Matteiu 12
12
CAP. XII.
1In quellu tempu Ghiesù passò un ghiornu di sabatu per un chiosu pienu di granu: e li so’ discipuli, che avianu fame, cumincionu a strappà di le spiche, ed a magnanne.
2Ciò che videndu li Farisei, li dissinu: Eccu li to’ discipuli fannu ciò, che nun è permessu di fà lu sabatu.
3Ma ellu li rispose: Nun avete lettu ciò, che fece Davidde, quandu ellu ebbe fame, e quelli, che eranu cun ellu:
4Comu ellu intrò in la casa di Diu, e magnò li pani di la proposizione, ciò che nun era permessu nè ad ellu, nè a quelli, che eranu cun ellu, ma sulamente a li sacerdoti?
5O nun avete lettu in la legghie, che li sacerdoti rompunu lu sabatu in lu tempiu, e per quessu nun fannu delittu?
6Ma eiu vi dicu, che qui c’ è unu più magghiò che lu tempiu.
7Ma se voi sapessite cosa vo dì: Amo la misericordia, e non lu sagrifiziu: nun auriste mai cundannatu l’ innucenti:
8Perchè lu Figliolu di l’ omu è patrone anche di lu sabatu.
9Ed essendusine partitu da culà, andò in la loru sinagoga.
10Ed eccu che si presenta un omu avendu una manu secca, ed elli l’ interrugavanu, dicendu: È mica permessu di guarì lu sabatu? e lu facianu per putellu accusà.
11Ma ellu li rispose: Qual è l’ omu tra voi altri, che avendu una pecura, se sta pecura casca in una fossa in un ghiornu di sabatu, nun la pigli, e la cacci fora?
12Di quant’ è migliore un omu d’ una pecura? Dunque è permessu di fà bè lu sabatu.
13Allora disse a l’ omu: Stendi la to manu. Ed ellu la stese, e turnò sana come l’ altra.
14Ma li Farisei surtendu, si cunsigliavanu contra ellu, per sapè come fà per perdalu.
15E Ghiesù sapendulu, si n’ andò da culà: e molti lu seguitonu, e li guarì tutti:
16E li raccumandò di nun fallu sapè.
17Affinchè fusse adempiutu ciò, ch’ è dettu da lu prufeta Isaia, dicendu:
18Eccu lu me servu, che agghiu sceltu, u me caru, in lu quale si cumpiace l’ anima mia. Ponaragghiu u me spiritu sopra ad ellu, ed ellu annunziarà a ghiustizia a le nazioni.
19Nun litigarà, nun gridarà, e nissunu sintirà la so voce su le piazze:
20Nun rumparà la canna dighià rotta, nun smuccarà u stuppinu fumante, fintantu che nun dia vittoria a la ghiustizia:
21E le ghienti sperarannu in lu so nome.
22Allora li presentonu unu, che avia in corpu lu dimoniu, ch’ era cecu e mutu, e lu guarì di modu, che vidia, e parlava.
23E si stupianu tutte le ghienti, e dicianu: Nun è quessu lu figliolu di Davidde?
24Ma li Farisei sintendu quessu, dissinu: Questu nun scaccia li dimonii, che per mezzu di Belzebù principe di li dimonii.
25Ma Ghiesù sapendu ciò, ch’ elli pensavanu, li disse: Ogni regnu, ch’ è divisu in partiti, si n’ andarà in ruina: ed ogni città, od ogni casa divisa tra di sè, nun po sussista.
26E se satanassu scaccia a satanassu, si trova allora in guerra cun sè stessu: ed allora come putirà sussista lu so regnu?
27E se eiu scacciu li dimonii per mezu di Belzebù, per qual mezu li scaccianu li vostri figlioli? E perciò elli stessi sarannu li vostri ghiudici.
28Se in cuntrariu eiu scacciu li dimonii per mezu di lu spiritu di Diu, vo dì, ch’ è ghiuntu a mezu a voi lu regnu di Diu.
