Luka 21

Okoro owai se maran tolo Atitǝu Awo Ogomo Asharri

(Mat 12.41-44)

1Yeso ma nyiza apana ma ni ano morra nga ya nyiza tulowa tonye ara ugwarǝ tolo tome. 2Nze ma ni oye okoro owai se onorromome ma wi se mazeman eyabo ne, ma ra ma we tolo to tunini tu repo. 3Nze Yeso go, “Deke ne enbizi nyi, tolo togome se owai tuyan ma rrai ma we, okira owo dangara ano zal. 4Baka se zal okonye nga na ngo na ayimi epegeme se nga zen no ze, ama me ayimi odera okome oze mana wiya zal in ru egemese ma zen no ouchakǝnǝ ome.”

Yeso ma buku beleng a tara opora Atitǝu Awo Ogomo Asharri

(Mat 24.1-2; Mar 13.1-2)

5An ngai ma be beleng a tara oreze Atitǝu Awo Ogomo Asharri, neng isana azuwa a rezeze se ama siya nan no, neng tolo togome se ano ma rasan no o Ogomo Asharri. Nze Yeso go, 6“Togogorro tugina se nyi ya nǝrǝ me, to, ocha ya ra se azema deke yeye rrezuwa a tara yeye ne, koya rrezuwa a ya tipi mi.”

Yeso ma bi beleng a tara ukankarro

(Mat 24.3-14; Mar 13.3-13)

7Nze nga sangarra me nga go, “Achakura, epegina se ngo na bi inciyu zi esa wonko? A yaze woro neng nǝri irru se togogorro tugina tunan wonko?”

8Nze ma gon nye “Wankǝli ni, tego woi wurrusi nyi ni. Baka se ano ya ra chebete ayimi rrijarron, nga ya gusa, ai, nga ze Yeso, nga gusa, ‘Ocha na denye.’ Tego e tarse nye ne. 9Tego nyi kuna beye ne, in ge ekuna olabare owo okara, neng o nyiza biruwa. Se epegina me na bura ra, ama bimaso bidawa rai ne.”

10Ma wucu a ji neng ugusa, “In nyanga maya wuza okara neng maye in anyanga, togomo tuya wuza okara neng togomo. 11A ya wuza uzukun nyanga uburu neng ekomo neng tokwene to buru atura keken keken. A ya ni togogorro to nyiza beye neng emo damara asuru Asharri.

12“Sakama tukwakwa tugina tu wonko nga ya meshe akanyi, nga nya nyi ekuna kwaye. A ya ngamen nyi togura to beroromo, a gwinta nyi beleng, a kuru a ngame e nyi akura e nyan, a ya kuru a ngamen nyi a ogomo neng ana sasaru baka rrejarrome. 13Emegena ze a nya ka nyi owarri obi belen be lo a tara akan. 14Baka nane ze goro erowa ekinyi sasa, tego ewuza adodonzo a tara nane se nyi nan kasa topana tonyi. 15Baka ya nya ka nyi beleng neng rremo, nane se ko ono vento ayima ano binyarna nan nyi, maze ma bare ma balama beleng beme, koma we mantarra ne ma nya me ne eme geme se nyi na buku ni. 16Ashowa nyi, neng ano wanama ka nyi neng yekura rronyi neng awantano akanyi nga ya nya kǝ nyi. Nga ya wuna a wuza an ngai oko nyi. 17Kavi ya nya me ne akǝnyi baka rrejarron. 18Ama korrete rrevento yezema worro ayimi topana tonyi ni. 19In ge matana eya ngona rroma.

20“Ocha ogomme se nyi ni tosoja tuna rrimmi Urshalima, a nyi ru guna ana ngona voto awirto a me. 21To, ana geme se nga ya yimi Yahudiya, a nga some a ngame atura tukantaran. Ana geme se nga ze ayima ape a nga suru, ana geme se nga za ogweri tego nga pete ayima ape ne. 22Baka tumuru tugina to matun toze, baka binja eme geme se ama darsa a beleng bo Ogomo Asharri se ba go. 23A ya kuna ogwengwene owa awai tupuru neng ana geme se abiya nye ya cunju! Baka matun maburu maya pete an nyanga me, osharra puru owa Ogomo Asharri oya tonu a tara ana gemme. 24A ya wuzang ngai atiyo okara, amishan ngai a ngamen nye aye ebouta amayen nyanga. Ano ageme se nye dan tuYahudi toze ne, nga ya kai a Urshalima nan atau aka nye, se ocha oko nyi na binja.

Okuru ra Vana Ono

(Mat 24.29-31; Mar 13.24-27)

25“A ya ni to gogorro to nyiza biye a tara odara neng ubǝrmǝ neng ewerewere. A masano ano ya ngona bo baka be yebo otoso neng ugurmu manyi mo orawa. 26Ano ya bamozo baka beye nga kuri nga kerkene, neng unǝrǝ to gogorro se to ya wonkozo a masano. Baka nane ze aye zuku to gogorro to ya Asharri. 27Ocho gina ze a ya ni Vano ono ara ayimi tuwero neng a gata neng togomo tome. 28Ocha ogome se epegina eme owonko, egoro topana tonyi baka obuza ku nyi o na ngona voto.”

Yemasanga a tara otiti okwafu

(Mat 24.32-35; Mar 13.28-31)

29Nze Yeso nya nye oye unǝrǝ ma go, “Nǝrǝ ni otiti okwafu neng odangara titi niga. 30Inga tubura utirri nyin topana tonyi, nyi ru guna rrekoze yina ngona voto. 31Nane ze enge nǝrǝ emegena ya wonkozo, in ru guna togomo ta Ogomo Asharri tuna ra voto.

32“Ya bezeze ka nyi magangan, ano masano magina nga ze wǝnǝ ni, se emegena zal na wonko. 33Asharri neng masano maya maso, ama beleng nga bon bema maso ne.

Wǝnkǝlini e chǝkǝnǝ a ogorro

34“Chǝkǝnǝ ni neng ogorropa! Tego e deke tuwucuzu neng ebammu, neng wuna beruwa ama lo ma masano ma yete adodonzo akanyi ni. Inga dan neng nane ne, odara meya denye neng o dururu ni, odarra omurke nyi, 35sakama otarko. Baka dargemme a tara kavi se maya chǝkǝnǝ a masano zal. 36Chǝkǝnǝ ni agorro, eya beroromo koyo odara doguna emurra oweri ochomporo atogogorro tugina se tuya wonko, ekuri eture a ji Vana Ono.”

37Koyo odara, Yeso ya ye masenga Atitǝu Awo Ogomo Asharri, in go wǝrru we nze ma suri ma ngame Owo Titi tuZaitun ama muri agemme. 38In usunzu pimpim ano zal nga rasa Atitǝu Awo Ogomo Asharri a nga rakara me.

Currently Selected:

Luka 21: JER

Highlight

Copy