Luka 16
16
Tangtiis Gwiim Gǝ bishiit Bǝnbǝt
1Yesu ƭat tangtiis shi ke mǝgwiim ni ƙane, “Gǝme gǝtǝp di la ta ɗi, gǝ mǝ ƙǝ an mǝ ƙan gwiim gǝ naa pǝ bilong mǝǝp tong ƙǝ tas bi ni. 2Se gǝlu ni yong ni ba tal ɗii mǝǝp ƙan, ‘A bin ta gǝ a ƙyel nƙa ga ye e? Ga ran bi shak ga shin ƙin bilong na gǝ dibit e ga pe ke han, pǝ ga la a gǝ na pǝ bilong na yit ƙet.’
3“Se gǝ bishiit ni ƙwol ne ɗǝǝn en ni ƙan, ‘Dang a la shin a ɗang ta ye e? Gǝlu na la ɓaam bishiit na. Han ƙin ɓal gǝ ya shaan ƙet. Ƙa na waat pǝ teen. 4A man bi gǝ dang a la shin dang tehl lap han ba lu yun nƙong bishiit na shik ye ƙǝ ɗai.’
5“Se yong gwiim shak gǝ ƙǝ ƙin ƙǝel gǝlu ni e mene mene ba tal ɗii mǝep. Tal ɗii gǝ taƙa ni ƙan, ‘Ƙǝel gǝlu na a kong ta ƙa ga e?’
6“Se ƙan, ‘Tuu mǝii tiktirik poƙun.’
“Se ƙwol ƙin gǝ ƙǝel ni ƙan, ‘Ga lap biran ga, ga shang tong ga ran ɗǝɗet ga ƙan a tuu tiktirik fei.’
7“Se tal ɗii nƙwa gǝ vǝel ƙan, ‘Ƙǝel ni mak a kong?’
“Se piing ƙan, ‘Hǝa bi ǝm tiktirik ƙun.’
“Se ƙwol ƙin ni ƙan, ‘Ga lap biran ga, ga ran ga ƙan a ǝm tiktirik vǝel ƙin saii fei.’
8“Gǝlu ni yaa pǝ gǝ naa pǝ bi gǝ loot Naan ƙet ni, pǝ ƙǝ ɓoot bǝnbǝt. Ƙapǝ tehl shak gǝ ƙǝ a mǝ ƙayil e ɓoot bǝnbǝt dang sut. Gwiim shak gǝ ƙǝ mǝ luoot Naan e ɓoot bǝnbǝt ƙet.” 9A ƙwol ƙin gun, gu pe biƭal gun dang gǝ lapƙa mǝ pya dang gu ya shaai ning ƙin mǝep, pǝ gu ke myeep se Naan ƙin mǝleƙa ni mǝep mǝ la lap gun wa ƙatǝng pe gǝdang gu la twaat gǝ woop.
10Gwiim shik mǝ ƙǝ ɗem ƙin ni ƙa bi gǝ shollok e, se mǝ la ɗem tane ƙin ni ƙa bi gǝ ɓǝng. Gwiim shik ƙǝ loot Naan ƙet ƙa bi shollok e, se la loot Naan tane ƙet ƙa bi gǝ ɓǝng. 11Se mǝ ƙat ƙǝ ɗem ƙin ga ƙa tǝp ƙayil ƙet, se dang a gǝden la ɗem ta ƙin ga ƙa tǝp shik ƙǝ mǝ ƙatǝng e? 12Ndaan se, mǝ ƙat mǝ ɗem ƙin nga ƙa le shik ƙǝ a mǝ nƙwa gwiim e ƙet, se a gǝden dang pe ta bi ni nni shik ƙǝ a nmak e ga e?
13“Ƙweem mene ƙat la shin pai bishiit ke gǝlu vǝel ƙet, se tang la nyang gǝme dang ɗem gǝme ning, ƙet se tang la loot pǝ gǝme dang ɓak gǝme ning. Gu la shin bishiit ke Naan ƙin ke shaal pǝshak ƙet.”
14Farisi mǝ ƙyel bi shak Yesu ƙǝ ƙwol e, se mǝ mang ni gǝ vǝal pǝ mǝ ƙat a gwiim mǝ tang shaal. 15Se ƙwol ƙin mǝep ƙane, “A gun bigun ta gǝ niin ƙasuk a gwiim mǝ ɗemen pǝshiim tehl, se Naan man ta bini fɔlɔk gun. Bi gǝ tehl ƙǝ mang a gǝ ɗemen ta yit yun, se a bi gǝ Naan ƙǝ nyang ta ben.
