Lukas 13

Kaida di tori di Siloé

1Na ki mesmu tempu, i staba la utru jinti ku na kontaba Jesus di ki jinti di Galileia ku Pilatus jagasi se sangi ku sangi di limarias ke na roniaba ku el. 2Jesus ruspundi, i punta elis: “Bo kuda kuma ki jinti e pekaba mas di ki tudu jinti di Galileia, suma e sufri e kusas? 3N na fala bos nau; ma abos, si bo ka ripindi, abos tudu bo na muri na mesmu manera. 4O ki disoitu jinti ku tori di Siloé kai riba delis, i mata elis, bo kuda kuma e mas kulpadu di ki tudu jinti ku mora na Jerusalen? 5N na fala bos nau, ma si bo ka ripindi, abos tudu bo na muri na mesmu manera.”

Komparason di figera ku ka padi

6I da elis e komparason: “I ten un omi ku teneba un figera parantadu na si kintal. I bai buska#Is 5.1-2; Mat 21.19 fruta la, i ka oja nada. 7I fala si tarbajadur di kintal: ‘Jubi de! I fasi ja tris anu ku N ta bin buska fruta ne figera, N ka ta oja nada. Kortal. Pa ke ki sta li amonton?’ 8I ruspundi i falal: ‘Siñor, disal e anu inda tok N garbata roda del, pa N strumal. 9Si i bin padi, i sta bon. Si i ka padi, bu ta manda kortal.’ ”

Jesus kura un minjer na dia di diskansu

10Jesus na nsinaba na dia di diskansu na un kasa di juntamentu. 11I staba la un minjer ku tenba ja disoitu anu ku spiritu di duensa. I ta yandaba kurvadu; i ka pudiba distindi kurpu diritu. 12Oca ku Jesus ojal, i comal pa i bin, i falal: “Minjer, bu sta libri di bu duensa.” 13I pui mon riba del; na ki ora i ndirita, i ngaba Deus.

14Ŝef di kasa di juntamentu paña raiba suma ku Jesus kura na dia di#Kap 14.3; Sai 20.8-11; Mat 12.10 diskansu. I fala pobu: “I ten seis dia di tarbaju; bo pudi bin kura na ki dias, ma i ka na dia di diskansu.”

15Siñor ruspundi i falal: “Finjiduris! Nta kada un di bos ka ta dismanca si turu o si buru na dia di diskansu pa bai bibintil? 16E minjer gora, fiju di#Kap 19.9 Abraon, ku Satanas tene prezu disoitu anu, i ka dibi di largadu na dia di diskansu de kusa ku maral?” 17Oca ki fala asin, tudu kilis ku staba kontra e fika ku borgoña. Tudu pobu fika kontenti ku tudu kusas garandi ki fasi.

Komparason di mostarda ku di fermentu

(Mat 13.31-33; Mar 4.30-34)

18Jesus punta: “Ke ku renu di Deus parsi ku el? Ke ku N na parsintil ku el? 19I asin: Un omi toma garan di mostarda, i sumial na orta; planta kirsi tok i sedu pe garandi. Kacus fasi niñu na si ramu.”

20I torna punta: “Ke ku N na parsinti renu di Deus ku el? 21I parsi asin: Un minjer toma fermentu, i jagasil na tris midida di foriña, tok i orfa tudu.”

Porta pikininu

(Mat 7.13-14)

22Oca Jesus na baiba pa Jerusalen, i na panti na prasas ku tabankas, i na nsina jinti. 23Un algin puntal: “Siñor, kilis ku na salba i puku?”

I ruspundil: 24“Bo fasi forsa pa yentra na porta pikininu, pabia N na konta bos kuma, manga delis na bin buska yentra, e ka na pudi. 25Ora ku dunu di kasa lanta, i ntranka porta, bo na firma la fora, bo na kumsa konki#Is 55.6; Mat 25.10-12 porta, bo na fala: ‘Siñor, Siñor, yabrinu.’ El i ta ruspundi bos: ‘N ka sibi abos i di nunde.’ 26Bo ta kumsa na fala: ‘No kume, no bibi ku bo; bu ta nsinaba jinti na no ruas.’ 27El i ta ruspundi bos: ‘N konta bos, N ka sibi abos i di nunde. Bo lunjusi#Sal 6.8; Mat 7.21-23; 25.41; Titu 1.16 di mi, abos tudu ku ta fasi mal.’ 28Bo na cora la, bo na ñeme dinti, ora ku bo oja Abraon, Isak ku Jakó ku tudu anunsiaduris na renu di Deus, abos bo botadu fora. 29Jinti na bin#Mat 8.11 di saida ku kaida di sol, di norti ku sul, e na sinta na festa na renu di Deus. 30Na bardadi i ten kilis di kabantada#Mat 19.30 ku na sedu purmeru; utrus ki di purmeru e na sedu di kabantada.”

Jesus miskiña kusa di Jerusalen

(Mat 23.37-39)

31Na ki mesmu tempu utru fariseus ciga, e fala Jesus: “Sai li, bu bai utru kau, pabia Erodis misti matau.”

32I ruspundi i fala elis: “Bo bai konta ki raposa kuma, ali N na serka dimonius, N na kura jinti aos ku amaña. Na terseru dia N ta kabanta tarbaju. 33N ten ku yanda aos ku amaña ku ermon di amaña, pabia i ka bon pa un anunsiadur muri fora di Jerusalen.

34“Ai, Jerusalen, Jerusalen, ku ta mata anunsiaduris, bu ta da ku pedra kilis ku Deus mandau! Kantu bias ku N misti junta bu fijus suma ku galiña ta junta si pinton bas di si asa, ma bu ka seta! 35Jubi, bo na fikadu ku bo kasa#Kap 21.5-6; Sir 26.31-33; Mik 3.12 bandonadu. Na bardadi N na konta bos, bo ka na ojan mas te ki tempu ku bo na fala: ‘Kil ku bin na nomi#Kap 19.38; Sal 118.26 di Siñor i mersi ngabadu.’ ”

Currently Selected:

Lukas 13: povB

Highlight

Copy