Yohane 16

Ɔtaa ne mogya adansedi ho nkɔmhyɛ

1 # Yoh 14.29 Eyinom na maka makyerɛ mo na moanhintiw. 2#Mat 24.9 Wobetu mo afi hyiadan mu; mpo ɛbere reba a obiara a obekum mo besusuw sɛ ɔde resom Nyankopɔn. 3#Yoh 15.21 Na wɔbɛyɛ eyinom, efisɛ wonhuu Agya no ne me ɛ. 4Na maka eyinom makyerɛ mo, na sɛ bere no du a, moakae sɛ maka makyerɛ mo. Na manka mo eyinom mamfi mfiase, efisɛ me ne mo wɔ hɔ. 5#Yoh 7.33 Na afei de, merekɔ nea ɔsomaa me no nkyɛn, na mo mu biara mmisa me sɛ: Ɛhe na worekɔ? 6Na sɛ maka eyinom makyerɛ mo nti, awerɛhow ahyɛ mo koma ma.

Honhom Kronkron ba

7 # Yoh 14.16; 14.26 Na meka mo nokware, eye ma mo sɛ mekɔ. Na sɛ mankɔ a, Okyigyinafo no remma mo nkyɛn; na sɛ mekɔ a, mɛsoma no aba mo nkyɛn. 8#1 Ko 14.24 Na ɔno de, sɛ ɔba a, obeyi wiase ntɛn bɔne ne trenee ne atemmu ho! 9#Yoh 3.18 Bɔne ho, efisɛ wonnye me nni; 10#Aso 5.31; Rom 4.25 ne trenee ho, efisɛ merekɔ Agya no nkyɛn, na munhu me bio; 11#Yoh 12.31; 14.30 ne atemmu ho, efisɛ wɔabu wiase sodifo no atɛn.

Nokware

12 # 1 Ko 3.1 Mewɔ nsɛm pii bio meka mekyerɛ mo, nanso muntumi nsoa mprempren. 13#Yoh 14.26; 1 Yoh 2.27 Na sɛ ɔno, nokware Honhom no nya ba a, ɔbɛkyerɛ mo kwan akɔ nokware no nyinaa mu. Na emfi n’ankasa mu na ɔbɛkasa, na biribiara a ɔbɛte no, ɔbɛka, na ɔbɛkyerɛ mo nneɛma a ɛreba. 14Ɔno na ɔbɛhyɛ me anuonyam; efisɛ ɔbɛfa me de bi na ɔde abɛkyerɛ mo. 15#Yoh 17.10 Nneɛma a m’Agya wɔ nyinaa yɛ me dea; eyi nti na mekae sɛ: Ɔbɛfa me de bi na ɔde abɛkyerɛ mo.

Daa anigye

16 # Yoh 14.19 Aka kakraa na munhu me; na bio aka kakraa mubehu me. 17Ɛnna n’asuafo no mu binom kekae wɔn mu sɛ: Dɛn na ose yɛn sɛ: Aka kakraa na munhu me, na bio aka kakraa mubehu me, ɛne sɛ: Merekɔ Agya no nkyɛn yi? 18Ɛnna wose: Dɛn ne nea ɔka yi sɛ: Aka kakraa? Yenhu nea ɔka yi. 19Ɛnna Yesu hui sɛ wɔpɛ abisa no, na osee wɔn sɛ: Eyi ho na mubisabisa wɔ mo mu, sɛ mekae sɛ: Aka kakraa na munhu me, na bio aka kakraa mubehu me. 20Mereka akyerɛ mo nokware mu pa ara sɛ: Mubesu na moatwa adwo, na wiasefo ani begye; na mo de, mo werɛ bɛhow; nanso mo awerɛhow no bɛdan anigye. 21#Yes 26.17 Ɔbea, sɛ ɔrewo a, ɔte yaw, efisɛ ne dɔn adu; na sɛ onya wo ɔba no a, ɔnkae ahohia no bio, anigye a wanya sɛ wawo onipa aba wiase no nti. 22Na mo nso, afei de, mowɔ awerɛhow; na mehu mo bio, na mo koma bɛtɔ mo yam, na mo anigye no, obi rennye mo nsam. 23#Yoh 14.20; 14.13-14 Na da no moremmisa me biribiara.

Kristo din mu adesrɛ

Mereka akyerɛ mo nokware mu pa ara sɛ: Biribiara a mobɛsrɛ Agya no me din mu no, ɔde bɛma mo.

24 # Yoh 15.11 Ɛde bedu sesɛɛ de, monsrɛɛ biribi me din mu ɛ; monsrɛ, na mubenya, na mo anigye awie pɛyɛ. 25Eyinom na maka mo mmebu mu; na bere no reba a merenkasa menkyerɛ mo mmebu mu bio, na mɛka Agya no ho asɛm makyerɛ mo pefee. 26Da no na mobɛsrɛ me din mu, na menka menkyerɛ mo sɛ mebisa Agya no mama mo; 27#Yoh 14.21 na Agya no ankasa dɔ mo, efisɛ modɔ me, na moagye adi sɛ mifi Nyankopɔn nkyɛn na mebae. 28Mifii Agya no nkyɛn na mebaa wiase; na bio, merefi wiase na makɔ Agya no nkyɛn.

29 # Yoh 16.25 N’asuafo no see no sɛ: Hwɛ, afei de, wokasa pefee, na wummu bɛ biara. 30Afei yɛahu sɛ wunim nneɛma nyinaa, na enhia wo sɛ obi bisa wo; eyi mu na yegye di sɛ wufii Nyankopɔn nkyɛn na ɛbae. 31Yesu bisaa wɔn sɛ: Afei de, mugye di anaa? 32#Sak 13.7; Mat 26.31; Mar 14.27; Yoh 8.29 Hwɛ, dɔn no reba, na anya adu sɛ mo nyinaa bɛhwete akɔ mo nkurow mu, na moagyaw me nko; nanso ɛnkaa me nko ɛ, efisɛ Agya no ka me ho. 33#Yoh 14.27; Rom 5.1; 1 Yoh 5.4 Eyinom na maka mo, na moanya me mu asomdwoe. Mo ho behia mo wiase de, nanso momma mo bo ntɔ mo yam! Me na madi wiase so nkonim.

Currently Selected:

Yohane 16: RATB

Highlight

Copy