Lukas 15

Karnel ku pirdi

(Mat 18.12-14)

1Kobraduris di mpustu#Mat 9.10; 1 Tim 1.15 ku utru jinti di mau nomi e ta baiba tudu pa obi ke ku Jesus na fala. 2Fariseus ku pursoris di lei e kumsa na papia entri elis, e na fala: “E omi ta risibi jinti di mau nomi, i ta kume#Kap 19.7; At 11.3 ku elis.” 3Jesus da elis un komparason, i fala:

4“Si un di bos tene sen karnel, si un son pirdi, i ten ku disa ki noventa i novi nunde ke na kume, i bai buska kil ku pirdi tok i ojal. 5Si i ojal, i ta pul riba di ombra ku kontentamentu. 6Si i ciga na kasa, i ta junta amigus ku visiñus, i fala elis: ‘Bo judan kontenti, pabia N oja ña karnel#1 Ped 2.25 ku pirdiba!’ 7N na konta bos kuma, asin ki ta ten alegria na seu pa un algin di mau nomi#Kap 5.32 ku ripindi, mas di ki pa noventa i novi jinti justu ku ka pirsisa di ripindi.

Mueda ku pirdi

8“O si un minjer tene des mueda di prata, i pirdi un son, i ten ku peganda kanderu, i bari kasa, i buskal na tudu ladu tok i ojal. 9Si i ojal, i ta junta si amigus ku si visiñus, i fala elis: ‘Bo judan kontenti pabia N oja ña mueda ku pirdi.’ 10N na konta bos kuma, asin ki ta ten alegria na metadi di anjus di Deus pa un algin di mau nomi ku ripindi.”

Fiju ku pirdi

11Jesus fala mas: “I tenba un omi ku teneba dus fiju. 12Ki mas nobu fala si pape: ‘Papa, dan ña parti di yardansa.’ I rapati elis dus tudu ki tene.

13“I pasa puku dias, ki fiju mas nobu i bindi tudu ki tene, i junta diñeru, i bai pa un tera lunju. La i kumsa na dana si diñeru na parodia. 14Oca ki kaba gastal tudu, i bin ten garandi fomi na ki tera. I kumsa na sinti falta. 15I bai buska tarbaju na mon di un omi di ki tera. Kila mandal na si ponta pa i bai bakia purku. 16I mistiba inci bariga ku figu brabu ku purku na kumeba, ma ningin ka ta dalba nada.

17“I kumsa na kuda; sintidu rabida ku el, i fala: ‘Kantu tarbajaduris di ña pape ku tene kusa di kume tok i pasa; ami li N na muri ku fomi! 18N na lanta, N bai pa ña pape, N falal: Papa, N peka kontra Deus, kontra bo tambi. 19Gosi N ka mersi pa bu coman bu fiju, ma fasin suma un di bu tarbajaduris.’ 20I lanta ki ora, i bai pa si pape. Oca i staba inda lunju, si pape ojal, i sinti garandi pena del, i kuri, i barsal, i dal beẑu. 21Fiju falal: ‘Papa, N peka#Kap 18.13; Sal 51.4 kontra Deus, kontra bo tambi. Gosi N ka mersi pa bu coman bu fiju.’ 22Pape fala si kriadus: ‘Bo tisi dipresa ki ropa#Is 61.10; Gal 3.27; Apok 19.8 mas minjor, bo bistil el; bo pul anel na dedu, bo kalsal sapatu. 23Bo tisi ki fiju di baka mas gurdu, bo matal, pa no kume, no kontenti, 24pabia e ña fiju staba#Ef 2.1; Apok 3.1 mortu, i torna bibu; i pirdiba, i ojadu.’ E kumsa ku#Is 35.10 kontentamentu.

25“Si fiju mas beju staba na matu. Oca ki bin tok i pertu kasa, i obi musika ku baju. 26I coma un kriadu, i puntal: ‘Es i ke?’ 27I falal: ‘Bu ermon bin; bu pape mata ki fiju di baka mas gurdu, pabia i risibil san i salbu.’ 28Ki fiju garandi paña raiba, i nega yentra. Si pape sai, i bai ngodal, 29ma i ruspundi i fala si pape: ‘N tarbaja#Mat 20.11-12 pa bo suma katibu manga di anu; nunka N ka nega bu ordi, ma nunka bu ka dan nin un kabritu pa N fasi festa ku ña amigus. 30Es bu fiju bin, ku dana tudu bu diñeru ku minjeris di mau vida; bu matal ki fiju di baka mas gurdu!’

31“Si pape falal: ‘Ña fiju, abo sempri bu sta ku mi. Tudu ña kusa i di bo; 32ma i bon pa no fasi festa, no kontenti, pabia bu ermon staba mortu, i torna bibu; i pirdiba, i ojadu.’ ”

Currently Selected:

Lukas 15: povB

Highlight

Copy