29Ma come putirà mai unu intrà in la casa d’ un omu di stomacu, e rubballi la so ropa, se prima nun l’ ha ligatu? Allora putirà metta a saccu a so casa.
30Quellu, che nun è cun me, è contra di me: e quellu, che nun raccoglie cun me, dissipeghia.
31Perciò vi dicu: Ogni peccatu, e ghiastema sarà perdunata a l’ omi: ma la ghiastema contra lu Spiritu santu nun sarà perdunata.
32Ed a quellu, che aurà dettu parola contra u Figliolu di l’ omu, li sarà perdunata: ma quellu, che aurà sparlatu contra lu Spiritu santu, nun li sarà perdunatu nè in questu mondu, nè in l’ altru.
33O dite, che l’ alberu è bonu, e lu so fruttu è bonu: o dite, che l’ alberu è cattivu, e lu so fruttu è cattivu: perchè l’ alberu si cunosce a lu so fruttu.
34Razza di vipare, come putete voi parlà bè, quandu sete maligni? La bocca nun parla, che secondu lu core.
35L’ omu bonu ricaccia di lu bè da lu tesoru bonu: e l’ omu cattivu ricaccia lu male da lu tesoru cattivu.
36Vi dicu in verità: L’ omi, che aurannu parlatu parole oziose sarannu ubbligati di rendane contu in lu ghiornu di lu ghiudiziu.
37Ed in fatti sarè ghiustificatu per le to’ parole, e sarè cundannatu per le to’ parole.
38Allora li risposinu alcuni di li Scribi e di li Farisei, dicendu: Maestru, vurriamu da te veda qualche miraculu.
39Ed ellu rispundendu li disse: La ghienerazione cattiva, e adultera dumanda lu miraculu: e nun li si farà miraculu, se non quellu di lu prufeta Ghiona.
40Siccome Ghiona ristò in lu ventre di la balena tre ghiorni, e tre notti, cusì lu Figliolu di l’ omu ristarà tre ghiorni, e tre notti in lu senu di la terra.
41L’ omi di Niniva s’ arrizzarannu in lu ghiornu di lu ghiudiziu contra sta ghienerazione, e la cundannarannu: perchè elli fecinu penitenza, quandu predicò Ghiona. Ed eccu c’ è qui unu, che è più che Ghiona.
42La reghina di lu mezughiornu s’ arrizzarà contra sta ghienerazione in lu ghiornu di lu ghiudiziu, e la cundannarà: perchè ella ghiunse da li cunfini di la terra per senta la sapienza di Salumone, ed eccu c’ è qui unu, ch’ è più che Salumone.
43Quandu lu spiritu impuru è surtitu da lu corpu d’ un omu, percorre li lochi deserti, circandu lu riposu, e nun lu trova.
44Allora dice: Turnaragghiu in la me casa, da duve so’ surtitu. Ed arrivandu la trova biota, spazzata di scope, e urnata.
45Allora va, e si piglia sette altri spiriti più maligni d’ ellu, ed intrandu in quellu omu ci stannu, e l’ ultimu statu di quell’ omu è assai pegghiu di lu primu. Succedarà cusì a sta pessima ghienerazione.
46Mentre ch’ ellu parlava cusì a la ghiente, eccu la so mamma, e li so’ fratelli, che stavanu fora, che dumandavanu a parlà cun essu.
47Allora unu li disse: C’ è la to mamma, e li to’ fratelli fora, che ti cercanu.
48Ed ellu rispose a quellu, che li parlava: Qual è la me mamma, e qual so’ li me’ fratelli?
49E stindendu la so manu versu li so’ discipuli, disse: Eccu la me mamma, e li me’ fratelli.
50Perchè quellu, che farà la vuluntà di lu me Babbu, ch’ è in li celi: quellu è lu me fratellu, la me sorella, la me mamma.
Currently Selected:
Matteiu 12: CORS1861
Highlight
Share
Copy
Want to have your highlights saved across all your devices? Sign up or sign in
Published in London in 1861.
