibhanza huje, abhabhombele shibhiibhi. 2Ahalajizya huje, bhanʼgoje ʉYaakobo#12:2 ɄYaakobo ahali mwana wa Zebedaayo, nantele ahali palishimo na bhasundwe bha Yeesu ishʉmi na bhabhɨɨlɨ. ʉnʼkʉlʉ wa Yoohani ni‑imaajɨ. 3Lwa waalola huje, ɨzyo zibhakhondezɨɨzye aBhayahuudi, ahalajizya huje bhanʼkhate nʉ Peeteli. Hahali habhaazyo hɨ shikulukulu ɨshɨ ntogito zya saga nsafu.#12:3 shikulukulu ɨshɨ ntogito zya saga nsafu Bhaazya izwi Paasaka hu Ngalulanyo ɨyɨ Mazwi aMajenu hu malishilo wɨ shitaabu ɨshi. 4Ɨpo bhahanʼkhata ʉPeeteli, ʉmwɨnɨ ʉHeloode ahanʼkʉnga mu hoobhe. Lwʉnʉʉlwo ahamʼmɨɨha hu lɨndɨɨlɨli ʉwa bhalwi abhɨ vipʉga vinɨ vinɨ huje, bhaposhelanaje hunʼnɨndɨɨlɨle. Ahasɨɨbhaga huje, ɨshikulukulu lwa shaashila, nka‑anʼnonje ʉPeeteli pitagaalila pa bhantu. 5Mu nsiku ɨzyo ʉPeeteli zya‑ahapinyiilwe mu hoobhe, abhantu abha hu shibhanza bhahabagaga tee humʼpuutile hwa Ngʉlʉbhɨ.

6Nʉsiku sha lisɨɨle isiku liila ʉHeloode ʉAgilipa lya‑ahalibhɨɨshɨle hunʼnonje ʉPeeteli, ʉPeeteli ahagonile mu hoobhe. Ahali paahati pa bhalwi bhabhɨɨlɨ, bhahamʼpinyile ɨnyoobhe na manyololo gabhɨɨlɨ. Pa lyango ʉgwɨ hoobhe bhahali abhalwi abhamwabho bha bhahalɨndɨlɨlaga. 7Lubhilo ahafumila ʉnʼtumi wa Mwɨnɨ ʉNgʉlʉbhɨ, ahɨmɨɨlɨla ɨpo ʉPeeteli ahali. Ʉlukhozyo lwahakhozya muuhati mu mpanda muula. Ʉnʼtumi ʉyo ahanʼnyinzanya ʉPeeteli hu lubhazu ahunʼdaamuzye, ahaga, “Daamuha lubhilo!” Amanyololo ga bhahamʼpinyile ʉPeeteli mu nyoobhe gahadumuuhana, gahalagala pa nsi! 8Ʉnʼtumi ʉyo ahamʼmʉʉzya ahaga, “Pinya ilamba lyaho, ʉkwate nɨ ndaatʉ.” ɄPeeteli ahabhomba ɨsho. Ɨpo ʉnʼtumi ahamʼmʉʉzya ahaga, “Kwata igolole lyaho, ʉmbɨnjɨɨlɨle!” 9ɄPeeteli ahamʼmɨnjɨɨlɨla ʉnʼtumi, bhahafuma hwʉnzɨ yɨ mpanda yɨ hoobhe. Saga ahamɨɨnye huje, ɨzyo ʉnʼtumi zya‑ahabhombile, zyahali zyɨ lyoli. Ahasɨɨbhaga huje, zyahali ndoleshelo. 10Bhahashila pa lɨndɨɨlɨli ʉwa hwande nʉ wa bhɨɨlɨ, bhahafiha hu lyango ʉgwɨ majela ʉgwa‑afumile mu hoobhe, atʉʉshe mwi‑ibooma. Ʉlyango ʉgwo gwahiiguha gwene, bhahafuma hwʉnzɨ pa hoobhe. Lwa bhaashila mwi‑idala limo, lubhilo ʉnʼtumi ahanʼneha ʉPeeteli. 11Ɨpo ʉPeeteli ahamanya zya zifumiiye, ahaga, “Ɨshi naamanya lyoli huje, ʉMwɨnɨ ʉNgʉlʉbhɨ andetɨɨye ʉnʼtumi waakwe huje, amfyʉle mu nyoobhe zya Heloode ʉAgilipa na mu mbiibhi zyonti aBhayahuudi zya bhahasʉbhɨɨye aje, abhala humbombe.”

12Lwa waamanya ɨsho, ahabhala hu nyumba ya Maliya, ʉnyina wa Yoohani wa bhahagaga Maalʉko. Mu nyumba ɨyo bhahabhʉngɨɨne abhantu abhinji bha bhahanʼnaabhaga ʉNgʉlʉbhɨ. 13ɄPeeteli ahiiguzya pa lyango ʉgwɨ lubhaga. Ʉnʼnɨndu ʉmo ʉnʼkalwe, ʉyo itaawa lyakwe ahali yʉ Looda, ahabhala pa lyango atejeelezye huje yʉ naanu. 14Lwa wʉmvwa huje lizwi lya Peeteli, ahaseshela tee, saga ahamʼmwigulila ʉlwiji, leelo ʉmwene ahashɨmbɨɨlɨla mu nyumba. Ahabhabhʉʉzya ahaga, “ɄPeeteli ayɨmɨlɨɨye pa lyango!”

