Lukas 19

Jesus ku Zakeu

1Jesus yentra na Jerikó, i na pasa na prasa. 2I staba la un omi riku ku ta comadu Zakeu, ŝef di kobraduris di mpustu. 3I na buskaba oja kin ki Jesus, ma, suma i kurtu, i ka pudi ojal, pabia jinti ciu. 4I kuri dianti, i subi na un pe di figu brabu pa i pudi ojal, suma ki tenba ku pasa la. 5Oca ku Jesus ciga na ki lugar, i jubi pa riba, i ojal, i falal: “Zakeu, ria dipresa, pabia aos N misti diskansa na bu kasa.”

6Zakeu ria dipresa, i risibil ku kontentamentu. 7Tudu ki jinti ku mati kumsa na rui, e na fala kuma Jesus bai gasija na kasa di un omi#Kap 5.30; 15.2; Mat 11.19; At 11.3 ku ta fasi pekadu. 8Zakeu lanta, i fala Siñor: “Jubi, Siñor, N na da pobris metadi di ña rikesa. Si kontra N ngana algin na kualker kusa, N sta pruntu pa tornal kuatru bias#Sai 22.1; 2 Sam 12.6 mas.”

9Jesus falal: “Aos salbason bin pa e kasa; e omi tambi i fiju di#Kap 13.16; Rom 4.11-12,16; Gal 3.7 Abraon. 10Fiju di omi bin buska#Kap 5.32; Rom 5.8 kil ku pirdi, pa salbal.”

Komparason di des mueda

(Mat 25.14-30)

11Oca ku jinti na sukuta e kusas, i kontinua i da elis utru komparason, pabia e na kudaba kuma renu di Deus na cigaba#At 1.6 na ki tempu, suma ku Jesus staba ja pertu di Jerusalen. 12I fala asin: “Un omi di bon familia bai#Mar 13.34 pa un tera lunju pa i bai fasidu rei, pa i riba. 13Antis di bai, i coma si des servu, i da kada kin un mueda di uru, i fala elis: ‘Bo bai nogosia tok N bin.’

14“Pobu di si tera ka gosta del, e kuji jinti, e manda elis si tras pa konta kuma e ka misti#Jon 1.11 pa ki omi rena riba delis, 15ma i fasidu rei, i riba. I manda coma ki servus ki ntregaba diñeru, pa i sibi kantu ku kada kin ngaña na nogos. 16Purmeru servu bin, i falal: ‘Siñor, N ngaña des mueda ku kil un ku bu dan.’ 17I falal: ‘Abo i bon servu, bu fasi ben. Suma bu sedu fiel#Kap 16.10 na kusa pikininu, bu na manda riba di des prasa.’

18“Sugundu servu bin, i falal: ‘Siñor, N ngaña sinku mueda ku ki un ku bu dan.’ 19I falal: ‘Abo tambi bu na manda riba di sinku prasa.’

20“Utru servu bin i falal: ‘Siñor, ali bu mueda ku N guarda na lensu, 21pabia N ten medu di bo, suma abo i omi di korson risu, bu ta toma kil ku bu ka pui, bu ta kebra kil ku bu ka sumia.’ 22Rei falal: ‘Abo i servu mau; N na julgau ku palabra#2 Sam 1.16; Jo 15.6; Mat 12.37 ku bu fala. Suma ku bu sibi kuma ami i omi di korson risu, N ta toma kil ku N ka pui, N ta kebra kil ku N ka sumia, 23pa ke ku bu ka pui ña diñeru na banku? Asin, manera ku N riba, N na risibilba ku juru.’

24“I rabida i fala kilis ku firmaba la: ‘Bo tomal ki mueda, bo da kil ku tene des.’ 25E falal: ‘Siñor, ma el i tene ja des mueda.’ 26I fala elis: ‘N na konta bos, tudu kil ku tene i na#Mat 13.12 buridu, ma kil ku ka tene, te kil ki tene i na tiradu el. 27Kil ña inimigus tambi ku ka mistiba pa N sedu se rei, bo tisi elis li, bo mata elis ña dianti.’ ”

Jesus yentra na Jerusalen

(Mat 21.1-11; Mar 11.1-11; Jon 12.12-19)

28Jesus kaba fala asin, i bai dianti na kamiñu pa Jerusalen. 29Oca ki ciga pertu di Betfajé ku Betânia, na kau ku comadu monti di Olivera, i manda dus di si disipulus, 30i fala elis: “Bo bai na tabanka ku sta bo dianti. Ora ku bo na yentra, bo na oja un burusiñu maradu ku ningin ka sinta riba del inda. Bo dismancal, bo tisi. 31Si algin punta bos ke ku manda bo na dismancal, bo ta falal asin: ‘I Siñor ku pirsisa del.’ ”

32Kilis ku mandadu e bai, e oja tudu suma ki fala elis. 33Oca ke na dismanca buru, si dunus punta elis: “Ke ku bo na dismanca buru pa el?” 34E ruspundi elis kuma i Siñor ku mistil. 35E lebal pa Jesus, e pui se ropa riba di buru, e pui Jesus sinta riba del. 36Suma ki na bai, e na distindi se ropa#2 Re 9.13 na kamiñu.

37Oca ki ciga pertu di riada di monti di Olivera, tudu ki multidon di disipulus kontenti, e kumsa na kanta risu, e na ngaba Deus pa tudu milagris ke oja, 38e na fala:

“Ki Rei#Kap 13.35 ku bin na nomi di Siñor i mersi ngabadu!

Pas#Kap 2.14 na seu; gloria na lugar mas altu na seu!”

39Utru fariseus na metadi di multidon e falal: “Mestre, manda bu disipulus pa e kala.” 40I ruspundi elis, i fala: “N na konta bos, si esis kala, pedras#Ab 2.11 propi na grita.”

Jesus cora pa Jerusalen

41Oca ku Jesus ciga pertu, i oja prasa, i cora#Jon 11.35 pa el, 42i fala: “Ai! Si bu sibiba, nin si i aos, ke ku pudi dau pas! Ma gosi i sta sukundidu na bu uju. 43Dias na bin ku bu inimigus na dau roda, e na tajau ku kusas, e na rokau na tudu ladu, 44e na durbau, ku bu fijus ku sta dentru di bu mura; e ka na disa nin un pedra#Kap 21.6,20; Mik 3.12 riba di utru na bo, pabia bu ka rapara tempu ku Deus#Kap 1.68 visitau.”

Jesus na kasa di Deus

(Mat 21.12-17; Mar 11.15-18; Jon 2.13-16)

45Jesus yentra na kasa di Deus, i kumsa na serka tudu kilis ku na fasi nogos; 46i fala elis: “I sta skritu kuma Deus fala: ‘Ña kasa i kasa di#Is 56.7; Jer 7.11 orason’, ma abos bo fasil kau ku ladron ta sukundi nel.”

47Kada dia i ta nsinaba na kasa di Deus. Ŝefis di saserdoti ku pursoris di lei ku ŝefis di pobu e na buskaba#Jon 7.19; 8.37 matal, 48ma e ka ojaba manera di fasil, pabia tudu pobu fikaba lungu del pa sukuta si palabra.

Currently Selected:

Lukas 19: povB

Highlight

Copy