Lukas 12

Avisu kontra finjimentu

1I junta un multidon di milyaris di jinti, tok e na masa ŋutru. Jesus kumsa na papia purmeru ku si disipulus, i fala elis: “Bo toma sintidu ku#Mat 16.6; 1 Kor 5.6-8 fermentu di fariseus, ku sedu finjimentu. 2I ka ten nada kubridu#Kap 8.17; Mat 10.26-27 ku ka na bin diskubridu, nin sukundidu ku ka na bin sibidu, 3pabia tudu ku bo papia na sukuru i na obidu na lus; kil ku bo fala na sigridu dentru di kasa i na kontadu riba di kasa pa tudu obi.

No ka dibi di medi omi

(Mat 10.28-31)

4“Ña amigus, N na fala bos: Ka bo ten medu#Is 8.12-13; 51.7,12-13; Jer 1.8 di kilis ku ta mata kurpu, dipus e ka pudi fasi mas nada. 5N na mostra bos kin ku bo dibi di medi. Bo medi Deus, kil ku, dipus di mata, i ten puder pa bota na nfernu. Sin, N na fala bos, i el ku bo dibi di medi. 6Nta sinku jamba ka ta bindidu pa bokadiñu di mueda? Ma Deus ka diskisi di nin un delis. 7Te kabelu di bo kabesa, Deus sibi se numeru. Asin ka bo medi, pabia bo mas bali di ki manga di kacu.

Seta o nega Kristu

(Mat 10.32-33; 12.32)

8“N na fala bos kuma, tudu algin ku konta dianti di jinti kuma el i di mi, tambi ami, Fiju di omi, N ta konta dianti di anjus di Deus kuma el i di mi, 9ma kin ku negan#Mar 8.38; 2 Tim 2.12; 1 Jon 2.23 dianti di jinti, i na negadu dianti di anjus di Deus.

10“Deus ta purda#Mar 3.28-30; 1 Jon 5.16 tudu kil ku fala un palabra kontra Fiju di omi, ma i ka na purda kil ku fala palabra mau kontra Spiritu Santu.

11“Ora ke leba bos pa kasas di juntamentu, o dianti di ŝefis ku otridadis, ka bo kuda#Kap 21.14-15; Mat 10.19-20 kuma ku bo na bai difindi, o ke ku bo na ruspundi, 12pabia Spiritu Santu na nsina bos na ki ora ke ku bo dibi di fala.”

Komparason di riku ku ka ten juisu

13Algin falal na metadi di multidon: “Mestre, fala ña ermon pa i rapati yardansa ku mi.” 14Jesus falal: “Omi, kin ku pun pa N sedu juis o rapatidur na bo metadi?” 15I fala pobu: “Bo toma sintidu, bo libra di tudu koldadi#Ef 5.3; 1 Tim 6.5-10; Eb 13.5 kubisa, pabia vida di algin i ka sta na manga di kusa ki tene.”

16I konta elis un storia, i fala: “Lugar di un omi riku i padi ciu. 17I na kuda gora na si kabesa, i punta: ‘Ke ku N na fasi? N ka tene nin un kau pa rukuji ña frutus.’ 18Dipus i fala: ‘N sibi ke ku N na fasi. N na kebra ña#Tia 4.13-16 bembas, N ta torna kumpu utrus mas garandi; la ku N na rukuji tudu ña arus ku utru kusas ku N labra.’ 19N ta fala ña kabesa: ‘Omi, bu tene manga di kusa guardadu pa manga di anu.#Dit 27.1; Is 22.13; 1 Kor 15.32 Diskansa, bu kume, bu bibi, bu divirti.’ 20Ma Deus falal: ‘Tulu, e di noti li#Jo 27.8; 1 Tes 5.3 bu ten ku ntrega bu vida. Kil ku bu purpara, pa kin#Sal 39.6; Ekl 2.18-19; Jer 17.11 ki na sedu?’ 21Asin ki ta sedu ku algin ku ta junta rikesa#Kap 12.33; Mat 6.19-20; 1 Tim 6.17-19; Tia 2.5; Apok 2.9 pa si kabesa, ma i ka riku dianti di Deus.”

Fiansa na Deus

(Mat 6.25-34)

22Dipus i fala si disipulus: “E ku manda N na konta bos: Ka bo fadiga#Fil 4.6 ku kusa di bo vida, pa kil ku bo na kume; nin pa kurpu, ke ku bo na bisti. 23Vida i mas bianda; kurpu i mas ropa. 24Bo jubi pa#Jo 38.41; Sal 147.9 korvus; e ka ta sumia, e ka ta kebra, e ka tene bemba nin armazen, ma Deus ta sustenta elis; abos, bo bali mas di ki kacus. 25Kal di bos ku pudi kuda tok i buri un palmu na si altura? 26Nta si bo ka pudi fasi e kusas pikininu, ke ku manda bo na fadiga pa ki utrus? 27Bo jubi flor, kuma ki ta kirsi; i ka ta tarbaja nin i ka ta tisi panu. N na konta bos kuma, nin Salomon propi, ku tudu si ronku, i ka bisti suma un delis. 28Si Deus ta bisti paja asin, ku sta na matu aos, amaña i na botadu na fugu, ku fadi abos, jinti di puku fe.