Nƙwa Biƙam
16“Mǝ ƙwol shik ƙa paa Musa ƙin mǝ ƙwol ɗii Naan wa yu ƙa Yaya. Pe di ben e, se mǝ ɗi mǝ tong mǝ ƙwol shik gǝ ɗong ƙa long Naan, se gǝden ƙǝ ƙalak ƙin ƙashin dang tal yei zum ning kaa ɗǝǝn. 17La shin ɓǝs gǝdang ƙatǝng ƙin ƙayil ƙuk, ƙin gǝdang mǝ yir gǝme la bi ne til ɗǝn paa ni.
18“Gwiim shik ƙǝ shiin mat ni dang lap nƙwa ning e se mǝɦan a ƙaɗǝǝn lu, ndan se gwiim shik ƙǝ lap mat shik gǝ mǝ shiin e se mǝɦan tane ƙaɗǝǝn lu.”
Gǝ Tǝp Mǝep Ƙin Lazarus
19Se Yesu ƭat tangtiis shi ƙane, “Gǝme gǝtǝp di la ta, lep tuun gǝ pyen ɓal det, shem gǝshang ne byeen shik tet. 20Se mǝ ɓǝt gǝme gǝ teen gǝ sum a Lazarus pǝ lu mǝǝp. Nshik ɓet a nshiil det. 21Tong ƙǝ ɗaai dang tu ƙǝ se ƙop sai gǝtǝp ni ning. Gwon gǝ ass mǝep tong ƙǝ ba ɓelem nshiil mǝǝp.
22“Pe wa yu gǝ gǝteen ni ke muut, se mǝleƙa mǝep mǝ shel mǝyip mǝǝp mǝ wa ƙin ƙa ƙǝiƙǝlǝng Brayim. Se gǝtǝp ni muut ndaan mǝ mang mǝ wum. 23Ɗi taam wa ƙape mǝ myeep, taam ɗǝǝn wolla gǝ byeen. Se gǝtǝp ni tep yit ni na pe wa ƙatǝng, se tal Brayim ƙǝ ɗai ke yee ƙin Lazarus ƙa ƙǝiƙǝlǝng ni. 24Se yong pe ke dang mǝǝp ƙane, ‘Pǝn na Brayim, ga na shiin ƙa na. Ga paai Lazarus dang lep nla sai ni ɗǝn ham ba ƭok ƙa liis na dang zuum ning, pǝ han ɗi a swa wolla ne byeen ɗǝn us shi.’
25“Se Brayim piing ƙane, ‘Latoom, ga ƙak diƙa ga di ɗi meen se ga lap nmak bi gǝ ɗong ti ne ɓǝng, se Lazarus di lap min a bi gǝ bis. Taam ye se ɗi ƙǝ shem gǝshang ni, se ga taam ɗǝǝn wolla. 26Pǝ gǝ ne ƙet maat, se mǝ teet dǝbam tuun ti ƙakang mǝn ƙin gun. Gwiim mǝ ƙǝ tang dang mǝ yool ye mǝ kaa dang ga se mǝ la ɓoot ƙet. Gwiim la ɓoot gǝ yal kaa ben waaka dang mǝn ƙet.’
27“Gǝtǝp ni piing ƙane, ‘Ti ne, se a teen ga latoom, ga paai Lazarus shang lu pǝn na, 28pǝ a ɗi ƙin mǝmǝǝl paat. Se mǝɦan shang dǝl ƙom mǝep, pǝ mǝ ƙǝ la yim mǝ ba pee wolla shi ndaan ƙet.’
29“Se Brayim piing ƙane, ‘Mǝ ɗi ƙin Musa ƙin mǝ ƙwol ɗii Naan, se mǝ ƙyel ɗii mǝep.’
30“Se piing ƙane, ‘Ɓangɓa, latoom Brayim, ƙǝ a gǝ muut ƙǝ mǝɦan ta dang mǝep, se mǝ la ƙyel mǝ yir dang Naan.’
31“Se Brayim ƙwol ƙin ni ƙane, ‘Mǝ ƙǝ ƙyel Musa mǝep ƙin mǝ ƙwol ɗii Naan ƙet, se gwiim ƙǝ yaal a muut ta ba maat se mǝ la ɗem ƙet.’ ”
Currently Selected:
Luka 16: MTL
Highlight
Share
Copy
Want to have your highlights saved across all your devices? Sign up or sign in
©️2022 Luke Initiative for Scripture Translation
