Rom 5

Ki savedir lape avek Bondie

1Asterla ki nou finn zistifie par lafwa, nou ena lape avek Bondie atraver nou Segner Zezi Kris. 2Akoz nou ena lafwa dan Lekris, li finn fer nou gagn akse lagras Bondie, e nou viv dan lexperyans sa lagras la. Nou met nou fierte dan lesperans ki nou partaz laglwar Bondie. 3Pa selma sa, nou met nou fierte dan nou soufrans, parski nou kone ki lasoufrans li amenn perseverans, 4perseverans fer gagn fidelite solid, e fidelite solid donn lesperans. 5Sa lesperans la li pa desevwar nou, parski Bondie finn repann so lamour dan nou leker par Lespri Sin ki li finn donn nou.

6Letan nou ti ankor feb, Lekris ti mor pou bann peser dan letan ki ti finn fixe. 7Li difisil pou kikenn donn so lavi pou enn lot ki viv drwat. Kikfwa enn par la kapav oze mor pou enn dimoun bien. 8Me ala kimanier Bondie prouve ki kantite lamour li ena pou nou: letan nou ti ankor peser, Lekris finn mor pou nou.

9Aster ki nou zistifie par so disan, ena plis rezon ankor pouki li sap nou devan lakoler Bondie. 10Nou ti bann ennmi Bondie, me nou finn rekonsilie ar li par lamor so Garson; aster ki nou rekonsilie ar li, ena plis rezon ki nou pou sove par lavi so Garson. 11Ek ena plis ankor: nou met nou fierte dan Bondie par nou Segner Zezi Kris, par ki, aster, nou finn rekonsilie ar Bondie.

Adam e Lekris

12Par enn zom pese finn vinn dan lemonn, e lamor finn rantre par pese, e lamor finn tous tou dimoun, parski tou finn fer pese. 13Ti ena pese dan lemonn avan ki ti donn Lalwa; me parski pa ti ena Lalwa, pese pa ti konte. 14Pourtan depi lepok Adam ziska lepok Moiz lamor finn manifeste so pouvwar, mem lor bann dimoun ki pa finn komet pese kouma Adam ti fer; Adam ti enn model Sa-Enn ki ti pou vinn apre li la.

15Me nou pa kapav konpar sa de la; parski don gratwi Bondie pa parey kouma fot ki Adam finn fer. Enn kantite finn mor akoz fot sa enn dimoun la; panse aster ki kantite dimoun finn touse par don gratwi ki Bondie finn done par lagras enn sel dimoun, Zezi Kris. 16Manier ki Bondie donn so don li pa parey kouma rezilta pese ki enn sel zom finn komet. Zizman ki ti swiv sa enn pese la, ti amenn kondanasion; me don gratwi ki ti swiv boukou pese ti amenn zistifikasion. 17Lamor finn manifeste so pouvwar par fot enn sel dimoun; mazine aster konbien plis bann ki resevwar lagras Bondie dan labondans, ansam ar don lazistis, konbien plis zot pou regne dan lavi akoz enn sel dimoun: Zezi Kris.

18Alor, parey kouma fot enn sel finn amenn kondanasion tou dimoun, dan mem manier aksion zis enn sel dimoun, Zezi Kris, sap tou dimoun depi zizman, rann zot lib pou viv. 19Par dezobeisans enn sel, boukou dimoun finn tom dan pese, dan mem manier, par lobeisans enn sel, boukou dimoun revinn zis devan Bondie.

20Ler Lalwa finn vini, bann pese finn ogmante. Me la kot pese ti ogmante, lagras dan so abondans ti ogmant ankor plis. 21Parey kouma pese ti regne dan lamor, dan mem manier lagras regne par lazistis pou amenn lavi eternel atraver Zezi Kris, nou Segner.

Currently Selected:

Rom 5: NTKM2009

Highlight

Copy