29“Asin, ka bo fadiga pa punta-punta ke ku bo na kume, o ke ku bo na bibi, 30pabia jinti di mundu e ta buska tudu e kusas. Bo Pape sibi kuma bo pirsisa delis. 31Bo buska renu di Deus, bo ta dadu tudu e kusas tambi.

Rikesa na seu

(Mat 6.19-21)

32“Ña karnelsiñus, ka bo medi, pabia bo Pape misti da bos renu. 33Bo bindi kil ku bo tene, bo da pobris. Bo ranja pa bos kartera ku ka ta beju, ku rikesa#Kap 12.21; At 2.45; 4.34-35; 20.35 na seu ku nunka ka ta kaba, nunde ku ladron ka ta ciga, nin bagabaga ka ta kumel, 34pabia, kau ku bo rikesa sta nel, la tambi ku bo korson ta sta.

Servus ku na bisia

(Mat 24.42-51)

35“Bo sta purparadu#Ef 6.14; 1 Ped 1.13 ku sintu maradu, ku lus#Mat 5.14-16; 25.1-13 na kanderu. 36Bo sedu suma omis ku na pera se patron ora ki na riba di festa di kasamenti, pa ora ki ciga, i bati, logu e pudi yabril porta. 37Sortiadu ki servus ku, ora ku se patron ciga, i oja elis e na bisia. Na bardadi N na fala bos kuma, i ta mara si sintu, i pui elis sinta na mesa, i ciga, i sirbi elis. 38Nin ki bin me-noti o na purmeru galu, si i oja ki servus e na bisia, e sortiadu. 39Bo obi e kusa: si dunu di kasa sibiba ora ku ladron#1 Tes 5.2; Apok 3.3; 16.15 na bin, i ta bisiaba, i ka ta disa pa i rombal kasa. 40Asin bo sta tambi pruntu, pabia Fiju#Kap 21.34-36 di omi na bin na ora ku bo ka pensa.”

41Pedru puntal: “Siñor, bu da e komparason son pa nos o pa tudu jinti?” 42Siñor falal: “Kin ki nkargadu#1 Kor 4.2 fiel i jiru ku si patron pui riba di si servus pa i da elis se kiñon di kumida na ora? 43Sortiadu i ki servu ku si patron, ora ki bin, i ojal i na fasi asin. 44Na bardadi N na fala bos, i na nkargal di tudu kusa ki tene. 45Ma si ki servu fala na si kabesa kuma si patron na tarda pa bin, i kumsa na suta servus macu ku femia, i na kume, i na bibi, i na cami, 46patron di ki servu na bin na un dia ki ka na peral, na un ora ki ka sibi, i na kastigal risu, i na juntal ku jinti ku ka sedu krenti.

47“Servu ku sibi vontadi di si patron, ma i ka pruntia, nin i ka fasi#Num 15.30; Lei 25.2; Jon 9.41; 15.22; At 17.30; Tia 4.17 suma ku si patron misti, i ta kastigadu ku manga di suti, 48ma kil ku ka sibi, i fasi kusa ku mersi#Sir 5.17; 1 Tim 1.13 kastigu, i ta dadu puku suti. Kil ku dadu ciu i ta pididu ciu; kil ku ntregadu ciu i na pididu mas ciu.

Jesus tisi divison

49“N bin bota fugu na tera. N misti son pa i sindi ja. 50N ten ku batisadu ku sertu batismu; N sta ku kasabi tok e kusa kontisi, i pasa. 51Bo kuda kuma N bin tisi#Mat 10.34-36; Jon 7.43; 9.16; 10.19 pas na tera? Nau, N bin tisi divison. 52Di gosi pa dianti, i na sta sinku jinti na un kasa; e na dividi tris kontra dus, dus kontra tris. 53E na sta divididu, pape#Mik 7.6 kontra fiju, fiju kontra pape, mame kontra fiju femia, fiju femia kontra mame, mame kontra minjer di si fiju, minjer di si fiju kontra el.”

Sinal di tempu

(Mat 16.2-3)

54I fala tambi multidon: “Ora ku bo oja nuven na subi di kaida di sol, bo ta fala logu: ‘Cuba na bin.’ I ta bin bin. 55Ora ku bentu na supra di sul, bo ta fala: ‘Kalur na ten.’ I ta ten. 56Finjiduris! Bo sibi rapara sinal di seu ku tera. Kuma ku bo ka sibi gora#Kap 19.42 rapara sinal de tempu?

57“Ke ku manda bo ka pudi rapara ke ki diritu ku bo kabesa propi? 58Ora ku bu na bai na otridadi#Mat 5.25 ku kil ku na keŝa di bo, buska ruma ki asuntu ku el na kamiñu, pa ka i bin lebau pa juis, juis ta ntregau na polisia, polisia ta botau na kalabus. 59N na falau kuma, bu ka ta sai la tementi bu ka kabanta paga tudu.”

Currently Selected:

Lukas 12: povB

Highlight

Copy