Matteiu 14
14
CAP. XIV.
1In quellu tempu Erode lu tetrarca intese parlà di la riputazione di Ghiesù:
2E disse a li so’ servitori: Quessu è Ghiuvanni Battista: è risuscitatu da li morti, ed è perciò, ch’ ellu face di li miraculi.
3Erode avia fattu piglià a Ghiuvanni, e l’ avia ligatu e postu in prighiò per causa di Erodiade moglie di lu so fratellu.
4Ghiuvanni li dicia: Nun t’ è permessu di tena ad ella.
5E vulendu fallu mora, avia paura di lu populu: perchè u tinianu per un prufeta.
6Ma lu ghiornu di la nascita d’ Erode la figliola di Erodiade ballò in mezu a tutti, e piacì ad Erode.
7Allora ellu li prumisse cun ghiuramentu di dalli ciò, ch’ ella li dumandaria.
8Ma ella, ch’ era stata struita da la so mamma: Dammi, li rispose, in un bacile lu capu di Ghiuvanni Battista.
9E lu re ne fu tuttu afflittu: ma per via di lu so ghiuramentu, e per via di quelli, ch’ eranu culà, dede ordine di dallilu.
10E mandò a taglià lu capu a Ghiuvanni in la so prighiò.
11E lu so capu fu purtatu in un bacile, e datu a la zitella, che l’ ufferì a la so mamma.
12E li so’ discipuli essendusi avvicinati, si piglionu lu so corpu, e lu suppellinu: e vinendu ne dedinu la nutizia a Ghiesù.
13Ciò che sintendu Ghiesù, si n’ andò sopra d’ una barca, in un locu desertu e separatu: e quandu la ghiente lu seppe, partinu a pedi da la città per seguitallu.
14E surtendu vidde una gran quantità di ghiente, ed ebbe cumpassione d’ elli, e guarì li loru infermi.
15Ma essendu ghiunta la sera, s’ avvicinonu li so’ discipuli, dicendu: Stu locu è desertu, ed è tardi: licenzia sta ghiente, perch’ ella possa andandusine per li paesi cumprassi di che magnà.
16Ma Ghiesù li disse: Nun è necessariu, ch’ elli si ne vadinu: datili di che magnà.
17Li risposinu: Nun avemu che cinque pani, e dui pesci.
18Ellu li disse: Purtatimili qui.
19Ed avendu urdinatu a la ghiente di mettasi a pusà su l’ erba, prese li cinque pani, e li dui pesci, e guardandu lu celu li benedì, e li spezzò, e li dede a li so’ discipuli, e li discipuli li dedinu a la ghiente.
20E tutti magnonu, e funu saziati. E di li resti, si ne purtonu dodici cufini pieni.
21Quelli, che magnonu eranu in numeru di cinquemila omi, senza cuntà le donne, e li zitelli.
22E subitu Ghiesù ubbligò li so’ discipuli a muntà sopra ad una barca, ed andà ad aspettallu sopra l’ altra riva, intantu ch’ ellu licenziasse la ghiente.
23Ed avendu licenziatu la ghiente, si ne cullò sopra di un monte solu per pregà. E la sera essendu ghiunta era solu in quellu locu.
24In stu frattempu la barca in mezu mare era sbattuta da l’ onde: perchè lu ventu era cuntrariu.
25Ma quandu venne la quarta veglia di la notte, Ghiesù andò a truvalli marchiandu sopra lu mare.
26E videndulu marchià sopra lu mare, si cunturbonu, dicendu: Quessu è un spiritu. E per paura si missinu a gridà.
27Ma subitu Ghiesù li parlò, dicendu: Abbiate fiducia: so’ eiu, nun timete nulla.
28Allora Petru rispundendu disse: Signore, se tu se’ tu, ordinami di vena versu di te sopra l’ acqua.
29Ed ellu disse: Veni. E Petru scindendu di la barca, marchiava sopra l’ acqua per vena versu Ghiesù.
30Ma videndu, che lu ventu era forte, ebbe paura: e come ella cuminciò ad andà a fondu, gridò dicendu: Signore, salvami.
31E subitu Ghiesù stindendu la manu, l’ agguantò: e li disse: Omu di poca fede, per cosa hai dubbitatu?
32E come elli funu cullati in la barca, lu ventu cessò.
33Quelli poi, ch’ eranu in la barca, vensinu, e l’ aduronu, dicendu: Sei veramente lu Figliolu di Diu.
34Ed essendu passati al di là di lu lagu, andonu in la terra di Ghienesar.
35E quandu l’ omi di quellu locu l’ ebbinu cunusciutu, mandonu da per tuttu in lu paese, e li presentonu tutti quelli, che avianu male:
36E u pregavanu di lascialli tuccà la falda di lu so vistitu. E tutti quelli, che la tucconu, guarinu.
Currently Selected:
Matteiu 14: CORS1861
Highlight
Share
Copy
Want to have your highlights saved across all your devices? Sign up or sign in
Published in London in 1861.