15Bhahamʼmʉʉzya bhahaga, “Ʉli laalusi!” Leelo, ʉmwene ahonjeezya ayanje huje, “Ɨnʉmvwɨzye izwi lya Peeteli!” Ɨpo bhahamʼmʉʉzya bhahaga, “Lumo ʉyo yʉ nʼtumi waakwe.” 16Ʉmwene ʉPeeteli ahajendeelela ahwiguzye pa lyango. Lwa bhiigula ʉlwiji, bhahanʼnola, bhahagunduha. 17ɄPeeteli ahavwenzya ʉnʼkhono hu mwanya huje, bhapʉʉme myɨ, ahabhabhʉʉzya ʉMwɨnɨ ʉNgʉlʉbhɨ sha‑amʼmwefwizye mu hoobhe. Ahabhabhʉʉzya ahaga, “Ɨga ga gabhombɨɨshe, mumʼmʉʉzye ʉYaakobo na bhooziwa abhamwetu.” Ɨpo ʉPeeteli ahasogola paala, ahabhala apanjɨ.

18Lwa hwasha, abhalwi bhaala bhahabha nʉ wooga tee, pɨpo saga bhahamɨɨnye zya zyahamʼmwajile ʉPeeteli. 19ɄHeloode ʉAgilipa ahalajizya abhalwi bhaakwe huje, bhamʼmwanze haani ʉPeeteli. Leelo lwa bhapootwa humʼmwaje, ahabhabhʉzɨɨlɨzya bhaala bha bhahanʼnɨndɨlɨlaga. Abheene bhahapootwa ɨlya humʼmwamule. Ɨpo ʉmwɨnɨ ahalajizya huje, bhagogwe. Pamandɨ ʉHeloode ʉAgilipa ahasogola hu mukowa ʉgwɨ Yudeeya, ahakhala hu habhaazyo hwi‑ibooma ɨlyɨ Kayisaliiya.

Ʉmwɨnɨ ʉHeloode ʉAgilipa afwa

20Ɨshi ʉHeloode ʉAgilipa ahabhavitiliilwe haani abhantu abha hwi‑ibooma ɨlyɨ Tiilo nɨ lyɨ Siidoni. Ɨpo abhantu abhɨ mabooma ɨgo bhahɨɨma peeka, bhahasalula abhantu bhamo huje, bhalolane nawo. Bhahanʼkʉndɨɨlɨzya ʉmuntu ʉmo wa bhahagaga Bulaasito huje, ayɨɨme peeka nabho. Ʉmuntu ʉyo ahasʉngaga ɨnyumba ya mwɨnɨ. Bhahabhala hwa mwɨnɨ hunʼnaabhe huje, hubhe nʉ tengaanu hu nongwa ya‑aje, amabooma ɨgo gahasʉbhɨlaga ɨvyalye afume mu nsi yaakwe.

21Lwa lyafiha isiku liila ʉmwɨnɨ ʉHeloode ʉAgilipa lya‑ahasaluuye, ahakwata amenda gaakwe agɨ shimwɨnɨ, ahakhala pi‑itengo lyakwe ɨlyɨ shimwɨnɨ, ahanda ayanje pitagaalila lyɨ lubhʉngaano lwa bhantu. 22Abhantu ɨbho bhahabwaga ibwago haani bhahaga, “Ɨli saga lizwi lya muntu! Ɨlyo lizwi lya weeka mwa bhangʉlʉbhɨ!” 23Lwa bhanʼsʉmba ɨsho ʉHeloode ʉAgilipa, ʉmwene saga ahamʼpiiye ʉNgʉlʉbhɨ ʉmwamu. Ʉnʼtumi wa Mwɨnɨ ʉNgʉlʉbhɨ ahanʼkhoma nɨ mpʉngo, ahalɨɨwa ni‑iyoha ɨlya mu vyanda, ahafwa.

24Leelo ɨNongwa ɨNyinza ɨzya Yeesu zyahajendeelela anyampaane mwa bhantu, bhope abhooziwa bhahonjelelaga tee.

25ɄBalinaaba nʉ Sauli lwa bhaamala ɨmbombo yaabho,#Bhaazya ɨMbombo ɨzya Bhasontwa 11:30. bhahasogola hwi‑ibooma ɨlyɨ Yelusaleemu peeka nʉ Yoohani wa bhahagaga Maalʉko, bhahabhala hwi‑ibooma ɨlyɨ Antiyokiya.

Currently Selected:

ƗMbombo ɨzya Bhasontwa 12: SBK

Highlight

Copy